Djoshuwa
16 Nyika yakapaswa* ana a Zuzee peciseenzeswa mudjenya yaitangira ku Djorodhani dhuze no Djeriko, dakara ku mvura nge ku dii re kumabvazuwa ke Djeriko, uye yaipinda nge ku renje yecikwidza ku Djeriko uye yaienda dakara ku mutanha we matunhu we Bheteri. 2 Kubva ku Bheteri iri ku Ruzi, yaienderera mberi dakara ku mugano we nharaunda yo Aareki ku Ataroti, 3 pedzepo yoenda ku dii ro kumadokero ku mugano we mutanha we Ajaferiti dakara ku mugano we Bheti-oroni ye Kumuterero no Jezeri, uye yaiperera mu bahari.
4 Ngokudaro, dzinza ra Manase uye dzinza ra Efraimu, awo ainga ari ana a Zuzee, akatora nyika dzawo. 5 Uu ndiwo wainga uri mugano we nharaunda ye ana a Efraimu, maererano no mhuri dzawo: Mugano we kumabvazuwa we nhaka yawo waibva ku Ataroti-adhari dakara ku Bheti-oroni ye Kumakwirira, 6 uye mugano uwona waienda dakara ku bahari. Mikimetati yainga iri kakutsi; uye mugano waienda kumabvazuwa dakara ku Taanati-siro, uye waienda ku dii re kumabvazuwa dakara ku Janoa. 7 Hino yaieterera ku Janoa yecienda ku Ataroti uye Naara, yaiguma ku Djeriko uye yaienderera dakara ku Djorodhani. 8 Kubva ku Tapuwa, mugano uwona waienderera mberi wecienda kumadokero ke Murambo* we Kanani, uye waiperera mu bahari. Ii ndiyo nhaka ye dzinza ra Efraimu, maererano no mhuri dzawo; 9 ana a Efraimu aingawo no mathaundi aakapaswa pakati pe nhaka ya Manase pamwepo no mizi dzawo.
10 Asi awona aazi kudzingira Akanani aigara ku Jezeri; ndiyo ndaa Akanani aciri kugara pakati pe Aefraimu dakara na nyamasi, eciita mabasa e kubambidzirhwa.