Mbuto ye Kunamatira Djehovha

Mozesi paainga ari ku Dunhu re Sinai, Djehovha akabvunza kuti awake tenda rinokosha rinozwi tabhernakuro. Aisraeri aikwanisa kunamata Djehovha imona. Mozesi waidikana kuwaka tabhernakuro ii nge mushobo unoita kuti irongedzeke kuti azokwanise kuithwara.

Kuti Aisraeri abetsere pa kuwakwa ke tabhernakuro, Djehovha akaakumbira kuti apase zviya zvaaikwanisa. Hino Aisraeri akapasa oro, prata, kobre, mapuwe anokosha, zviro zvinokosha, usaru, macira, matehwe e zvinyama uye zvimweniwo. Awona akapasa zviro zvakawanda zvekuti Mozesi wakazoguma pakubhuya kuti: ‘Zvakwana! Amucadikanizve kuunzisa zviro.’

Anarume no anakadzi akawanda aikwanisa kuita mabasa akasiyana-siyana akabetsera pa kuwaka tabhernakuro. Amweni aisona macira, amweni aironga mapuwe anokosha, eciseenza no oro uye kutsetsa matabwa. Djehovha akabetsera Aisraeri kufundira zvese zvaidikanwa pa kuwaka ikona.

Aisraeri akawaka tabhernakuro hingana zvaainga abvunzwa na Djehovha. Ngo dii ro kunza ro tabhernakuro kainga kuno ruwanze, basiya ro kobre uye artari yakakura. Ngo dii ro mukati mainga muno kortina yakarungama maningi yaisiyanisa matii mairi, Mbuto Cena uye Mbuto Yakacenesesa. Mukati me Mbuto Cena, mainga muno kandiyero ye oro, meza uye artari. Mukati me Mbuto Yakacenesesa mainga muno ciro cakaita hinga kasha yakagadzirhwa no matabwa uye oro, iyona yaidainzwa kuti areka ye citenderano. Unoziya kuti cinyi cinozwi citenderano? I gondeso inokosha. Uye areka yo citenderano yaiseenza kuti iedzurire Aisraeri kuti ainga akagondesa kunamata uye kuzwira Djehovha basi.

Djehovha akasanangura ana airi a Aroni kuti aseenze hinga apristi. Awona aidikana kucengeta tabhernakuro uye mipiro yaipasa anhu Djehovha. Djehovha akasanangura Aroni kuti aseenze hinga mupristi mukuru. Iyena basi ndiye waidikana kupinda mu Mbuto Yakacenesesa. Iyena waipinda kamwe pa gore. Unoziya kuti ngei iyena waipinda mu mbuto iyona? Kuti akumbire rurekerero Djehovha nge ndaa yezviro zvakashata zvaainga aita, zvainga zvaizwa no ana ake uye zvaiizwa no Aisraeri.

Tabhernakuro yakapera kuwakwa mumasure me gore rimwe Aisraeri abuda mu Edjipitu. Parizvino, awona ainga aano mbuto yekuti anamatire Djehovha. Apona awona aikwanisa kuzwa kuti Djehovha ainga anawo.

Djehovha akaita kuti gore rioneke pamusoro pe tabhernakuro. Gore parairumbwa rakaima, Aisraeri airumbwawo ari pa mbuto iyona. Asi gore paraikwira, awona aiziya kuti yainga yaguma nguwa yekuti aenderera mberi no rhwendo rawo. Hino awona airongedza tabhernakuro uye aiteera gore.