Avhevhi 12

Aisraeri akabuda ku Dunhu re Sinai uye akaita rhwendo ku renje ecienda ku mbuto inodainzwa Kadhesi. Paakaguma ikona, Djehovha akabvunza Mozesi kuti asanangure anarume 12 e madzinza akasiyana kuti avhevhe Kanani. Mozesi wakati ku anarume 12: ‘Endai ku Kanani muone kuti nyikeyo inoita here kurima zvokurhya. Onai kuti mathaundi akadini uye kuti anhu e ku Kanani akabamba here kana kuti haiwa.’ Ngokudaro, avhevhi 12 akaenda ku Kanani.

Mumasure me mazuwa 40, avhevhi akahwirira kubva Kanani uye akaunzisa maonde, maromaa uye no uvha. Awona akapanganidzira Aisraeri zvaakaona, eciti: ‘Mbutoyo yakanaka, asi anhu e ikona ano simba uye mathaundi ano muru dzakareba maningi.’ Asi Karebhi umwe we avhevhi wakati: ‘Kunyazi zvakadaro, isusu tingaanyisa. Ngatiendeyo zvino kooarhwisa!’ Ngei Karebhi wakabhuya izvona? Ngokuti Karebhi na Djoshuwa aigonda maningi Djehovha. Asi avhevhi amweni 10 akati: ‘Haiwa! Akanani anothyisa uye akakura maningi! Kana teciezaniswa nawo, isusu tinoita hingana makwiza.’

Aisraeri paakazwa izvona, akathya maningi Akanani. Awona akatanga kugurunguta ecibhuya kuti aida kuhwirira ku Edjipitu. Djoshuwa na Karebhi akaedza kunyaradza Aisraeri, eciti: ‘Amudikani kuathya, Djehovha acatidziirira. Catinodikana kuita i kurumbwa tecimuzwira.’ Asi Aisraeri ainga asikadi kutombozvizwa. Awona aida kutouraya Djoshuwa na Karebhi!

Djehovha akaitei? Iyena akabvunza Mozesi kuti: ‘Ndakaitira zvakawanda Aisraeri asi kunyazi zvakadaro awona aadi kundizwira. Ndiyo ndaa, awona acarumbwa ecigara ku renje ke makore 40 uye ndiko kaacafira. Djoshua na Karebhi no ana e Aisraeri ndiwo acapinda mu Kanani.’