Zvakaitika mu Dunhu re Karmero

Umambo we madzimambo gumi wakagara no madzimambo akawanda maningi aiita zvakashata, asi umwe wainga eciita zvakashatisisa maningi ndi Akabhi. Iyena wakawaka mwanakadzi waiita zvakashata maningi waidainzwa kuti Djezabheri. Djezabheri na Akabhi akaita kuti Aisraeri ese anamate mwari we kunyepa unozwi Bhaari. Awona akaitawo kuti aphorofita akawanda a Djehovha auraiwe. Djehovha akaitei? Iyena akatuma muphorofita Eriya kuti aende kooreketa na Akabhi.

Eriya wakabhuya kuti nge ndaa ye zvishaishi zva Akabhi, mu Israeri mainga musikazonai mvura. Uye mu makore anokwana kuita matatu, amuzi kutonaya. Nge ndaa yazvo, kakashomanika zvokurhya uye anhu akabatana no nzara. Mumasure me makore manganani, Djehovha akatumazve Eriya kuti aende kooreketa na Akabhi. Akabhi paakaona Eriya, iyena wakati: ‘Zvese izvi zviri kuitika i ndaa yako!’ Eriya wakadaira eciti: ‘I ndaa yangu? Imwimwi ndimwi makaita kuti anhu ese anamate Bhaari. Itai izvi: Unganidzai anhu ese uye no aphorofita ese a Bhaari mu Dunhu re Karmero kuitira kuti tione kuti ndiani Mwari we zvirokwazvo.’

Anhu ese akaenda ku Dunhu re Karmero. Ikona, Eriya wakati: ‘Imwimwi munodikana kusanangura kuti mucada kunamata ani. Djehovha here, kana kuti Bhaari. Ngatiitei cipangidzo cicapangidza kuti ndiani Mwari we zvirokwazvo. Aphorofita anokwana kuita 450 a Bhaari, anodikana kugadzirira cibairo cawo uye inini ndicagadzirira cibairo kuna Djehovha. Mwari acatuma muriro kubva kudenga kuti upise cibairo, ndiyena Mwari we zvirokwazvo.’

Aphorofita a Bhaari akagadzirira cibairo. Awona akapedza zuwa rese ecidainza zina ra Bhaari, asi Bhaari wainga asikadairi. Pa nguwa iyona, Eriya wakatanga kuseka aphorofita awona ecibhuya kuti: ‘Pamweni Bhaari uri kuwata. Nyasai kukhuwa no izwi rakakura, pamweni iyena ungamuka.’ Kunza kakadoka, uye aphorofita a Bhaari airumbwa ecikhuwa. Asi apana caiitika.

Hino, Eriya wakakanda cibairo pamusoro pe artari uye wakapsveterepo mvura. Mumasure mazvo, Eriya wakanamata eciti: ‘Ndapota Djehovha, pangidzirai ku anhu ese kuti imwimwi ndimwi Mwari we zvirokwazvo.’ Pa nguwa iyona, Djehovha akaita kuti muriro ubve kudenga uye wakapisa zvese zvainga zviri pa artari. Ipona, Aisraeri akagara no cokwadi cekuti Djehovha ndiyena Mwari we zvirokwazvo. Aphorofita a Bhaari anokwana kuita 450 akauraiwa.

Hino Eriya wakaona cikuta cidoko cecikhwedera uye wakati kuna Akabhi: ‘Mvura ino simba irikuuya. Kasikai, gadzirirai ngoro yenyu ye hondo uye endai kumba kenyu mvura isati yanaya.’ Hino, mudenga makadzara no makuta akasvipa, dutu rakatanga kuvhuvhuta uye kakatanga kunaya mvura ino simba. Akabhi wakakwira ngoro yake ye hondo uye wakaigogomesa maningi. Asi no rubetso ra Djehovha, Eriya wakakwanisa kugogoma maningi kupinda ngoro ye hondo ya Akabhi! Hino, mu Israeri makatangazve kunaya. Asi Eriya waizobatanazve no matambudziko amweni.