Muti Wakareba Maningi

Pa usiku umweni, mambo Nabhukodhonozori wakarota hope dzimweni uye wakathya maningi. Iyena wakakumbira kuti azii e umambo amupanganidzire zvaireya hopedzo. Asi apana kana umwe hake wakakwanisa kumupanganidzira. Hino, mambo wakasanangura kureketa na Dhanyeri.

Mambo wakabvunza Dhanyeri kuti: ‘Inini ndarota muti. Muti iwona wainga wakareba maningi, zvekuti waitoguma kudenga. Mutiwo waitokwanisika kuoneka ku mbuto ipi hayo ye nyika. Uwona wainga uno masakani akarungama uye no micero yakawanda. Zvinyama zvaipfarira kuzororera pa bvute rawo uye shiri dzaiwaka masaki adzo mu nhai dze mutiwo. Pedzepo, kakauya ngirozi yecibva kudenga. Iyona yakadainzira yeciti: “Temai muti, asi siyai tsiki no nzinde dzaro pasi uye sungai tsikiro no simbi uye kobre. Mwoyo we mutiwo ucacinja kubva pa kugara we munhu wogara we cinyama. Uye nguwa nomwe dzicadarika, anhu ese acaziya kuti Mwari ndiye Mutongi uye kuti anopasa umambo ku uya waanoda.”’

Djehovha akaita kuti Dhanyeri aziye zvaida kureya hopedzo. Dhanyeri paakaziya zvaida kureya hopedzo, iyena wakathya. Dhanyeri wakabvunza mambo kuti: ‘Inini ndaida kuti hopedzo dzigare dze azondi enyu, asi dzino cokuita na imwimwi mambo. Muti wakhona wakakura, ndimwi. Mucaruza umambo uye mucarhya shango hinga cinyama. Asi, ngokuti ngirozi yakabhuya kuti tsiki no nzinde zvisiiwe, imwimwi mucahwirirazve kugara mambo.’

Mumasure me gore rimwe, Nabhukodhonozori wainga ecihamba pateraso ye nyumba yake, ecishamiswa no Bhabhironi. Iyena wakabhuya kuti: ‘Onai kurungama ke thaundi iri rendakawaka. Inini ndiri mukuru kupinda madzimambo ese!’ Paainga ecireketa, izwi rakazwika recibva kudenga reciti: ‘Nabhukodhonozori! Kubvira zvino auciripi mambo.’

Kubvira pa nguwa iyona, Nabhukodhonozori wakatanga kupenga, uye wakatanga kuita hingana cinyama. Ndiyo ndaa, iyena wakabuda mu nyumba ya mambo uye oenda koorarama no zvinyama. Tsitsi ra rake rakakura hingana matenga e godzi uye ndhwara dzake dzakagara hingana dze godzi.

Mumasure me nguwa nomwe, Nabhukodhonozori wakahwirira kugara munhu kwaye! Hino Djehovha akasiyazve kuti agare mambo we Bhabhironi. Nabhukodhonozori wakati: ‘Djehovha ndi Mambo we kudenga, uye iyena wakasisira kunamathwa kese. Zvino, ndaakuziya kuti Djehovha ndi Mutongi, iyena anofundisa munhu anodzikudza kuti agare anodzidodosa. Uye anopasa umambo ku uya waanoda.’