Masoko Akatarhwa pa Paredhi

Paa padarika nguwa, Bherisazari wakagara Mambo we Bhabhironi. Pa usiku umweni, iyena wakaita mabiko akakura maningi uye wakapika anhu anokosha maningi e ku Bhabhironi. Pedzepo, Bherisazari wakatuma aseenzi ake kuti auye no kopo dze oro dzakatorhwa ndi Nabhukodhonozori mu tempro ya Djehovha. Bherisazari no ese ainga ari pa mabiko aimwira mu kopo idzona dze oro, ecireketa zvakanaka ngezve anamwari awo ekunyepa. Hino, ciriporipoco pakabudikira nyara yo mwanarume. Nyara iyona yakatara masoko ainga asikazwisisiki pa paredhi.

Bherisazari wakathya maningi. Iyena wakadainza anarume aiita zvemasarapita uye wakaabvunza kuti: ‘Uya unondipanganidzira zvinoreya masoko aya, ucagara munhu wecitatu unokosha maningi mu Bhabhironi.’ Anhu ese aiita zve masarapita akaedza, asi apana wakakwanisa kupanganidza zvaireya masoko awona. Pedzepo, mambokadzi wakabvunza Bherisazari kuti: ‘Kuno mwanarume umweni unozwi Dhanyeri, nguwa dzese waipanganidza hope dza Nabhukodhonozori. Iyena ungakwanisawo kumupanganidzirai zvinoreya masoko aya.’

Dhanyeri wakaenda kooreketa na mambo. Hino, mambo wakati: ‘Dhanyeri kana ukakwanisa kuerenga uye kundipanganidzira masoko aya, ndicakupasa korari ye oro uye ucagara mwanarume we citatu unokosha maningi mu Bhabhironi.’ Dhanyeri wakadaira kuti: ‘Tenzi inini andidi zviro zvese izvi, asi inini ndingakwanisa kumubvunzai zvinoreya masoko aya. Baba enyu, Nabhukodhonozori ainga ari mwanarume unodzikudza, asi Djehovha akamufundisa fundo. Kunyazi meciziya zvese zvakaitika kaari, imwimwi mamwira vhinyu mu kopo dzo mu tempro, Djehovha anyangadzwa maningi. Ndiyo ndaa, iyena atara masoko aya pa paredhi, ekuti: Meni, Meni, Tekeri uye Pasini. Zvecida kureya kuti Mambo we Medhiya no we Persiya ucatsakatisa Bhabhironi uye amuzogarizve mambo.’

Bhabhironi rainga rakatenderedzwa no muru wakakura maningi uye no murambo wakadzika. Ndiyo ndaa, anhu ese airangarira kuti apana waizokwanisa kutsakatisa Bhabhironi. Asi pa usiku uwona paaita mabiko, masurudado e Medhiya no Persiya akarhwisa Bhabhironi. Mambo we Persiya waizwi Siro wakapausa mvura. Ngokudaro, zvakagara nyore kuti masurudado ake agume pa misuwo dze Bhabhironi. Paakaguma ipona, misuwo dze Bhabhironi dzainga dzakafununguka! Masurudado akapinda, orhwisa thaundi re Bhabhironi uye ouraya Bherisazari. Hino Siro wakagara Mambo we Bhabhironi.

Mumasure me gore rimwe, Siro wakabvunza anhu ese kuti: ‘Djehovha andituma kuti ndiwakezve tempro mu Djerusarema. Ndicasiya Adjudha ese anoda kubetsera pa basa iri kuti aende ikona.’ Hingana zvainga zvakagondeswa na Djehovha, Adjudha akawanda akahwirira kumba mumasure me makore 70 Djerusarema raa ratsakatiswa. Siro wakahwirinza kopo dze oro ne dzo prata no zvese zvainga zvabviswa na mambo Nabhukodhonozori mu tempro. Waona here kuti Djehovha akaseenzesa kudini Siro kuti abetsere anhu Ake?