Dhanyeri mu Rindi re Mhondoro

Ku Bhabhironi kakazogara na mambo umweni waizwi Dhariyo. Dhariyo wakaona kuti Dhanyeri wainga akasiyana no amweni. Ngokudaro, iyena wakaita kuti Dhanyeri agare mutungamiriri we anarume ese anokosha ku Bhabhironi. Anarume aya ainga ano bibvu na Dhanyeri uye aida kuti afe. Awona aiziya kuti Dhanyeri waiita munamato kuna Djehovha katatu pa zuwa. Hino, awona akaenda kooreketa na mambo kuti: ‘Mambo Dhariyo, kandai mutemo wekuti anhu anamate imwimwi basi. Uya usikanamati imwimwi basi unodikana kukhandirhwa mu rindi rakadzara no mhondoro.’ Dhariyo wakapfarira zanoro uye wakakanda mutemo uwona.

Dhanyeri paakazwa ngezve mutemo uwona, wakaenda kumba. Iyena wakagodama pamberi pe janera rakafununguka uye wakaita munamato kuna Djehovha. Hino, azondi a Dhanyeri akapinda mu nyumba make pa nguwa yekuti wainga eciita munamato. Pedzepo, awona akagogoma oenda koobvunza mambo Dhariyo kuti: ‘Dhanyeri aazi kuzwira mutemo wamakagadza. Iyena unonamata kuna Mwari wake katatu pa zuwa.’ Asi Dhariyo waida maningi Dhanyeri uye wainga asikadi kuti iyena afe. Dhariyo wakapedza zuwa rese ecirangarira mushobo waagaita kuti Dhanyeri asauraiwe. Asi zvainga zvisikacaiti kuti mambo acinje mutemo waainga agadza. Hino, iyena wakatuma aseenzi ake kuti aende koothusira Dhanyeri mu rindi rainga rakadzara no mhondoro dzinoruma maningi.

Pa usiku uwona, Dhariyo wakanetseka maningi ngo ndaa ya Dhanyeri, zvekuti aazi kutokwanisa kuwata. Co macibesi iyena wakagogoma kuenda ku rindi uye wakadainzira eciti: ‘Dhanyeri, Mwari wako wakoponesa here?’

Dhariyo wakashamisika Dhanyeri paakadaira kuti: ‘Ngirozi ya Djehovha yafunga miromo ye mhondoro. Adzizi kumbondikuwadza.’ Dhariyo wakapfara maningi, zvekuti wakatuma aseenzi ake kuti abvise Dhanyeri mu rindi. Dhanyeri aazi kumbokuwadzwa. Hino mambo wakabhuya kuti anarume aya ainga ano bibvu akhandirhwe mu rindi ro mhondoro. Paakakhandirhwa mu rindi, anarumewo akatorhyiwa no mhondoro asatoti ambwera pasi.

Mumasure mekuitika zvese izvi, Dhariyo wakabvunza anhu kuti: ‘Mwese munodikana kunamata Mwari wa Dhanyeri. Iyena akanunura Dhanyeri mu rindi ro mhondoro.’

Unosooita munamato kuna Djehovha mazuwa ese hinga zvaiizwa ndi Dhanyeri here?