Esteri Unoponesa Anhu Ake

Esteri wainga ari musikana we Cidjudha wairarama ku Shushani, thaundi ro Persiya. Iyena waigara ikona ngokuti Nabhukodhonozori wainga akadusa mhuri yake ku Djerusarema ke makore akawanda ainga adarika. Esteri wakarerhwa no hama yake Mordhekai. Mordhekai waiseenzera Asuero, Mambo we Persiya.

Mambo Asuero waida mambokadzi mupsva. Hino, aseenzi ake akamuendesera anakadzi akarungama maningi e mu umambo wake, kutobatanidzawo Esteri. Asi mambo wakasanangura ani? Iyena wakasanangura Esteri. Mordhekai wakabvunza Esteri kuti asabvunze munhu kuti iyena wainga ari we dzinza ro Cidjudha.

Mu umambo uwona, mainga mune mwanarume umweni waidzikudza maningi waizwi Amani. Iyena wainga ari mukuru we macinda ese uye waida kuti nyika yese imugodamire. Asi Mordhekai aazi kumbomugodamira. Izvi zvakaita kuti Amani agare no shungu dzakakura zvekuti wakada kuuraya Mordhekai. Uye paakaziya kuti Mordhekai wainga ari Mudjudha, Amani wakada kuuraya Adjudha ese. Iyena wakabvunza Mambo kuti: ‘Adjudha akashata maningi; munodikana kuauraya ese.’ Mambo Asuero paakazwa izvi, wakasiya Amani kuti agadze mutemo. Mutemo iwona, waibhuya kuti Adjudha ese aidikana kuuraiwa mu zuwa 13 re mwedzi wa Adhari. Asi Djehovha ainga eciona zvese zvaiitika.

Esteri wainga asikazii ngezve mutemo uu. Hino, Mordhekai wakamutumira kopiya ye mutemo uu, omubvunza kuti: ‘Psvaka mushobo uri wese kuti urekete na mambo.’ Esteri wakamudaira kuti: ‘Asi munhu wese unoenda kooreketa na mambo asikazi kupikwa, unodikana kuuraiwa. Uye paakuita mazuwa 30 asikazi kundidainza! Asi zvakanaka ndicaenda. Asi kana mambo akamutsa ndonga yake ndicararama. Kana akasama kudaro, ndicafa.’

Hino, Esteri wakaenda dakara pa ruwanze ra mambo. Mambo paakamuona, wakamumutsira ndonga yake. Esteri wakaenda kaari uye mambo wakamubvunzisa kuti: ‘Cinyi candingakuitira mambokadzi Esteri?’ Iyena wakadaira eciti: ‘Inini ndiri kumupikai pamwepo na Amani kuti tirarire tese.’ Paainga ecirarira, Esteri wakapika mambo uye Amani kuti azorarirezve ese zuwa rimweni. Pa kurarira kecipiri, mambo wakabvunzisazve Esteri kuti cinyi caangamuitira. Esteri wakati: ‘Pano munhu urikuda kuuraya anhu angu uye naininiwo. Ndapota, tiponesei.’ Mambo wakamubvunzisa eciti: ‘Asi ndiani urikuda kumuurayai?’ Esteri wakadaira kuti: ‘Ndi Amani mwanarume uu wakashata mwoyo.’ Asuero wakanyangadzwa maningi zvekuti pa nguwa iyona kamare wakatouraisa Amani.

Asi apana waizocinja mutemo wakagadzwa na Amani, kunyazi mambo. Pedzepo, Asuero wakaita kuti Mordhekai agare mutungamiriri we macinda uye wakasiyazve kuti Mordhekai agadze mutemo umweni. Mutemo uwona, waibhuya kuti Adjudha aidikana kudzidziirira paaizorhwiswa. Ngokudaro, mu zuwa 13 ra Adhari, Adjudha akakunda azondi awo. Mumasure mazvo, Adjudha akatanga kupemberera kukunda uku makore ese.