Djesu Akagara Mesiya

Juau waiparidzira eciti: ‘Kuri kuuya munhu mukuru kudarika inini.’ Hino, Djesu paainga ano makore anokwana kuita 30, iyena akaenda ku Murambo we Djorodhani, kaibhabhatidzira Juau anhu. Djesu akakumbira kuti abhabhatidzwewo, asi Juau wakabhuya kuti: ‘Djesu, inini andidikani kumubhabhatidzai. Imwimwi ndimwi munodikana kundibhabhatidza.’ Djesu akabvunza Juau kuti: ‘Djehovha anoda kuti iwewe undibhabhatidze.’ Hino, awona akapinda mu Murambo we Djorodhani uye Juau wakabhabhatidza Djesu ecinyika mwiri wake wese mu mvura.

Mumasure mekuti Djesu abuda mu mvura, iyena akaita munamato. Pedzepo, denga rakafununguka uye mwiya wa Mwari wakacita paari wakaita hingana njiwa. Djehovha akabva areketa ari kudenga, eciti: “Iwewe ndiwe Mwana wangu, mudisiswa; ndakupfarira.”

Pa nguwa ii, Djesu akagara Kristu kana kuti Mesiya. Zvino, iyena ainga akagadzirira kutanga basa raainga akapaswa na Djehovha.

Mumasure mekuti abhabhatidzwa, Djesu akaenda ku renje uye akagara ikona ke mazuwa 40. Paakahwirira akaenda kooreketa na Juau. Juau paakaona Djesu eciuya, iyena wakabhuya kuti: “Onai, Bira ra Mwari rinobvisa zvitema zve nyika.” Juau wakadainza Djesu kuti Bira ra Mwari ngokuti waida kuti anhu aziye kuti Djesu ainga ari Mesiya. Asi, Djesu paainga ari ku renje, pano zvakaitika. Ndi zvinyi zvakaitika? Ngationei.