Dhiyabhurosi Unoedza Djesu

Djesu abva kubhabhatidzwa, iyena akaenda ku renje. Mumasure me kutsanya usiku no masikati ke mazuwa 40, iyena akazwa nzara. Hino, Dhiyabhurosi wakauya kuzomuedza uye wakamubvunza kuti: ‘Kana iwewe uri Mwana wa Mwari, bvunza mapuwe aya kuti aphinduke agare pau.’ Asi Djesu akamudaira eciseenzesa zviri mu Matarhwa, kuti: ‘Zvakatarhwa kuti munhu aadikani kurarama no pau basi. Iyena unodikana kutondowedza zvinobhuiwa na Djehovha.’

Pedzepo, Dhiyabhurosi wakaedzazve Djesu kecipiri. Iyena wakamubvunza kuti: ‘Kana iwewe uri Mwana wa Mwari dzikhandire pasi, ngokuti zvakatarhwa kuti iyena acatuma ngirozi kuti dzikutengure kuti tsoka dzako dzisapondere pa buwe.’ Djesu akamudaira eciseenzesazve Matarhwa kuti: ‘Zvakatarhwa kuti usaedze Djehovha Mwari wako.’

Pedzepo, Dhiyabhurosi wakaedzazve Djesu kecitatu. Iyena wakapangidza Djesu umambo wese we nyika no upfumi wawo uye omubvunza kuti: ‘Ndicakupasa zvese izvi kana ukandihwararira wondinamata kamwe basi.’ Hino Djesu akati kaari: ‘Buda pano, Sathani! Ngokuti zvakatarhwa kuti tinodikana kunamata Djehovha basi.’

Dhiyabhurosi wakaenda uye ngirozi dzakauya koopasa Djesu zvekurhya. Mumasure me zvese izvi, Djesu akatanga kuita basa raakapaswa na Djehovha, kubvunza anhu ese ngezve Umambo wa Mwari. Anhu aipfarira maningi zvaifundiswa na Djesu, pese paiendwa na Djesu, anhu aiendawo.