Djesu no Mwanakadzi Musamariya

Mumasure me Paskwa, Djesu no afundi ake akaenda ku Garireya. Paainga ari mu gwanza, akapinda no ku Samariya. Hino, Djesu akaima pa cimbo caizwi cimbo ca Djakobo kuti azorore uye afundi ake akaenda ku thaundi kootenga zvekurhya.

Pedzepo, mwanakadzi we ku Samariya wakaguma pa cimbo kuti acere mvura. Djesu akamubvunza kuti: “Ndiri kukumbirawo mvura ye kumwa.” Mwanakadziwo wakashamisika uye wakati: ‘Ngei muri kubhuya na inini? Inini ndiri Musamariya. Adjudha aapindirani no Asamariya.’ Djesu akadaira kuti: ‘Iwewe auzii kuti inini ndiri ani. Kudai waiziya, waizondikumbira mvura uye inini ndaizokupasa mvura ye upenyu.’ Mwanakadziwo wakamubvunza kuti: ‘Kuita kudini? Imwimwi amutona muthepu kuti mucere mvura.’ Djesu akamudaira kuti: ‘Munhu anomwa mvura yandinomupasa aazogarizve no mukaha.’ Mwanakadziwo wakati: “Tenzi, ndipasei mvura iyona.”

Hino, Djesu akazoti kaari: “Enda koodainza mwamuna wako.” Mwanakadziwo wakadaira kuti: “Andina mwamuna.” Djesu akamubvunza kuti: ‘Ngokuti wakambowakwa no anarume ashanu, uye mwanarume waunaye zvino amwamuna wakopi.’ Mwanakadziwo wakashamisika uye wakabvunza Djesu kuti: ‘Imwimwi muri muphorofita. Asamariya anotendera kuti angakwanisa kunamata Mwari muno mu Samariya, asi Adjudha anoona kuti anodikana kumunamata ku Djerusarema basi. Inini ndinoziya kuti Mesiya aizouya uye aizotifundisa mushobo watinganamata Mwari.’ Apona, Djesu akabhuya ciro caainga asati abvunza anhu amweni, iyena akati: ‘Inini ndini Mesiya.’

Mwanakadziwo wakagogoma kuenda ku thaundi rake uye akabvunza Asamariya kuti: ‘Ndareketa no mwanarume unonyasa kuziya nge zvangu. Inini ndinoona kuti ndi Mesiya. Uyai muone!’ Asamariya akaenda no mwanakadziwo ku cimbo kuti azwe zvaifundiswa na Djesu.

Hino, Asamariya akakumbira Djesu kuti agare mu thaundi rawo. Djesu akagara ikona ke mazuwa mairi ecifundisa uye anhu akawanda akatanga kutenda kuti iyena ainga ari Mesiya. Mumasure me kupurutana Djesu, anhu e mu thaundi irona, akabvunza mwanakadzi Musamariya kuti: ‘Pari zvino, isusu taakuziya kuti mwanarume uu zvezvirokwazvo ndiye muponesi we nyika.’