Djesu Anoparidzira ngezve Umambo wa Mwari

Djesu paakapedza kubhabhatidzwa, iyena akatanga kuparidzira kuno anhu ese kuti: ‘Umambo wa Mwari waa padhuze.’ Djesu akaparidzira ku Garireya uye ku Djudhiya. Pedzepo, iyena akaenda ku Nazareta, thaundi raakakurira. Ikona, iyena akapinda musinagoga uye akaerenga no izwi guru masoko ainga akatarhwa no muphorofita Isaya. Awona aiti: ‘Djehovha akandipasa mwiya mucena kuti ndiparidzire masoko akanaka.’ Ngei Djesu akabhuya izvona? Ngokuti anhu aida basi kuti iyena aite zvishamiso. Asi Djehovha akapasa Djesu mwiya mucena kuti aparidzire ngezve Umambo wa Mwari. Hino, Djesu akabhuya kuti: ‘Nyamasi, uphorofita uu wa Isaya wadzadzika.’

Pedzepo, Djesu akaenda ku Bahari ro Garireya uye ikona akasongana no abati e howe 4, awo akazogara ateeri ake. Awona aizwi Pedru, Andreya, Tiyago uye Juau. Djesu akaabvunza kuti: ‘Nditeerei uye ndicamuitai kuti mugare aedzi e anhu.’ Ciriporipoco, awona akasiya maricera awo uye akaenda na Djesu. Awona akahamba mu Garireya rese kuti aparidzire ngezve Umambo wa Djehovha. Awona aiparidzira mu masinagoga, mu mabazari uye mu makwanza. Kese kaienda Djesu, anhu akawanda aimuteera. Anhu aizwa kureketa ngezva Djesu, kunyazi ku mbuto dzainga dziri kure no kaaigara, hinga ku Siriya.

Nokuhamba ke nguwa, Djesu akapasa afundi ake anganani simba re kuporesa matenda uye kudzingira madhimoni. Djesu aiparidzira thaundi no thaundi, mutanha no mutanha uye afundi ake aihamba pamwepo naye. Uye anakadzi ainga akatendeka akaita hinga Mariya Madharena, Juana, Suzana, uye amweniwo, aiita zvaaikwanisa kuti abetsere Djesu no afundi ake.

Mumasure mekuti Djesu arowedza afundi ake, awona akaenda kooparidzira ku Garireya rese. Akawanda akazwa masoko e Umambo, akagarawo afundi uye akabhabhatidzwa. Asi akawanda ainga ecidikanawo kuzwa masoko e Umambo. Anhu awona ainga akawanda zvekuti Djesu akaaezanisa no munda waida kukororhwa. Ndiyo ndaa, Djesu akati: ‘Itai munamato kuna Djehovha kuti atumire aseenzi amweni pa basa re kukorora.’ Padarika cinguwa, Djesu akasanangura afundi anokwana kuita 70. Iyena akaatuma ari airi airi kuti aende kooparidzira ngezve Umambo wa Mwari ku Djudhiya yese. Afundi akafundisa anhu e mishobo yese. Awona akahwirira ecida maningi kupanganidzira Djesu nge kubudirira kainga kaita basa. Kunyazi Dhiyabhurosi wainga asikakwanisi kuimisa basa re kuparidzira.

Djesu aizohwirira kudenga, asi iyena aida kuti afundi ake arumbwe eciparidzira. Iyena akaatuma kuti: ‘Paridzirai ngezve Umambo wa Mwari mu nyika yese. Fundisai anhu Soko ra Mwari uye meciabhabhatidza.’