Djesu Anoita Zvishamiso Zvakawanda

Djehovha akatuma Djesu pa nyika kuti arekete ngezve Umambo wa Mwari. Iyena akapasawo Djesu simba kuti aite zvishamiso. Zvishamiso izvi, zvaipangidza zvicazoizwa na Djesu ku anhu, paacazogara Mambo we Umambo wa Mwari. Djesu aikwanisa kuporesa nhenda ipi hayo. Ndiyo ndaa, anhu airhwara aienda kaari uye iyena aiaporesa. Djesu aiporesa mapofu, anhu ainga asikazwi uye akaoma mwiri. Uyewo aitodzinga madhimoni. Anganani aiporeswa nge kubata basi macira a Djesu. Anhu aiteera Djesu ku mbuto yese yaainga ari. Iyena aibetsera anhu, kunyazi pa nguwa yekuti aida kumbogara ega.

Zuwa rimweni, anhu amweni akauya no mwanarume wainga akaoma mwiri dakara ku nyumba yainga ina Djesu. Asi mu nyumba makhona mainga makadzara zvekuti aazi kukwanisa kupinda imona. Hino, anhu aya akafunungura padenga pe nyumba ocitisa mwanarume uya wainga akaoma mwiri dakara painga pana Djesu. Djesu akabvunza mwanarume uya wainga akaoma mwiri kuti: ‘Muka uhambe.’ Mwanarume uya wakamuka uye wakabuda ecihamba. Anhu ese akashamiswa nazvo.

Pa zuwa rimweni, Djesu akapinda mu nharaunda imweni. Pedzepo, anarume anokwana kuita 10 ainga ano nhenda ye mapere akateera Djesu. Pa nguwa iyona, munhu wainga ano nhenda ii wainga asikadikani kugara dhuze no anhu. Ndiyo ndaa, awona akaima ngece kure uye akakhuwa eciti: ‘Djesu tibetsereiwo!’ Djesu akabvunza anarumewo kuti aende ku tempro. Paainga ecienda, anarumewo akaporeswa. Umwe we anarume ainga ano mapere paakaona kuti waporeswa, iyena wakahwirira kuti aende kootenda Djesu uye Mwari. Pa anarume 10 ainga ano mapere, umwe basi ndiye wakaenda kootenda.

Mwanakadzi umweni wainga ecirhwara ke makore 12 waida maningi kuporeswa. Iyena wakapinda pakati pe anhu, wakagara sure ka Djesu uye wakabata macira ake. Iyena wakapora ciriporipoco. Pazvakaitika, Djesu akabvunzisa kuti: “Ndiani wandipsvasa?” Mwanakadzi uu wakathya maningi, ngokuti munhu wainga ano nhenda ii wainga asikadikani kugara dhuze no anhu amweni. Kunyazi zvakadaro, iyena wakabvunza Djesu kuti ndiye wainga abata macira ake. Djesu akanyaradza mwanakadziwo uye akamubvunza kuti: ‘Mwanangu, enda mu runyararo.’

Mwanarume umweni waizwi Djairosi wakadeketerera Djesu eciti: ‘Hambai kumba kangu! Mwana wangu we mwanakadzi uri kurhwara maningi.’ Asi Djesu asati aguma pa nyumba pa Djairosi, mwanewo wakafa. Djesu paakaguma ikona, iyena akaona anhu akawanda ecicema pamwepo no mhuri ya Djairosi. Djesu akati: ‘Musaceme; musikana uu aazi kufa, asi uri kuwata.’ Hino, Djesu akabata nyara yekamusikaneko uye akati: “Musikana ndinoti kauri, muka!” Pa nguwa iyona kamare, musikanewo wakamuka. Ipona, Djesu akabvunza abereki ake kuti amupase zvekurhya. Rangaridzai kuti abereki ake akazwa kudini!