Djesu Akasanangura Aphostori Ake 12

Mumasure me kuparidzira gore rimwe no hafu, Djesu aidikana kuita cisananguro cinokosha maningi. Iyena aidikana kusanangura kuti ndiani aizoseenza naye mu basa re kuparidzira uye kuti ndiani waizoonerera ungano dzokutanga. Djesu akada rubetso ra Djehovha kuti aite cisananguro icona. Ndiyo ndaa, iyena akaenda ega ku dunhu uye akanamata usiku wese. Comacibesi, Djesu akaunganidza afundi ake anganani uye akasanangura aya aizogara aphostori ake 12. Iwewe uciri kuedzurira mazina e anganani awo here? Awona anodainzwa kuti: Pedru, Andreya, Tiyago, Juau, Firipi, Bhartoromeu, Tomaji, Mateu, Tiyago (mwana wa Arfeu) Tadheu, Simoni uye Djudhasi Iskariyoti.

Anarume aya 12 aihamba na Djesu. Mumasure mekuti awona arowedzwa, aphostori akaenda ega kooparidzira. Djehovha akaapasa simba re kudzingira madhimoni uye re kuporesa airhwara.

Kuna Djesu, aphostori aya 12 ainga ari shamwari dzake. Djesu aiagonda. Aphostori akagara ku dii ra Djesu mu nguwa dzinokosha maningi, dzakadai hinga Djesu asati afa uye mumasure mekuti amutswa. Kuitawo hingana Djesu, akawanda e aphostori ake ainga ari e ku Garireya. Anganani awo ainga akawaka. Afarisi ainga asikakoshesi aphostori aya, ngekuti pa ese 12 apana kana umwe hake ainga akafunda mu zvikora zvakakwirira. Asi aphostori ainga akarowedzwa ndi Djesu kuti aite basa re kuparidzira.

Aphostori ainga ari anhu ano citema, nguwa dzimweni awona aishaishawo. Pamweni paya, aireketa asikazi kurangarira, aiita zvisananguro zvakashata uye ainga asina mwoyo unononoka kutsamwa. Nguwa dzimweni, aireketedzana kuti ndiani waikosha maningi kupinda amweni. Asi ainga ari anhu akanaka uye aida Djehovha. Awona aizobetsera kuumba ungano ye Cikristu mumasure mekuti Djesu afa.