Mharidzo yo Padunhu

Mumasure mekuti Djesu asanangura aphostori ake 12, iyena akaona kuti kainga kuno anhu akawanda aimuetsera. Awona ainga abva ku mbuto dzakasiyana-siyana, dzakaita hinga Garireya, Djudhiya, Tiro, Sidhoni uye Siriya. Anganani awo ainga ecirhwara uye amweni aishuphwa ngo madhimoni. Asi Djesu akaporesa anhu ese. Ipona, iyena akagara pasi uye akatanga kuita mharidzo yekuti nyamasi uno inoziikanwa hingana Mharidzo yo pa Dunhu. Pa mharidzo iyona, Djesu akapanganidza kuti cinyi catinodikana kuita kuti tigare shamwari dza Mwari. Akafundisa kuti atikwanisi kurarama pasina Djehovha uye tinodikana kumuda. Azviiti kubhuya kuti tinoda Mwari, asi tisikadi anhu amweni. Djesu akabhuya kuti tinodikana kuita zviro zvakanaka ku anhu ese.

Djesu akabhuyawo kuti: ‘Imwimwi amudikani basi kuda shamwari dzenyu. Munodikanawo kuda azondi enyu uye kurekerera anhu. Kana pano munhu wakamunyangadzirhwai endai kooreketa naye uye mukumbirei rurekerero. Batai amweni hinga mushobo wamunoda kuti amubatei.’

Djesu akapasawo mazano anocokuita no mare. Iyena akabhuya kuti: ‘Zvinokosha maningi kugara shamwari ya Djehovha pano kugara no mare yakawanda. Mbavha ingakwanisa kuba mare yenyu, asi apana ungakwanisa kuba ushamwari wenyu na Djehovha. Musanetseke kuti mucarhyei, mucamwei kana kuti mucapfekei. Onai shiri. Mwari anodzipasa zvadzinoda kuti dzirhye. Kudzirhya mwoyo akuiti kuti munhu ararame ke nguwa yakareba. Edzurirai kuti Djehovha anoziya zvatinoda.’

Anhu awona ainga asati akambozwa munhu unoreketa hinga Djesu. Atungamiriri e magereja, awo aidikana kufundisa ngezva Mwari ainga asikafundisi zviro izvi zvakafundiswa na Djesu. Asi ngei Djesu ainga ecifundisa zvakanaka? Ngokuti Djehovha aibvunza Djesu zviya zvaaidikana kufundisa.