Djesu Anofundisa Mushobo Wakanaka we Kuita Munamato

Afarisi aiita zviro zvakanaka ngokuda basi kudzionesa ku anhu amweni. Awona aipfarira kuita munamato pakadzara nge anhu kuti anhu ese aaone. Awona aibata nge musoro minamato yakareba. Pedzepo, aienda kumasinagoga uye mu makwanza kuti aphinde minamatoyo no izwi rakakura kuti anhu ese akwanise kuzwa. Asi Djesu akafundisa afundi ake kuita munamato nge mushobo wakasiyana. Iyena akati: ‘Musaite munamato hingana Afarisi. Awona anorangarira kuti Mwari anopfarira minamato yawo yakareba, asi Mwari aaipfariri. Pamunonga meciita munamato munonga mecireketa na Djehovha, haiwa no anhu. Pamunoita munamato, musaphinde masoko amwe-amwewo. Djehovha anoda kuti mumubvunze mazwiro enyu.’

Pedzepo, Djesu akati: ‘Munodikana kunamata kudai: “Baba edu muri kudenga, zina renyu ngariceneswe. Umambo wenyu ngauuye. Kuda kenyu ngakuizwe pasi pano hinga zvakunoizwa kudenga.”’ Djesu akabvunzawo afundi ake kuti aidikana kuita munamato ecikumbira zvekurhya zve zuwa irona, kuti Mwari aarekerere zvishaishi zvawo uye zvimweniwo.

Djesu akatizve: ‘Musaime kuita munamato. Rumbwai mecikumbira Djehovha zviro zvakanaka. Iyena ndi Baba edu uye baba umwe na umwe unoda kupasa zviro zvakanaka mwana wake. Kana mwana akakumbira baba pau, awona aizomupasa buwe here? Uye mwana akakumbira howe, awona aizomupasa nyoka here?’

Djesu akazopanganidza zvatinofunda pa nyaya ii, iyena akati: ‘Kana abereki ecikwanisa kupasa zviro zvakanaka ana awo, kuzoti Djehovha kei? Iyena unoda kumupasai mwiya mucena. Camunodikana kuita kumukumbira basi.’ Iwewe unosoita munamato nge mushobo wakafundiswa na Djesu here? Zviro zvipi zvaunobhuya kana kukumbira pa munamato?