Djesu Anopasa Zvekurhya Anhu Akawanda

Pa zuwa rimweni, aphostori akaita rhwendo re kuparidzira uye paakahwirira awona ainga akaremba maningi. Hino, Djesu akasanangura kutora aphostori ake kuti aende ku thaundi re Bhetisaidha kuti ambozorore padoko. Awona akapinda mu bharko uye akaenda ikona. Paainga aa dhuze kuguma, ngece n’ombera Djesu akaona anhu akawanda. Ainga ari mamiriyonji e anhu aiteera Djesu. Iyena aida kugara ari ega no aphostori ake, asi kunyazi zvakadaro, Djesu akabata anhu ese zvakanaka. Iyena akaporesa airhwara uye akapedza zuwa rese ecifundisa anhu akawanda ngezve Umambo wa Mwari. Pakainga koodoka, aphostori akaenda kooreketa na Djesu kuti: ‘Anhu aano nzara. Zvirinani kuti anhu ese aende kuti akwanise kuona zvekurhya.’

Djesu akaadaira eciti: ‘Anhu aya aadikani kuenda. Ese angakwanisa kurhya ari ipona kamare.’ Aphostori akabhuya kuti: ‘Munoda kuti tiende kootenga zvekurhya here?’ Firipi, umwe we aphostori ake wakabhuya kuti: ‘Kunyazi dai tino mare yakawanda, yainga isikazokwani kutenga pau kuti tipase anhu ese aya.’

Djesu akabvunzisa aphostori ake kuti: ‘Tino zvekurhya zvakawanda kudini?’ Andreya wakadaira kuti: ‘Zvatinazvo azvikwani ciro, tino pau shanu no howe mbiri basi.’ Hino, Djesu akati: ‘Ndipasei kuno paudzo no howedzo.’ Iyena akakumbira kuti anhu ese agare pasi uye aumbe zvikwata zve 50 no zve 100. Djesu akabata pau no howe, akaringira kudenga oita munamato. Pedzepo, iyena akapasa zvekurhya ku aphostori uye awona akatanga kukuwanisa zvekurhya zviya ku anhu. Pa anhu aya, painga pano anarume anokwana kuita 5000, anakadzi uye ana adoko, ese akarhya oguta. Kuti zviro zvasara zvisapsvethwe, aphostori akazviunganidza. Pakasara zvitengu zvakadzara zvinokwana kuita 12! Zvakaizwa na Djesu zvinoshamisa maningi, andizvopi?

Anhu akashamiswa maningi zvekuti aida kuti Djesu agare mambo wawo. Asi Djesu aiziya kuti Djehovha ainga asikadi kuti agare mambo pa nguwa iyona. Hino, akabvunza anhu kuti aende uye akabvunza aphostori ake kuti aende ku dii rimweni re Bahari re Garireya. Aphostori akakwira mu bharko uye Djesu akaenda ega ku dunhu. Ngei? Ngekuti aida kuita munamato kuna Djehovha. Kunyazi iyena ainga akabatikana maningi, Djesu aipsvaka nguwa kuti aite munamato.