Otubro

Imwimwi munorangarira kuti nguwa dzimweni zvinoshupha kuzwira here? Mambo Dhavhidhi wairangarira kudaro. Ndiyo ndaa, iyena wakanamata kuna Mwari eciti: “Itai kuti ndigare no cido cekukuzwirai.” (Pis. 51:12) Dhavhidhi waida Djehovha. Kunyazi zvakadaro, nguwa dzimweni zvaimushuphira kuti iyena amuzwire. Uye zviro zvimwezvo zvingaitikawo katiri. Ngei? Cokutanga, ngekuti tiri anhu asikazi kukwana uye takabarhwa no cido cekuda kutama kuzwira. Cocipiri, ngekuti Sathani nguwa dzese unoedza kuti isusu tisagare ku dii ra Djehovha hingana zvaakaita. (2 Ako. 11:3) Uye cocitatu, takatendererhwa no migariro yekutama kuzwira ye nyika ino, “mwiya uri kuseenza mu ana asikazwiri.” (Aef. 2:2) Isusu tinodikana kupeta masimba akakura kuti tirhwisane no cido cedu cekuda kuita zvakashata uye tirhwisane no zviro zvakashata zvatinokhandirirhwa na Sathani uye no nyika ino kuti tisazwire. Tinoita izvona nge kuzwira Djehovha uye no aya aakagadza hinga atungamiriri. w23.10 paji. 6 ndi. 1

Tingafundei kubva pa cishamiso cakaizwa ndi Djesu cekucinja mvura kuti igare vhinyu? Tinofunda wara rekudzidodosa. Djesu aazi kugaya nge cishamiso caakaita. Kubhuya zvazviri, apana paakambogaya ngezve zviro zvaaiita. Kusiya izvona, Djesu aidzidodosa uye aipasa mbiri yese kuna Baba ake. (Juau 5:19, 30; 8:28) Kana tikateedzera muezaniso wa Djesu, uye togara tecidzidodosa, atizodzipasi mbiri nge zviro zvatinonga taita. Zviri nani kusama kurangarira nge zvedu basi, asi topasa rukudzo rese kuna Mwari wedu anoshamisa. (Djer. 9:23, 24) Iyena akasisira kukudzwa. Kodi ciro cipi cataizokwanisa kuita pasina rubetso ra Djehovha? (1 Ako. 1:26-31) Kana isusu tecidzidodosa atietseri kugara no mbiri nge zviro zvakanaka zvatinonga taitira amweni. Katiri, zvinokwana kuziya kuti Djehovha anoona zvatinoita uye kuti anokoshesa zvatinoita. (Ezanisai na Mateu 6:2-4; Aheb. 13:16) Zvezvirokwazvo, tinopfadza maningi Djehovha kana tikateedzera kudzidodosa ka Djesu.—1 Ped. 5:6. w23.04 paji. 4 ndi. 9; paji. 5 mandi. 11-12

Muphostori Pauro akakohomedzesa Akristu kuti akande zvido zve amweni pa mbuto yekutanga. Tingaseenzesa kudini mazano aya patinonga tiri pa misangano? Nge kuedzurira kuti hingana isusu, amweni arikudawo kudaira. Cimborangarirai ngezve muezaniso unoteera. Kana imwimwi mecicedza no shamwari yenyu, munondoreketa musikaipasiwo mukana we kureketa? Zvezvirokwazvo haiwa! Imwimwi munomubatanidzawo pamunonga mecireketa. Ngo mushobo umwewo, isusu tinoda kuti hama dzakawanda dzipase mhinduro pa misangano. Zvezvirokwazvo, umwe mushobo unokosha we kupangidza rudo ku hama no hanzvadzi dzedu nge we kuapasa mukana we kureketa ngezve kutenda kawo. (1 Ako. 10:24) Pasai mhinduro isikazi kureba, nge kuita kudaro, anhu amweni akawanda acagara no mukana we kupasawo mhinduro. Kunyazi imwimwi mecipasa mhinduro isikazi kureba, edzai kuita kuti musapase mafundo akawanda pa nguwa imwewo. Kana imwimwi mukadaira ndima yese, mucasira amweni mukana mudoko wekuti akwanise kupasa mhinduro. w23.04 mapaji. 22-23 mandi. 11-13

Tinodikana kuedzurira kuti zvinokosha maningi kurumbwa tecibetsera amweni maka-maka nge kuita basa re kuparidzira. Mu basa re kuparidzira, tinodikana kugara anhu anokasika kucinja. Patinoparidzira isusu tinosongana no anhu anobva ku mbuto uye anomigariro yakasiyana-siyana uye anotenda zviro zvakasiyana-siyana. Muphostori Pauro waikwanisa kudjairana no migariro we zviro uye isusu tingafunda zvakawanda kubva ku muezaniso wake. Djesu akagadza Pauro hinga “muphostori ku madzinza.” (Aro. 11:13) Pauro wakaparidzira ku Adjudha, ku Agrego ku anhu ainga akafunda uye no anhu ainga asikazi kufunda, ku atongi no madzimambo. Kuti abaye mwoyo ye anhu aya, Pauro wakagara “zviro zvese ku anhu ese.” (1 Ako. 9:19-23) Pauro wairangarirawo ngezve mbuto dzaibva anhu, uye zviya zvaaitenda pedzepo waicinja mushobo wake we kuparidzira. Isusu tingakwanisa kuparidzira nge mushobo wakanaka kana isusu tikarangarira ngezve zviro zvinodiwa no anhu uye tocinja mushobo wedu wekuparidzira. w23.07 paji. 23 mandi. 11-12

Kugara no upfawi akurei kuti takaremba, asi wara iri ngere anhu akabamba. Tinodikana kugara takabamba ngecemukati kuti tirumbwe takaterama paya patinonga tecibatana no mugariro unoshupha. Upfawi unobatanidzwa pa “zvibereko zve mwiya.” (Aga. 5:22, 23) Soko re Cigrego rekuti “upfawi” raiseenzeswa pakupanganidza ngezve kavharo yemushango yainga yaakuseenzeswa no munhu. Mumasure mekuti iyona yaakuseenzeswa no munhu kavharo ii inorumbwa yakaterama uye isikanetseki, asi iyona inorumbwa ino simba. Asi isusu, tingagara kudini no upfawi uye panguwa imweyo takabamba? Atidikani kuita izvona tega. Tinodikana kuita munamato tecikumbira mwiya mucena wa Mwari uye kukumbira rubetso kuti tikwanise kugara no wara iri rakanaka. Pano miezaniso yakawanda inopangidza kuti zvinokwanisika kufundira kugara no upfawi. Hama no hanzvadzi dzakawanda dzinosorumbwa dzakaterama kunyazi paya padzinonga dzeciambirhwa, uye dzinotosiya miezaniso yakanaka ku aya anonga ari kuringira.—2 Ti. 2:25. w23.09 paji. 14 ndi. 3

Juau wakaoneswa zviro zvinoshamisa. Iyena wakaoneswa akuru 24 kudenga ecinamata Djehovha. Awona aikudza Djehovha eciti iyena akasisira kutambira “rukudzo, rureremedzo uye simba.” (Zvak. 4:10, 11) Ngirozi dzakagondeka dzino zvikonzero zvakawanda zvekuti dzikudze uye dzireremedze Djehovha. Idzona dziri kudenga pamwepo na Djehovha uye dzinonyasa kumuziya. Idzona dzinoona mawara ake pa zviya zvaanoita. Idzona padzinonyasa kuona Djehovha eciita ciito zvinoita kuti dzide kumukudza. (Djobo 38:4-7) Isusu tinodawo kukudza Djehovha mu minamato yedu tecimubvunza zvatinoda uye tecimubvunza kuti ngei tecishamisika naye. Pamunoerenga uye kufunda Bhaibheri, edzai kuzwisisa kuti mawara api a Djehovha amunonyanya kupfarira. (Djobo 37:23; Aro. 11:33) Pedzepo panganidzirai Djehovha kuti ngei munonyanya kupfarira mawara aya. Mushobo umweni watingakudza nawo Djehovha, ngewe kumutenda nge zvese zvaanotiitira uye zvaanoitira hama dzedu dze ku mwiya.—1 Sam. 2:1, 2. w23.05 mapaji. 3-4 mandi. 6-7

Muna 1919, Bhabhironi Guru rakaruza simba rayainga rinaro ku anhu a Mwari. Mugore irona, kakagadzwa “muranda wakagondeka uye wakangwara” waizobetsera anhu kutanga kuhamba mu “Gwanza Rakacena.” (Mat. 24:45-47; Isa 35:8) Nge ndaa ye basa rese rakaizwa pakugadzirira “gwanza rakacena,” aya akazohambawo mu gwanza irona, akakwanisa kutunhudzirawo ruziyo rawo ngezva Djehovha uye ngezve zvinangwa zvake. (Zvie. 4:18) Aona akaita cinjo kuti ararame maererano no fundiso dza Djehovha. Asi Djehovha aazi kukumbira kuti anhu ake aite cinjo idzona pa nguwa imwe-imweyo. Pane kudaro iyena akacinja anhu ake padoko no padoko. Uye mune ramangwana ticapfara maningi ngekukwanisa kupfadza Djehovha nge zvese zvatinoita! Gwanza rese kuti rirumbwe rakanaka rinodikana kugadziriswa. Kubvira muna 1919, “Gwanza Rakacena” rinosogadziriswawo, uye izvona zvakaita kuti anhu akawanda abude mu Bhabhironi Guru. w23.05 paji. 17 ndi. 15; paji. 19 ndi. 16

Dare Rinotungamirira rinobatikana pakurowedza abetseri o matare e Dare Rinotungamirira. Abetseri aya aano mabasa akawanda dakara zvino uye akagadzirira kuti azorumbwe eciita basa rekucengeta mabira a Kristu. Kana akadzodzwa e kupedzesera akaenda kudenga dambudziko guru raakuda kupera, kunamata kakacena kucarumbwa kuripo pa nyika. Nge ndaa ye kutungamirirhwa na Djesu Kristu, isusu atizosii kunamata Djehovha. Zviri pamhene kuti pa nguwa iyona ticarhwiswa na Gogi we Magogi, mubatanidzwa wenyika dzakasiyana-siyana. (Ezek. 38:18-20) Asi kurhwiswa uku akuzotori nguwa yakareba uye akuzobudiriri; akuzoitisi kuti aseenzi a Djehovha asiye kumunamata. Apana mubvunzo kuti Djehovha acatiponesa! Mu ciono cake, muphostori Juau wakaona “anhu akawanda maningi” e mabira amweni a Kristu. Uye Juau wakaziya kuti “anhu akawanda maningi” aya ainga ari aya e kuti aibuda “mukutambudzika kukuru.” (Zvak. 7:9, 14) Apana mubvunzo kuti Djehovha acatiponesa! w24.02 mapaji. 5-6 mandi. 13-14

Asi tinodikana kuitei kuti titambire mwiya mucena? Isusu tinganamata tecikumbira mwiya mucena, kufunda Soko ra Mwari, uye kuita dii re sangano. Kuita izvona kucatibetsera kuti tisakurire “zvibereko zve mwiya mucena.” (Aga. 5:22, 23) Djehovha anopasa mwiya mucena wake ku aya akacena mu ndangariro uye mu maitiro. Iyena aatipasi mwiya wake kana tikagara tecirangarira zviro zvakashata kana kuita zviro zvaasikatenderi. (1 Ate. 4:7, 8) Kusiya izvona, kuti tirumbwe tecitambira mwiya mucena, tinodikana kuteerera mutemo we “kureremedza zvipikirhwa.” (1 Ate. 5:20) “Zvipikirhwa” izvi zvinobatanidza masoko atakapaswa ndi Mwari eciseenzesa mwiya wake, ngezve zuwa ra Djehovha uye kukasika ke mazuwa edu. Isusu ationi hingana kuti Amagedhoni icanonoka maningi kuti iitike. Ngekudaro, isusu tino cidaka-daka kuti iitike nokukasika. Tinoita izvona nge kurumbwa tino muhambiro wakanaka uye nge “kubatikana pakuita ma mabasa ekudzipira kuna Mwari” mazuwa ese.—2 Ped. 3:11, 12. w23.06 paji. 12 mandi. 13-14

Mukristu unodikana kuitei kana foto ye pornografiya ikabuda mu foni yake kana kuti mu komputadhori? Tinodikana kuima kuzviona ciriporipoco. Uye zvicaita nyore kuzviita kana tikaedzurira kuti ciro cinokosha maningi mu upenyu wedu ushamwari wedu na Djehovha. Mafoto amweni angasama kuoneka hinga e pornografiya, kunyazi zvakadaro angaita kuti cido cedu cekuita zve pamaponde cikure. Ngei tisikadikani kuona mishobo ii ye mafoto? Ngekuti atidi kuita ciro cipi haco, kunyazi ciri cidoko cingatiitisa kuti tiite kana kurangarira zviro zvisikazi kucena. (Mat. 5:28, 29) Mukuru umweni we ku Tailândia unozwi David unoti: “Inini ndinoima, ndorangarira kuti: ‘Kunyazi mafoto aya asiripi e pornografiya, Djehovha angapfara kana ndikarumbwa ndeciaona here?’ Kurangarira kudaro kunoita kuti ndiite zvisananguro zvino ungwaru.” Kuthya kuita ciro cipi haco cingasiya Djehovha akatsukwara, kucatibetsera kuti tiite zvisananguro zvakanaka. Kuthya Mwari ndikona “kutanga,” kana kuti, panotangira “ungwaru.” w23.06 paji. 23 mandi. 12-13

“Makwartu” pamweni ari kuda kureya ungano dzedu. Mu nguwa ye dambudziko guru, isusu ticadziirirhwa na Djehovha kana tikarumbwa takabatana no hama dzedu. Ndiyo ndaa, tinodikana kupeta masimba zvino haiwa basi kuti tizwisise hama no hanzvadzi dzedu, asi kuti tifundirewo kudzida. Pamweni kupona kedu kunozotsamira pakuita izvona! “Zuwa guru ra Djehovha” inonga iri nguwa inoshupha. (Zef. 1:14, 15) Uye anhu a Djehovha acashuphikawo. Asi kana tikagadzirira zvino, ticarumbwa takaterama uye tobetsera amweni. Ticakurira matambudziko api hawo angamuka no kushingirira. Hama dzedu padzinonga dzecitambudzika, ticaita zvese zvatinokwanisa kuti tiabetsere uye tiapase zvese zvaanoda teciapangidzira usisi. Uye ticarumbwa tiri dhuze no hama no hanzvadzi dzedu, tecipangidza rudo kaari. Djehovha acatikomborera no upenyu usikaperi mu nyika yekuti tsawana dzese uye matambudziko ese anonga apera.—Isa. 65:17. w23.07 paji. 7 mandi. 16-17

Kakawanda kakhona, Bhaibheri rinobhuya kuti anarume akagondeka e kare hingana ano simba uye akabamba. Asi, kunyazi aya ekuti ainga akabamba nguwa dzimweni awona ainga asikazwi hingana akabamba. Ngo muezaniso, pa mugariro umweni Mambo Dhavhidhi waizwa “akabamba hingana dunhu,” asi panguwa dzimweni iyena “waithya maningi.” (Pis. 30:7) Uye pa nyaya ya Samusoni, iyena wainga ano simba nge ndaa ye mwiya mucena wa Mwari. Kunyazi zvakadaro, iyena waiziya kuti asina rubetso iri, “waizoruza simba, waizoremba uye waizogara akatodzana no anarume amweni ese.” (Ato. 14:5, 6; 16:17) Anarume aya ainga akabamba basi ngekuti Djehovha akaapasa simba. Muphostori Pauro, waiziyawo kuti waida simba ra Djehovha. (2 Ako. 12:9, 10) Iyena waibatanawo no cinetso co uthongo. (Aga. 4:13, 14) Uye nguwa dzimweni, iyena waidikana kuseenza no simba kuti aite zviro zvakanaka. (Aro. 7:18, 19) Uyezve nguwa dzimweni, iyena waithya zviro zvaizoitika kaari. (2 Ako. 1:8, 9) Kunyazi zvakadaro, Pauro paainga akaremba iyena waizwa akabamba. Izvi zvaiitika ngekuti Djehovha aimupasa simba raaida kuti akurire zvinetso. w23.10 paji. 12 mandi. 1-2

Kana nguwa dzimweni mukazwa kuti amukoshi, edzurirai kuti Djehovha wene ndiye akamusanangurai kuti mumuseenzere. (Juau 6:44) Djehovha anoona zviya zvakanaka zvinoizwa na umwe no umwe wedu, iyena anoona mwoyo wedu uye mushobo waanotiona andiwopi watinodziona. (2 Mak. 6:30) Uye mungagara no rugondo rekuti Djehovha paanobhuya kuti munokosha kaari i zvirokwazvo. (1 Juau 3:19, 20) Tisati tafunda cokwadi amweni edu pamweni takaita zviro zviciri kuita kuti tidzipase ndaa. (1 Ped. 4:3) Uye amweni arikuseenzera Djehovha akatendeka kubvira kare, pamweni ari kurhwisana no mazwiro akashata. Zvakadini na imwimwi, pamweni paya munozwa hingana kuti Djehovha aazi kumurekererai here? Pa mugariro iwona, zvakanaka kurangarira kuti kunyazi aseenzi a Djehovha akagondeka akarhwisana no mazwiro akadaro. Ngo muezaniso, muphostori Pauro paairangarira ngezve zvishaishi zvake waitsukwara maningi. (Aro. 7:24) Zviri pamhene kuti Pauro wakacinyuka pa zvishaishi zvake uye wakabhabhatidzwa. Kunyazi zvakadaro, iyena waidziona hinga “mudoko pa aphostori ese” uye mushaishi “mukuru.”—1 Ako. 15:9; 1 Ti. 1:15. w24.03 paji. 27 mandi. 5-6

Zviro zvatinofunda kubva pa zvisananguro zvakashata zvakaizwa na Mambo Djoashi nge zvekuti tinodikana kusanangura shamwari dzinotibetsera kuti tiite zvakanaka—shamwari dzinoda Djehovha uye kumupfadza. Uye shamwari dzedu dzingagara dze mathunga akasiyana-siyana. Edzurirai kuti, Djoashi wainga aciri djaha maningi paakagara shamwari ya Djeoyadha. Pa nyaya yakaringana no shamwari dzenyu, dzibvunzisei kuti: ‘Kodi shamwari dzangu dzinondibetsera kubambisa kutenda kangu muna Djehovha here? Idzona dzinondikohomedzesa kuti ndirarama maererano no zviya zvinodiwa na Mwari here? Dzinoreketa ngezva Djehovha uye ngezve cokwadi ce Bhaibheri here? Dzinoreremedza zviya zvinodiwa na Djehovha here? Idzona dzinoreketa basi zviro kuti dzindipfadze here, kana kuti dzino ushingi we kundipasa mazano pandinonga ndecida rubetso?’ (Zvie. 27:5, 6, 17) Cokwadi nge cekuti shamwari dzisikadi Djehovha, imwimwi amudikani kudzida. Asi kana imwimwi muno shamwari dzinoda Djehovha, dzibatei no nyara mbiri—idzona dzicamubetserai nguwa dzese!—Zvie. 13:20. w23.09 paji. 9 mandi. 6-7

Soko rekuti Arfa ndi bhii rokutanga mu Cigrego uye Omega rokupedzesera. Ecibhuya kuti ndini “Arfa uye Omega,” Djehovha anopangidza kuti paanotanga kuita ciro, iyena anociita kuti cibudirire. Mumasure me kusika Adhamu na Evha, Djehovha akuti: “Baranai, muwande, mudzadze nyika uye muitonge.” (Gen. 1:28) Djehovha paakabhuya cinangwa cake, zvaiita hingana akabhuya kuti “Arfa.” Cinangwa ca Djehovha cicadzadzika kana abarirhwana a Adhamu na Evha e kuti akazwira acagara akakwana, odzadza nyika uye oicinja kuti igare Paraizo, pa zuwa irona kana izvi zvikaitika zvinoita hingana Djehovha ecibhuya kuti “Omega.” Djehovha paakapedza kusika “denga no nyika no zvese zviri mazviri,” iyena akapasa rugondo. Izvona zvinopangidza kuti cinangwa ca Djehovha ku anhu no kunyika cicanyasa kudzadzika pakupera ke zuwa reconomwe—Gen. 2:1-3. w23.11 paji. 5 mandi. 13-14

Rhwendo re kubva ku Bhabhironi dakara ku Israeri rainga risiripi nyore. Irona raikwanisa kutora mwedzi murongomuna, asi Djehovha akagondesa kuti aizoparadza ciro cipi haco caizopingaidza anhu ake kuti ahwirire. Ku Adjudha akagondeka, makomborero e kuhwirira ku Israeri anopinda kudzipira kupi hako kekuti pamweni aidikana kuita. Cikomborero cakakura kupinda zvese cainga cine cokuita nokunamata Djehovha. Awona ainga asina tempro kunyazi imwe hayo yekuti anamate Djehovha ku Bhabhironi. Kunyazi artari yekuti aizokwanisa kupasa zvibairo zvaikumbirhwa no Mutemo wa Mozesi, uye aona ainga asinawo grupo re apristi raizoita urongwa wekupira zvibairo. Kupinda izvona, anhu a Djehovha ainga akatenderedzwa no anhu akawanda ainga asikareremedzi mitemo ya Djehovha. Ngokudaro, mamirionji e Adjudha akagondeka ainga ano cidaka-daka cekuhwirira ku nyika yawo uye cekuhwirinza kunamata kakacena. w23.05 mapaji. 14-15 mandi. 3-4

Kana tecida kurumbwa tecihamba hinga “ana e ruvheneko,” isusu tinodawo rubetso re mwiya mucena. Ngei? Ngekuti zvinoshupha kurumbwa takacena mu nyika ino isikazi kucena. (1 Ate. 4:3-5, 7, 8) Mwiya mucena ucatibetsera kuti tirhwisane no marangariro e nyika, awo anobatanidza ungwaru we nyika uye maonero asikapindirane no mushobo we kurangarira wa Mwari. Mwiya mucena ucatibetsera kuti tiitewo zvese “ngo mushobo wese we zviro zvakanaka zve unatsi.” (Aef. 5:9) Mushobo umweni we kutambira mwiya mucena ngewe kuita munanato. Djesu akati, Djehovha ‘angatamawo here kupasa mwiya mucena ku aya anomukumbira?’ (Ruka 11:13) Kusiya izvona, patinokudza Djehovha pa musangano tinotambirawo mwiya mucena. (Aef. 5:19, 20) Mwiya mucena ndiwo ucatibetsera kuti tirarame nge mushobo unopfadza Djehovha. w24.03 paji. 23 mandi. 13-15

Imwimwi munoda kutunhudzira mwoyo wenyu unononoka kutsamwa? Kana zvakadaro, itai munamato mecikumbira izvona. Mwoyo unononoka kutsamwa unobatanidzwa pa zvibereko zve mwiya mucena. (Aga. 5:22, 23) Ndiyo ndaa tinodikana kuita munamato tecikumbira kuti Djehovha atipase mwiya mucena uye atibetsere kuti tigare no mawara e zvibereko zve mwiya mucena. Patinobatana no mugariro unoita kuti mwoyo unononoka kutsamwa wedu uedzwe, isusu “ticarumbwa tecikumbira” mwiya mucena kuti utibetsere kuti tipangidze mwoyo unononoka kutsamwa. (Ruka 11:13) Kusiya izvona tingakumbira Djehovha kuti atibetsera kuti tione zviro ngo mushobo waanozviona. Pano kuita munamato basi, tinodikana kupeta masimba kuti tiite zviro zvatinokwanisa zuwa no zuwa. Patinorumbwa teciita munamato tecikumbira mwoyo unononoka kutsamwa uye topeta masimba kuti tikwanise kugara no mwoyo uona, wara iri ricagara no nzinde mu mwoyo medu uye ricagara dii re mawara edu. Uyewo zvinobetsera kurangarira miezaniso dziri mu Bhaibheri. Bhaibheri rinoreketa ngezve anhu akawanda akapangidza mwoyo unononoka kutsamwa. Patinorangarira ngezve miezaniso ii, tinofundira mishobo yakasiyana-siyana ye kupangidza mwoyo unononoka kutsamwa. w23.08 mapaji. 22-23 mandi. 10-11

Djesu akagondesa muphostori Pedru kuti Djehovha aizomucengeta. Mumasure me kumutswa, Djesu akaitazve kuti Pedru no aphostori ake amweni abatezve howe dzakawanda ngo mushobo unoshamisa. (Juau 21:4-6) Cishamiso ici cakaita kuti Pedru azwisise kuti Djehovha aizomupasa zvekurarama nazvo zvese zvaaida. Pamweni Pedru wakaedzurira masoko a Djesu paakabhuya kuti Djehovha anoriritira aya ‘anotanga kupsvaka Umambo.’ (Mat. 6:33) Zvese izvi zvakabetsera Pedru kuti akande basa rake re kuparidzira pa mbuto ye kutanga, haiwa basa rekutengesa howe. Iyena wakagara mwanarume ano ushingi uye wakaparidzira pa zuwa re pentekoste 33 K.A., ecibetsera anhu akawanda kuti atende masoko akanaka. (Zvii. 2:14, 37-41) Uye pa nguwa yakazoteera, iyena wakabetsera Asamariya uye no aya ainga asiripi Adjudha kuti afunde zvakawanda ngezva Kristu. (Zvii. 8:14-17; 10:44-48) Zvezvirokwazvo Djehovha akabetsera Pedru kuti aunzise mu ungano anhu e mishobo yese. w23.09 paji. 20 ndi. 1; paji. 23 ndi. 11

Mumasure me makore mairi aa adarika Abhabhironi paakatsakatisa Djerusarema, Mambo Nabhukodhonozori weku Bhabhironia wakarota zvinothyisa ngezve mufanikiso wakakura maningi. Iyena wakathyisidzira kuuraya azii ese kutobatanidzawo Dhanyeri kana awona akatama kubhuya zvaainga arota nokuzvidudzira. (Dha. 2:3-4) Dhanyeri wakaita ciito nokukasika; pasina izvona, akawanda aizofa. Iyena “wakaenda kuna mambo uye wakakumbira nguwa kuti adudzire hope dzaakarota.” (Dha. 2:16) Paidikana ushingi wakakura uye kutenda. Bhaibheri arireketi kuti Dhanyeri wainga akambodudzira hope kareko. Iyena wakakumbira shamwari dzake kuti “aite munamato kuitira kuti Mwari we kudenga aazwire usisi uye oabvunza hope dzakhona.” (Dha. 2:18) Djehovha akadaira munamato uu. No rubetso ra Djehovha, Dhanyeri wakadudzira hope dza Nabhukodhonozori. Upenyu wa Dhanyeri, we shamwari dzake no we azii amweni wakacengetedzwa. w23.08 paji. 3 ndi. 4

Rangaridzai ngezve makomborero ekupangidza mwoyo unononoka kutsamwa. Munhu uno mwoyo unononoka kutsamwa i munhu uno pfara uye wakaterama. Kusiya izvona, mwoyo unononoka kutsamwa ungaita kuti tigare no uthongo uri nane. Patinopangidza mwoyo unononoka kutsamwa tinogara no shamwari dzakanaka uye tinogarisana zvakanaka no amweni. Kusiepo izvi, ungano yedu inogara yakabatana. Munhu paanotinyangadzisa, tinopeta masimba kuti zviro zvisabambirire kushata. (Pis. 37:8, masoko e pasi; Zvie. 14:29) Cinonyanya kukosha, tinonga teciteedzera Djehovha Baba uye torumbwa tecibambisa ukama wedu naye. Zvezvirokwazvo, mwoyo unononoka kutsamwa iwara rakanaka maningi uye rinobetsera tese isusu! Izviro kwazvo kuti azviripi nyore nguwa dzese kupangidza mwoyo unononoka kutsamwa. Asi no rubetso ra Djehovha, tingarumbwa tecipangidza wara iri. Patinonga tecietsera nyika ipsva, tingagara no rugondo kuti “madziso a Djehovha anoringira aya anomuthya no aya anoetsera rudo rake rakagondeka.” (Pis. 33:18) Hino tinodikana kushinga kurumbwa tecipangidza mwoyo unononoka kutsamwa. w23.08 paji. 22 ndi. 7; paji. 25 ndi. 16-17

Tiyago wakabhuya kuti mwanarume iyena waiti unokutenda, asi zvaaita zvainga zvisikapindirani no zviya zvaaibhuya. (Tig. 2:1-5, 9) Tiyago wakareketawo ngezve ‘hama kana hanzvadzi isina zvokupfeka no zvokurhya zvinokwana pa zuwa’ uye munhu otama kuita ciro kuti amubetsere. Kunyazi iyena akabhuya kuti uno kutenda, zviito zvake zvaipangidza kuti iyena wainga asina kutenda. (Tig. 2:14-16) Tiyago wakareketa ngezva Rakabhi hinga muezaniso we munhu wakapangidza kutenda. (Tig. 2:25, 26) Rakabhi wainga azwa ngezva Djehovha uye waiziya kuti iyena aibetsera Aisraeri. (Djs. 2:9-11) Pedzepo iyena wakapangidza kutenda kake nge zviito—iyena wakadziirira avhevhi airi e Ciisraeri, ainga ari pa mugariro unoshupha waikanda upenyu wawo pa ngozi. Ndiyo ndaa, mwanakadzi uu wainga ano citema uye wainga asiripi Muisraeri wakazwi munatsi ngo mushobo umwewo wakabvunzwa Abrahamu kuti wainga munatsi. Muezaniso wa Rakabhi unotifundisa kuti kutenda kedu kunodikana kupangidzwa nge zviito. w23.12 mapaji. 5-6 mandi. 12-13

Hingana Akristu, isusu atidi basi kuzwisisa zviro zvekutanga zve Bhaibheri. No rubetso ra Djehovha, isusu tino cidaka-daka cekuda kufunda “kutobatanidzawo zviro zvakadzika zva Mwari.” (1 Ako. 2:9, 10) Munoona kudini ngezvekutanga urongwa we fundo ye munhu ega kuti murumbwe mecikhwedera dhuze na Djehovha? Ngo muezaniso, imwimwi mungakwarakwatisa zvakawanda ngezve mushobo wa Djehovha waakapangidza rudo rake ku aseenzi ake e kare uye kuti izvona zvinopangidza kudini kuti iyena anomudai. Uye imwimwi mungakwarakwatisawo kuti kunamata Djehovha mu nguwa ye Aisraeri kainga kakarongwa kudini uye kuti Djehovha anoda kuti timunamate kudini mazuwa ano. Kana kuti pamweni imwimwi mungafunda zviro zvakawanda zvakaringana no uphorofiti wakadzadziswa na Djesu paainga ari pa nyika pano. Imwimwi mungaseenzesa Índice das Publicações da Torre de Vigia kana kuti Bhuku Rinobatsira Zvapupu zvaJehovha Pakutsvakurudza. Mu maferamenta aya, imwimwi mucaona kuti awona anoita kuti fundo yenyu ipfadze. Kuita fundo ii yakadzika ye Bhaibheri, kungamubetsera kuti mubambise kutenda kenyu uye “mugumira ruziyo ra Mwari.”—Zvie. 2:4, 5. w23.10 mapaji. 18-19 mandi. 3-5

Soko raseenzeswa no muphostori Pedru rekuti “maningi” rinoda kureya “ciro cakatatamurhwa.” Dii recipiri re vhersikuro, rinopangidza kuti ngazvipi zvaticaita kana tikagara no rudo rakakura ku amweni, ricafukidza kana kuti kuita kuti tisakande ndangariro dzedu pa zvishaishi zve hama dzedu. Izvona zvakaita hingana: Kubata djira rinotatamuka, toritatamura, kunyasa kuritatamura kamare dakara tafukidza haiwa cishaishi cimwe kana kuti zviiri, asi “zvishaishi zvakawanda” zve hama dzedu. Pa mugariro uu “kufukidza” kunoreya kurekerera. Kuita hinga djira rinofukidza pakasvipa uye kuremara, nge mushobo umwewo rudo redu rinofukidzawo kutama kukwana uye kuremba ke hama dzedu. Rudo redu rinodikana kunyasa kubamba roita kuti tikwanise kurekerera kutama kukwana ke hama dzedu kunyazi izvona zvecishupha. (Ako. 3:13) Patinorekerera amweni, tinopangidza kuti rudo redu rakakura uye kuti tinoda kupfadza Djehovha. w23.11 mapaji. 10-11 mandi. 13-15

Mambo Djosiya paainga ano makore 25, iyena wakatanga kugadzirisa tempro. Apa ndipo paakagumira “bhuku re Mutemo wa Djehovha, raakapasa eciseenzesa Mozesi.” Mambo paakazwa zvaibhuiwa no bhuku iri, iyena nokukasika wakaita cinjo kuti azwire zvainga zvakatarhwa mu bhukuro. (2 Mak. 34:14, 19-21) Imwimwi makamboedza kuerenga Bhaibheri mazuwa ese here? Kana muri kuedza, zviri kukwanisika here? Imwimwi muno musambo we kutarira mavhersikuro angazomubetserai here? Paainga ano makore 39, Djosiya wakaita cishaishi cakaita kuti afe. Pane kupsvaka nhungamiriro dza Djehovha, iyena wakasanangura kudzigonda. (2 Mak. 35:20-25) Iri i fundo rinokosha katiri. Azvinei no thunga ratinaro kana kuti nguwa yatinonga tapedza teciseenzera Djehovha, isusu tinodikana kurumbwa tiri dhuze na Djehovha. Ndiyo ndaa tinodikana kuita munamato kuna Djehovha nguwa dzese tecikumbira nhungamiriro dzake, kufunda Bhaibheri, uye kuzwira mazano e Akristu akakura pa kunamata. Kana mukaita kudaro, mucathurudza mikana ye kuita zvishaishi uye mucatunhudzira mukana we kupfara.—Tig. 1:25. w23.09 paji. 12 mandi. 15-16

Bhaibheri rinoreketa ngezve anakadzi akawanda anoshamisa akada Djehovha uye akamuseenzera. “Awona aidzibata” uye “akatendeka mu zviro zvese.” (1 Ti. 3:11) Asi nyamasi uno, mu ungano muno miezaniso dzakawanda dze hanzvadzi dzakakura pakunamata dzekuti madjaha angakwanisa kudziteedzera. Hanzvadzi dze cidjaha, zvakadini kupsvaka muezaniso we hanzvadzi ye Cikristu yakakura pakunamata uye moedza kufunda no muezaniso wayo? Ongororai kuti mawara api aanawo. Pedzepo, rangarirai kuti mungateedzera kudini mawara awona. Wara rinokosha maningi ku Mukristu i kudzidodosa. Kana mwanakadzi akadzidodosa, iyena ucagara no ushamwari wakabamba na Djehovha uye ucagarisana no amweni zvakanaka. Ngo muezaniso, mwanakadzi unoda Djehovha uye unodzidodosa, unosanangura kuzwira cokwadi cisikacinji cekupurutana musoro we mhuri wakasanangurhwa na Djehovha. (1 Ako. 11:3) Cokwadi icona cisikacinji, cinopanganidza kuti ndiani akasanangurhwa na Djehovha kuti atungamirire ungano uye mhuri. w23.12 mapaji. 18-19 mandi. 3-5

Djehovha anoda kuti mwamuna ade mukadzi wake uye amuriritire panocokuita no zviro zvekunyama, zvemundangariro uye zvekumwiya. Kukwanisa kunyasa kurangarira, kureremedza anakadzi uye kuthembeka zvicamubetserai kuti mugare mwamuna uye musoro we mhuri wakanaka. Mumasure mekucata pamweni imwimwi mucazogara baba. Zvinyi zvamungafundira na Djehovha zvinocokuita nokugara baba akanaka? (Aef. 6:4) Djehovha ainga asikapsveruki kubvunza Mwana wake Djesu Kristu kuti aimuda uye aimupfarira. (Mat. 3:17) Kana imwimwi mukagara baba, musakanganwe kubvunza mwana wenyu kuti munomuda uye simbai mwana wenyu pese paya paanoita zviro zvakanaka. Abereki anoteedzera muezaniso wa Djehovha, anobetserawo ana awo kuti agare Akristu akakura pakunamata. Imwimwi mungagadzirira kuzogara baba akanaka ngekutanga zvino kubata zvakanaka anhu e mu mhuri yenyu uye hama dze mu ungano uye kuabvunza mushobo wamunoada uye wamunodada nawo.—Juau 15:9. w23.12 mapaji. 28-29 mandi. 17-18

Kunyazi tiri aseenzi akagondeka a Djehovha, isusu tinosonganawo no matambudziko, cinetso co uthongo hingana zvinosoitikawo no anhu ese. Asi kusiya izvona, pamweni tinodikanawo kushingirira kuteererhwa no kuphikiswa no aya anozonda anhu a Mwari. Djehovha aaiti kuti tisabatane no matambudziko aya, asi anotigondesa kuti acatibetsera nguwa dzese. (Isa. 41:10) No rubetso rake, isusu tingakwanisa kurumbwa tino mupfaro, kuita zvisananguro zvakanaka uye kurumbwa takagondeka kaari kunyazi mu nguwa dzinoshupha maningi. Djehovha anogondesa kutipasa zvinodainzwa no Bhaibheri kuti “runyararo ra Mwari.” (Afi. 4:6, 7) Runyararo iri i kuterama uye aya basi anonga ari shamwari dza Djehovha ndiwo anozwa runyararo irona. Runyararo irona “rinodarika kuzwisisa kwese”; uye rinosimba rakakura kupinda zviya zvatingarangarira. Imwimwi makambozwa runyararo re zvirokwazvo mumasure me kuita munamato no mwoyo wese kuna Djehovha here? Hino imwimwi munoziya kuti cinyi cinozwi “runyararo ra Mwari.” w24.01 paji. 20 ndi. 2; paji. 21 ndi. 4

Kuda Mwari kunoitisa kuti anhu akatendeka ade kukudza zina rake. Mambo Dhavhidhi wakazwisisa kuti kukudza zina ra Djehovha kainga kuri kutokudzawo Djehovha wene. Zina ra Djehovha rinobatanidzawo muhambiro wake. Hino izvona zvinotiedzurira mawara ake akanaka, uye zviro zvinoshamisa zvaanoita. Dhavhidhi waida kukudza zina ra Baba ake ngekuti irona rakacena. Iyena waida kuita izvona no “zvese zvainga zviri mukati make” kana kuti—no mwoyo wese. Nge mushobo umwewo, Arevhi ndiwona ainga ari pamberi pakukudza Djehovha. Ecidzidodosa, awona akatendera kuti masoko awo ainga asikazokwanisi kukudza zina cena ra Djehovha nge mushobo warinosisira. (Nee. 9:5) Apana mubvunzo kuti kudzidodosa uku kakaita kuti Djehovha apfare. w24.02 paji. 9 ndi. 6

Kana imwimwi mukakonerhwa kudzadzisa cinangwa cenyu, Djehovha aazomuoni hingana kuti amubetseri. (2 Ako. 8:12) Fundirai no zvinetso. Cimborangarirai ngezve zviro zvamakakwanisa kudzadzisa. Bhaibheri rinobhuya kuti: “Ngekuti Mwari amunhupi asina unatsi kuti akanganwe basa renyu.” (Aheb. 6:10) Hino itai zvimwezvo. Musakanganwe zviro zvese zvamakakwanisa kuita—ngo muezaniso kugara no ushamwari na Djehovha, kureketa no amweni nge zvake kana kuti kubhabhatidzwa. Kuita hingana mushobo wamakakwanisa kudzadzisa zvinangwa zvenyu kare, imwimwi mucakwanisawo kudzadzisa zvinangwa zvamunazvo zvino. No rubetso ra Djehovha, imwimwi mungagumira zvinangwa zvenyu. Kana kuti, pamunoedza kugumira zvinangwa zvenyu, pfarai ngekuona mabetserhwe amuri kuizwa ndi Djehovha uye kukomborera kaari kuita kupeta kenyu masimba. (2 Ako. 4:7) Kana mukasama kuremba mucatambira makomborero akakura.—Aga. 6:9. w23.05 paji. 31 mandi. 16-18

Djehovha nguwa dzese anopsvaka mishobo ye kupangidza kuti anoda aseenzi ake uye kuti anopfara maningi no zvaanoita. Bhaibheri rinobhuya ngezve migariro miiri yekuti Djehovha akabvunza Djesu kuti iyena ainga ari Mwana Wake anodiwa uye anopfarirhwa. (Mat. 3:17; 17:5) Imwimwi maizopfarira here kuzwa Djehovha ecibhuya zviro zvakadai ngezvenyu? Nyamasi uno, Djehovha aabhuyi nesu hope no hope, asi iyena anoreketa na isusu eciseenzesa Bhaibheri. “Tingazwa” izwi ra Djehovha ecititendera patinoerenga masoko a Djesu mu Mavhangeri. Djesu akateedzera zvakakwana unhu wa Baba ake. Hino patinoerenga masoko e upfawi a Djesu aakabvunza anhu asikazi kukwana, tinodikana kuona kuti ndi Djehovha arikutibvunza masoko awona. (Juau 15:9, 15) Kana tikabatana no zvinetso azvirei kuti aticiripi kutenderhwa na Djehovha. Asi kusiya izvona, iwona ndi mukana wekupangidza rudo redu kuna Mwari uye rugondo redu kaari.—Tig. 1:12. w24.03 paji. 28 mandi. 10-11