Setembro

Mwari akapasa simba Djesu kuti akwanise kupedza matambudziko ese ku anhu. Zvishamiso zvaakaita zvinopangidza kuti Djesu ano simba rekukwanisa kugadzirisa matambudziko atainga tisikazombokwanisi kugadzirisa tiri tega. Ngo muezaniso, iyena ano simba rekutisudzunura—pa citema no zvese zviya zvinokonzerhwa no citema, matenda no rufu. (Mat. 9:1-6; Aro. 5:12, 18, 19) Zvishamiso zvakaizwa ndi Djesu zvinopangidza kuti iyena ano simba rekuporesa “mishobo yese” ye matenda nokumutsa aya akafa. (Mat. 4:23; Juau 11:43, 44) Iyena ano simba rekuonerera madutu ano simba uye kusudzunura anhu pa zviito zve madhimoni. (Mark. 4:37-39; Ruka 8:2) Tinopfara maningi ngekuziya kuti Djehovha akapasa Mwana wake simba rekuita zviro zvese izvi andizvopi! Isusu ticagara no rugondo rese rekuti Umambo wa Mwari ucaunzisa makomborero akawanda pa nyika. Zvishamiso zvakaizwa na Djesu paainga ari pa nyika zvinopangidza zviro zvaacaita hinga Mambo we Umambo wa Mwari. w23.04 paji. 3 mandi. 5-7

Kana imwimwi muri mu ungano yakakura uye momutsa nyara kakawanda asi motama kupaswa mukana, zvinoita hingana kuti muitisi uri kuita kuda kake. Asi musaime kuedza kudaira. Mungagadzirira mhinduro dzakawanda pa musangano umwe na umwe. Kana mukasama kudainzwa pakutanga ke fundo, imwimwi munonga mucino mukana we kupasazve mhinduro. Pamunogadzirira Fundo ye Murindiri, onai kuti ndima imwe na imwe iri kubatana kudini no musoro we fundo. Nge kuita kudaro, imwimwi mucakwanisa kupasa mhinduro dzakanaka pa fundo yese. Kusiya izvona, imwimwi mungakwanisa kunyasa kugadzirira kuti mukwanise kudaira mu mandima anoreketa ngezve zviro zvakadzika, e kuti kajinji kakhona anoshupha kupanganidza. Ngei? Ngekuti pamweni anhu akawanda aamutsi nyara pa mandima awona. Asi kana mukakonerhwa kupasa mhinduro, mumasure me kuedza pa misangano dzakawanda, mungaitei? Cedzai no muitisi musangano usati watanga, momubvunza kuti ndaizopfarira kupasa mhinduro pa ndima yakati. w23.04 mapaji. 21-22 mandi. 9-10

Zuzee wainga asikanonoki kuteerera nhungamiriro dza Djehovha, uye izvona zvakaita kuti agare mwamuna wakanaka. Pa migariro mitatu yatinoziya, iyena wakatambira nhungamiriro dza Mwari dzinocokuita no mhuri yake. Katatu kese, iyena wakazwira nokukasika, kunyazi izvona zvaireya kuti waidikana kuita cinjo dzakakura. (Mat. 1:20; 2:13-15, 19-21) Ngekuteerera nhungamiriro dza Mwari, Zuzee wakadziirira, wakatsigira uye wakariritira Mariya. Tino rugondo rekuti izvona zvakaita kuti rudo uye rureremedzo raizwa Mariya kuna Zuzee zvitunhudzirike maningi! Amuna, imwimwi mungateedzera muezaniso wa Zuzee ngekupsvaka nhungamiriro dze mu Bhaibheri pese pamunoriritira mhuri yenyu. Kunyazi zvecidikana kuita cinjo, pamunoteerera mazano ari mu Bhaibheri, imwimwi munonga mecipangidza kuti munoda mukadzi wenyu uye munobambisa mucato wenyu. Hanzvadzi imweni inogara ku Vanuatu yaano makore anodarika 20 yawakwa, inoti: “Mwamuna wangu paanopsvaka uye kuteerera nhungamiriro dza Djehovha, rureremedzo rangu kaari rinorumbwa recitunhudzirika. Inini ndinozwa ndakacengeteka uye ndinogonda zvisananguro zvaanoita.” w23.05 paji. 21 ndi. 5

Adjudha aya paaozibuda ku Bhabhironi aizogara “anhu acena” kuna Djehovha. (Dhe. 7:6) Asi zviri pamhene kuti kana ecida kupfadza Djehovha, aona aidikana kuita cinjo dzinganani.Akawanda e Adjudha aya akabarirhwa ku Bhabhironi ainga adjairana no mushobo wekurangarira we Abhabhironi. Paa padarika makore 70 mumasure mekuti Adjudha e kutanga ahwirira ku Israeri, Mutungamiriri Neemiya wakanyangadzwa maningi paakaona kuti ana akabarhwa ku Israeri aazi kuzoguma pakufundira mureketero we Adjudha. (Dhe. 6:6, 7; Nee. 13:23, 24) Masoko akawanda a Mwari ainga akatarhwa mu Cihebheru. Hino ana aya aizofundira kudini kuda nokunamata Djehovha sezvo asikakwanisi kuzwisisa mureketero iwona? (Esdra 10:3, 44) Zviri pamhene kuti Adjudha aya aizodikana kuita cinjo dzakakura mu upenyu, asi zvaizonga zviri nyore kuita cinjo idzona kudai ari ku Israeri kekuti kunamata kakacena kaihwirinzwazve padoko no padoko.—Nee. 8:8, 9. w23.05 paji. 15 mandi. 6-7

Kunyazi mutori no cido uye makatonyasa kugadzirira, zvinotsukwarisa kuti mungatosongana no zvinetso pakugumira zvinangwa zvenyu. Ngo muezaniso, “zviro zvinoitika tisikakariri” nguwa dzimweni zvingatisiya tisina nguwa yekudzadzisa zvinangwa zvedu. (Mup. 9:11) Kana kuti dambudziko ringatisiya tecidzirhya mwoyo uye tisina simba. (Zvie. 24:10) Ngekuti tiri anhu asikazi kukwana tingakwanisa kuita zviro zvakashata zvingaita kuti tisadzadzise zvinangwa zvedu. (Aro. 7:23) Kana kuti tingazwa takaremba. (Mat. 26:43) Asi cinyi cingatibetsera kuti tishingirire zvinetso kana kuti zuwa rinoshupha? Kusongana no zvinetso pamunonga meciedza kugumira cinangwa azvidikani kuita kuti imwimwi murembe. Bhaibheri rinopangidza pamhene kuti kunyazi tecisongana kakawanda no zvinetso tingakwanisa kumuka toenderera mberi. Uye isusu tino rubetso ra Djehovha. Patinorumbwa tecienderera mberi kunyazi tecisongana no zvinetso, tinopangidza Djehovha kuti tinoda kumupfadza. Uye Djehovha anopfara maningi nge kumuonai mecipeta masimba kuti mugumire zvinangwa zvenyu! w23.05 paji. 30 mandi. 14-15

Kugara pionero kungabetsera mudjaha kuona kuti ungabata kudini anhu ese ngo mushobo wakanaka uye kuti ungaseenzesa kudini zvakanaka mare yaanoona uye osama kuigastari maningi. (Afi. 4:11-13) Mushobo wakanaka wekutangisa basa re mu nguwa yakadzara ngewe kugara pionero we rubetso, uye izvona zvakaita kuti agadzirire kugara mapionero e nguwa dzese. Basa re upiyonero ringakwanisa kufungura mikana yakawanda kuti museenze mu nguwa yakadzara, hinga muezaniso kuseenza pa basa rekuwaka kana kuti pa Bheteri. Zvaizonga zvakanaka kuti mwanarume wese mu ungano agare no cinangwa cekukwaniriswa kuti aitire zvakawanda hama no hanzvadzi ngekugara mukuru. Bhaibheri rinobhuya kuti anarume anopeta masimba kuti agare no ubaba uwona arikuseenza no simba kuti agare no “basa rakanaka.” (1 Ti. 3:1) Kutanga, hama inodikana kumbokwaniriswa kuti iseenze hinga mubati anoseenzera. Abati anoseenzera anobetsera akuru pakucengeta hama dze mu ungano ngo mushobo wakasiyana-siyana. Akuru kunyazi abati anoseenzera ndi anhu anodzidodosa, anoseenzera hama no hanzvadzi uyewo ndi aparidzi anoshingaira mu basa re kuparidzira. w23.12 paji. 28 mandi. 14-16

Mambo Djosiya wainga ano makore 16 paakatanga kukhwedera dhuze na Djehovha. Iyena waida kufunda zvakawanda ngezva Djehovha uye kuita kuda Kake. Asi upenyu wainga usiripi nyore nguwa dzese kuna mambo wecidjaha uu. Djosiya waidikana kugara no ushingi kuti akwanise kudziirira kunamata ke cokwadi. Uye ndizvo kamare zvaakaita! Iyena wainga ano makore 20 paakatanga kubvisa kunamata ke kunyepa mu nyika. (2 Mak. 34:1-2) Kunyazi imwimwi muciri djaha, mungakwanisa kuteedzera Djosiya uye kufunda ngezva Djehovha uye ngezve mawara Ake anoshamisa. Izvi zvicaita kuti mude kudzipira kuna Djehovha. Asi cisananguro ici cingabata-bata kudini upenyu wenyu we zuwa no zuwa? Luke, wakabhabhatidzwa paainga ano makore 14, unoti: “Kubvira zvino kuenda mberi, inini ndicakanda basa rangu kuna Djehovha pa mbuto yekutanga mu upenyu wangu uye ndicapeta masimba kuti ndipfadze mwoyo wake.” (Mark. 12:30) Mungagara no cokwadi cekuti mucakomborerhwa maningi kana mukasanangura kuita zvimwezvo! w23.09 paji. 11 mandi. 12-13

Muphostori Pauro paakatarira tsamba Atesaronika, ungano iyona yainga isina gore yaayaumbwa. Pamweni anarume ainga agadzwa ainga asina maesperiyensiya uye pamweni akaita zviro ngo mushobo usiriwopi. Kunyazi zvakadaro, awona aisisira kureremedzwa. Maka-maka paya patinonga tiri dhuze no dambudziko guru, ticadikanawo kugonda akuru e ungano uye kuteerera nhungamiriro dzaanonga atipasa. Pamweni atizokwanisi kutambira nhungamiriro dzinobva ku sedhi mundiyari kana ku Bheteri, ndiyo ndaa zvinokosha maningi kuti tifundire kuda uye kureremedza akuru e mu ungano yedu kubvira zvino. Azvinei no zvicaitika, ticarumbwa takabamba, uye atikandi ndangariro dzedu pakusama kukwana ke hama dzedu, tinodikana kukanda ndangariro dzedu pakuti Djehovha na Djesu ndiwo ari kutungamirira hama idzi dzakatendeka. Kuita hingana kapaseti yaidziirira musoro we musurudado, kariro yedu ye ruponeso inodziirirawo ndangariro dzedu. Tinoita kuti tiziye kuti apana catingapaswa no nyika ino cinobetsera. (Afi. 3:8) Kariro yedo inotibetsera kuti tirumbwe takaterama uye takabamba. w23.06 mapaji. 11-12 mandi. 11-12

Aya anopurutana “mwanakadzi benzi” anodikana kusanangura kuti acatendera here kana kuti haiwa mupiko waanoita. Tino zvikonzero zvakanaka zvekuti tisaite uhure. “Mwanakadzi benzi” unoti: “Mvura ye kuba inotapira.” (Zvie. 9:17) “Mvura ye kuba” ii icinyi? Bhaibheri rinoezanisa kuita zve pamaponde ke mwamuna no mukadzi hinga mvura inotonhorera. (Zvie. 5:15-18) Mwanarume no mwanakadzi akacata zviri pa mutemo, angagumira mupfaro wekuita zve pamaponde zvakasisira mukati me mucato wawo. Asi zvakasiyana maningi no “mvura ye kuba.” Mvura iyona inoreya kuita zve pa maponde kusikazi kucena uye kunorambidzwa. Anhu anoita izvona, anozviita mucifise-fise hinga mbavha inoedza kuba isikaoneki nge munhu. Uye anhu paanorangarira kuti apana munhu ucaziya zvaanonga aita, “mvura ye kuba” inoita hingana irikutapira maningi. Cishaishi cakakura maningi kurangarira kudaro! Djehovha anoona zvese. Apana ciro cinorhwadza kupinda kuruza kutenderhwa na Djehovha. Ndiyo ndaa, apana “cinotapira” pakupsvetekerhwa ikona kunotsukwarisa.—1 Ako. 6:9, 10. w23.06 paji. 22 mandi. 7-9

Munodikana kuitei kana mukazwa kuti amuciripi kunamata no mwoyo wese uye kana kuti amucaripi kupfarira kuparidzira hinga zvamaiita kare? Musarangarire kuti amucina mwiya mucena wa Djehovha. Hinga anhu asikazi kukwana, mazwiro edu angakwanisa kucinja. Kana amuciripi kushingaira hingana kare, rangarirai ngezve muezaniso we muphostori Pauro. Iyena waipeta masimba kuti ateedzere Djesu, asi Pauro waizviziya kuti pamweni paya wainga asikazogari no cido cakabamba cekuita zviya zvaidikanika kuti aite. Pauro wainga akagadzirira kuita basa rake re kuparidzira azvinei nokuti wainga ecizwa kudini. Nge mushobo umwewo, musaite zviro maererano no mushobo wamuri kuzwa. Garai makagadzirira kuita zviro zvakanaka kunyazi musikadi kuzviita. Kana mukarumbwa meciita zviro zvakanaka, no kuhamba ke nguwa mazwiro enyu angacinja uye ogara akanyasa kunaka.—1 Ako. 9:16. w24.03 mapaji. 11-12 mandi. 12-13

Isusu tingapangidzawo rudo ku hama no hanzvadzi patinoita ushamwari uye patinopedza nguwa tiri pamwepo. (2 Ako. 6:11-13) Akawanda edu tiri mu ungano dzinoumbwa no hama no hanzvandzi dzakarerhwa nge mushobo wakasiyana-siyana uye ano mawara akasiyana-siyana. Tingabambisa rudo redu kaari kana tikakanda ndangariro dzedu pamawara akanaka. Patinofundira kuona amweni hinga mushobo waanooniwa na Djehovha, isusu tinonga tecipangidza kuti tino rudo kaari. Rudo ricagara ciro cinokosha pa nguwa yedambudziko guru. Rangaridzai zvinoteera, dambudziko guru paricatanga Djehovha acaticengetedza kudini? Onai nhungamiriro dzakapasa Djehovha ku anhu ake paakarhwiswa no Abhabhironi munguwa ye kare. Iyena akati: “Endai anhu angu, pindai mu makwartu enyu, mofunga misuwo. Findarai ke nguwa doko dakara kutsamwa kapera.” (Isa. 26:20) Pamweni nhungamiriro idzi dzingazoseenzawo pa nguwa ye dambudziko guru. w23.07 mapaji. 6-7 mandi. 14-16

Ziikanwai hingana munhu anozwisisa. Dzibvinzisei kuti: ‘Anhu anondiona hingana munhu unozwisisa, usikaomeseri amweni uye unotenderawo maonero e amweni here? Kana kuti awona anondiona hingana munhu unoomesera amweni uye usikaazwisisi? Kana kuti ndinopurutana maonero e amweni uye ndinokasika kucinja paya pazvinodiwa?’ Azvinei no mushobo watinopangidza kuazwisisa tinonga tecipangidza kuti tinoteedzera Djehovha na Djesu dakara papi. Zviro pazvinocinja mu upenyu wedu tinodikana kugara anhu anozwisisa uye anokasika kudjairana no mugariro upsva. Cinjo idzi dzingakwanisa kumutsa dambudziko ratainga tisikakariri. Tingakwanisa kubatana no dambudziko re uthongo kana kuti tingakwanisa kubatana no dambudziko re kutama mare kana kuti dambudziko re zve matongerhwe e nyika zvingaita kuti upenyu wedu ubambirire kushupha. (Mup. 9:11) Nguwa dzimweni, kucinjwa ke basa ratainga tapaswa kuti tiite zvingagara cinetso katiri. Zvinokwanisika kuti tidjairane no migariro ipsva kana tikaita zviro zvirongomuna: (1) kutendera mugariro uripo, (2) kuringira zviri mberi, (3) kukanda ndangariro dzedu pa zviro zvakanaka, uye (4) kuitira amweni zviro zvakanaka. w23.07 mapaji. 21-22 mandi. 7-8

Muphorofita Dhanyeri wainga ari djaha Abhabhironi paakamutora hinga musungwa kuti aende naye kure ke nyika yaakabarirhwa ye Djerusarema. Asi kunyazi Dhanyeri wainga ari djaha, iyena wakashamisa akuru e Bhabhironi. Awona akaona “zvinooneka no madziso” kuti Dhanyeri wainga “akanaka, ano ciimo cakanaka” uye waibva ku mhuri inokosha maningi. (1 Sam. 16:7) Ndiyo ndaa Abhabhironi aida kumurowedza kuti aseenzere pa nyumba ya mambo. (Dha. 1:3, 4, 6) Djehovha aida maningi Dhanyeri nge ndaa ye mushobo we munhu waakasanangura kugara. Dhanyeri wainga ano makore anokwana kuita 20 no padoko Djehovha paakamubvunza kuti iyena wainga akaezana na Nowa uye na Djobo. Hino Djehovha aiona djaha Dhanyeri hinga munatsi hingana zvainga zvakaita Nowa na Djobo akaseenzera Djehovha ke makore akawanda. (Gen. 5:32; 6:9, 10; Djobo 42:16, 17; Ezek. 14:14) Dhanyeri wakararama ke nguwa yakareba eciseenzera Djehovha no mupfaro uye Djehovha aimuda ke nguwa yese ii.—Dha. 10:11, 19. w23.08 paji. 2 mandi. 1-2

Kana imwimwi muri kuda kutenga nyumba, zvezvirokwazvo imwimwi maizoenda panyumbepo moringira makwartu ese uye monyasa kuona magarire ayo.Tingaitawo zvimwezvo patinonga tecierenga uye kufunda Bhaibheri. Kana tikaerenga Bhaibheri tisikakwarakwatisi, pamweni tingatokwanisa kuzwisisa zviro zvinganani—“zviro zvekutanga zvematarhwa macena a Mwari.” (Aheb. 5:12) Hingana zviya zvamaizoita, kuenda koona “mukati” me nyumba musati maitenga, imwimwi munodikana kufunda Bhaibheri makangwarira kuti munyase kurizwisisa zvakanaka. Umwe we mushobo wekufunda Bhaibheri, ngewe kuona kuti matii aro akabatana kudini no amweni. Petai masimba kuti musagume basi pakuzwisisa zvokwadi zvamunotenda, asi muziyewo kuti ngei imwimwi mecizvitenda. Kuti tinyase kuzwisisa Soko ra Mwari , tinodikana kufunda zvokwadi zvakadzika zve Bhaibheri. Muphostori Pauro wakabvunza hama dzake kuti dzifunde Soko ra Mwari dzakangwarira kuti anyase kukwanisa “kuzwisisa zvinozwi kupamhama, kureba, kukura no kudzika” ke cokwadi. Nge kuita izvi, awona aizokwanisa kugara “akadzika midzi uye akabamba” mu kutenda kawo. (Aef. 3:14-19) Uye isusu tinodikanawo kuita zvimwezvo. w23.10 paji. 18 mandi. 1-3

Mu Bhaibheri, tinogumira miezaniso yakawanda ye anhu akapangidza mwoyo unononoka kutsamwa. Munorangarira kudini ngezve kugara no urongwa wekufunda uye mokwarakwatisa zvakawanda? Ngo muezaniso, Dhavhidhi wakasanangurhwa kuti agare mutungamiriri we Aisraeri aciri djaha kamare uye iyena waidikana kuetsera ke makore akawanda kuti azogare mambo. Muezaniso umweni ngewa Simeyau na Ana. Awona akanamata Djehovha akagondeka paaietsera kuuya ka Mesiya. (Ruka 2:25, 36-38) Pamunonga mecifunda ngano idzi, dziitei mibvunzo inoteera: Ngei munhu uu wakapangidza mwoyo unononoka kutsamwa? Kugara no mwoyo unononoka kutsamwa kakabetsera kudini munhu uu? Ndingamuteedzerawo kudini? Imwimwi mungafundawo kubva ku anhu aya asikazi kupangidza mwoyo unononoka kutsamwa. (1 Sam. 13:8-14) Pamunoongorora miezaniso ii, dzibvunzisei kuti: ‘Ngei munhu uu asikazi kugara no mwoyo unononoka kutsamwa? Zviro zvipi zvakashata zvakaitika ngokutama kupangidza mwoyo unononoka kutsamwa?’ w23.08 paji. 25 ndi. 15

Muphostori Pedru wainga akagondeka; iyena aazi kusiya kuti ciro cipi kana kuti munhu upi hake amuitise kuti asiye kuteera Djesu. Ngo muezaniso, iyena wakapangidza kugondeka Djesu paakabhuya zviro zvekuti afundi amweni aazii kuzvizwisisa. (Juau 6:68) Anhu akawanda aiteera Djesu akasiya kuita izvona uye aatozi kuetsera kupanganidzirhwa zvaaida kureya. Asi Pedru aazi kuita kudaro. Iyena wainga akagondeka uye wakabhuya kuti Djesu basi ndiyena wainga ano “masoko e ruponeso.” Djesu aizviziya kuti Pedru pamwepo no afundi amweni aizomusiya. Kunyazi zvakadaro, Djesu akabvunza Pedru kuti aizviziya kuti iyena waizorumbwa akatendeka. (Ruka 22:31, 32) Djesu aizviziya kuti “mwiya unoda asi nyama aina simba.” (Mark. 14:38) Ndiyo ndaa, Djesu aambozi kuda kusiya muphostori wake unodiwa kunyazi iyena wainga akambobhuya kuti aamuzii. Uye zvese zvinopangidza kuti mumasure mekuti Djesu amutswa, iyena akadzipangidza kuna Pedru ari ega. (Mark. 16:7; Ruka 24:34; 1 Ako. 15:5) Izvi zvakabambisa maningi Pedru ngokuti iyena wainga akatsukwara nge ndaa ye zviro zvaainga aita! w23.09 paji. 22 mandi. 9-10

Mwari anorekerera zvishaishi zve aya anokutenda maari. Iyena anonyasa kurekerera uye aazogari eciedzurira zvishaishi zve munhuwo. (Pis. 32:1, 2) Kuna Djehovha, munhuwo munatsi uye aana caanoshaisha nge ndaa ye kutenda kake. Izvirokwazvo kuti Abrahamu, Dhavhidhi no aseenzi amweni akatendeka a Djehovha akadainzwa kuti anatsi, kunyazi zvakadaro, awona akarumbwa ari anhu asikazi kukwana uye ashaishi. Asi nge ndaa ye kutenda kaainga anako, Djehovha akaaona hinga anhu asikashaishi, maka-maka kana eciezaniswa no aya ainga asikamunamati. (Aef. 2:12) Mu tsamba yaakatarira Aroma, muphostori Pauro wakapanganidza kuti tinodikana kugara nokutenda kana tecida kugara shamwari dza Mwari. Hino, kuita hingana Abrahamu uye Dhavhidhi, kana tino kutenda muna Djehovha tingakwanisawo kugara shamwari dzake. w23.12 paji. 3 mandi. 6-7

Nyamasi uno, Akristu ese ano makomborero e kupasa cibairo kuna Djehovha eciseenzesa nguwa, simba uye zviro zvawo kuti atsigire zvese zviri kuizwa no Umambo wa Mwari. Isusu tingapangidza kuti tinokoshesa maningi makomborero aya patinonamata Djehovha tecimupasa zvakanakisisa zvedu. Muphostori Pauro wakareketa zviro zvakawanda zvatinodikana kuita kuti tinamate Djehovha. (Aheb. 10:22-25) Zviro izvona zvinobatanidza kuita munamato nguwa dzese kuna Djehovha, kuparidzira anhu amweni ngezve kariro yedu, kupinda misangano no ungano uye kubambisana “maka-maka [teciona] zuwa ra [Djehovha] recikhwedera.” Mu bhuku ra Zvakapangidzwa tinoerenga ngezve ngirozi ya Djehovha yakabhuya kuti: “Namatai Mwari!” Iyona yakabhuya izvona kairi kese kuti ipangidze kuti i ciro cinokosha maningi. (Zvak. 19:10; 22:9) Isusu atidi kukanganwa zvese zvatiri kufunda ngezve tempro huru ye ku mwiya uye ngezve cikomborero cinoshamisa catinaco cekunamata Mwari wedu mukuru Djehovha! w23.10 paji. 29 mandi. 17-18

Tese isusu tinoda ‘kurumbwa tecidanana.’ Asi tinodikana kuedzurira kuti Djesu akabhuya kuti ‘rudo re ajinji raizotonhora.’ (Mat. 24:12) Djusu ainga asikabhuyi kuti akawanda e afundi ake aizosiya kupangidzira rudo ku umwe na umwe wawo. Asi tinodikana kungwarira kuti kutama rudo kuri mu nyika kusapfuridzire mushobo watinobata hama dzedu. Tecirangarira izvona, ngatione mubvunzo umweni unoti: Tingakwanisa kudini kuziya kuti rudo redu ku hama dzedu rakabamba? Umwe we mushobo wekuziya kuti rudo redu ku hama dzedu rakabamba kamare, i kuongorora zvatinoita mu migarire yakasiyana-siyana ye upenyu. (2 Ako. 8:8) Izvi zvinonyasa kudjeka pa masoko akarekethwa no muphostori Pedru, iyena wakati: “Kudarika zvese, idai maningi umwe na umwe wenyu, ngokuti rudo rinofukidza zvitema zvakawanda.” (1 Ped. 4:8) Kana kuti kuremba no kutama kukwana ke amweni, kungaedza rudo ratinaro. w23.11 paji. 10-11 mandi. 12-13

Tinonga tisikapangidzi muezaniso wa Djesu we rudo mu ungano kana tikada hama dzimweni uye totama kuda dzimweni. Izvirokwazvo kuti tinoda hama dzese, asi aripo atinonyanya kuda maningi hinga zvakaizwawo na Djesu waida maningi afundi amweni. (Juau 13:23; 20:2) Asi muphostori Pedru unotiedzurira kuti tinodikana kupeta masimba kuti “tide hama dzedu”—kunyasa kubatana hinga hama dze kubarhwa nadzo no hama no hanzvadzi dzese. (1 Ped. 2:17) Pedru wakapangidza kuti zvinokosha “kuda maningi umwe na umwe wedu no mwoyo wese.” (1 Ped. 1:22) Kuda no “mwoyo wese” uku kunoreya kuda kunyazi zvecitoshupha kamare. Ngo muezaniso, maizoitei kana munhu akamunyangadzai? Cokutanga catingarangarira ngece kumuhwirinzirawo, pane kumupangidzira rudo. Asi Pedru wakafunda na Djesu kuti maitiro akadaro aapfadzi Djehovha. (Juau 18:10, 11) Pedru wakatara kuti: “Musahwirinzire cakashata no cakashata kana kutuka no kutuka. Pane kudaro, komborerai.” (1 Ped. 3:9) Kana imwimwi mukada maningi hama dzenyu mucadzipangidzira upfawi uye mucadzizwisisa. w23.09 mapaji. 28-29 mandi. 9-11

Tinoshamisika nge kuona mwana mudoko ecikura pa nguwa doko basi. Uye izvi zvinoitika zvega. Asi izvi, zvakasiyana no kukura pakunamata, ngekuti ikona akuitiki kega. (1 Ako. 13:11; Aheb. 6:1) Kuti munhu agare no ushamwari wakabamba na Djehovha, iyena unodikana kupeta masimba. Kusiya izvona, iyena unoda rubetso re mwiya mucena wa Djehovha kuti agare no mawara akanaka, asakurire mishobo ye kuita zviro uye agadzirire ubaba waanozogara nawo mu nguwa ye mberi. (Zvie. 1:5) Djehovha akasika anhu kuti agare mwanarumwe kana kuti mwanakadzi. (Gen. 1:27) Zviri pamhene kuti mwanarume no mwanakadzi akasiyana mwiri, asi paripozve paakasiyana. Ngo muezaniso, Djehovha akaita mwanarume no mwanakadzi no ubaba wakasiyana uye akapasa umwe na umwe uzii uye cipo caizoabetsera kuti akwanise kuita ubaba wawo.—Gen. 2:18. w23.12 paji. 18 mandi. 1-2

Kodi Djesu aida kuti amweni aseenzese zina ra Baba ake here? Zviri pamhene kuti honde. Atungamiriri amweni e magereja aitendera kuti kubhuya zina ra Mwari kainga kuri kutama kupangidza rureremedzo, asi Djesu aazi kusiya kuti tsika ii isikatsamiri mu Bhaibheri imuitise kuti asakudze zina ra Baba ake. Zuwa rimweni, Djesu akaporesa mwanarume umweni wainga ano madhimoni waigara ku muthana we Agerasa. Anhu akathya maningi Djesu zvekuti awona akadeketera kuti abude mu mutanha uwona. (Mark. 5:16, 17) Kunyazi zvakadaro, Djesu aida kuti anhu e mutanha uwona aziye zina ra Mwari. Hino Djesu akabvunza mwanarume uya waiinga aporesa kuti andiyepi Djesu ainga amuitira izvona, asi Djehovha ndiye ainga amuitira. (Mark. 5:19) Djesu ainga ecida kuti zina ra Baba ake riziikanwe mu nyika yese! (Mat. 24:14; 28:20) Patinoita zviro izvona, tinosiya Mambo wedu Djesu Kristu akapfara. w24.02 paji. 10 ndi. 10

Zvakanaka maningi kugara dii re sangano ra Djehovha mu mazuwa ano anoshupha. Nyika ino pairi kubambirira kushata, Djehovha anotipasa mhuri ye ku mwiya yakabatana ye hama no hanzvadzi. (Pis. 133:1) Djehovha anotibetserawo kuti tigare no mhuri yakabamba uye inopfara. (Aef. 5:33–6:1) Uye iyena anotipasa ungwaru watinoda kuti tikwanisane no kuora mwoyo, tizwe takapfara. Tinodikana kupeta masimba kuti tirumbwe teciseenzera Djehovha takatendeka. Ngei? Ngekuti nguwa dzimweni tinganyangadzwa nge zviro zvinorekethwa uye zvinoizwa no amweni. Uye zvingatishuphirawo maningi kubatana no zvishaishi zvedu kamare, maka-maka patinoita cishaishi cimweco kakawanda. Pano migariro mitatu yatinodikana kushingirira mu basa ra Djehovha, (1) hama kana hanzvadzi painotishaishira, (2) mwamuna kana mukadzi paanotiodza mwoyo, uye (3) patinoora mwoyo nge zvishaishi zvedu kamare. w24.03 paji. 14 mandi. 1-2

Pamweni paya, imwimwi mucazwa maesperiensiya e hama no hanzvadzi dzakasanangura kuita zvakawanda mu basa ra Djehovha. Pamweni idzona dzakatopinda Cikora ce Aziisi e Umambo kana kutocinja ecienda ku mbuto inodiwa aparidzi akawanda. Kana mugariro wenyu wecitendera, mungagarawo no zvinangwa zvakadai. Anhu a Djehovha nguwa dzese anopsvaka mikana yekuita zvakawanda mu basa re kuparidzira. (Zvii. 16:9) Asi zvakadini kana musikakwanisi kuita izvona pa nguwa ino? Musarangarire kuti imwimwi amukoshi kudarika hama dziya dzinoita zvakawanda. Cinokosha ngecekuti munodikana kurumbwa mecishingirira. (Mat. 10:22) Musambokanganwe kuti Djehovha anopfara maningi no zviya zvamungaita maererano no mugariro wenyu uye zvamunokwanisa. Ndizvona zvicamubetserai kuti murumbwe meciteera Djesu mumasure me kubhabhatidzwa.—Pis. 26:1. w24.03 paji. 10 ndi. 11

Djehovha anogondesa kuti kana tikacinyuka iyena acatirekerera. (Pis. 86:5) Hino, kana tikacinyukadi kamare pa zvishaishi zvatakaita, tingagara no rugondo rokuti Djehovha ari kubhuya cokwadi cekuti iyena atotirekerera Edzurirai kuti Djehovha aatikumbiri zvakawanda uye aatiomeseri. Iyena aambotikumbiri zviya zvatisikakwanisi kumuitira. Iyena anokoshesha ciro cipi haco catinomuitira asi teciciita no mwoyo wese. Kusiya izvona, imwimwi munganyasa kurangarira ngezve miezaniso ye anhu e mu Bhaibheri akaseenzera Djehovha no mwoyo wese. Ngo muezaniso, rangarirai ngezve muphostori Pauro, iyena wakaseenza no simba ke makore akawanda. Wakaita rhwendo ke makirometro akawanda uye wakabetsera kuumba ungano dzakawanda. Asi mugariro we upenyu wake pawakacinja, iyena ainga asikacakwanisi kuparidza kakawanda hingana zvaaita kare. Hino Djehovha akasiya kukoshesa zvaiizwa ndi Pauro here? Haiwa. Pauro wakarumbwa eciita zvaaikwanisa uye Djehovha akamukomborera. (Zvii. 28:30, 31) Nge mushobo umwewo, zvatingaitira Djehovha zvingacinja no kuhamba ke nguwa. Asi zvinonyanya kukosha i zvikonzero zvinoita kuti timuseenzere. w24.03 paji. 27 mandi. 7, 9

Djesu akatisiira muezaniso wekuti titeedzere kubva pa minamato yake kamare yaakaita kuna Djehovha. Paaiita basa rake re kuparidzira, Djesu aiita munamato nguwa dzese. Iyena aidikana kutodzipasa nguwa yekuita munamato ngekuti ainga akabatikana maningi uye ainga akatenderedzwa ngo anhu akawanda. Iyena aitomuka cemacibesi-besi kuti aone nguwa yekuita munamato. (Mark. 1:35) Zuwa rimweni, iyena akaita munamato usiku wese asati aita cisananguro cinokosha maningi. (Ruka 6:12, 13) Uye usiku asati afa, eciziya kuti ainga ari dhuze kuti abatane no dii rinoshupha re basa rake, Djesu akaita munamato kakawanda. (Mat. 26:39, 42, 44) Muezaniso wa Djesu unotifundisa kuti kunyazi takabatikana maningi tinodikana kupsvaka nguwa yekuita munamato. Kuita hingana Djesu tinodikana kuronga nguwa yekuita munamato—zvingaita cemacibesi-besi kana kuti tisati tawata. Patinoita izvona, tinonga tecipangidza kuna Djehovha kuti tinokoshesa maningi cipo ce munamato. w23.05 paji. 3 mandi. 4-5

Onai soko rekuti “rakadururhwa” mu tsamba ya nyamasi. Referensiya imweni ye Bhaibheri inopanganidza soko iri hinga “mvura irikupopoma yeciuya katiri.” Muezaniso uu unonyasa kupanganidza zvakanaka mushobo unoda Djehovha akadzodzwa! Uye awona anoziya kuti “anodiwa na Mwari.” (Djud. 1) Muphostori Juau wakapangidza mazwiro ake paakatara kuti: “Onai kuti Baba akatipangidzira rudo rakakura kudini, nge kuita kuti tidainzwe ana a Mwari!” (1 Juau 3:1) Asi Djehovha anoda akadzodzwa basi here? Haiwa, Djehovha akapangidza kuti anoda isusu tese. Ndicipi cipangidzo cikuru ce rudo ra Djehovha? Rusudzunuro—ciitiko cikuru ce rudo mu nyika yese!—Juau 3:16; Aro. 5:8. w24.01 paji. 28 mandi. 9-10

Vhersikuro ii, inopangidza ciro cimwenizve cakabetsera Dhavhidhi paainga ecithya: Kunyazi upenyu pawainga uri pa ngozi, iyena wairangarira zviya zvaaizoizirhwa na Djehovha. Dhavhidhi waizviziya kuti Djehovha aizomuponesa pa nguwa yakasisira. Kusiya izvona, Djehovha ainga akabvunza Dhavhidhi kuti waizogara mambo unoteera we Aisraeri. (1 Sam. 16:1, 13) Kuna Dhavhidhi, zvese zvaigondeswa na Djehovha zvaitoita hingana kuti zvatoitika. Djehovha akagondesa kumuitirei? Isusu atietseri kuti Djehovha atidziirire pa matambudziko ese. Kunyazi zvakadaro, zvinetso zvipi hazvo zvatingasongana nazvo mu nyika ino, tingagonda hedu kuti Djehovha acazvipedza zvese mu nyika ipsva. (Isa. 25:7-9) Zvezvirokwazvo, Musiki wedu ano simba re kumutsa akafa, re kuporesa matenda, uye kutsakatisa azondi edu ese.—1 Juau 4:4. w24.01 paji. 6 mandi. 12-13

Rangarirai zvikonzero zvakaita kuti mudzipire uye mubhabhatidzwe. Imwimwi makatora matanho aya ngekuti maida kugara ku dii ra Djehovha. Edzurirai zviro zvakamubetsera kuti mukwanise kuona kuti mainga magumira cokwadi. Imwimwi makaziya kuti Djehovha ndiani uye makatanga kumuda, kumureremedza hinga Baba ekudenga. Imwimwi makasakurira kutenda uye kakamuitisa kuti mucinyuke. Rudo renyu kuna Djehovha rakamuita kuti musiye kuita zviro zvakashata uye motanga kuita zviro zvinopfadza Mwari. Imwimwi makazwa runyararo pamakaziya kuti Djehovha amurekerera. (Pis. 32:2) Imwimwi makatanga kupinda misangano uye makatanga kubvunza amweni ngezve zviro zvinokosha zvamakafunda. Hinga Mukristu wakadzipira uye wakabhabhatidzwa, zvino imwimwi muri kuhamba mu gwanza ro upenyu uye makasanangura kurumbwa meciita zvese zvamunokwanisa kuti murumbwe mecihamba mu gwanza iri. (Mat. 7:13, 14) Ngatirumbwei takabamba, tisikazungunuki tecida Djehovha uye tecizwira nhungamiriro dzake. w23.07 paji. 17 ndi. 14; paji. 19 ndi. 19

Kunyasa kurangarira munamato wamakaita pamakadzipira kuna Djehovha, ndikona kucamupasai simba kuti mukunde muedzo upi hawo. Ngo muezaniso, imwimwi maizoda munhu unonga awaka kana kuwakwa here? Zviri pamhene kuti haiwa! Imwimwi makagondesa kuna Djehovha kuti amuzoiti zviro zvakadaro. Kana imwimwi mukatama kusiya kuti mazwiro akashata apinde mu mwoyo menyu, amuzogari no basa rekuda kuabvisa. Ngekudaro, imwimwi munonga ‘musikapindi’ mu “gwanza re anhu anoita zvakashata.” (Zvie. 4:14, 15) Kunyasa kurangarira ngezve muezaniso wa Djesu kungatibetsera maningi pa mugariro iwona, iyena ainga akagadzirira kupfadza Baba ake nguwa dzese. Uyewo kuita hingana Djesu, isusu tinodawo kupfadza Mwari. (Mat. 4:10; Juau 8:29) Cokwadi nge cekuti miedzo yamucabatana nayo, icamupasai mukana kuti mupangidza kuti imwimwi munoda ‘kurumbwa meciteera’ Djesu. Uye imwimwi mungagara no rugondo rekuti Djehovha acamubetserai kuti muite izvona. w24.03 mapaji. 9-10 mandi. 8-10