Mareferensiya e Urongwa we Musangano Basa Redu uye Kurarama
MBUDZI 7-13
UPFUMI UNOBVA MU SOKO RA MWARI | REVHITIKO 10-11
“Kuda Katinoita Djehovha Kunodikana Kupinda Kuda Katinoita Mhuri Yedu”
it-2 paji. 371
Zvisikatenderhwi
Muriro uye Rusenzi Risikatenderhwi. Pana Revhitiko 10:1 soko re Cihebheru rekuti zar (re cikadzi, za·rahʹ) rinoseenzeswa pane cokuita no ‘muriro wainga usikazi kutenderhwa na Djehovha,’ asi ana a Aroni aizwi Nadhabhi na Abhiyu akaseenzesa muriro uu pamberi pa Djehovha, ndiyo ndaa, Djehovha akaauraya eciseenzesa muriro. (Re 10:2; Nu 3:4; 26:61) Mu masure mazvo, Djehovha akati kuna Aroni: “Iwewe no ana ako aunawo audikani kumwa vhinyu kana zvimweni zvinomwiwa zvinoraradzisa, pamunopinda mu tenda re kuunganira, kuitira kuti musafe. Nhungamiriro ii icagara iripo ku zvibarirhwana zvenyu zvese. Izvi zvicasiyanisa ciro cakacena no ciro cisikazi kucena, uye ciro cakasvipa no cakacena, uye zvicafundisa Aisraeri nhungamiriro dzese dzaakabvunzwa na Djehovha eciseenzesa Mozesi.” (Re 10:8-11) Izvi zvinopangidza kuti Nadhabhi na Abhiyu anga akararadza uye kuraradza uku kakaaita kuti awona apisire muriro usikazi kutenderhwa. Kusatenderhwa ke muriro uu pamweni kainga kuri panguwa yaakaupisira, pa mbuto kana pa mushobo wekuupisira, kana kuti rusenzi raakapisira rainga rakasiyana no riya rinorekethwa pana Ekisodho 30:34, 35. Awona aazi kurekererhwa ngokuti akazviita akararadza.
w11 7/15 mapaji. 31-32 ndi. 16
Makapinda mu—Zororo ra Mwari Here?
Aroni, mukoma a Mozesi, akasongana no dambudziko rakakura nge ndaa ye zvakaizwa no ana ake airi, Nadhabhi na Abhiyu. Rangarirai kuti iyena akazwa kudini ana ake paakaurayiwa nge ndaa ye kupisira muriro usikatenderhwi na Djehovha. Zviri pamhene kuti kufa kaakaita kakaita kuti asacedzezve no abereki awo. Asi azvizi kugumira apona basi. Eciseenzesa Mozesi, Djehovha akabvunza Aroni no ana ake akagondeka kuti “Musapisike misoro yenyu, musamwese macira enyu [mucicema], kuti musafe uye kuti Djehovha asatsamwire ungano yese.” (Re. 10:1-6) Masoko aya ari pamhene. Kuda katinoita Djehovha kunodikana kupinda kuda katinoita anhu e mu mhuri yedu asikazi kugondeka.
Kupsvakisisa Upfumi uri mu Soko ra Mwari
w14 11/15 paji. 17 ndi. 18
Tinodikana Kugara Takacena pa Zviro Zvese Zvatinoita
Kuti tigare anhu akacena, tinodikana kunyasa kurangarira zvinorekethwa mu matarhwa uye kuita zviya zvatinokumbirhwa ndi Mwari kuti tiite. Ngo muezaniso, cimborangarirai nge zve ana a Aroni, Nadhabhi na Abhiyu, awo akaurayiwa nge ndaa ye kupisira “muriro usikatenderhwi”, pamweni ngekuti ainga akararadza. (Re. 10:1, 2) Onai zvakabhuya Mwari kuna Aroni. (Erengai Revhitiko 10:8-11.) Mavhersikuro aya ari kuda kureya here kuti atidikani kumwa vhinyu kana zvimweniwo zvinoraradzisa tisati taenda ku musangano we ciKristu? Cimborangarirai izvi: Isusu atiripi pasi pe Mutemo wa Mozesi. (Aro. 10:4) Mu nyika dzimweni, hama dzedu dzinomwa vhinyu dzisikanyanyisi padzinonga dzecirhya dzisati dzaenda ku misangano. Pa paskwa paiseenzeswa makopo marongomuna e vhinyu. Djesu paakatanga cirangaridzo, akaita kuti apostori ake amwe vhinyu yaiimirira ngazi yake. (Mt. 26:27) Bhaibheri rinorambidza kumwisa doro uye kuraradza. (1Ako. 6:10; 1Ti. 3:8) Uye aKristu akawanda akasanangura kusambomwa zvinoraradzisa kana aakuda kuita zviro zvekunamata ngokuti hana dzawo adziatenderi. Kunyazi zvakadaro, zviro zvinosiyana nge nyika no nyika, uye cinodikanwa ngecekuti aKristu asiyanise “zviro zvakacena no zviro zvisikazi kucena” kuitira kuti agare akacena hingana zvinodiwa na Mwari.
it-1 paji. 135 ndi. 4
Zvinyama
Kurambidzwa kurhya zvinyama uku kaisenza basi ku aya ainga ari pasi pe mutemo wa Mozesi, ngokuti Revhitiko 11:8 inoti: “Azvizi kucena kamuri”, zvecida kureya ku Aisraeri. No kubviswa ke Mutemo uu pecisenzeswa cibairo ce rufu ra Djesu, kurambidzwa uku kakabviswa uye zvaakuita kurhya zvinyama zvese hingana zvakaziiswa Noa mu masure me kuparadzwa ke nyika no mvura.—Ako 2:13-17; Ge 9:3, 4.
MBUDZI 14-20
UPFUMI UNOBVA MU SOKO RA MWARI | REVHITIKO 12-13
“Tinofundei pa Mitemo Yakaringana no Nhenda yo Mapere”?
wp18.1 paji. 7
Rakasaririra kana kuti Ritori Mberi ke Nguwa Yaro?
• Kukanda anorhwara kawo oga.
Mutemo wa Mozesi waibhuiya kuti anhu ano mapere aidikana kukandwa kawo oga. Anhu akawanda paakarhwara nhenda dzinopaswana makore aakudarika 700, arapi ndipo paakatangawo kusenzesa mushobo uu we kurapa uye na nyamasi uno uciri kuseenzeswa.—Revhitiko ndima 13 ne 14.
wp16.4 paji. 9 ndi. 1
Maizviziya Here?
Adjudha e kare aithya nhenda yo mapere yaiitika makore akhonewo. Nhenda ii yaikuwadza tsinga dze anhu zvekuti aitoremara uye aitogara cigono. Painga pasina munhu aiziya mutombo we mapere. Hino, ese ainga ano nhenda ii aidikana kugara kawo oga, uye aidikana kudainzira kuti anhu aziye kuti ano mapere.—Revhitiko 13:45, 46.
it-2 mapaji. 690-691 ndi. 11
Mapere
Pa macira no nyumba. Nhenda yo mapere yaikwanisawo kubata macira. Iyona pamweni yaikwanisa kubuda pa macira ngo kuwaphadza, uye painga pano urongwa we kukanda ciro cipi haco cabathwa no mapere kaco coga. Asi kana nhenda ii ikabambirira pa ciro icona, uye cogara no mawara o bhurumu no e kupsvuka zvaipangidza kuti i nhenda yo mapere yakashatisisa uye ciro cabathweco no nhenda ii caidikana kupiswa. (Re 13:47-59) Kana pa paredhi ye nyumba pakabuda zviro zve mawara akaita bhurumu uye akapsvuka, mupristi aidikana kupa mutemo kuti nyumbeyo isagarhwe ke cinguwa. Pamweni paya zvaitodikana kubvisa mapuwe akabathwa nge nhenda yo mapere uye mukati me nyumbeyo maiparhwa zvobva zvaiendeswa kumbuto isikazi kucena, kunza ke guta. Nyumbeyo payaiibathwazve no nhenda yo mapere iyona yaiputswa uye zvese zvayo zvaipsvethwa ku mbuto isikazi kucena. Asi, kune nyumba dzaizwi dzakacena kana kuti dzainga dzisisina nhenda yo mapere, panga pano urongwa wekudzicesa. (Re 14:33-57) Anhu anosobhuya zvakasiyana-siyana nge ndaa yo mukhaindi uu we mapere waibata macira no nyumba, asi aunyasi kuziikanwa kuti wakaita maitirei.
Kupsvakisisa Upfumi uri mu Soko ra Mwari
w04 5/15 paji. 23 ndi. 1
Mafundo Makuru e Bhuku ra Revhitiko
12:2, 5—Ngei kubereka mwana kaiita kuti mwanakadzi agare “asikazi kucena”? Nhengo dze muiri dzekubereka nadzo dzakaizwa kuti dzibudise munhu akakwana. Hino, nge ndaa yo citema catakagara nhaka, mwana aibarhwa asikazi kukwana uye ano citema. Nguwa ‘yekusacena’, yakadai hingana kubereka, kwenda ku mwedzi, no kubuda ke urume, kaaita kuti Aisraeri aedzurire kuti ainga akagara nhaka yo citema. (Revhitiko 15:16-24; Pisarema 51:5; Aroma 5:12) Nhungamiriro dzainga dzinocokuita no kuceneswa ke Aisraeri dzaiabetsera kuti aone kuti paidikana rusudzunuro raizoseenzeswa pakurekerera zvitema zve anhu uye kuita kuti anhu agarezve akakwana. Ngo kudaro, Mutemo kaari wainga uri ‘muperekedzi waiaendesa kuna Kristu.’—Agaratiya 3:24.
wp18.1 paji. 7
Rakasaririra kana kuti Ritori Mberi ke Nguwa Yaro?
• Nguwa ye kuita ucekeri.
Mutemo wa Mwari waibhuya kuti mwana we mwanarume waidikana kuizwa ucekeri aane mazuwa masere e kubarhwa. (Revhitiko 12:3) Ku ana abva kubarhwa, ngazi yawo inonga yaakuhambirana zvakanaka mu masure mekudarika sumana imwe. Kudai ucekeri waizwa sumana imwe isati yapera, mwana waizobuda ngazi yakawanda. Mu nguwa dze Bhaibheri kainga kusina mishobo ye kurapa ye mazuwa ano. Hino, zvainga zvakanaka maningi kuetsera sumana imwe kuti ana aizwe ucekeri.
MBUDZI 21-27
UPFUMI UNOBVA MU SOKO RA MWARI | REVHITIKO 14-15
“Kuti Tinamate Djehovha Tinodikana Kugara Takacena”
it-1 paji. 305
Kusamba
Nge ndaa yo zvikonzero zvakawanda Aisraeri ese aidikana kusamba. Uya aihwirirazve kubatana no nhenda yo mapere, uya aibata zviro zvabathwa no munhu “aibuda ngazi yakawanda,” mwanarume kana ecibuda urume, mwanakadzi wabva ku mwedzi, kana kuti munhu wese anonga abva kuita zve pa bonde ainga asikazi “kucena” uye aidikana kusamba. (Re 14:8, 9; 15:4-27) Munhu ainga ano mutumbi pa nyumba uye oubata aigara asikazi “kucena” uye aidikana kudzicenesa ne mvura yo kucenesa. Uya wairamba kutondoedza nhungamuriro ii ‘waidikana kubviswa pakati pe ungano, nge ndaa yo kuti anonga asvipisa mbuto yakacena ya Djehovha.’ (Nu 19:20) Kudzicenesa uku kaiseenzeswa ngo mushobo we kufanikidzira kuitira kupangidza kudikanwa ke kucena pamberi pa Djehovha. (Pis 26:6; 73:13; Isa 1:16; Eze 16:9) Kudzisambidza no soko recokwadi ra Djehovha, zvecifanikidzwa nge mvura, rinosimba rekucenesa.—Aef 5:26.
it-2 paji. 805 ndi. 5
Kwenda ku Kumwedzi
Mwakadzi waionekwa asikazi kucena kana akabuda ngazi ke mazuwa akawanda, kana kuti “ecibuda ngazi kupindiridza medida,” zviro zvese zvaaiwatira no paaigara zvaigara zvisikazi kucena, no anhu ese aibata zviro izvi zvisikazi kucena. Mu masure mekuti waima kubuda ngazi yakawanda, waidikana kuita mazuwa manomwe, uye ndipo paaigara akacena. Pa zuwa recisere, iyena waiyendesa magora mairi kana njiwa mbiri doko ku mupristi, kuti arekererhwe, ecipangidza cimwe cezvinyama izvi kuna Djehovha hingana cibairo ce citema uye cimweni hingana cibairo cakapiswa.—Re 15:19-30; onai KUCENA, KUCENESA.
it-2 paji. 724
Mbuto Yakacena
2. Tenda re kuunganira, uye tempuro no kuhamba ke nguwa. Zviro zvese, zvinobatanidza ruwanze re tabhernakuro no maruwanze ese e mu tempuro, yainga iri mbuto yakacena. (Eki 38:24; 2Mak 29:5; Zvi 21:28) Pa ruwanze painga pano artari ye zvibairo no basia re kobre. Ii yainga iri midziyo yakacena. Zviya zvainga zvakacena basi ndizvo zvaidikana kusenzeswa pa ciitiko cipi haco pa ruwanze re tabhernakuro; zvimwezvoo, apana aidikana kupinda pa ruwanze re tempuro ari mumamiriro ekusacena. Ngo muezaniso, mwanakadzi asikazi kucena waisadikanapi kubata ciro cipi haco cakacena, kana kupinda mu mbuto yakacena. (Re 12:2-4) Zviri pamhene kui, kunyazi mumamiriro e kurumbwa asikazi kucena e Aisraeri aionekwa hingana asvipisa tabhernakuro. (Re 15:31) Aya aipasa zvibairo kuti aceneswe pa nhenda yo mapere aiuya nazvo pa musuwo pe ruwanze. (Re 14:11) Kana munhu asikazi kucena akarhya nyama ye cibairo co kupindirana inonga iri ya Djehovha, munhu uu waidikana kuuraiwa.—Re 7:20, 21.
Kupsvakisisa Upfumi uri mu Soko ra Mwari
it-3 paji. 150 ndi. 1
Nzee
Pa kugadzwa ke apristi mu Israeri, Mosesi akabvunzwa kuti atore dii yo ngazi yo bira ye kugadza naro oitsurutsuta pa nzee yo muoko kwawo ya Aroni no ye ana ake, uye pa gunwe guru re muoko kwawo no ro murenje kwawo, zvecipangidza kuti zviya zvaanonga azwa, basa raanonga aita no muhambiro wawo zvaidikana kupangidza zvaiitika panguwa yakhoneyo. (Re 8:22-24) Zvimwezvo, Mutemo waibhuya kuti mupristi aidikana kukanda dii re ngazi yo bira yaipaswa hinga cibairo ce ndaa, no mafuta anonga apaswa ku muceto ko nzee yo munhu anonga aceneswa pa nhenda yo mapere. (Re 14:14, 17, 25, 28) Urongwa wakaezana na uu, unooneka pa zviya zvaizwa no mwanarume waida kurumbwa eciseenzera tenzi wake ke upenyu wake wese. Pakadaro, tenzi wake aidikana kumutora oenda naye padhuze no musuwo uye omubora nzee. Ciitiko ici cekubora nzee, caipangidza pamhene cido ce muranda uu ce kurumbwa ecipurutana uye kuzwira tenzi wake.—Eki 21:5, 6.
g 1/06 paji. 14, bhokisi
Zviro Zvinoodza—Shamwari uye Muzondi!
BHAIBHERI RINOBHUYA NGE ZVIRO ZVINOODZA HERE?
Bhaibheri rinobhuya nge zve “nhenda ye mapere pa nyumba” recireya ciwakwa ce nyumba. (Revhitiko 14:34-48) Anhu anosobhuya zvakasiyana-siyana nge ndaa yo mukhaindi uu we “mapere waibata nyumba,” asi aunyasi kuziikanwa kuti wakaita maitirei. Kunyazi zvakadro, Mutemo wa Mwari waibhuya kuti aridzi o nyumba aidikana kubvisa mapuwe ainga abathwa no nhenda ii, no kupara mukati mayo uye kupsveta zviro zvese zvabathwa no mapere kunza ke guta, “ku mbuto isikazi kucena.” Kana nhenda ii ikahwirirazve, nyumba yese yaidikana kuzwi yakasvipa uye yaidikana kuputswa. Nhungamiriro idzi dzaipangidza rudo risikacinji ra Djehovha ku anhu ake uye kuti anorangarira nge zve kugarika kawo kakanaka.
MBUDZI 28–MAVHIZA 3
UPFUMI UNOBVA MU SOKO RA MWARI | REVHITIKO 16-17
“Zuwa re Kurekerera Rinotifundisei”?
w19.11 paji. 21 ndi. 4
Zvatinofunda Kubva mu Bhuku ra Revhitiko
Erengai Revhitiko 16:12, 13. Cimboedzai kurangarira zvaiitika pa Zuwa re Kurekerera: Mupristi anopinda mu tabhernakuro. Uku ndi ke kutanga kupinda mu Mbuto Yakacenesesa uye aizopindazve kairi pazuwa irona. Mu muoko umwe, iyena anobata mudziyo wakadzara no rusenzi inonuhwirira, uye muoko umweni akabata mudziyo we oro we kupisira rusenzi wakadzara no masimbe e muriro. Anomboimira mberi ke djira riri pakati pe Mbuto Yakacena no Mbuto Yakacenesesa. Ecipangidza rureremedzo rakakura, anopinda mu Mbuto Yakacenesesa oimira padhuze no areka ye citenderano. No gwanza re kufanikidzira, anonga ari pamberi pa Djehovha Mwari! Mupristi anotanga kukanda rusenzi yakacena pa masimbe, uye mu Mbuto Yakacenesesa munodzara no kunuhwirira kakanaka. Pedzepo, iyena acapindazve mu Mbuto Yakacenesesa no ngazi ye zvibairo zve zvitema. Onai kuti iyena anotanga apisa rusenzi asati apasa ngazi ye zvibairo zve zvitema.
w19.11 paji. 21 ndi. 5
Zvatinofunda Kubva mu Bhuku ra Revhitiko
Tinofundei pamushobo wekuseenzesa rusenzi kaiizwa no mupristi pa zuwa re kurekerera? Bhaibheri rinopangidza kuti minamato ye aseenzi a Djehovha akagondeka yakaita hingana rusenzi. (Pis. 141:2; Zva. 5:8) Taona kuti mupristi aipangidza rureremedzo paaiendesa rusenzi pamberi pa Djehovha. Zvimwezvoo, patinoita munamato kuna Djehovha tinozviita no rureremedzo rakakura. Tinotenda maningi kuti musiki we zviro zvese anotitendera kuti tirekete naye, uye togara padhuze naye hingana zvinoita mwana kuna baba. (Tg. 4:8) Anoda kuti tigare shamwari dzake! (Pis. 25:14) Makomborero aya anodikanwa maningi katiri zvekuti atitombodi kumutsamwisa.
w19.11 paji. 21 ndi. 6
Zvatinofunda Kubva mu Bhuku ra Revhitiko
Edzurirai kuti mupristi aitanga apisa rusenzi asati apasa ngazi ye zvibairo. Aiita izvi kuti agare no zvirokwazvo zvekuti Djehovha aizomupfarira paaizopasa zvibairo. Tinofundei? Djesu paainga ari panyika, aidikana kuita ciro cimwe caidikanwa maningi—asati apa upenyu wake hinga cibairo—kuti anhu aponeswe. Cinyi caaidikana kuita? Aidikana kurarama upenyu wake wese pa nyika akaperera uye akagondeka kuitira kuti Djehohva azotambira cibairo cake. No kuita izvi, Djesu aizopangidza kuti kurarama maererano no zvinodiwa na Djehovha ndikona kunonyanya kudikanwa. Aizobudisa pamhene—ucangamire wa Baba wake—Kureya kuti aizopangidza kuti matongero a Djehovha akanaka uye e unatsi.
Kupsvakisisa Upfumi uri mu Soko ra Mwari
it-1 paji. 284 ndi. 2
Azazeri
Maererano no zvakapanganidzwa no mupostori Pauro, Djesu akapasa upenyu wake wakakwana eciitira zvitema zve anhu ese, iyena wakaita zvakawanda kupinda zvinokwaniswa kuizwa no “ngazi ye mikono ye mabira uye no ye mbudzi”. (Ahe 10:4, 11, 12) Iyena wakaseenza hingana “mukono we mbudzi”, ‘akathwara nhenda dzedu,’ “akabaiwa nge ndaa yo zvishaishi zvedu.” (Isa 53:4, 5; Mt 8:17; 1Pe 2:24) Iyena ‘akathwara’ zvitema zve anhu ese anotenda mu cibairo cake. Akapangidza urongwa wa Mwari we kupedza zvitema zvacose. Ngo makwanza aya, “mbudzi ya Azazeri” inoimirira cibairo ca Djesu Kristu.
w14 11/15 paji. 10 ndi. 10
Ngei Tecidikana Kugara Takacena?
Erengai Revhitiko 17:10. Djehovha akarayira Aisraeri kuti asarhye “ngazi cero ipi hayo.” Akristu anodikanawo kusiya kuseenzesa ngazi—azvinei kuti ngo ye—zvinyama here kana kuti ye munhu. (Zviito 15:28, 29) Atidi kuti Mwari ‘atitsamwire’ otibvisa muungano yake. Tinomuda uye tinoda kumupurutana. Kunyazi tikarhwara zvekuti uyai muzoone, atitenderi kuita zvinodiwa no anhu asikadi Djehovha uye asikamupurutani. Honde, Tinoziya kuti anhu acatishora nge ndaa yo kupurutana katinoita mutemo wa Mwari we kusiya ngazi, asi tinosanagura kupurutana Mwari. (Djudha 17, 18) Cinyi cicatibetsera kuti ‘tishinge’ kuramba kutunhudzirhwa ngazi kana kuirhya?