Mareferensiya e Urongwa we Musangano Basa Redu uye Kurarama
GUMIGURU 2-8
UPFUMI UNOBVA MU SOKO RA MWARI | EKISODHO 39-40
“Mozesi Akanyasa Kutondoedza Nhungamiriro Dzaakatambira”
w11 9/15 mapaji. 27-28 ndi. 13
Munonyasa Kuziikanwa na Djehovha here?
Kusiyana na Khora, Mozesi ainga ari “munhu akapfawa maningi kudarika anhu ese ainga ari panyika.” (Num. 12:3) Iyena akapangidza upfawi uye kudzidodosa no kutsunga kake kuita zvaakabvunzwa na Djehovha. (Eki. 7:6; 40:16) Apana cinopangidza kuti Mozesi ainga asikapindirani no maitiro a Djehovha kana kuti aimbotsamwa no nhungamiriro dzaaipaswa na Djehovha. Ngo muezaniso, Djehovha akamubvunza zvese zvaidikanwa kuizwa pakuwakwa ke tabhernakuro, zvakadai hinga mawara e shinda uye kuwanda ke zviro zvaidikana kugara pa macira e tenda. (Eki. 26:1-6) Nyamasi, kana tikapaswa nhungamiriro dzakawanda no umwe mutungamiriri mu sangano ra Mwari, nguwa dzimweni tingakwanisa kutsamwa. Kunyazi zvakadaro, Djehovha mutungamiriri akakwana, anopasa asenzi ake mabasa okuita ecigonda nawo. Paanotipasa nhungamiriro dze zviro zvatinodikana kuita, anozviita no cido cakanaka. Asi onai kuti Mozesi aazi kutsamwira Djehovha ngokuti aimubvunza zvekuita zvakawanda, ecirangarira kuti Djehovha aimuonera pasi kana kuti ainga asikadi kuti asenzesewo ndangariro dzake. Asi Mozesi akagara no cokwadi cokuti agadziri e tabhernakuro aizoita “izvona kamare” maererano no zvaakabvunzwa na Mwari. (Eki. 39:32) Uku ndiko kunozwi kudzidodosa! Mozesi aiziya kuti rainga riri basa ra Djehovha uye kuti iyena aindosenzeswawo kuriita.
w05 7/15 paji. 27 ndi. 3
Makatendeka mu Zviro Zvese Here?
“Mozesi ainga akatendeka,” inodaro Aheberu 3:5. Cinyi cakaita kuti muphorofiti Mozesi agare munhu akatendeka? Pakuakwa uye kurongwa ke tabhernakuro, “Mozesi akaita zvese; maererano no zvaainga abvunzwa na Djehovha, akaita izvona kamare.” (Ekisodho 40:16) Zvatiri anamati a Djehovha, tinopangidza kuti takatendeka ngo kumusenzera tecinyasa kumupurutana. Zve zvirokwazvo, izvi zvinobatanidza kurumbwa takagondeka kuna Djehovha patinonga ticisongana no miedzo yakakura. Kunyazi zvakadaro, kubudirira pakukunda miedzo yakakura andikopi kunopangidza kuti takandeka. Djesu akati “Munhu akatendeka mu zviro zvidoko akatendekawo mu zviro zvikuru, uye munhu asizi kururama pa zviro zvidoko mu zviro zvikuru aaziwo kururama.” (Ruka 16:10) Tinodikana kurumbwa takatendeka pa zviro zvinoita hingana zvidoko.
Kupsvakisisa Upfumi uri mu Soko ra Mwari
it-3 paji. 219 ndi. 5
Dehwe re Makondohwe
Aisraeri Aizorionerepi. Bhaibheri rinosenzesa soko re kuti taʹchash recida kureya mushobo we cinyama cinozwi makondohwe, pamweni tingadzibvunzisa kuti Aisraeri aikwanisa kudini kuona dehwe re makondohwe. Kunyazi makondohwe, kajinji ecinyanya kuda kugara mu nharaunda ye Artika no Antartika, makondohwe amweni anotoda kugara ku mbuto dzinopisa. Mazuwa ano, makondohwe amweni aciri kugara mu Bahari re Mediterrâneo, no mu mvura inopisira. No kuhamba ke nguwa, anhu akaita kuti numero ye makondohwe ipunguke, uye munguwa yo kare, zvinyama izvi zvainga zvakawanda mu Mediterrâneo uye mu Bahari Rekupsvuka. Mu gore ra 1832, bhuku re Dicionário da Bíblia Sagrada re Cingezi ra Calmet (paji. 139) rakati: “Kunooneka makondohwe mu mazvitsuwa zvakawanda zve bahari Rekupsvuka, rakatenderedza muceto we dunhu re Sinai.”—Onaiwo bhuku rakazwi The Tabernacle’s Typical Teaching, re A. J. Pollock, Londres, paji. 47.
w15 7/15 paji. 21 ndi. 1
Zvinodikanwa Here Kuti Ndiani Anoona Basa Ratinoita?
Tabhernakuro payakapera, gore “rakafukidza tenda rekuunganira, mbiri ya Djehovha yakadzadza tabhernakuro.” (Eki. 40:34) Izvi zvakanyasa kupangidza pamhene kuti Djehovha ainga apfarira basa rawo! Cimborangarirai kuti Bhezareri na Oriyabhi akazwa kudini pa nguwa iyona? Kunyazi hazvo mazina awo ainga asikazi kutarhwa pa zviro zvaakagadzira, awona akapfara maningi ngo kuziya kuti Mwari aikomborera kupeta masimba kaakaita. (Zvie. 10:22) Makore zvaaihamba, awona aipfara maningi no kuona zviro zvaakagadzira zvecirumbwa zvecisenzeswa pakunamata Djehovha. Paacamutswa mu nyika ipsva, Bhezareri na Oriyabhi acapfara maningi paacazwa kuti tabhernakuro yakaseenzeswa pakunamata ke cokwadi ke makore anokwana 500!
GUMIGURU 9-15
UPFUMI UNOBVA MU SOKO RA MWARI | REVHITIKO 1-3
Zvaiitisa kuti Paizwe Zvipo
it-3 paji. 120
Mipiro
Zvibairo zvinopiswa. Zvainga zviri zvibairo zvaiendeswa kuna Mwari ciri cese co mutero; apana waisara no dii ripi haro re cinyama caainga apira. (Onai Ato 11:30, 31, 39, 40.) Kuita izvi kaipangidza cikumbiro cawo kuna Djehovha cekuti atambire cibairo cawo, nge ndaa ye zvitema zvawo. Djesu, hinga “cibairo cinopiswa,” akadzipira kakakwana uye mu zviro zvese.
it-3 paji. 123 ndi. 5
Mipiro
Mipiro ye zvirimwa. Mipiro ye zvirimwa yaiizwa pamwepo no zvibairo zve runyararo, zvibairo zvakapiswa uye zvibairo zve citema, no ye zvibereko zvekutanga; nguwa dzimweni yaiizwa pake-pake. (Eki 29:40-42; Re 23:10-13, 15-18; Nu 15:8, 9, 22-24; 28:9, 10, 20, 26-28; ndi. 29) Zvaiizwa kuti atende Djehovha nge kuakomborera uye kuita kuti abudirire. Kajinji zvaidikana kutungamidzwa no mafuta uye no rusenzi. Mipiro ye zvirimwa yaipaswa zvakaita ufu wakamotsa, kana kuti zvakaita hinga pau yakaomeswa, zviro zvakabikwa, zvakaibviswa pa marata e kukocera kana kuti mupoto. Dii rimweni re cibairo raiiswa pa artari ye zvibairo zvakapiswa, dii rimweni rairhyiwa no apristi uye, mu cibairo ce runyararo, mupiri aibatanidzwawo. (Re 6:14-23; 7:11-13; Nu 18:8-11) Mu mupiro ye zvirimwa zvaaiendeswa pa artari zvainga zvisikadikani kukandwa isiti kana “uci” (pamweni zvecida kureya nge zve sharopi ye maonde kana kuti muto we micero) zvaizoita kuti zviwire.—Re 2:1-16.
it-3 paji. 121 ndi. 1
Mipiro
Zvibairo zve mubatanidzwa (kana kuti zvibairo zve runyararo). Zvibairo zve runyararo zvaitenderhwa na Djehovha zvaipangidza runyararo naye. Mupiri no mhuri yake aibatanidzwawo (pa ruwanze re tabhernakuro; maererano no tsika, paigadzira zvitumba pa mbuto yaiita mugano no Djira raitenderedza ruwanze rese; mu tempuro mainga muno mekurhyira). Mupristi aitungamirira aipaswa dii rimwe, uye apristi ainga ari pa basa aipaswawo dii rimwe. Djehovha, aitambira tsutsi cinonuhwirira ce mafuta aipiswa. Ngazi, yaiimirira upenyu, yaipaswa Djehovha, ngekuti upenyu unobva kaari. Ngokudaro, apristi, anamati, na Djehovha aita hingana ari pamwepo pakurhya, zvaipangidza ushamwari we runyararo. Munhu aipinda mu cibairo ici asikazi kucena (kusacena kupi hako kunorekethwa no mutemo) kana munhu anorhya nyama yakacengethwa padarika cinguwa (yaakuora) aidikana kubviswa pakati pe anhu ake. Iyena aizosvipisa cokurhya, ngekuti anonga asikazi kucena, uye ngokurhya zviya zvinozwi na Djehovha zvakasvipa, ecipangidza kusareremedza zviro zvicena.—Re 7:16-21; 19:5-8.
Kupsvakisisa Upfumi uri mu Soko ra Mwari
w04 5/15 paji. 22 ndi. 1
Mafundo Makuru e Bhuku ra Revhitiko
2:13—Ngei ‘cibairo cese’ caidikana kurungwa no munyu? Izvi zvainga zvisikaizirhwi kuti cibairo cakhona cinake. Munyika yese, munyu unoseenzeswa kuti ucengetese zviro. Zvecida airungisa zvibairo kuti zvisakasike kuora.
it-2 paji. 246
Mafuta e Zvinyama
Cinoitisa kuti pagare no mutemo uu. Maererano no mutemo, ngazi no mafuta ye zvinyama zvaionekwa hinga zviro zva Djehovha basi. Ngazi ino upenyu, uwo unobva kuna Djehovha; hino, nge ya Djehovha. (Re 17:11, 14) Mafuta aionekwa hinga dii rakapfuma maningi mu zvinyama. Mupiro we mafuta e zvinyama, waipangidzira kuti zviro zvakanakisisa nge zva Djehovha, uya anopa zvakawanda, uye zvaizopangidza cido co munamati cekupasa zvakanakisisa zvake kuna Djehovha. Ngokudaro, ciutsi caitororeka pa nguwa yaipiswa mafuta aya, caiita hinga “zvekurhya” uye hinga “munuhwi unonuhwirira” kaari. (Re 3:11, 16) Hino, kurhya mafuta kainga kuri kuba zviro zvakaceneserhwa Mwari, kainga kuri kuputsa zvitenderhwa zva Djehovha. Kurhya mafuta yainga iri ndaa yaizoguma pakuuraisa. Kusiyana no ngazi, mafuta aikwanisa kuseenzeswa pakuita zviro zvimweni, kunyazi e cinyama cakafa cega kana kuti cakauraiwa no cinyama cimweni.—Re 7:23-25.
w04 5/15 paji. 22 ndi. 2
Mafundo Makuru e Bhuku ra Revhitiko
3:17. Mafuta aionekwa hinga dii rakanakisisa maningi kana kuti rakakora, zviri pamhene kuti kurambidzwa kurhya mafuta kaibambisira Aisraeri kuti rainga riri dii rakanakisisa ra Djehovha. (Genesi 45:18) Izvi zvinotiedzurira kuti tinodikana kupasa Djehovha zvakanakisisa zvedu.—Zvierengo 3:9, 10; Akorosi 3:23, 24.
GUMIGURU 16-22
UPFUMI UNOBVA MU SOKO RA MWARI | REVHITIKO 4-5
“Pasai Djehovha Zvakanakisisa Zvenyu”
it-3 paji. 122 ndi. 9
Mipiro
Zvibairo zvo ndaa. Zvibairo zvo ndaa zvaiizwawo nge ndaa yo citema, ngokuti mikhaindi yese ye ndaa inobatanidza citema. Zvibairo izvi zve zvitema, zvekuti zvaaita kuti anhu agare no ndaa, zvainga zvakasiyana no zvibairo zvimweni zvaipaswa. Izvona zvainga zvakasiyana ngokuti zvaizwa kuti zvipfadzise kana kuti kuhwirinza zvitenderhwa. Zvitenderhwa izvi zvaibatanidza zva Djehovha kana kuti zvo anhu ake, pazvaiputswa. Hino cibairo ce ndaa caipaswa kuti Djehovha asarumbwe akanyangadzwa nge daa yo zvitenderhwa zvakaputswa, kana kuti kuhwirinzwa ke zvitenderhwa kune aya ainga ashaisha ocinyuka, uye kuti asudzunurhwe pa mupanico nge ndaa yo citema cake.—Onai Isa 53:10.
w09 6/1 paji. 26 ndi. 3
Iyena Anorangarira Zvatinokwanisa no Zvatisikakwanisi Kuita
Zvecipangidza usisi una Djehovha, Mutemo waiti: “Kana asikakwanisi kuona bira, anodikana kuuya no njiwa mbiri kana kuti magora mairi kuna Djehovha hinga cibairo ce ndaa, nge ndaa ye citema caakaita.” (Vhersikuro 7) Kana Muisraeri akagara asina zvakawanda zvekuti aakwanisi kuona bira, Mwari aipfara kutambira zvimweni zvaaikwanisa kuona—njiwa mbiri kana kuti magora mairi.
w09 6/1 paji. 26 ndi. 4
Iyena Anorangarira Zvatinokwanisa no Zvatisikakwanisi Kuita
Kana munhu wakhona ainga asikakwanisi kunyazi kutenga shiri mbiri? Mutemo waiti: “Anodikana kuuya no ce gumi ce efa [inonga iri kirograma imwe basi] ye ufu wakamotsa hinga cibairo nge ndaa ye citema.” (Vhersikuro 11) Djehovha akasanangura kutendera aya ainga ari arombo kuti apase cibairo cisina ngazi. Ku Aisraeri, kugara murombo kainga kusikapingidziri munhu kuti arekererhwe zvitema kana kuti kugara mu runyararo na Mwari.
Kupsvakisisa Upfumi uri mu Soko ra Mwari
w16.02 mapaji. 29-30 ndi. 14
Kugondeka Kuna Mwari Kunobetsera Kuti Tigare no Usisi
Ngazvipi zvatingafunda pa muezaniso wa Natani? Cimborangarirai kuti imwimwi maziya kuti hama imweni, kana kuti shamwari yenyu yepadhuze yaita cishaishi cakakura. Mungada kurumbwa makagondeka kaari ngo kusama kuzvibvunza amweni. Asi kana mukaedza kufisa cishaishi cakhona, munonga mecipangidza kusagondeka kuna Mwari. Tinodikana kugondeka kuna Djehovha kudarika kuna anhu ese. Hingana zvakaizwa na Natani, garai no ushingi asi no unatsi. Kohomedzesai hama yenyu kana kuti shamwari yenyu kuti ipvsake rubetsero kune akuru. Kana akatora nguwa asati aenda kune akuru, imwimwi wene munodikana kuti murekete shwiro yakhona no akuru. Kana mukadaro munonga mecipangidzei? Kuti makagondeka kuna Djehovha. Uye munonga maitira zvakanaka munhu uya washaisha. Akuru ecikristu acaedza kubetsera munhu akadaro no upfawi uye kuita kuti agarezve no ushamwari na Djehovha.—Erengai Revhitiko 5:1; Agaratiya 6:1.
it-3 paji. 529 ndi. 1
Kucena
Zvinyama no Zvirimwa. Mikono ye n’ombe inotanga kuberekwa, mabira uye mbudzi yaionekwa hinga yakacena kuna Djehovha uye yainga asikadikani kusudzunurhwa. Yaidikana kupaswa hinga zvibairo, uye dii rimweni raidikana kupaswa apristi. (Nu 18:17-19) Zvibereko zvekutanga no zvegumi zvainga zvakacena, kutobatanidzawo zvibairo zvese no zvipo zvaiizwa mu mbuto yakacena. (Eki 28:38) Zviro zvese zvakacena kuna Djehovha zvainga zvisidikani kuseenzeswa ngo mushobo usikazi kucena. Muezaniso wazvo mutemo we cegumi. Kana mwanarume akacengeta cegumi, ngatiti ufu we trigu, pedzepo iyena kana kuti umwe we mu mhuri yake outora kuti auseenzese, mwanarumewo acagara no ndaa ye kupwanya mutemo wa Mwari we zviro zvicena. Kana munhu akaputsa mutemo we zviro zvakacena, iyena waidikana kupasa ku mbuto yakacena mupimo wakaezana, ecitunhudzirhwa 20%, uye aidikana kupasawo cibairo ce bira rakanaka. Izvi zvaiita kuti anhu areremedze zviro zvakacena zva Djehovha.—Re 5:14-16.
GUMIGURU 23-29
UPFUMI UNOBVA MU SOKO RA MWARI | REVHITIKO 6-7
“Kupangidza Kutenda”
w19.11 mapaji. 22-23 ndi. 9
Zvatinofunda mu Bhuku ra Revhitiko
Fundo ye cipiri: Tinoseenzera Djehovha ngokuti tinotenda zvaanotiitira. Kuti tinyase kuzwisisa fundo ii ngatimborekete nge zve zvibairo zve runyararo zvaipaswa no Aisraeri. Hingana zvatinoona mu bhuku ra Revhitiko, Muisraeri aikwanisa kupasa cibairo ce runyararo “ecipangidza kutenda.” (Re. 7:11-13, 16-18) Aidzisanangurira ega kupasa cibairo ici. Hino cainga ciri cibairo caipaswa ne munhu ecizvidira pacake ngekuti aida Mwari wake Djehovha. Cinyama cinonga cabairhwa, nyama yakhona yairhyiwa no munhu anonga apasa, mhuri yake, uye no apristi. Asi pane nhengo dzimweni dzaipaswa Djehovha basi. Ngadzipi?
w00 8/15 mapaji. 15-16 ndi. 15
Zvipo Zvinotenderhwa ndi Djehovha
Cibairo cimweni caipaswa ngokuti munhu aitozvidira ega cainga ciri cibairo cokupindirana, cinopanganidzwa pana Revhitiko kapituro 3. Zina rakhona rinoturukirhwa kuti “cibairo ce runyararo.” Mucihebheru, soko rekuti “runyararo” rinoreya zvinodarika kutama kugara no hondo. “Mu Bhaibheri rinoreya izvi, uye kugara mu runyararo na Mwari, kubudirira, mupfaro, uye kupfara,” rinodaro bhuku rinozwi Studies in the Mosaic Institutions (Estudos nas Instituições Mosaicas). Hino, zvibairo zve kupindirana zvaipaswa, haiwa kupsvaka runyararo na Mwari, asi kupangidza kutenda kana kuti kupemberera nge nda re runyararo rainga riri pakati pe aya ainamata Mwari akagondeka. Apristi no uya anonga aita cibairo ce kupindirana, airhya cibairo cakhona pasure pe kupasa Djehovha ngazi no mafuta. (Revhitiko 3:17; 7:16-21; 19:5-8) Ngo kuita zvese izvi, anhu aipasa zvibairo izvi, apristi uye Djehovha Mwari aiita hingana kuti airhya pamwepo, zvecipangidza ukama une runyararo pakati pawo.
w00 8/15 paji. 19 ndi. 8
Zvipo Zvokurumbidza Zvinopfadza Djehovha
Zvakadini no munhu anopasa cibairo cakhona? Mutemo waiti ani naani hake aiuya pa mberi pa Djehovha aidikana kugara akacena uye asizi kusvipiswa. Munhu anonga akasvipiswa nge ndaa ye ciro cipi haco aidikana kutanga apasa cibairo ce citema kana kuti ce ndaa kuti ahwirinze ukama wake wakacena na Djehovha kuitira kuti cibairo cake cinopiswa kana kuti cekupindirana citenderhwe Naye. (Revhitiko 5:1-6, 15, 17) Ngokudaro, tinokwanisa kuzwisisa kudikanwa ke kurumbwa tiine ukama wakacena na Djehovha here? Kana tecida kuti kunamata kedu kutenderhwe na Mwari, tinodikana kukasika kugadzirisa kuputswa ke mutemo kupi hako. Tinodikana kukasika kusenzesa cipo catakapaswa na Mwari—“anarume akuru e ungano” uye “cibairo ce rurekerero ce zvitema zvedu,” Djesu Kristu.—Djakobho 5:14; 1 Juau 2:1, 2.
Kupsvakisisa Upfumi uri mu Soko ra Mwari
it-2 paji. 148 ndi. 4
Muriro
Unocokuita no we mutabhernakuro no tempuro. Muriro waifanikidzira kunamata kaiizwa mu tabhernakuro uye no kuhamba ke nguwa mu tempuro. Macibesi ese no usiku, mupristi aidikana kupisira rusenzi pa artari yo rusenzi. (Eki 30:7, 8) Mutemo wa Mwari waibhuya kuti muriro we pa artari ye cibairo cinopiswa waidikana kurumbwa wecibaka. (Re 6:12, 13) Tsika ye Adjudha yekuti muriro we pa artari wakabatidzwa pakutanga na Mwari, zve zvirokwazvo aioneki mu matarhwa. Maererano no nhungamiriro dza Djehovha dzakapaswa Mozesi, ana e anarume a Aroni aidikana “Kukanda muriro pa artari no huni,” asati akanda cibairo pa artari. (Re 1:7, 8) Mu masure me kugadzwa ke upristi wa Aroni, uye mu masure me kuizwa zvibairo zve kugadzwa kawo, muriro wa Djehovha, wakabva mu gore pamusoro pe tabhernakuro. Muriro uu we cishamiso wakapangidzwa, haiwa kuti ubakidze huni dzainga dziri pa artari, asi kuti “upise cibairo no mafuta ainga ari pamusoro pe artari.” Hino, muriro waibaka pa artari pamweni wainga uri mubatanidzwa we muriro wakabva kuna Djehovha no muriro wainga waapo. (Re 8:14–9:24) Zvimwezvoo, muriro we cishamiso wakabva kuna Djehovha wakapisa cibairo pasure pemunato wa Saromoni pa kudimurhwa ke tempuro.—2Mak 7:1; onaiwo Ato 6:21; 1Mad 18:21-39; 1Mak 21:26, hinga umwe we muezaniso we cishamiso ce muriro wa Djehovha, pakutenda zvibairo zve asenzi ake.
si paji. 27 ndi. 15
Bhuku re Citatu re Bhaibheri—Revhitiko
(3) Mutemo waikumbira kuti paizwewo cibairo co citema caizwa no munhu asikadi. Mushobo we cinyama caisenzeswa hinga mupiro pa zvitema zvakadai, waitsamira pakuti ndiani waida kurekererhwa—mupristi here, anhu ese here, kana kuti munhuwo hake. Kusiyana no zvibairo zvakapiswa no zve runyararo, zvibairo zve citema zvaidikana kuizwa pasinei nokuti munhu aida kuzviita kana kuti haiwa.—4:1-35; 6:24-30.
GUMIGURU 30–MBUDZI 6
UPFUMI UNOBVA MU SOKO RA MWARI | REVHITIKO 8-9
“Cioneso ce Makomborero a Djehovha”
it-2 paji. 414
Kugadzwa
Mozesi akacenesa Aroni no ana ake, Nadhabhe, Abhiyu, Ereazar na Itamar (kana kuti akabhuya kuti awona adzicenese pacawo) mu basiya re kobre rainga riri pa ruwanzi uye akapfekedza Aroni zvipfeko zve upristi. (Nu 3:2, 3) Pedzepo, akapfeka zvipfeko izvi zvakarungama, Aroni akagadzwa hinga mupristi, zvipfeko izvi zvaiimirira mawara uye ubaba we basa rake. Photopo, Mozesi akadzodza tabhernakuro, midziwo yese no zvaisenzeswemo, uye artari ye kupisira, kutobatanidzawo basiya re kobre no zvese zvaisenzeswemo. Izvi zvaiceneswa kuti zvisenzeswe pa basa ra Mwari. Pakupedzesera, Mozesi akadzodza Aroni ngo kudurura mafuta mu musoro make.—Re 8:6-12; Eki 30:22-33; Mapis 133:2.
it-2 paji. 415 ndi. 8
Kugadzwa
Pa zuwa re cisere, mupristi akanyasa kukwaniriswa uye akagadzwa pa ubaba wake, akaita (pasina rubetso ra Mozesi) ke kutanga basa re kurekererhwa ke zvitema zve dzinza re Aisraeri. Irona raida kuceneswa, haiwa basi pa zvitema zvawo zvaagara anazvo asi nge ndaa ye musikazwa waakaita wekugadzira mufanikiso we oro, uwo wakatsamwisa Djehovha. (Re 9:1-7; Eki 32:1-10) Mu masure mekuti apristi aya abva kugadzwa apedza kuita basa iri rekutanga, Djehovha akapangidza kupfarira kake kugadzwa ke apristi ngo kuita kuti muriro ubve mugore rainga riri padenga pe tabhernankuro uye kuti upise zvese zvainga zvasara pa artari.—Re 9:23, 24.
w19.11 mapaji. 23-24 ndi. 13
Mafundo Makuru e Bhuku ra Revhitiko
Fundo re cirongomuna: Djehovha ari kukomborera dii re pa nyika re sangano rake. Rangarirai zvakaitika mu gore ra 1512 K.A.A. tabernakuro payakaimiswa pasi pe Dunhu re Sinai. (Eki. 40:17) Mozesi akatungamirira pa kugadza Aroni no ana ake e anarume kuti agare apristi. Aisraeri akaungana kuti aone apristi ecipa zvibairo zvawo zvekutanga zve zvinyama. (Re. 9:1-5) Djehovha akapangidza kudini kuti akapfarira kugadzwa ke apristi? Aroni na Mozesi paikomborera anhu, Djehovha akaita kuti muriro ubve kudenga wopisa zvese zvainga zvasara pa artari.—Erengai Revhitiko 9:23, 24.
Kupsvakisisa Upfumi uri mu Soko ra Mwari
w14 11/15 paji. 9 ndi. 6
Ngei Tinodikana Kugara Takacena
Mazuwa ano anhu a Djehovha ane zvaanofundawo pa nhungamiriro dzaikumbira kuti apristi aidikana kucenesa miiri yawo. Anhu atinofunda nawo Bhaibheri kajinji anoona kucena kunonga kakaita mbuto dzedu dzekunamatira no mapfekero atinonga takaita. Asi kucena ke apristi kunotibetserawo kuona kuti munhu wese unokwira pa dunhu ra Djehovha kuti amunamate anodikana kugara no “mwoyo wakacena.” (Erengai Mapisarema 24:3, 4; Isa. 2:2, 3.) Patinoitira Mwari basa rakacena, mwoyo yedu, ndangariro dzedu uye miiri yedu zvinodikana kugara zvakacena. Kuti tidaro, tinodikana kugara tecidziongora uye kana tikaona panoda kugadziriswa togadzirisa kuti tigare anhu akacena. (2 Ako. 13:5) Ngo muezaniso, munhu akabhabhatidzwa ano musambo we kuona zvipsverudzi kana pornografia anodikana kudzibvunzisa kuti, ndiri kupangidza kuti ndiri munhu akacena here? Zvadaro anodikana kupsvaka rubetso kuti asiye musambo uu wakashata.—Tg. 5:14.
it-3 mapaji. 17-18 ndi. 6
Mozesi
Mwari akaita kuti Mozesi agare mudairiri we citenderano co mutemo no Aisraeri, mbuto ye pamwoyo isikazi kumbogarhwa no munhu upi hake pamberi pa Mwari, kunza ka Djesu, mudairiri we citenderano cipsva. Mozesi wakamizira ngazi ye cibairo mu bhuku ro mutemo ecipangidzira kuti rainga riri rimwe “dii” re zviro zva Djehovha, uye anhu (aiimirira akuru) anga ari “dii” rimweni. Iyena akaerenga bhuku ro mutemo ku anhu zvekuti awona akadaira eciti: “Takagadzirira kuita zvese zvabhuiwa na Djehovha uye kuzvitondoedza.” (Eki 24:3-8; Ahe 9:19) Pa ubaba wake we mudairiri, Mozesi akagara no mukana wakanakisisa we kuonerera kuwakwa ke tabhernakuro no midziwo yayo maererano no zvaakabvunzwa na Djehovha, akagadza apristi, uye akadzodza tabhernakuro no mupristi mukuru Aroni no mafuta anodikanwa maningi. Pedzepo, akaonerera mabasa e kutanga e apristi.—Eki mandi. 25-29; Re mandi. 8, 9.