Mareferensiya e Urongwa we Musangano Basa Redu uye Kurarama
© 2023 Watch Tower Bible and Tract Society of Pennsylvania
JANERO 1-7
UPFUMI UNOBVA MU SOKO RA MWARI | DJOBO 32-33
Nyaradzai Aya Ari Kubatana no Kudzirhya Mwoyo
it-1 paji. 799
Eriu
Eriu wainga asikasananguri, uye ainga asiripi shamwari ye kunyepedzera. Kuita hingana Djobo, iyena waizviziya kuti wainga akaizwa no mataka, uye kuti we Masimba Ese ainga ari Musiki wake. Eriu wainga asina cinangwa ce kunetsa Djobo, asi wakabhuya naye hinga shamwari ye zvirokwazvo, ecidainza Djobo no zina kamare, zviro zvisikazi kuizwa na Erifaji, Bhiridhadhi uye Zofari.—Djob 32:21, 22; 33:1, 6.
w14 6/15 paji. 25 mandi. 8-10
Imwimwi Munoona Kusakwana ke Anhu Hinga Maonero Anoizwa na Djehovha?
8 Cingatibetsera kuti tigare no usisi i kuedzurira kuti hama dzedu dzimweni dzakaremba nge ndaa ye migariro inoshupha yakaita ingana cinetso ce uthongo, kuparadzana ke mhuri kana kuti dhepresau. Zvingaita kuti tingazogarawo pa mugariro umwewo. Asati apinda mu Nyika Yakapikirhwa, Aisraeri, ainga atambudzika maningi ku Edjipitu, akaedzurirhwa kuti ainga asikadikani “kuomesa mwoyo [yawo]” ku hama dzawo dzainga dziri arombo uye dzakaremba. Djehovha aietsera kuti awona abetsere arombo.—Dhe. 15:7, 11; Rev.25:35-38.
9 Pane kuti titonge aya ari kubatana no migariro inoshupha, tinodikana kuanyaradza teciseenzesa Matarhwa. (Djobo 33:6, 7; Mat. 7:1) Ngo muezaniso: Munhu unocovha bhasikoro paanoita tsawana akaguma ku cipitari, kodi mamedhiko anotanga kukwarakwatisa kuti ndiani aitisa kuti paitike tsawana? Zviri pamhene kuti haiwa, nokukasika anoita kuti araphwe. Ngo mushobo umwewo, kana hama yedu ye Cikristu yakaremba ngedaa ye zvinetso, tinodikana kupasa rubetso re kumwiya raanoda.—Erengai 1 Atesaronika 5:14.
10 Kana tikarangarira ngezve migariro inobatana no hama dzedu, tingapedzesera taakudziona zvakanaka. Rangarirai ngezve hanzvadzi dzaano makore dzecishingirira kuphikiswa no mhuri. Amweni munoaona hingana kuti aazi kubamba asi awona ano kutenda kakakura. Pamunoona hanzvadzi inorera ana ayo yega uye yecirumbwa eciuya ku musangano nguwa dzese no ana ayo, amubaiwi mwoyo here no kutenda uye kushinga kayo? Zvakadini no madjaha anorumbwa akagondeka kunyazi no kupfuridzirhwa kaanoizwa no adoni awo e kucikora? Kana tikarangarira zvese zviri kuizwa no hama uye hanzvadzi dzedu kuti dziseenzere Djehovha, tinoona kuti aya anoita hingana kuti aana simba ndiwo “akapfuma pakutenda” hingana aya ari mumigariro iri nani.—Tig. 2:5.
w20.03 paji. 23 mandi. 17-18
Tingaziya Kudini Nguwa Yakasisira ye Kureketa?
17 Mwanarume we cirongomuna wakavhakacira Djobo ndi Eriu umwe we mu mhuri ya Abrahamu. Iyena wakapurutana Djobo no anarume amweni atatu paaireketa. Uye Eriu wakanyasa kupurutana zvaaibhuya. Ndiyo ndaa iyena wakakwanisa kupasa mazano e usisi uye akananga kuna Djobo kuti amubetsere kugadzirisa marangariro ake akashata. (Djobo 33:1, 6, 17) Caikosha kuna Eriu i kukudza Djehovha, haiwa kudzikudza pacake kana kuti kukudza mwanarume umweni. (Djobo 32:21, 22; 37:23, 24) Muezaniso wa Eriu unotipangidza kuti kune nguwa ye kunyarara uye kupurutana. (Tig. 1:19) Unotipangidzawo kuti, kana tecida kupasa zano, tinodikana kutanga takudza Djehovha, haiwa isusu.
18 Tikaterera mazano ari mu Bhaibheri akaringana no kuti nguwa ipi uye tingabhuya kudini, tinopangidza kuti tinokoshesa cipo ce kureketa. Mambo ano uzii Soromoni wakatara kuti: “Soko rinobhuiwa pa nguwa yakasisira rakatodzana no masaa e oro ari mu paratu ye prata.” (Zvie. 25:11) Patinonyasa kupurutana zvinobhuiwa no amweni uye kurangarira tisati tareketa, masoko edu angaita hingana masaa aya e oro—anokosha uye akarungama. Nge mushobo umwewo, kunyazi tecireketa maningi kana padoko, masoko edu acapfadza amweni uye Djehovha acadada nesu. (Zvie. 23:15; Aef. 4:29) Uu ndi mushobo wakanaka we kupangidza kuti tinotenda maningi no cipo ici cinokosha ca Djehovha!
Upfumi Watinogumira mu Bhaibheri
w13 1/15 paji. 19 ndi. 10
Rumbwai Mecikhwedera Dhuze na Djehovha
10 Zvakanaka maningi kucengeta ciimo cedu. Asi atidikani kunyanyisa teciedza kubvisa zvese zvinopangidzira kuti tacembera. Ngokuti izvona zvinopangidza kuti taamunhu wakura, ano dzireremedza uye akarungama nge cemukati. Ngo muezaniso Bhaibheri rinoti: “Bvudzi rakacena rakaita hinga korona yakanaka kana yecioneka nge gwanza re unatsi.” (Zvie. 16:31) Djehovha anotiona kudaro uye isusu tinodikanawo kudziona kudaro. (Erengai 1 Pedru 3:3, 4.) Hino, zvakanaka here kuita maoperasau kana kuti marapirhwe anokanda upenyu wedu pangozi kuti mwiri wedu ugare wakarungama? “Mupfaro wa Djehovha” ndiwo unoita kuti tigare no kurungama ke zvirokwazvo kunobva ngece mukati azvinei no thunga redu kana kuti uthongo wedu. (Nee. 8:10) Mu nyika ipsva basi ndimona maticagara no uthongo wakanaka uye ticagarazve madjaha akarungama. (Djobo 33:25; Isa. 33:24) Dakara ikona, kupangidza ungwaru we zvirokwazvo uye kutenda kucatibetsera kurumbwa tiri pa dhuze na Djehovha teciita zvese zvatinokwanisa mu migariro ye zviro inonga iripo.—1 Ti. 4:8.
JANERO 8-14
UPFUMI UNOBVA MU SOKO RA MWARI | DJOBO 34-35
Upenyu Paunoita Hinga Usina Unatsi
wp19.1 paji. 8 ndi. 2
Mwari Akaita Kudini?
Nguwa dzese Mwari anoita zvakanaka. Bhaibheri rinoti: “Mwari we zvirokwazvo aamboiti zvakashata, we Masimba Ese aazomboiti zviro zvisikazi kunaka!” (Djobo 34:10) Kutonga ka Djehovha kuno unatsi, ndiyo ndaa mutari we pisarema wakati: “Mucatonga anhu no unatsi.” (Pisarema 67:4) Anhu anonyepedzera kugara zvaasiripi aakwanisi kunyepera Djehovha ngekuti “Djehovha anoona zviri mu mwoyo.” (1 Samueri 16:7) Nguwa dzese Djehovha anoziya kuti cokwadi ngacipi, uye kutonga kake nguwa dzese kakanaka. Kusiya izvona Djehovha ari kuona kutama unatsi uye uzondi uri mu nyika uye iyena akapikira kuti, nokukasika “aya anoita zvakashata . . . acaparadzwa pa nyika.”—Zvierengo 2:22.
w17.04 paji. 10 ndi. 5
Cinyi Cicabviswa Umambo wa Mwari Paucauya?
5 Djehovha acaitei no anhu anoita zvakashata? Nyamasi uno Djehovha ari kupasa mukana anhu anoita zvakashata kuti acinje. (Isa. 55:7) Awona aasati atambira kutongwa kawo ke kupedzesera. Zvezirokwazvo mugariro we nyika ndiwo wakatongerhwa kuparadzwa, haiwa anhu. Asi cinyi cicaitika ku anhu aya anopfarira kugara dii re nyika ino uye asikadi kucinja? Djehovha akagondesa kuti acabvisa anhu anoita zvakashata pa nyika. (Erengai Pisarema 37:10.) Anhu anoita zvakashata anorangarira kuti aacaparadzwi. Akawanda akhona akafundira kufisa zvaanoita, uye anoita zviri zvese kuti atize zviro zvino unatsi uye mugumisiro zve zviito zvawo. (Djobo 21:7, 9) Asi Bhaibheri rinotiedzurira kuti: “Madziso a Mwari anoona zvese zvinoizwa no munhu, uye Iyena anoona zvese zvatinoita zuwa no zuwa. Apana cidima kana kuti zidima rakakura maningi rekuti munhu unoita zvakashata ungafindara imona.” (Djobo 34:21, 22) Apana mushobo umweni we kudzifisa pana Djehovha Mwari. Apana angamucengedzera; apana mbuto yakaita cidima kana kuti yakaigika yekuti Djehovha aangakwanisi kuona zviri kuitika imona. Hino, mumasure me Amagedhoni kunonga kusisina anhu anoita zvakashata mu mbuto yese pa nyika. Awona aacazoonekizve—zvacose!—Pis. 37:12-15.
Mucakuhunywa nge Ndaa ya Djesu Here?
19 Dambudziko iri, riri kuitikawo here mazuwa ano? Honde. Anhu akawanda nyamasi anokuhunyika ngokuti isusu atipindiri mune zvematongerhwe e nyika. Awona anorangarira kuti isusu taidikana kusanangura mutongi umwe panonga peciizwa cisananguro. Asi isusu tinoziya kuti kusanangura munhu kuti agare mambo wedu, tinonga teciramba Djehovha. (1Sa. 8:4-7) Pamweni anhu angarangarira kuti isusu taidikana kuwaka zvikora, zvipitari uye kuita mabasa amweni e rupo. Awona anokuhunyika paanotiona tecipeta masimba pa basa rekuparidzira haiwa pakupedza matambudziko e nyika ino.
20 Tinodikana kuitei kuti tisapauswe? (Erengai Mateu 7:21-23.) Cinonyanya kukosha katiri, kuita basa ratakapaswa na Djesu. (Mat. 28:19, 20) Atidikani kukangaidzwa nge zve matongerhwe e nyika ino. Isusu tinoda anhu uye tinonetsekawo no matambudziko aarikusongana nawo. Asi tinoziya kuti mushobo wakanaka wekubetsera anyacigarisano edu, ngewe kuafundisa zvakaringana no Umambo wa Mwari uye kuabetsera kuti agare shamwari ya Djehovha.
Upfumi Watinogumira mu Bhaibheri
w17.04 paji 29 ndi. 3
Itai Zviri Zvese kuti Mukudze Djehovha!
3 Mwanarume waizwi Eriu wakazwa zvaicedzwa no anarume aya. Pedzepo iyena wakabvunzisa Djobo kuti: “Kana uri munatsi, ucapasei [Mwari]; iyena acatambirei kubva kauri?” (Djobo 35:7) Kodi Eriu waida kubhuya kuti kupeta masimba kedu pakuseenzera Mwari akuseenzi? Haiwa. Kudai zvainga zviri izvona zvairangarirhwa na Eriu, Djehovha angadai akamusumurura. Asi Djehovha aazi kuita izvona. Zvaida kubhuiwa na Eriu ngezve kuti Djehovha aatibambidziri kuti timunamate. Djehovha akakwana. Atikwanisi kumupfumisa kana kuti kumupasa simba. Kubhuya zvazviri, ndiyena anotiitisa kuti tigare anhu akanaka ngekutipasa mawara, zvipo uye simba. Uye iyena anoona kuti tinozviseenzesa kudini.
JANERO 15-21
UPFUMI UNOBVA MU SOKO RA MWARI | DJOBO 36-37
Ngei Imwimwi Mungagonda mu Cipikirhwa ca Mwari ce Upenyu Usikaperi
w15 10/1 paji. 13 mandi. 1-2
Zvinokwanisika Here Kuziya Mwari?
MWARI AANA PAANOTANGIRA NO PAANOGUMIRA: Bhaibheri rinotifundisa kuti Mwari akagara ariyo “kubvira rini dakara nariini.” (Pisarema 90:2) No masoko amweni, Mwari aana paanotangira uye aana paanogumira. Mukuona ke anhu, “kukura ka Mwari kakakhwirira kudarika kuzwisisa kedu.”—Djobo 36:26.
Izvona zvinomubetserai kudini: Mwari akapika kumupasai upenyu usikaperi kana mukamuziya hinga shamwari yake. (Juau 17:3) Zvaizoshupa kugonda mu cipikirhwa ici kudai Mwari ainga asikazorarami nokusikaperi. “Mambo asina mugumo” ndiyena basi aizokwanisa kudzadzisa cipikirhwa ici.—1 Timoti 1:17.
w20.05 paji. 22 ndi. 6
Imwimwi Munotenda ngo Zvipo Zvamunopaswa na Mwari?
6 Panyika pano rumbwa pano Mvura ngekuti nyika iri kure no zuwa. Kudai zuwa rainga riri paduze mvura yese yaizophwa. Panyika paizogara pasina ciro cakapenya. Kudai nyika yainga iri kure maningi no zuwa mvura yese yaizoita mapuwe o cando. Nyika yese yaizogara dzukubuwe ro jero. Djehovha akakanda pa mbuto yakasisira, uye izvona zvinoita kuti mvura irumbwe yecitenderera panyika kuti iraramise zvisikwa zvese zvakapenya. Zuwa rinopisa mvura iri mu mabahari no pa nyika inokhwira kudenga kuti iite makuta. Gore rimwe na rimwe zuwa rinonyungurusa mvura inokwana kuita 500 000 kirometro kubhiko. Mvura yakawanda maningi inodarika mvura iri mu madhamu pa nyika. Mvura ii inorumbwa iri kudenga ke mazuwa anokwana kuita 10 isati ya naya. Pedzepo inozonaya hinga mvura kana mhute. Mvura iyona inonaya inohwirira mu mabahari no mu mbuto imweni inogara mvura uye kutenderera ke mvura kunotangazve. Kutenderera uku ke mvura kunopangidza kuti Djehovha ano simba uye ungwaru.— Djobo 36:27, 28; Mup. 1:7.
Rumbwai Mecibambisa Kariro Yenyu
16 Kariro yedu ye kurarama nokusikaperi i cipo cakanakisisa ca Mwari. Tinoetsera no mwoyo wese ngezve ramangwana—ratinorugondo kuti ricaitikadi kamare. Kariro yedu inoita hingana ankora, yecitigarisa takabamba kuti tirhwisane no zvinetso, tishingirire kuteererhwa uye kutotama kuthya. Kariro yedu inoita hingana kapaseti, yecidziirira ndangariro dzedu kuti tirambe zvakashata uye tiite zvakanaka. Kariro yedu inotsamira mu Bhaibheri inonyasa kutikhwededza kuna Mwari uye inotipangidza mushobo wakakura we rudo rake katiri. Ticagara no makomborero akawanda mu upenyu wedu kana kariro yedu ikabamba.
Upfumi Watinogumira mu Bhaibheri
it-1 paji. 522
Kubarariswa ke Masoko
Munhu umwe na umwe waitora masoko uye mazano ecibhuya ku munhu umweni zveciita kuti agume ku anhu ese munguwa ye Bhaibheri. Kakawanda masoko o munharaunda uye o nyika dzo kunza aibarariswa ecirekethwa no muromo. (2Sa 3:17, 19; Djob 37:20) Aya aiita rhwendo no ngoro dzaisungirhwa pa makavharo aireketa manotisiya aibva kure paaiima kuti awone zvokurhya, mvura uye zviro zvimweni zve muthaundi imona kana kuti paya paaiima. Nyika ye ku Palestina, teciona ngezve ciimo cayo cakakhwirira kudarika Asiya, Afrika uye Europa kaihambwa ngoro dzaisungirhwa pa makavharo dzaienda uye dzaiuya kubva kure. Izvona zvaiita kuti anhu okweneyo agonde kuti aizozwa masoko e zviro zvinokosha zvaiizwa ku nyika dze kunza. Manotisiya o munharaunda uye oku nyika dze kunza, kakawanda aioneka kubazari re mu thaundi.
JANERO 22-28
UPFUMI UNOBVA MU SOKO RA MWARI | DJOBO 38-39
Imwimwi Munopsvaka Nguwa kuti Muone Zvisikwa?
Makagadzirira Kuetsera Djehovha Here?
7 Parinopanganidza kuti Djehovha akasika kudini nyika, Bhaibheri rinobhuya kuti iyena akakanda “midida yayo,” “akaigadzika,” uye “akaimisa buwe rayo re pakhona.” (Djobo 38:5, 6) Iyena akatodusa nguwa yekuti aongorore zvese zvaainga aita. (Gen. 1:10, 12) Munokwanisa kurangaridza kuti ngirozi dzakazwa kudini padzaiona zvisikwa zva Djehovha zvecibudirira? Zvingaita kuti dzakapfara maningi! Zvekuti Bhaibheri rinoti, pano nguwa imweni yekuti idzona “dzaidaindzira dzecimukudza.” (Djobo 38:7) Tinofundei? Djehovha akatora mamirionji e makore kuti apedzese zvese zvaainga asika, asi kuita zvese padoko no padoko uye no ungwaru, zvakabetsera. Paakaima kuti aongorore zvisikwa zvake, Djehovha akaona kuti zvese zvainga “zvakanaka maningi.”—Gen. 1:31.
w20.08 paji. 14 ndi. 2
Rumuku re Akafa Rinopangidza Rudo ra Mwari, Ugwaru uye Mwoyo Unononoka Kutsamwa
2 Pakutanga Djehovha akasika munhu umwe kuti aseenze naye pakusika: Mwana wake Djesu. Eciseenzesa Djesu “zviro zvese zvimweni zvakasikwa,” kubatanidzawo mamirionji e ngirozi. (Ako. 1:16) Kuna Djesu kakagara mupfaro mukuru kuseenza na Baba ake. (Zvie. 8:30) Uye ngirozi dzainga dzino zvikonzero zvakawanda kuti dzipfare padzaiona Djehovha eciseenza no Munhu Anonyasa Kuziya Basa Djesu pakusika denga no nyika. Ngirozi dzakapangidza kudini kupfara ka dzaiita? Idzona “dzaikhuwa” dzecikudza Djehovha panguwa yekuti nyika yaisikwa, uye apana mubvunzo kuti idzona dzaiita izvona pese pekuti Djehovha aipedza kusika ciro. Ngirozi dzingadaro dzakapfara maningi padzakaona cisikwa cekupedzesera uye cinokosha maningi panyika: Anhu. (Djobo 38:7; Zvie. 8:31, masoko e pasi) Cisikwa cimwe na cimwe cakapangidza rudo uye ungwaru wa Djehovha.—Pis. 104:24; Aro. 1:20.
Fundai Zvakawanda ngezva Djehovha Kubva pa Zvisikwa Zvake
8 Tinokwanisa kugonda Djehovha. Djehovha akabetsera Djobo kuziya kuti angakwanisa kugonda Naye. (Djobo 32:2; 40:6-8) Paaicedzesana na Djobo, Djehovha akabhuya ngezve zviro zvaakasika zvakaita hingana nyeredzi, makuta uye kupisa ke zuwa. Djehovha akabhuyawo ngezve zvinyama, n’ombe dze mushango no makavharo. (Djobo 38:32-35; 39:9, 19, 20) Pa zviro zvese izvi, Djobo wakafunda ngezve simba ra Djehovha, ngezve rudo rake uye uzii wake. Mumasure mekucedza uku, Djobo wakanyasa kugonda Djehovha zvaainga asati amboita kare. (Djobo 42:1-6) Nge mushobo umwewo, patinofunda ngezvakasikwa, zvinogara pamhene kuti Djehovha ano uzii wakawanda usikaperi. Iyena anokwanisa uye acapedza matambudziko edu. Kuziya izvona kucatibetsera kuti tinyase kugonda na Djehovha.
Upfumi Watinogumira mu Bhaibheri
it-2 paji. 199
Muiti we Mitemo
Djehovha Muiti we Mitemo. Djehovha ndiye basi Muiti we Mitemo we zvirokwazvo mu nyika no kudenga. Mitemo ye zvisikwa zvisina upenyu inobva kaari (Djob 38:4-38; Pis 104:5-19), uye upenyu we zvinyama. (Djob 39:1-30) Anhu hingana zvisikwa zva Djehovha zve kunyama, ari pasi pe mitemo ngekuti akapaswa maitiro akanaka, mazwiro, anokwanisa kurangarira uye kugara no maitiro e kumwiya, uyewo anodzikanda pasi pe mitemo ya Mwari. (Aro 12:1; 1Ako 2:14-16) Uyezve mitemo ya Djehovha inotonga zvisikwa zvekumwiya, ngirozi.—Pis 103:20; 2Pe 2:4, 11.
Mitemo ya Djehovha ye zviro zvakasikwa aiposeswi. (Dje 33:20, 21) Mudenga no nyika zvinozikanika, mitemo yake yakanaka uye yakagondeka, mu mbuto mekuti masiyentista anoziya ngezve mitemo ii, angakwanisa kupima kutenderera kunoita mwezi, mapraneta uye zviro zvimweni zvekudenga no rugondo rese. Munhu wese usikateereri mitemo ye pa nyika anozoona mugumisiro we kutama kuzwira. Nge mushobo umwewo mitemo ya Mwari aicinji uye aiiti kutama kuzwirhwa pasina kusumururhwa. “Mwari aatambwi naye. Ngokuti zvinosimwa no munhu, ndizvona zvaanozokorora.”—Ag 6:7; 1Ti 5:24.
JANERO 29–FEVRERO 4
UPFUMI UNOBVA MU SOKO RA MWARI | DJOBO 40-42
Zvatinofunda no Maesperiensiya a Djobo
w10 10/15 mapaji. 3-4 mandi. 4-6
“Ndiyani Aguma Pakuziya Marangariro a Djehovha?”
4 Patinonyasa kurangarira ngezve mabasa a Djehovha, tinodikana kusiya marangariro e kuedza kumutonga maererano no marangariro e anhu. Marangariro aya anorekethwa pa masoko a Djehovha akatarhwa pana Pisarema 50:21: “Warangarira kuti inini ndaizogara hingana iwewe.” Muzii umweni we Bhaibheri wakazoreketa paa padarika makore anokwana 175 iciti: “Anhu anoedza kutonga Mwari ecimuona hingana kuti anoarambidza kuita zviro zvaanorangarira kuti zvakanaka.”
5 Tinodikana kungwarira kuti tisarangarire ngezva Djehovha teciseenzesa maonero edu uye zvido zvedu. Ngei izvona zvecikosha? Patinonga tecifunda Matarhwa zviito zvimweni zva Djehovha zvingaita hingana kuti azvizi kunaka maererano no maonero edu e anhu asikazi kukwana. Aisraeri e kare akagara no marangariro akadaro, awona akatanga kuona zvaaiizirhwa na Djehovha hingana zvisina unatsi. Onai zvaakabvunzwa na Djehovha: “Asi imwimwi mucabhuya kuti: ‘Gwanza ra Djehovha arina unatsi.’ Ndapota, izwai, Haiwa nyumba ya Israeri. Gwanza rangu ndiro risina unatsi here? Makwanza enyu andiopi asina unatsi here?”—Ezek. 18:25.
6 Ciro cingatibetsera kuti tisawire pamurau we kutonga Djehovha maererano no marangariro edu, kuziya kuti maonero edu ano paanogumira uye kakawanda kakhona akashaishika. Djobo wakadikana kufunda fundo irona. Paaishuphika, iyena wakarhwisana no kunetseka uye wakaguma pakurangarira ngezvake basi. Djobo wakasiya kurangarira ngezve zviro zvaikosha. No rudo, Djehovha akamubetsera kugadzirisa maonero ake. Iyena akamuita mibvunzo dzinodarika 70 dzaasikazi kukwanisa kudzidaira ecimupangidzira kuti pano zvaainga asikakwanisi kuzwisisa. Asi Djobo wakadaira ecidzidodosa ngekugadzirisa maonero ake.—Erengai Djobo 42:1-6.
w17.06 paji. 25 ndi. 12
Musakanganwe Ciro Cinonyanya Kukosha
12 Kodi Djehovha akanyanyisa ngekureketa na Djobo nge mushobo wakananga mumasure me zvese zvaakabatana nazvo here? Izvirokwazvo kuti haiwa, uye Djobo aazi kuona kudaro. Mupango wa Djehovha wainga wakananga, asi no rudo. Djobo wakatobhuya kuti: “Ndirikutsukwara no zvandabhuya, uye ndirikucinyuka mu bhukuta uye marota.” (Djobo 42:1-6) Pakutanga mudjaha umweni waizwi Eriu wainga akapasawo zano Djobo. (Djobo 32:5-10) Mumasure mekuti Djobo watenda mupango uye ocinja mushobo wake wekurangarira, Djehovha akasiya pamhene ku amweni kuti aidada na Djobo ngekuti wakarumbwa akagondeka paaibatana no matambudziko.—Djobo 42:7, 8.
“Etserai Djehovha”
17 Djobo andiyepi basi museenzi wa Djehovha wakarumbwa wakagondeka uye wakabamba paaisongana no miyedzo yakakura. Mu tsamba yaakatarira Ahebheru, muphostori Pauro wakabhuya ngezve anarume akawanda akarumbwa akagondeka uye wakadainza anarume aya kuti “gore guru re apupuri.” (Aheb. 12:1) Akawanda e anarume aya akabatana no miyedzo yakakura; kunyazi zvakadaro, awona akarumbwa anokutenda muna Djehovha. (Aheb. 11:36-40) Asi kupeta kawo masimba uye basa rakakura raakaita zvakabetsera here? Honde zvakabetsera! Kunyazi hawo asikazi kuona kudzadzika ke zvipikirhwa zva Djehovha, awona akarumbwa akagondeka kaari. Kupinda izvona, aseenzi aya akagondeka kuna Djehovha ainga ano cokwadi cekuti awona akatenderhwa naye. Ndiyo ndaa, awona ainga ano cokwadi cese kuti aizoona zvipikirhwa zva Djehovha zvecidzadzika mune ramangwana. (Aheb. 11:4, 5) Miezaniso yawo ingatibetsera kuti isusu tirumbwe tecigonda na Djehovha.
18 Nyika yatirikurarama nyamasi uno, irikubva pakushata yecienda pakushatisisa. (2Ti. 3:13) Sathani asati apedza kuedza anhu a Mwari. Zvezvirokwazvo, tinoziya kuti ticasongana no matambudziko akawanda maningi, kunyazi zvakadaro tinodikana kushinga kurumbwa takagondeka kuna Djehovha tecigonda kuti “tinokanda kariro yedu kuna Mwari mupenyu.” (1Ti. 4:10) Edzurirai kuti Mwari akakomborera kugondeka ka Djobo zvecipangidza kuti “Djehovha ano usisi wakakura uye ano nyasha.” (Tig. 5:11) Tinoda kurumbwa takagondeka kuna Djehovha tinocokwadi cekuti iyena anopasa mubairo “aya anomupsvaka no mwoyo wese.”—Erengai Ahebheru 11:6.
Upfumi Watinogumira mu Bhaibheri
it-1 paji. 831
Kusekwa
Djobo wainga ari mwanarume wakaperera mu gwanza re unatsi kunyazi no kusekwa kakakura. Asi wakagara no maonero akashata uye wakaita cishaishi zveciita kuti apangwe. Eriu wakati ngezvake: “Ndiyani wakaita hingana Djobo, anomwa kushorhwa hingana mvura?” (Djob 34:7) Djobo wakanyanya kukanda maonero ake pambuto yokutanga pane kukanda a Mwari uye waiwona kuti unatsi wake wakakura kudarika wa Mwari. (Djob 35:2; 36:24) Paaiisekwa no “shamwari” dzake dzitatu, Djobo wakazviona hingana kuti zvaiwira kaari pane kuti kuna Mwari. Ngokudaro wakaita hingana munhu unosekwa no kushorhwa, uye unozvipfarira, eciita hingana kuti urikumwa mvura no mupfaro. Paapadarika nguwa, Mwari akapanganidza Djobo kuti aya aimuseka (mukuongorora ke kupedzesera) aireketa manyepo ngezva Mwari. (Djob 42:7) Nge mushobo umwewo, Djehovha akabhuya ku muphorofita Samueri, Aisraeri paakakumbira kuti aida mambo. Iyena akati: “Aazi kuramba iwewe, asi aramba inini hinga mambo wawo.” (1Sa 8:7) Uye Djesu akati ku afundi ake: “Imwimwi mucazondwa no anhu e madzinza ese [haiwa nge ndaa yenyu, asi] nge ndaa yo zina rangu.” (Mt 24:9) Kuziya izvona kucabetsera Mukristu kuti ashingirire kusekwa ano mwiya wakanaka uye kuti azokwanise kutambira mubairo nge kushingirira kake.—Ruk 6:22, 23.
FEVRERO 5-11
UPFUMI UNOBVA MU SOKO RA MWARI | PISAREMA 1-4
Tsigirai Umambo wa Mwari
“Ndicazungunusa Madzinza Ese”
8 Anhu anotambira kudini masoko aya? Anhu akawanda aatambiri zvakanaka. (Erengai Pisarema 2:1-3.) Madzinza ese arikudzutaira. Awona arikuramba Mutongi wakasanangurhwa ndi Mwari. Kaari, masoko anopfadza e Umambo atinoparidzira, “amasokopi akanaka.” Zvezvirokwazvo, atongi amweni akatorambidza basa rekuparidzira! Kunyazi akawanda ecitendera kuti anoseenzera Mwari, awona aadi kusiya zvigaro zvaanazvo. Kuita hingana atongi e munguwa ya Djesu, awona anopangidza kuti anozonda Mudzodziwa wa Djehovha nge kuteerera ateeri ake akagondeka.—Zviito 4:25-28.
w16.04 paji. 29 ndi. 11
Rumbwai Musina Kamunotsigira mu Nyika Ino Isina Rubatano
11 Kunyanya kuda pfuma. Kana tikanyanya kudisa maningi zviro zvedu zve kunyama zvicazotishuphira maningi kurumbwa tisina patinotsigira kana pakamuka zvinetso. Ruth, we ku Malawi, wakaona izvona zveciitika no Apupuri a Djehovha akawanda paakateererhwa mu makore 1970. Iyena unoti: “Hama dziya adzizi kukwanisa kusiya upenyu wawo wakanaka. Pakutanga, amweni akatoguma pakudzingiriswa mu nyika iyona pamwepo na isusu, asi akazopedzesera aakutsigira zvematongerhwe e nyika kuti ahwirire kumba. Awona aazi kukwanisa kushingirira upenyu unoshupha ku musasa we asungwa.” Cinopfadza ngece kuti hama dzedu dzakawanda dzakarumbwa dzisina kadzaitsigira kunyazi dzecisongana no zvinetso zve mare uye kuruza zvese zvaainga anazvo.—Aheb. 10:34.
Upfumi Watinogumira mu Bhaibheri
it-2 mapaji. 689-690
Marara
Ndii rakatetepa rinodziirira kana kuti deme rinofukidza zviro zvakaita hingana mupunga uye trigo. Kunyazi mareferensiya o Bhaibheri anobhuya kuti marara anoseenzeswa pakuezanisira, awona anoimirira miitiro yokupura yaiizwa munguwa yo kare. Mumasure me kukorora, deme iri risikarhyiwi rainga risikaseenzizve, uye ndiyo ndaa raiezaniswa no ciro cakatetepa, cisikaseenzi uye cisikadiwi, ciro caisiyaniswa no zviya zvakanaka, uye cotsakatiswa.
Cokutanga, kupura kaiita kuti tsango ibude pa uswa. Pedzepo, no kuurusa, uswa waitorhwa no duto, hingana bukuta. (Onai KUURUSA.) Izvona zvinonyasa kupangidza kubvisa kunoita Djehovha anhu akapauka pakutenda pakati pe anhu ake uye mushobo waanoparadza anhu anoita zvakashata uye dzinza re aphikisi. (Djob 21:18; Pis 1:4; 35:5; Isa 17:13; 29:5; 41:15; Oze 13:3) Umambo wa Mwari ucatsakatisa azondi ake ngekuita zvidimbu zvidoko-zvidoko zvekuti acapeperuswa hingana uswa.—Dha 2:35.
Marara asikakoshi aiunganidzwa uye opiswa, kuti asahwirirezve no dutu uye opindazve mu zvitsango. Ngo mushobo umwewo, Juau Mubhabhatidzi wakabhuya ngezve kuparadzwa ke magereja e kunyepa—Mupuri, Djesu Kristu, acaunganidza trigu yake mu muturika, “asi marara acaapisa pa muriro usikadzimiki.”—Mt 3:7-12; Ruk 3:17; Onai KUURUSA.
FEVRERO 12-18
UPFUMI UNOBVA MU SOKO RA MWARI | PISAREMA 5-7
Kurumbwa Takagondeka Kunyazi no Zviito zve Amweni
Bhaibheri Ringamubetsera Kudini kuti Mushingirire
7 Makambocengedzwa nge anyaukama kana nge shamwari yenyu here? Kana zvakaitika, ciro cingamubetsera ngece kuedzurira zvakaita Mambo Dhavhidhi mwana wake Absaramu paakamupandukira kuti iyena agare mambo pa mbuto pake.—2 Sam. 15:5-14, 31; 18:6-14.
8 (1) Namatai. Musati maerenga ngano ii ye upenyu wa Dhavhidhi, panganidzirai Djehovha mazwire amurikuita nge kushaishirhwa kamaizwa. (Pis. 6:6-9) Hino, kumbirai kutungamirirhwa ndi Djehovha kuti mugumire mazano e Bhaibheri acamubetsera kuziya zvokuita.
w20.07 mapaji. 8-9 mandi. 3-4
Gutsikanai kuti Magumira Cokwadi
3 Kutenda kedu akudikani kutsamirira basi pa rudo riripo pakati pe anhu a Mwari. Ngei? Rangaridzai kuti hama imwe yo ungano—kunyazi mukuru kamare kana kuti mupionero—unoita citema cakakura. Kana kuti hama ye mu ungano yenyu ikamushaishirai? Zvingatoita kuti, hama imwe inopauka pakunamata uye yotanga kubhuya kuti atina cokwadi. Imwimwi maizoitei? Maizokuhunyika uye moima kuseenzera Djehovha here? Zvinokosha kuedzurira zvinoteera: Kana mukawaka kutenda kenyu maererano no maitiro e amweni, pane kuti muwakire pa ushamwari wenyu na Djehovha, kutenda kenyu akuzobambi. Nyumba yenyu yo kutenda aidikani kuwakwa no zviro zvisikazi kubamba, hinga mazwiro. Iyona inoda zviro zvakanyasa kubamba, hingana zvikonzero uye kupsvakisisa. Imwimwi munodikana kuziya pacenyu kuti Bhaibheri rino cokwadi ngezva Djehovha.—Aro. 12:2.
4 Djesu akabhuya ngezve anhu aizotenda cokwadi “no mupfaro,” asi aizoruza kutenda kawo kana akaedzwa. (Erengai Mateu 13:3-6, 20, 21.) Zvingaita kuti awona aazi kuzwisisa kuti kuteerera Djesu kunobatanidza zvinetso uye matambudziko. (Mat. 16:24) Pamweni airangarira kuti upenyu we Mukristu waizogara usina matambudziko—wakadzara no makomborero pasina cinetso. Asi mu nyika ino isikazi kukwana tese isusu ticabatana no matambudziko. Uye cinjo dzinganani dzinoitika mu upenyu medu dzingapedza mupfaro wedu ke cinguwa.—Pis. 6:6; Mup. 9:11.
Upfumi Watinogumira mu Bhaibheri
it-2 paji. 1004
Guwa
Pana Aroma 3:13 muphostori Pauro unobhuya ngezve Pisarema 5:9, eciezanisa mukuro we anhu anoita zvakashata no “guwa rakafununguka.” Kuita hingana guwa rakafununguka recida kudzadzwa no akafa uye no zviro zvisina unatsi, mukuro wawo unofununguka no masoko anouraisa uye asina unatsi.—Ezanisai na Mt 15:18-20.
FEVRERO 19-25
UPFUMI UNOBVA MU SOKO RA MWARI | PISAREMA 8-10
“Ndicamukudzai, Haiwa Djehovha”!
Cengetedzai Mbuto Yenyu mu Mhuri ya Djehovha
6 Djehovha akatigadzirira nyika yakanaka. Asati asika munhu we kutanga, Djehovha akatanga kugadzira nyika yakanakisisa kuti izogare anhu. (Djobo. 38:4-6; Dje. 10:12) Nge rudo uye rupo, Djehovha akakanda pa nyika zviro zvakawanda uye zvakanaka zvinoita kuti tipfare. (Pis. 104:14, 15, 24) Paakamboima kuti awone zviro zvese zvaakasika, Djehovha “akaona kuti zvese zvainga zvakanaka.” (Ge. 1:10, 12, 31) Ecipangidza kuti anhu anokosha, Djehovha akaapasa “simba rekuti aonerere” zvisikwa zvake zvese zvinoshamisa zviri pa nyika. (Pis. 8:6) Cinangwa ca Mwari nge cekuti anhu akakwana azwe mupfaro we kuonerera zvisikwa zvinoshamisa nokusikaperi. Imwimwi munosotenda Djehovha nge kariro ii yakanaka here?
w20.05 paji. 23 ndi. 10
Imwimwi Munotenda Here Zviro Zvamunopaswa na Mwari?
10 Tino mishobo yakawanda ye kupangidza kuti tinotenda nge kukwanisa kedu kureketa. Umwe wakhona nge we kucedza no amweni nge zviya zvatinotenda muna Mwari ku aya anoti zviro zvakaita zvekuphinduka-phinduka. (Pis. 9:1; 1 Ped. 3:15) Aya anotenda kuti zviro zvakaita zvekuphinduka-phinduka anoda kuti isusu titendere kuti nyika no zviro zvese zvipenyu zvakaita zvekuphinduka-phinduka. Kana awona akagadzirira kuteerera mungaseenzesa Bhaibheri uye no mafundo manganani ari mufundo ino kuti mudziirire Baba edu e kudenga uye mopanganidza kuti ngei tino cokwadi cekuti Djehovha ndi Musiki we denga no nyika.—Pis. 102:25; Isa. 40:25, 26.
Muri “Muezaniso Wakanaka . . . Pamunoreketa Here”?
13 Embai no mwoyo wese. Patinoemba mu Nyumba ye Umambo, cinangwa cedu cikuru nge cekukudza Djehovha. Hanzvadzi imweni inozwi Sara inodziona hingana isikaembi zvakanaka. Asi iyona inoda kukudza Djehovha nge kuemba ngoma. Cinobetsera hanzvadzi Sara, ndikugadzirira kuemba aciri kumba hingana mushobo waanogadzirira matii amweni e misangano. Awona anogadzirira nge kuemba uye opsvaka kuona kubatana kakaita ngomeyo no zviro zvicafundwa pa misangano. Awona anoti: “Izvi zvinondibetsera kuti ndikande ndangariro dzangu pa masoko ari kurekethwa nge ngomeyo haiwa pa mushobo wandiri kuemba.”
Upfumi Watinogumira mu Bhaibheri
it-1 paji. 664
Cikunwe
Ngekuezanisira, panorekethwa ngezva Mwari hingana eciita mabasa no “zvikunwe,” zvakaita hingana kutara Mitemo Gumi pa matabwa e buwe (Eki 31:18; Dhe 9:10), kuita zvishamiso (Eki 8:18, 19), uye kusika matenga (Pis 8:3). “Zvikunwe” zva Mwari zveciseenza pa basa re kusika, zvinoda kureya mwiya wake mucena kana kuti simba ra Mwari, zvinorekethwa pa ngano ya Genesi ngezve zvisikwa, panobhuya kuti simba ra Mwari (ruʹach, “mwiya”) raitenderera pamusoro pe mvura. (Ge 1:2) Matarhwa e Cikristu eci Grego anopangidza kuzwisisa kakakwana ke soko iri rekuezanisira, ngekudaro ngano ya Mateu inopanganidza kuti Djesu aidzingira madhimoni eciseenzesa ‘mwiya mucena wa Mwari’ uye ngano ya Ruka inobhuya kuti izvona zvaiitika no “cikunwe ca Mwari.”—Mt 12:28; Ruk 11:20.
FEVRERO 26–MARSO 3
UPFUMI UNOBVA MU SOKO RA MWARI | PISAREMA 11-15
Rangaridzai Muri mu Nyika Ipsva ya Mwari Ino Runyararo
w06 5/15 paji. 18 ndi. 3
Mafundo Makuru Anobva mu Bhuku Rekutanga ra Pisarema
11:3—I fundasau ipi inoputswa? Iidzi ndidzo fundasau dzo anhu—mutemo, kurongeka uye unatsi. Izvi pazvinonga zviri pa mugariro unoshupha, kusarongeka ke anhu kunobambirira uye kakutama unatsi. Pa migariro iyona, “munatsi” unodikana kugonda Mwari.—Pisarema 11:4-7.
wp16.4 paji. 11
Nyika Isina Zvecisimba
Bhaibheri rinobhuya kuti nokukasika Mwari acapedza zvecisimba. Nyika ino zvecisimba nyamasi iri kuetsera “zuwa re kutongwa uye re kuparadzwa ke anhu akashata.” (2 Pedru 3:5-7) Kunonga kusisinazve anoita zvecisimba ecikonzera matambudziko ku amweni. Ngei tingagara no rugondo rekuti Mwari anoda kuita ciro kuti atsakatise zvacose zvecisimba?
Bhaibheri rinobhuya kuti Mwari “anozonda zvecisimba.” (Pisarema 11:5) Musiki anoda runyararo uye unatsi. (Pisarema 33:5; 37:28) Ndiyo ndaa, iyena aazosii anhu anoita zvecisimba ecigara nokusikaperi.
w17.08 paji. 6 ndi. 15
Imwimwi Makagadzirira Kuetsera no Mwoyo Unononoka Kutsamwa?
15 Cinyi cakabetsera Dhavhidhi kuetsera no mwoyo unononoka kutsamwa? Pisarema 13 Dhavhidhi wakabvunzisa karongomuna kese eciti: “Dakara rini?” Uye pa Pisarema umweumwewo Dhavhidhi unopanganidza cakamubetsera. Iyena unoti: “Inini ndinogonda rudo renyu risikacinji; mwoyo wangu unopfarira zviito zvenyu zvekuponesa. Ndicaembera Djehovha ngekuti iyena anondikomborera kamare.” (Pis. 13:5, 6) Dhavhidhi waigonda rudo ra Djehovha. Iyena waiedzurira zvese zvaakaizirhwa na Djehovha, uye izvona zvaimubetsera kuti aetsere no mupfaro zuwa rokuzoponeswa na Djehovha. Dhavhidhi waizviziya kuti kuetsera makomborero a Djehovha kunokosha maningi.
kr paji. 236 ndi. 16
Umambo Ucaita kuti Kuda ka Mwari Kuitike pa Nyika
16 Kucengeteka. Pakupedzesera masoko akanaka anobhuiwa pana Isaya 11:6-9 acadzadzika. Anarume, anakadzi uye ana acagara akacengeteka azvinei no mbuto yaanonga ari pa nyika. Apazogari no cisikwa, munhu kana cinyama cicathyisidzira amweni. Rangaridzai nyika yese uri muzi wenyu mune ramangwana, mamucakwanisa kudhibha mu murambo, mu madhamu uye mu mabahari; mecidarika matunhu; uye kuhamba mu maminda makacengeteka. Uye kunyazi kukasvipa, imwimwi amuzothyi. Masoko ari pana Ezekiyeri 34:25 acadzadzika, uye anhu a Mwari acakwanisa “kugara ku renje akacengeteka uye kuwata mushango.”
Upfumi Watinogumira mu Bhaibheri
w13 9/15 paji. 19 ndi. 12
Imwimwi Makacinjwa Here?
12 Zvinotsukwarisa kuti tinorarama no anhu anoita zvinoreketwa na Pauro. Anhu akadaroko pamweni ari kurangarira kuti kurarama eciteedzera zvinobhuiwa no mutemo azvicaseenzi. Maprosori no abereki akawanda ano marangariro ekuti ana angaita “zvaanoda.” Anoona hingana kuti apana cinozwi cakanaka kana kuti cakashata. Kunyazi aya anoti kuti anonamata anorangarira kuti ano rusununguko rokuita zvaanorangarira kuti zvakanaka uye kuti aadikani kuteerera Mwari no mitemo yake. (Pis. 14:1) Marangariro awona anokwanisa kukanganisa Akristu e zvirokwazvo. Amweni asikazi kunyasa kungwarira angakwanisa kutanga kugarawo no maonero akadaro pa zviro zvinocokuita nokunamata. Pamweni angaramba kuteerera zvinobhuiwa mu ungano uye kutogurunguta kana pano zviro zvaanonga asikapfariri. Kana kuti angatama kugara no cokwadi cekuti zano re mu Bhaibheri panyaya ye kudziaraidza, kuseenzesa interneti uye fundiso dze pamuso-soro rinoseenza.