Mareferensiya e Urongwa we MusanganoBasa Redu uye Kurarama
MARSO 4-10
UPFUMI UNOBVA MU SOKO RA MWARI | PISAREMA 16-17
“Djehovha, Ndimwi Munondipasa Zviro Zvakanaka”
w18.12 paji. 26 ndi. 11
Madjaha, Imwimwi Mungagara no Upenyu Wakanakisisa Maningi
ITAI SHAMWARI DZAKANAKA
11 Erengai Pisarema 16:3. Dhavhidhi waiziya kaaizogumira shamwari dzakanaka. Iyena waizwa “mupfaro wakakura maningi” nge kugara no anhu aida Djehovha, ainga ano maitiro akanaka uye aiita zviro zvakanaka. Ndiyo ndaa, Dhavhidhi unodainza shamwari idzi kuti “acena.” Mutari umweni we pisarema, wairangarira zvimwezvo ngezve shamwari dzake dzaaisanangura. Iyena wakatara kuti: “Ndiri shamwari dzo ese aya anomuthyai uye dzo aya anoteerera mitemo yenyu.” (Pis. 119:63) Hingana zvataona pa fundo yadarika, imwimwiwo mungagumira shamwari dzakawanda dzakanaka dziri pakati pe aya anoseenzera Djehovha. Uye idzona adzidikani kugara dziya basi dzino thunga rakaezana no renyu.
w14 2/15 paji. 29 ndi. 4
“Pfadzwai nge Unaki wa Djehovha”
Mu imwe ye pisarema yake, Dhavhidhi wakaembera Djehovha kuti: “Djehovha ndiye nhaka yangu, dii rangu, uye kopo yangu.” Dhavhidhi wakaembazve kuti: “Munocengetedza nhaka yangu. Mbuto dzakanakisisa dzakaigirhwa inini.” (Pis. 16:5, 6) Dhavhidhi waitenda maningi ngokuti Djehovha ainga ari “nhaka” yake, kana kuti nge kugara no ushamwari uri padhuze na Djehovha uye ngokugara no makomborero e kumuseenzera. Kuitawo hingana Dhavhidhi, isusu tinokomborerhwa maningi pa mwiya, kunyazi patinosongana no zvitsinzwa! Hino ngatirumbwe tecikoshesa kunamata ke cokwadi uye “tecitenda” nguwa dzese tempro ye kumwiya ya Djehovha.
w08 2/15 paji. 3 mandi. 2-3
Ngatiite kuti Djehovha Agare pa Mberi Pedu Nguwa Dzese
2 Tese isusu tingafunda zvakawanda kubva ku zviitiko zve upenyu zve aya anonyasa kuziikanwa mu Bhaibheri, akaita hinga—Abrahamu, Sara, Mozesi, Rute, Dhavhidhi, Esteri, muphostori Pauro, uye amweni. Asi ngano dze anhu asikanyanyi kuziikanwa, dzingakwanisa kutibetserawo. Kunyasa kurangarira ngano dze mu Bhaibheri kungatibetsera kuita maererano no masoko a mupisarema anoti: “Ndinoita kuti Djehovha agare pa mberi pangu nguwa dzese. Andizombozungunuswi, ngokuti ari ku dii ro moko kwawo wangu.” (Pis. 16:8) Masoko aya anoda kureyei?
3 Kakawanda kakhona musurudado waiseenzesa supada ku moko kwawo, ecisiya dii irona risikadziirirhwi no civhikhiro, caibathwa ngo moko boswe. Asi iyena waizozwa akacengeteka kana mudoni wake akarhwa dhuze naye ku moko kwawo wake. Kana tikarumbwa tina Djehovha mu ndangariro medu uye toita kuda kake, iyena acatidziirira. Ngokudaro, ngatione kuti ngano dzimweni dze Bhaibheri dzingatibetsera kudini kuti tibambise kutenda kedu kuitira kuti “tiite kuti Djehovha agare pa mberi [pedu] nguwa dzese.”—Byington.
Upfumi Watinogumira mu Bhaibheri
it-2 paji. 350
Mboni yo Dziso
Soko re Cihebheru rokuti ʼi·shohnʹ (Dhe 32:10; Zvie 7:2), parinoseenzeswa pamwepo no soko rokuti ʽaʹyin (dziso), zvinoreya “cimwanarume co dziso”; nge mushobo umwewo, pana Mariro 2:18 panoseenzeswa soko rokuti bath (mwana we mwanakadzi) zvecida kureya “mwana we mwanakadzi we dziso,” masoko ese aya, anoreya mboni yo dziso kana kuti mboni. Masoko mairi aya anobatanidzwa kuti abambiswe pa tsamba ya Pisarema 17:8 (ʼi·shohnʹ bath-ʽaʹyin) ecida kureya, cimwanarume ce dziso, “mwana we mwanakadzi we dziso” (“mboni yo dziso,” NW). Izvi zvingada kureya mufanikiso wenyu kamare wamunodziona pa dziso ro munhu umweni.
Dziso rakapfawa maningi uye rakareruka; kunyazi citsitsi cidoko kana kuti cidii cidoko basi co bukuta cikapinda pa dziso uye pa mboni yo dziso, izvona zvingazwika no kukasika. Pa dii rinoonekera ro dziso (cornea) rinofukidza mboni yo dziso rinodikana kudziirirhwa uye kucengetedzwa, ngokuti kana pa dii iri pakakuwadzika kana kuti pakasvipa nge ndaa yo nhenda, zvingabara kusama kuona zvakanaka kana kuti kutogara bofu. Bhaibheri rinoseenzesa no simba, uye ngo mushobo wakanaka soko rokuti “mboni yo madziso ako” recida kureya ciro ciya cinodikana kunyasa kudziirirhwa. Mutemo wa Mwari unodikana kuoniwawo kudaro. (Zvie 7:2) Pecipangidza mushobo wakadziirira Mwari Aisraeri hinga baba awo, Dheuteronomiyo 32:10 inobhuya kuti Iyena aidziirira dzinza iri “hinga mboni yo dziso rawo.” Dhavhidhi wakanamata ecikumbira kudziirirhwa uye kucengethwa na Mwari hinga “mboni yo dziso.” (Pis 17:8) Iyena waida kuti Djehovha aite ciito ciriporipoco kuti amubetsere paanonga ecida kurhwiswa no muzondi. (Ezanisai Za 2:8; panoseenzeswa soko re Cihebheru rinoti ba·vathʹ ʽaʹyin, “mboni ye dziso.”)—Onai DZISO.
MARSO 11-17
UPFUMI UNOBVA MU SOKO RA MWARI | PISAREMA 18
“Djehovha Ndiye . . . Anondinunura”
w09 5/1 paji. 14 mandi. 4-5
Mupfaro wa Djehovha i Simba Redu
Bhaibheri rinoezanisawo Djehovha no zviro zvisikafemi. Iyena anodainzwa hingana “Buwe re Israeri,” “buwe” uye “cidziiriro.” (2 Samueri 23:3; Pisarema 18:2; Dheuteronomiyo 32:4) Izvi zvakaezana papi? Kuita hingana buwe rakakura rakanyasa kubamba, Djehovha Mwari angagara Cidziiriro cakabamba kamuri.
5 Bhuku ra Pisarema rakadzara no zviro zvakawanda zvakasiyana-siyana zvinocokuita no unhu wa Djehovha. Ngo muezaniso, Pisarema 84:11 inobhuya kuti Djehovha ndi “zuwa uye cihvikhiro” ngokuti iyena ndi Manyuku e ciedza, e upenyu, e simba uye e kudziirira. Nge dii rimweni, Pisarema 121:5 inoti: “Djehovha ndi bvute rako ku moko kwawo wako.” Kuita hingana mbuto inodziirirhwa no bvute pano zuwa rinopisa maningi, Djehovha angadziirira aseenzi ake pa kupisa ke matambudziko, eciapasa bvute, kana kuti kudziirhwa, pasi pe “nyara” yake kana kuti pasi pe “mabaphiro” ake.—Isaya 51:16; Pisarema 17:8; 36:7.
it-2 paji. 1219 ndi. 5
Izwi
Mwari anozwa izwi ye aseenzi ake. Aya anoseenzera Mwari no mwiya uye cokwadi angaita munamato kaari no rugondo rekuti iyena anozwa izwi rawo pasinei no mureketero upi hawo waangaita nawo munamato. Kunyazi asikadusi izwi ngekuita munamato mucinyararire kuna Mwari, Iyena ekuti anoziya mwoyo ye anhu, “anozwa” kana kuti anokoshesa. (Pis 66:19; 86:6; 116:1; 1Sa 1:13; Ne 2:4) Mwari anozwa aya ari kunetseka ecikumbira rubetso kaari, uyewo iyena anozwa uye anoziya zvido zve anhu anophikisa uye anoronga kuita zvakashata ku aseenzi ake.—Ge 21:17; Pis 55:18, 19; 69:33; 94:9-11; Dje 23:25.
Tingakunda Kudini Kudzirhya Mwoyo?
2. Kunyasa kurangarira. Munokwanisa kurangarira here mugariro we zviro unoshupha wamakambosongana nawo mu upenyu wenyu, asi makakwanisa kuukunda nge rubetso ra Djehovha here? Kana tikanyasa kurangarira kubetsera kakaita Djehovha aseenzi ake mu nguwa dzekare uyewo kubetserhwa katakamboizwa, tinogara no runyararo re zvirokwazvo uye rugondo redu kaari rinotunhudzirika. (Pis. 18:17-19) Mukuru umweni unozwi Djoshuwa wakati: “Ndino mundandanda we minamato yandakadairhwa na Djehovha. Izvona zvinondibetsera pa nguwa yekuti ndakakumbira Djehovha ciro candaida uye iyena akandipasa icona kamare.” Zvezvirokwazvo, kana tikanyasa kurangarira mabetserhwe atakaizwa na Djehovha, zvinotipasa simba rekuti tirhwisane no marangariro anoita kuti tidzirhye mwoyo.
Upfumi Watinogumira mu Bhaibheri
it-2 paji. 768 ndi. 3
Kerubhi
Idzona dzainga dzisiripi mifanikiso dzaithyisa hingana dziya dzainamathwa no madzinza amweni aiyatenderedza, hingana zvinorekethwa no amweni. Maererano no upupuri we kare wakatenderana we Adjudha (Bhaibheri arizi kureketa ngezve nyaya ii), makerubhi aya ainga akaita hingana munhu. Dzainga dziri mifanikiso dzakatonyasa kuizwa, dzeciimirira ngirozi dzakanyasa kurungama, uye dzakaizwa “maererano no. . . . muezaniso“ wakapaswa Mozesi na Djehovha. (Eki 25:9) Muphostori Pauro unodzipanganidza hingana “makerubhi e rukudzo, ekuti mabaphiro awo aifukidza cidumhaidzo ce mbuto yaipisirhwa ruseenzi.“ (Ahe 9:5) Makerubhi aya ainga anocokuita no kuoneka ka Djehovha: “Ipona ndicadzipangidza kauri uye ndicareketa na iwewe ndiri pa musoro pe cidumhaidzo, pakati pe makerubhi mairi ari pamberi po arka ye citenderano.” (Eki 25:22; Nu 7:89) Ndiyo ndaa zvecibhuiwa kuti Djehovha ainga “akagara pa musoro [kana kuti pakati] pe makerubhi.” (1Sa 4:4; 2Sa 6:2; 2Md 19:15; 1Mk 13:6; Pis 80:1; 99:1; Isa 37:16) Nge mushobo we kuezanisira, makerubhi “aiseenzeswa hinga aimiriri e karu” ya Djehovha, yekuti iyena aihamba nayo (1Mk 28:18), uye mabaphiro e makerubhi aidziirira pa kurinda kutobatanidzawo pa kuita rhwendo no kukasika. Ngokudaro, Dhavhidhi mu ngoma yake ye poeziya wakapanganidza ngezve kukasika kakaita Djehovha kuti amubetsere, ecibhuya kuti “akauya akapakira pa kerubhi uye akauya ecimburuka,” kunyazi no “mabaphiro e mwiya.”—2Sa 22:11; Pis 18:10.
MARSO 18-24
UPFUMI UNOBVA MU SOKO RA MWARI | PISAREMA 19-21
“Matenga Anoziisa Rukudzo ra Mwari”
w04 1/1 paji. 8 mandi. 1-2
Ese Ngaaziise Rukudzo ra Djehovha
DHAVHIDHI, mwana wa Djese, wakakura hinga muushi dhuze no ku Bheterehema. Kakawanda kese wakaona kukura ke matenga no nyeredzi co usiku, paainga ecicengeta mabira a baba ake ari ega! Apana mubvunzo kuti zviitiko izvi zvakauya mu ndangariro make paakafemerhwa no mwiya mucena wa Mwari kuti atare uye aembe masoko anopfadza ari pana Pisarema 19 ekuti: “Matenga anoziisa rukudzo ra Mwari; awona anoziisa mabasa e nyara dzake. Asi matenga anopasa upupuri pasi rese, uye masoko awo anoguma ku magumo e nyika.”—Pisarema 19:1, 4.
2 Matenga akasikwa na Djehovha anoziisa rukudzo rake, mazuwa ese, usiku no masikati kunyazi hazvo asikareketi, aana masoko kana izwi. Zvisikwa azvimbosii kupasa rukudzo ra Mwari, uye zvinoita kuti tidzidodose patinorangarira ngezve upupuri uu usikareketi unopaswa mu “nyika yese” kuti agari ese e mu nyika aone. Asi azvikwani basi kupupura kunoita zvisikwa. Anhu akagondeka anokohomedzeswa kuti abhuyewo no izwi rinozwika. Mupisarema umweni usikabhuiwi zina rake, wakabvunza anamati akagondeka masoko akafemerhwa anoti: “Pasai Djehovha zvakamusisira nge ndaa ye rukudzo rake uye simba. Pasai Djehovha rukudzo rinosisira ku zina rake.” (Pisarema 96:7, 8) Aya ano ushamwari uri padhuze na Djehovha anozwa mupfaro ngo kutendera kohomedzeso ii. Asi rukudzo ra Mwari rinocokuita nei?
w04 6/1 paji. 11 mandi. 8-10
Matenga Anoziisa Rukudzo ra Mwari!
8 Dhavhidhi unopanganidza ngezve zvishamiso zve zvisikwa zvimweni zva Djehovha kuti: “Makagadzirira zuwa tenda imona [matenga anooneka], irona rakaita hinga mwanarume wabva kucata ecibuda mu nyumba yokucatira; rinopemberera hinga mwanarume uno simba ecigogoma mu gwanza. Zuwero rinobuda kumagumo e nyika uye rinotenderera dakara ku mugumo umweni we nyika; uye apana cinosara cakaigika pa kupisa karinoita.”—Pisarema 19:4-6.
9 Reciezaniswa no nyeredzi dzimweni, zuwa rakakura nge mushobo uri pakati no pakati. Asi irona, i nyeredzi inonyanya kuonekwa, inoita kuti nyeredzi dzimweni dzinoritenderera dziite hinga zvidoko doko. Bhuku rimweni rinobhuya kuti zuwa rinorema matoneradha anokwana “mabhirionji e mabhirionji mairi”—zvecida kureya mapurusento anokwana 99.9 ekurema ke nyeredzi dzedu dzese! Simba raro rinokweiwa, rinotendera kuti ritenderere pasi ke makirometro anokwana 150 mirionji risikaendi kure no zuwa kana kukhwedera dhuze maningi. Praneta yedu inotungwa no cidii cidoko basi no simba rinopaswa no Zuwa, asi ci dii icona cinokwanisa kucengetedza upenyu.
10 Mutari we pisarema wareketa ngezve zuwa nge mushobo we kuezanisira eciipanganidza hingana “we masimba” unogogoma ecibva ku dii rimwe ecienda ku dii rimweni pa zuwa uye unozorora usiku mukati me “tenda.” Nyeredzi ii yakakura painouya yecibaka, kana teciiona tiri pano pa nyika, inoita hinga iri kupinda mu “tenda,” hingana iri koozorora. Macibesi iyona inouya yecibaka “hinga mwanarume wabva kucata ecibuda mu nyumba yokucatira.” Dhavhidhi hinga muushi, waizviziya kuti cousiku kaizotonhora. (Genesi 31:40) Iyena waiedzurira kuti zuwa raibakira kudini iyena no zviro zvaimutenderedza. Zviri pamhene kuti zuwa rainga risikarembi nge ndaa ye “kubaka karaiitira” kumabva zuwa dakara kumadokera, asi raiita hinga “we masimba” akagadzirira kubaka.
g95 11/8 paji. 7 ndi. 3
Musiki Asikakosheswi mu Mazuwa Edu Ano
Kutunhudzira kutenda kedu ku zviro zvakasikwa, kungakwanisa kutibetsera kuziya Musiki wedu wekuti zvese zvaakasika zvakatitenderedza. Djesu akabvunza afundi ake kuti aone maruwa e mushango aikura ku Garireya, iyena akati: “Fundai no makurire anoita maruwa e mushango, awona aabati basa uye aaruki asi ndinomubvunzai kuti, kunyazi Soromoni no mbiri yake yese, aazi kusimira hingana rimwe rawo.” (Mateu 6:28, 29) Kurungama ke ruwa re mushango, kungatiedzurira kuti Mwari aambosii kuriritira anhu ake.
Upfumi Watinogumira mu Bhaibheri
it-1 paji. 1128
Cihebheru, II
Zvaazvadaro, masoko anoembwa anobva abatana, (kana kuti, anodzadzisana) dii ro cipiri arindophindi basi masoko anonga adudzwa pa mutsara wokutanga, uyewo masoko akhona aapesani. Asi anoita kuti zvidjeke togara no masoko mapsva. Pisarema 19:7-9 muezaniso wakhona:
Mutemo wa Djehovha wakakwana,
unohwirinza simba.
Zviedzuriro zva Djehovha zvakagondeka,
zvinongwadza asina uzii.
Zvinobhuiwa na Djehovha ngezve unatsi,
zvinoita kuti mwoyo upfare;
Mitemo ya Djehovha yakacena,
inoita kuti madziso apenye.
Kuthya Djehovha kakacena,
kunogara nokusikaperi.
Mitongo ya Djehovha ngeye cokwadi
yese ngeye unatsi.
Onai kuti dii rocipiri ro mutsara umwe na umwe, rinodzadzisa zvinonga zvecida kududzwa, zvozoita kuti mutsara wese wobva wabatana. Asi pakati no pakati pe mitsara pakaita hingana “unohwirinza simba” uye “zvinongwadza asina uzii” zvinoita kuti muerengi aziye kuti ‘mutemo wa Djehovha wakakwana’ uye kuti “zviedzuriro zva Djehovha zvakagondeka.” Pa mugariro wakadai, pa musiyano uripo pakati pe mutsara wekutanga no wo cipiri, zvinoita kuti muerengi amboime uye azwisise zvaanonga aerenga. Kana tikadaro, zvicaita kuti masoko edu, aite kuti zvibve zvabatana. Ndiyo ndaa zvecidainzwa kuti masoko akaezana kana kuti masoko anowaka.
MARSO 25-31
UPFUMI UNOBVA MU SOKO RA MWARI | PISAREMA 22
Bhaibheri Rainga Rakareketa Zvakawanda Ngezve Rufu ra Djesu
w11 8/15 paji. 15 ndi. 16
Awona Akaona Mesiya!
16 Mesiya waizoita hingana kuti asiiwa na Mwari. (Erengai Pisarema 22:1.) Maererano no uphorofiti, padzakaguma “15 dze masikati, Djesu akadainzira no izwi guru eciti: ‘Eri, Eri, rama sabhakitani?’ zvinoreya kuti: ‘Mwari wangu, Mwari wangu, ngei mandisiya ndega?’” (Mk 15:34) Azvirei kuti Djesu ainga asina kutenda kuna Baba ake e kudenga. Mwari akasia Djesu mu nyara me azondi ake asikamudziiriri kuitira kuti kuperera ka Djesu kuedzwe. Uye kudainzira kakaita Djesu kakadzadzisa Pisarema 22:1.
w11 8/15 paji. 15 ndi. 13
Awona Akaona Mesiya!
13 Dhavhidhi akaphorofita kuti Mesiya aizotukwa. (Erengai Pisarema 22:7, 8.) Djesu akatukwa paaitambudzika pamutanda, Mateu unoti: “Aipinda ndipona, aimutuka ecidzungudza misoro yawo eciti: ‘Iwewe waiti waizoparadza tempro, woiwaka mu mazuwa matatu, dziponese! Kana uri mwana wa Mwari, cita pa mutanda!’” Atungamiriri e apristi, atari no akuru, akatanga kumusekawo eciti: “Akaponesa amweni; asi iyena aakwanisi kudziponesa! Iyena ndi Mambo we Israeri; ngaacite pa mutanda we kutambudzikira, uye isusu ticatenda maari. Iyena waigonda Mwari; Mwari wakewo ngaamuponese kudai Ecimuda, ngokuti iyena waireketa kuti: ‘Ndiri Mwana wa Mwari.’” (Mat. 27:39-43) Asi Djesu akashingirira zvese izvi no rureremedzo!
w11 8/15 paji. 15 ndi. 14
Awona Akaona Mesiya!
14 Aizokhandira midjenya kuti akoanisane macira a Mesiya. Mutari we pisarema wakatara kuti: “Koanisanai macira angu,”, “uye khandirai midjenya kuitira macira angu.” (Pis. 22:18) Zvakaitika izvona kamare, mumasure “mekuti [masurudado e Roma] akhomera [Djesu] pamutanda, akakhandira mudjenya kuti akoanisane macira ake e kunza.”—Mat. 27:35; erangai Juau 19:23, 24.
Upfumi Watinogumira mu Bhaibheri
w06 11/1 paji. 29 ndi. 7
Tinopangidza Rureremedzo nge Musangano Dzedu Dzakacena
7 Pano mishobo yakawanda yatingapangidza kureremedza kuungana katinoita. Imweni yakhona ngeye kugara tiripo panoembwa ngoma dze Umambo. Dzakawanda dzakhona dzakatarhwa nge mushobo we munamato, hino tinodikana kuemba no rureremedzo. Ecireketa ngezve masoko ari pana Pisarema 22, muphostori Pauro wakatara ngezva Djesu kuti: “Ndicaziisa hama dzangu zina renyu; ndicamukudzai no ngoma ndiri pakati pe ungano.” (Ahebheru 2:12) Ngo kudaro, tinodikana kugara pa mbuto pedu sacigaro asati aziisa ngoma, uye tokanda ndangariro dzedu pakuti masoko akhona anoreyei. Mushobo watinoemba ngaupangidze kuti tinozwa hingana mazwiro aiita mutari we pisarema, akati: “Ndicakudza Djehovha no mwoyo wangu wese pakati pe anatsi uye ndiri mu ungano.” (Pisarema 111:1) Zvezvirokwzvo, kuembera Djehovha cikonzero cakanaka cinoita kuti tigume ku misangano nguwa iciripo.
w03 9/1 paji. 20 ndi. 1
Kudzai Djehovha “Muri Pakati pe Ungano”
Nyamasi uno, kuezana no nguwa yo kare, panoizwa urongwa kuitira kuti uya anotenda abhuye ngezve kutenda kake “pakati pe ungano.” Mukana uripo ku ese ngewe kupasa mhinduro dze mibvunzo dzinoizwa ku apurutani pa misangano ye ungano. Ngo muezaniso, zvatinobhuya zvinopangidza mushobo we kukurira kana kuti kunzvenga nayo zvinetso zvinobambisa kushinga ke hama dzedu pa kuteera kadzinoita nhungamiriro dze Bhaibheri. Mhinduro dzinopanganidza tsamba dze Bhaibheri dzinonga dziripo asi dzisikazi kutarhwa, kana kuti dzinobatanidza marangariro mumasure mekuti munhu wakwarakwatisa zvingakohomedzesa amweni kuti asakurire muitiro wakanaka we kufunda.
ABRIRI 1-7
UPFUMI UNOBVA MU SOKO RA MWARI | PISAREMA 23-25
“Djehovha Ndiye Muushi Wangu”
w11 5/1 paji. 31 ndi. 3
“Djehovha Ndiye Muushi Wangu”
Djehovha anotungamirira mabira ake. Mabira asina muushi, kakawanda kakhona anopsveteka. Ngo mushobo umwewo, tinoda kubetserhwa kuti tikwanise kuona gwanza rakanaka rokuhamba naro mu upenyu wedu. (Djeremiya 10:23) Hingana zvinopanganidzwa na Dhavhidhi, Djehovha anotungamirira anhu ake ku “mbuto ino mashango akasvipirira” uye “mbuto yo kuzororera yakanyasa kudirirhwa.” Iyena anoatungamirira mu “makwanza e unatsi.” (Mavhersikuro 2, 3) Mushobo uu we kuusha unotiitisa kuti tinyase kugonda Mwari. Nge kuteerera nhungamiriro ye mwiya wake, inopangidzwa mu Bhaibheri, tingagara no upenyu unopfadza maningi uye wakacengeteka.
w11 5/1 paji. 31 ndi. 4
“Djehovha Ndiye Muushi Wangu”
Djehovha anodziirira mabira ake. Pasina muushi padhuze, mabira anothya. Djehovha anobvunza aseenzi ake kuti aadikani kuthya, “kunyazi ecihamba mucidima cinothyisa maningi”—kana kuti munguwa inoshupha maningi mu upenyu wawo. (Vhersikuro 4) Djehovha anoacengeta, uye akagadzirira kuabetsera. Iyena angakwanisa kupasa aseenzi ake ungwaru uye simba raanoda kuti akunde miedzo.—Afiripi 4:13; Tiyago 1:2-5.
w11 5/1 paji. 31 ndi. 5
“Djehovha Ndiye Muushi Wangu”
Djehovha anopasa zvokurhya mabira ake. Mabira anoda rubetso ro muushi wawo kuti awone zvokurhya. Isusu tino zvinodiwa pa mwiya zvekuti tingakwanisa kuzviona no rubetso ra Mwari basi. (Mateu 5:3) Zvinopfadza ngezve kuti Djehovha anotipasa zvatinoda no mwoyo wese. Iyena Anogadzirira zviro zvakawanda ku aseenzi ake. (Vherisikuro 5) Bhaibheri no mabhuku amweni anoseenzeswa pakurifunda, hingana revhista ii yamuri kurierenga ndizvo zvekurhya zve ku mwiya zvinodikanwa kuti tigutsikane pa zvinodiwa zve kumwiya kuti tiziye kuti ndicipi cinanguwa ce upenyu uye cinangwa ca Mwari katiri.
Upfumi Watinogumira mu Bhaibheri
w11 2/15 paji. 24 mandi. 1-3
Idai Unatsi no Mwoyo Wese
ECISEENZESA Soko rake uye mwiya wake mucena, Djehovha anotungamirira anhu ake mu “makwanza e unatsi.” (Pis. 23:3) Asi ngekuti tiri anhu asikazi kukwana, tingabuda mu gwanza irona. Pedzepo, kuhwirirazve kuita zviro zvakanaka kunodikana kugadzirira uye kupeta masimba. Cinyi cingatibetsera kuti tibudirire? Kuita hingana Djesu, tinodikana kuda kuita cakanaka.—Erengai Pisarema 45:7.
2 Cinyi cinozwi “makwanza e unatsi”? I gwanza rakatetepa. “Makwanza” aya anoimirira mitemo ye unatsi ya Djehovha. Mu Cihebheru uye mu Cigrego, soko rokuti “unatsi” rinoreya kunyasa kuteerera tsika dzakanaka. Sezvo Djehovha “i mbuto inogarhwa no unatsi,” anamati ake anopfarira kusiya kuti iyena asanangure gwanza rakanaka rinodikanwa kuhambwa naro.—Djer. 50:7.
3 Zvinobvira basi kunyasa kupfadza Mwari kana tikapeta masimba no mwoyo wese kuti tirarame maererano no mitemo yo unatsi wake. (Dhe. 32:4) Kuti tikwanise kuita izvona, tinodikana kufunda zvese zvinocokuita ngezva Djehovha Mwari mu Soko rake Bhaibheri. Patinotunhudzira ruziyo redu ngezva Djehovha, tecikwedera kaari mazuwa ese, rudo redu ku unatsi wake ricabambirira kukura. (Tig. 4:8) Tinodikanawo kutendera nhungamiriro dze Soko rakafemerhwa ra Mwari patinonga tecida kuita zvisananguro zvinokosha mu upenyu.
ABRIRI 8-14
UPFUMI UNOBVA MU SOKO RA MWARI | PISAREMA 26-28
Dhavhidhi Wakaitei kuti Arumbwe Akaperera kuna Djehovha
w04 12/1 paji. 14 mandi. 8-9
Ngatihambe mu Gwanza Rakaperera
8 Dhavhidhi wakanamata eciti: “Ndiongororei, Haiwa Djehovha, mundiedze; natsirisai ndangariro dzangu dze mukatikati uye mwoyo wangu.” (Pisarema 26:2) Mazazo anogara mukatikati me mwiri. Awona anoimirira marangariro uye mazwiro e mukati me munhu. Uye mwoyo we kuezanisira unoreya munhu wese kamare ngece mukati—zvikonzero, mazwiro uye uzii. Paainamata kuna Djehovha ecikumbira kuti amuongorore, caidiwa na Dhavhidhi cainga ciri cekuti marangariro uye mazwiro ake e mukati aongororhwe uye zvinyase kuoniwa.
9 Dhavhidhi akakumbira kuti mazazo no mwoyo wake zvigadziriswe. Djehovha anogadzirisa kudini zvatiri ngece mukati? Dhavhidhi wakaemba kuti: “Ndicakudza Djehovha uyo anondipangira. Kunyazi usiku ndangariro dzangu dze mukatikati dzinondinatsirisa.” (Pisarema 16:7) Izvona zvinoreyei? Zvinoreya kuti mazano a Mwari akabata-bata mukatikati ma Dhavhidhi ogara, ecigadzirisa mazwiro uye ndangariro dzake dze mukatikati. Izvona zvingaitikawo katiri kana tikanyasa kurangarira nokutenda mazano atinoona kubva mu Soko ra Mwari, ku aimiriri ake uye ku sangano rake, uye totendera kuti mazano awona agare mukatikati medu. Kugara teciita munamato kuna Djehovha kuti atigadzirise nge mushobo uu kucatibetsera kuti tihambe takagondeka.
w04 12/1 paji. 15 mandi. 12-13
Ngatihambe mu Gwanza Rakaperera
12 Ecibhuya ngezve ciro cimweni cakabambisa kuperera kake, Dhavhidhi wakati: “Andina ushamwari no anhu anonyepa; uye ndinogara kure no aya anonyepedzera zvaari. Ndinozonda kugara no anoita zvakashata, uye ndinoramba kuhamba no akashata.” (Pisarema 26:4, 5) Dhavhidhi wainga akagadzirira kutama kugara no anhu anoita zvakashata. Iyena waizonda kushamwaridzana no anhu anoita zvakashata.
13 Zvakadini na isusuwo? Tinoramba here kugara no anhu anonyepedzera zvaari peciseenzeswa maprogarama e terevhizau, mavhidhiyo, sinema, Interneti, kana kuti zviro zvimweniwo? Tinogara kure no aya anofisa zvaari? Amweni kucikora kana kuti kubasa pamweni angagara no zvinangwa zviiri kana kuti kunyepedzera kugara shamwari dzedu. Hino tingadadi kamare kusakurira ushamwari wakabamba no aya asikahambi maererano no cokwadi ca Mwari? Kunyazi ecipangidza kuti anoita zvakanaka, apanduki e cokwadi pamweni angafisa cinangwa cawo cekuda kutipausa kuti tisaseenzere Djehovha. Hino kana mu ungano muno anhu amweni anotora upenyu uiri? Ayawo zvezvirokwazvo anofisawo zvaari. Jayson, wekuti zvino waamubati anosenzera, wainga ano shamwari dzakadaro paainga ari mudjaha. Iyena unopanganidza eciti: “Zuwa rimweni, umwe we shamwari dzangu wakandibvunza kuti: ‘Azvinei no zvaticaita zvino, ngokuti mugariro upsva we zviro ukaguma, tinonga tatofa kare. Tinonga tisikacazvizii kuti taruza ciro cipi haco.’ Masoko aya akasenza hinga ngwadzo kandiri. Andidi kufa kana mugariro upsva we zviro ukaguma.” Jayson no ungwaru wakasiya kushamwaridzana nawo. Muphostori Pauro wakangwadza kuti: “Musacengedzwe. Kushamwaridzana no anhu anoita zviro zvakashata kunoshatisa maitiro akanaka.” (1 Akorinti 15:33) Zinokosha maningi kusama kushamwaridzana no anhu anoita zviro zvakashata!
w04 12/1 paji. 16 mandi. 17-18
Ngatihambe mu Gwanza Rakaperera
17 Tabhernakuro, no artari yayo yo cibairo, yainga iri mbuto yokunamata Djehovha mu Israeri. Ecipangidza mushobo waaipfarira mbuto iyona, Dhavhidhi wakanamata eciti: “Djehovha, ndinoda maningi nyumba yamunogara, mbuto inogara rukudzo renyu.”—Pisarema 26:8.
18 Kodi isusu tinonyasa kupfarira kuungana katinoita kuti tifunde ngezva Djehovha here? Nyumba yo Umambo imwe na imwe no urongwa wayo we kurumbwa wecifundisa zviro zvinocokuita no kunamata, inoseenza hingana mbuto yokunamata ke cokwadi mu nharaunda. Kusiya izvona, makore ese tino magungano e mutanha, magungano e munharaunda uye gungano rinokosha re zuwa rimwe. “Zviedzuriro,” kana kuti fundiso dza Djehovha zvinopanganidzwa pa misangano idzona. Tikafundira “kunyasa kuzvida,” tinogara no cido cakabamba cokubatanidzwa tiripo uye tonyasa kuteya nzee pa zviya zvinonga zvecirekethwepo. (Pisarema 119:167) Zvinopfadza maningi kuungana no hama dzinopfarira kucengeteka ke umwe na umwe wedu uye anotibetsera kuti tienderere mberi takaperera!—Ahebheru 10:24, 25.
Upfumi Watinogumira mu Bhaibheri
w06 7/15 paji. 28 ndi. 15
Djehovha Anonunura uya Anotambudzika
15 Mutari we pisarema Dhavhidhi wakaemba kuti: “Kunyazi baba angu na mai angu akandisiya, Djehovha acanditora.” (Pisarema 27:10) Zvinonyaradza maningi kuziya kuti rudo ra Djehovha rinodarika rudo ripi haro ra mai kana kuti ra baba! Kunyazi zvecirhwadza maningi patinorambwa, kubathwa zvisina unatsi kana kuti, kusiiwa na baba kana kuti na mai, apana zvinoitisa kuti Djehovha asatipfarire. (Aroma 8:38, 39) Edzurirai kuti Mwari anokweya uya waanoda. (Juau 3:16; 6:44) Pasinei no mushobo wamakabathwa no anhu, imwimwi munodiwa maningi na Baba enyu e kudenga!
ABRIRI 15-21
UPFUMI UNOBVA MU SOKO RA MWARI | PISAREMA 29-31
Mupango—Cipangidzo ce Rudo ra Djehovha
it-1 mapaji. 929-930 ndi. 12
Hope
‘Kufisa hope’ kungareya zvakawanda, asi zvinoenderana no mugariro umwe na umwe. Kufisa kunoita Djehovha Mwari hope yake kakawanda kakhona zvinoreya kusiya kupfarira munhuwo kana kuti kubvisa simba rake pakumuriritira. Izvi zvinoitika nge ndaa ye kutama kuzwira ke munhu kana cikwata ce anhu, kuita hingana dzinza ra Israeri. (Djob 34:29; Pis 30:5-8; Isa 54:8; 59:2) Pamweni paya zvingareya kuti Djehovha aima kuita ciito kana kuti kupasa mhinduro, ecietsera nguwa kwayo. (Pis 13:1-3) Cikumbiro ca Dhavhidhi cokuti: “Fisai hope yenyu pa zvitema zvangu uye fudzai zvitema zvangu zvese,” cinopangidza kuti iyena waikumbira kurekererhwa zvitema zvake na Mwari. —Pis 51:9; ezanisai Pis 10:11.
w07 3/1 paji. 19 ndi. 1
Kupfara nge Kuetsera Djehovha
Kubetserhwa katinoizirhwa no mupango wa Djehovha kungaezaniswa no kukura kunoita mucero dakara wapsvuka. Recibhuya ngezve mupango wa Mwari, Bhaibheri rinoti: “Kuno aya anoroedzwa ngo mupango, uwona unobara mucero we runyararo no unatsi.” (Ahebheru 12:11) Kuitawo hingana micero inoda nguwa kuti ikure, isusuwo tinodawo nguwa kuti ticinje maitiro edu ngekuteerera ruwedzo ratinopaswa na Mwari. Nge muezaniso, kana nge ndaa ye muhambiro wedu wakashata ukaita kuti isusu tiruze ubaba wedu mu ungano, kuda kedu kuetsera Mwari kucatiitisa kuti tisaore mwoyo uye kusama kuremba. Pa mugariro wakadai, masoko akafemerhwa a Dhavhidhi anotipfadza: “Ngokuti kutsamwirhwa naye [na Mwari] nge kenguwa doko, asi kupfarirhwa naye nge ke upenyu wese. Kucema kungakwanisa kuuya no usiko, asi kaedza panooneka mupfaro wakakura.” (Pisarema 30:5) Kana tikasakurira wara ro kuetsera uye toseenzesa mazano anobva mu Soko ra Mwari uye ku sangano rake, nguwa yedu ye “kupfara” icaguma.
Cinyi Cinozwi Kucinyuka ke Zvirokwazvo?
18 Munhu wakadzingwa anodikana kuita zviro zvinganani kuti apangidze kuti wacinyukadi zvezvirokwazvo. Iyena unodikana kupinda misangano nguwa dzese, oteera mazano e akuru e kuita munamato nguwa dzese uye kufunda Bhaibheri. Iyena unodikana kuita zviri zvese kuti asasongane no migariro yakaita kuti aite citema icona. Kana munhu akapeta masimba kuti agarezve no ushamwari na Djehovha, iyena ucagara no rugondo rekuti Djehovha acamurekerera uye akuru acamuhwirinza mu ungano. Zviri pamhene kuti paanobata nyaya ye munhu wakaita citema, akuru anoedzurira kuti nyaya imwe na imwe yakasiyana no ndaa imweni uye kuti awona aadikani kutonga asikapangidziri usisi.
Upfumi Watinogumira mu Bhaibheri
w06 5/15 paji. 19 ndi. 13
Mafundo Makuru Anobva mu Bhuku Rekutanga ra Pisarema
31:23—Munhu wese anodzikudza anohwirinzirhwa kudini nge mushobo wakanyanyisa? Kuhwirinzirhwa kuri kubhuiwa apa kunoreya kuphanicwa. Munhu munatsi unohwirinzirhwa na Djehovha nge ndaa ye zvishaishi zvaanoita asikazvizii. Asi munhu anodzikudza, sezvoo aacinyuki pa zviito zvake zvakashata, unohwirinzirhwa nge kuphanicwa nge mushobo wakanyanyisa.—Zvierengo 11:31; 1 Pedru 4:18.
ABRIRI 22-28
UPFUMI UNOBVA MU SOKO RA MWARI | PISAREMA 32-33
Ngei Tecidikana Kooreketa Ngezve Zvitema Zvakakura?
w93 3/15 paji. 9 ndi. 7
Usisi wa Djehovha Unotiponesa pa Kuora Mwoyo
7 Kana taita zvitema zvakakura kuna Mwari, pamweni zvingatishuphira kupupura zvitema zvedu, kunyazi kuna Djehovha. Cinyi cingaitika pa migariro hingana ii? Pana Pisarema 32, Dhavhidhi wakabhuya nge zvake kuti: “Pa nguwa yandakarumbwa ndakanyarara [pane kupupura], makodo angu akapera simba nge kugomera zuwa rese. Ngokuti usiku no masikati nyara yenyu [ya Djehovha] yaindiremera. Masimba angu akapera kuphwa hinga kuphwa kunoita mvura mu nguwa ye kupisa.” (Mavherisikuro 3, 4) Kuedza kufisa citema cake uye kudvinyirira hana iri kudzipasa ndaa zvakarembesa mushaishi Dhavhidhi. Kushuphika kakamurembesa maninngi zvekuti wakaita hinga muti wakaoma usina mvura. Zvezvirokwazvo, iyena pamweni aazi kuzwa zvakanaka mu ndangariro uye mu mwiri kamare. Azvinei kuti zvakahamba kudini, iyena wakaruza mupfaro. Kana umwe na umwe wedu ari pa mugariro wakaita hingana uu cinyi caanodikana kuita?
cl paji. 262 ndi. 8
Mwari “Wakagadzirira Kurekerera”
8 Dhavhidhi paakacinyuka wakati: “Ndazopupura citema cangu; andizi kufisa cishaishi cangu. . . . Uye imwimwi marekerera cishaishi cangu uye zvitema zvangu.” (Pisarema 32:5) Soko rokuti “marekerera” rinoturukira soko ro Cihebheru rinoda kureya “kupurumutsa” kana kuti “kutora.” Mushobo waraseenzeswa apa, irona rinoda kureya kubvisa “ndaa, citema uye cishaishi.” Zvaita hingana kuti Djehovha apurumutsa uye atora zvitema zva Dhavhidhi. Zviri pamhene kuti izvona zvakaita kuti Dhavhidhi arerukirhwe pa mazwiro ake e kudzipasa ndaa aaishingirira. (Pisarema 32:3) Isusu tinganyasawo kugonda Djehovha, ngokuti iyena anotora zvitema zve aya anopsvaka kurekererhwa naye eciseenzesa kutenda mu cibairo ce rusudzunuro ra Djesu.—Mateu 20:28.
w01 6/1 paji. 30 ndi. 1
Kupupura Kunoita kuti Munhu Apore
Mumasure mekuti Dhavhidhi apupura citema cake, iyena aazi kugara no mazwiro ekuti andicabetseri. Masoko ake aakatara pa mapisarema ngezve kupupura anopangidza kurerukirhwa kaakazwa uye cido cake cekuseenzera Mwari akagondeka. Ngo muezaniso, onai Pisarema 32. Pa vherisikuro 1, tinoerenga kuti: “Anopfara munhu anorekererhwa cishaishi cake, wekuti citema cake cakafukidzwa.” Azvinei no kukura ke citema, zvinoita kuti pagare no mugumisiro unopfadza kana munhu wakacinyuka zvecibva mu mwoyo. Iyena angakwanisa kupangidza kucinyuka uku nge kutendera mugumisiro we maitiro ake hinga zvakaizwa na Dhavhidhi. (2 Samueri 12:13) Iyena aazi kupsvaka kurerusa zvishaishi zvake pamberi pa Djehovha uye aazi kupasa ndaa munhu umweni. Vherisikuro 5 inoti: “Ndazopupura citema cangu kamuri, andizi kufisa kushaisha kangu. Ndakabhuya kuti: ‘Ndicapupura cishaishi cangu kuna Djehovha.’ Uye imwimwi makandirekerera zvishaishi zvangu.” Kupupura zvese uye zvecibva pa mwoyo, zvinoita kuti munhu azwe akarerukirhwa zvekuti hana yake aicadikani kunetseka no zviro zve kare.
Upfumi Watinogumira mu Bhaibheri
w06 5/15 paji. 20 ndi. 1
Mafundo Makuru Anobva mu Bhuku Rekutanga ra Pisarema
33:6; masoko e pasi—“Mwiya” we mu muromo ma Djehovha i cinyi? Mwiya iwona i simba ra Mwari kana kuti mwiya mucena, waakaseenzesa pakusika denga no nyika. (Genesi 1:1, 2) Unodainzwa kuti mwiya we muromo wake ngokuti, kuitawo hinga kufema ko simba, uwona ungatumwa kuti uite zviro nge kure.
ABRIRI 29–MAYO 5
UPFUMI UNOBVA MU SOKO RA MWARI | PISAREMA 34-35
“Ndicakudza Djehovha Nguwa Dzese”
w07 3/1 paji. 22 ndi. 11
Ngatikudze Djehovha Tiri Pamwepo
11 “Ndicakudza Djehovha nguwa dzese; kukudzwa kake kucagara kuri mu muromo mangu.” (Pisarema 34:1) Ecirarama hingana mutizi, Dhavhidhi pamweni wainetseka maningi nge ndaa yekuda kudziriritira, asi hingana zvinopangidza masoko aya, zviro zvaaida pakudziriritira zuwa no zuwa zvainga zvisikanyanyi kukosha kudarika cisananguro cake cokukudza Djehovha. Zvezvirokwazvo, uu i muezaniso wakanaka maningi katiri paya patinobatana no zvinetso! Azvinei kuti tiri kucikora, kubasa, no hama dzedu pakutenda, kana kuti mu basa rekuparidzira, cido cedu cekutanga cinodikana kugara cekukudza Djehovha. Rangarirai basi ngezve zvikonzero zvakawanda zvatinazvo kuti timukudze! Ngo muezaniso, pa zviro zvinoshamisa zvakasikwa na Djehovha, zvatinofunda ngezvazvo tecipfadzwa azviperi. Uye onai zvaanoita eciseenzesa sangano rake. Kunyazi ari anhu asikazi kukwana, Djehovha anonyasa kuseenzesa anarume aya akatendeka mazuwa edu ano. Tingaezanisa kudini mabasa a Djehovha no mabasa e anhu anonamathwa no nyika? Amutenderani here na Dhavhidhi, paakatara kuti: “Pakati pe anamwari akuna akaita hinga imwimwi, Haiwa Djehovha, apana mabasa akaita hinga enyu”?—Pisarema 86:8.
w07 3/1 paji. 22 ndi. 13
Ngatikudze Djehovha Tiri Pamwepo
13 “Ndicadzikudza muna Djehovha; anatsi acazwa uye acapfara.” (Pisarema 34:2) Apa Dhavhidhi wainga asikadzikudzi nge ndaa ye zviro zvaaiita iyena pacake. Ngo muezaniso, iyena aazi kudzikudza nge mushobo waakacengedzera mambo we Gati. Iyena waizviziya kuti Djehovha akamudziirira paainga ari mu Gati uye kuti akapukunyuka ecibetserhwa na Djehovha. (Zvierengo 21:1) Hino Dhavhidhi aazi kudzikudza, asi akakudza Djehovha. Nge ndaa yazvo, anatsi akakweerhwa kuna Djehovha. Nge mushobo umwewo, Djesu aikudza zina ra Mwari uye izvona zvaiita kuti anhu anodzidodosa anoda kufunda, auye kuna Djehovha. Mazuwa ano, anatsi e madzinza ese anokweerhwa ku ungano dze madzinza ese ye Akristu akadzodzwa, ekuti Djesu ndi Musoro wawo. (Akorosi 1:18) Anatsi aya, anobaiwa mwoyo paanozwa zina ra Mwari recikudzwa no aseenzi anodzidodosa uye paanozwa soko re Bhaibheri raanobetserhwa kuzwisisa eciseenzesa mwiya mucena wa Mwari.—Juau 6:44; Zviito 16:14.
w07 3/1 paji. 23 ndi. 15
Ngatikudze Djehovha Tiri Pamwepo
15 “Ndakaita munamato kuna Djehovha, uye iyena akandidaira uye akandinunura pa zviro zvese zvandaithya.” (Pisarema 34:4) Kubatana no mugariro uu, zvaikosha maningi kuna Dhavidhi. Ndiyo ndaa, iyena wakarumbwa ecireketa kuti: “Mwanarume uu unodzidodosa, wakadainza uye Djehovha akamuzwa. Iyena akamununura mu matambudziko ake ese.” (Pisarema 34:6) Patinoungana no hama dzedu, tino mikana yakawanda yokubhuya zviro zvakaitika zvinobambisa ngezve kuti Djehovha arikutibetsera kudini kuti tibatane no migariro inoshupha. Izvi zvinobambisa kutenda ke hama dzedu, hinga zvakaita masoko a Dhavhidhi akabambisa aya aimutsigira. Panocokuita na Dhavhidhi, aya aaishamwaridzana nawo “akaringisa kuna [Djehovha] uye opfara, hope dzawo dzainga dzisikapsveruki.” (Pisarema 34:5) Kunyazi aitiza Mambo Sauri, ainga asikapsveruki. Aigonda kuti Mwari aitsigira Dhadhivhi, uye hope dzawo dzakapfara. Nge mushobo umwewo, aya ari kutanga kupfarira, no aya a Akristu ke nguwa yakareba, anopsvaka rubetso kuna Djehovha. Ngekuti azwa rubetso rake pacawo, hope dzawo dzakapfara dzinopangidza kushinga kawo kurumbwa akagondeka.
Upfumi Watinogumira mu Bhaibheri
w06 5/15 paji. 20 ndi. 2
Mafundo Makuru Anobva mu Bhuku Rekutanga ra Pisarema
35:19—Cikumbiro ca Dhavhidhi cokutama kusiya kuti aya aimuzonda atame kuphaira madziso cinoreyei? Kuphaira madziso kaizoreya kuti azondi a Dhavhidhi aiwona mupfaro pakubudirira ke zviro zvakashata zvaaimurongera. Dhavhidhi akakumbira kuti izvona zvisaitike.