Mareferensiya e Urongwa we Musangano Basa Redu uye Kurarama
© 2024 Watch Tower Bible and Tract Society of Pennsylvania
MAYO 6-12
UPFUMI UNOBVA MU SOKO RA MWARI | PISAREMA 36-37
“Musanyangadzwe nge Ndaa ye Anhu Anoita Zviro Zvakashata”
w17.04 paji. 10 ndi. 4
Cinyi Cisikazoonekipozve Umambo wa Mwari Paucauya?
4 Isusu tinobathwa-bathwa kudini no anhu anoita zvakashata? Mumasure mekubhuya kuti mazuwa edu “aizonetsa uye aizoshupha kushingirira,” muphostori Pauro wakafemerhwa kuti atare kuti: “Anhu akashata no acengedzi acabambirira kugara akashata.” (2 Ti. 3:1-5, 13) Imwimwi munorangarira kuti izvona zviri kuitika mazuwa ano here? Akawanda edu takamboizirhwa zvakashata no anhu aya anoita zvakashata. Anhu amweni akadaro aaigi zvaari. Amweni anonyepedzera kugara anhu akanaka asi kunonga kuri kunyepedzera. Kunyazi isusu tisikazi kushuphika zvakananga nge ndaa ye anhu aya, maitiro awo anotibata-bata. Tinothya maningi patinozwa kuti awona anoita zviro zvakashata no ana, acemberi uye anhu amweni asikakwanisi kudzidziirira. Zviro zvaanoita azvizi kusisira kuizwa no anhu zveciita kuti hingana akatodzana no zvinyama uye madhimoni. (Tig. 3:15) Zvinopfadza ngezve kuti Bhaibheri rinotipasa masoko akanaka.
Djehovha Anokomborera Aya Anorekerera
10 Kucengeta bundu kunotikuwadza. Kurema ke bundu kungakura maningi uye Djehovha aadi kutiona tecinetseka nazvo. (Erengai Aefeso 4:31, 32.) Ndiyo ndaa anotibvunza kuti “musatsamwe uye siyai hasha.” (Pis. 37:8) Kuita izvona kunonga kuri kupangidza uzii, ngekuti kucengeta bundu kungatikuwadza pa nyama uye mu ndangariro. (Zvie. 14:30) Edzurirai kuti, kucengeta bundu akukuwadzi munhu watishaishira. Kuita izvona zvaizoita hingana kumwa mutombo unouraya toetsera kuti munhu umweni akuwadzike, hino patinorekerera amweni tisu tinowina. (Zvie. 11:17) Tinozwa runyararo uye mwoyo wedu unogara wakacena, pedzepo tinoenderera mberi teciseenzera Djehovha.
w03 12/1 paji. 13 ndi. 20
“Gumirai Mupfaro Wakakura kuna Djehovha”
20 Hino, “anhu akapfawa acagara nhaka ye nyika.” (Pisarema 37:11a) Asi anhu “akapfawa” aya ndiani? Soko rekuti “akapfawa” rinobva pa soko rinoreya kuti “tambudza, kupsverudza uye kudzidodosa.” Zvezvirokwazvo anhu “akapfawa” ndi aya ekuti ecidzidodosa anoetsera Djehovha kuti agadzirise kusama unatsi kese kaanoizirhwa. Awona “acapfara maningi mu runyararo rakawanda.” (Pisarema 37:11b) Kunyazi zvino tinoona runyararo rakakura mu paraizo yo ku mwiya yakabatana no ungano ye Cikristu ye cokwadi.
Upfumi Watinogumira mu Bhaibheri
it-2 paji. 410
Dunhu
Kudzikamidza, kugara kana kuti kukwirira. Masoko aya ekuti kudzikamidza uye kugara anopaswa ku matunhu. (Isa 54:10; Abh 3:6; ezanisai na Pis 46:2.) Hino, mutari we pisarema paakabhuya kuti unatsi wa Djehovha wakaita hingana “matunhu a Mwari,” (Pis 36:6) pamweni iyena waida kureya kuti unatsi wa Djehovha aucinji. Kana kuti, ngekuti matunhu akakwirira, pamweni izvona zvinopangidza kuti unatsi wa Mwari wakakwirira maningi kudarika unatsi we anhu. (Ezanisai Isa 55:8, 9.) Maererano no kudururhwa ke tijera ye cinonwe ye kutsamwa ka Mwari, Zvakapangidzwa 16:20 inoti: “Matunhu akangara-ngara.” Izvona zvinopangidza kuti kunyazi zviro zvakakwirira zvakaita hingana matunhu aazopukunyuki pakudururhwa ke kutsamwa ka Mwari.—Ezanisai na Dje 4:23-26.
MAYO 13-19
UPFUMI UNOBVA MU SOKO RA MWARI | PISAREMA 38-39
Musarumbwe Mecinyanya Kudzipasa Ndaa
“Onai Ramangwana” Riri Mberi
12 Erengai 1 Juau 3:19, 20. Tese isusu tinodzipasa ndaa nguwa dzimweni. Ngo muezaniso, amweni anodzipasa ndaa nge zviro zvaakaita asati afunda cokwadi. Amweni anodzipasa ndaa nge zvishaishi zvaakaita mumasure me kubhabhatidzwa. (Aro. 3:23) I zvirokwazvo kuti tese tinoda kuita zvakanaka. Asi “tese tinoshaisha kakawanda.” (Tig. 3:2; Aro. 7:21-23) Kunyazi tisikadi kudzipasa ndaa, izvi zvinotipfadza. Ngei? Ngekuti kudzipasa ndaa kunoita kuti tigadzirise zvishaishi zvedu, uye toshinga kuti tisaphindezve.—Aheb. 12:12, 13.
13 Nge dii rimweni, zvinokwanisika kunyanya kudzipasa ndaa—kana kuti, kurumbwa tecidzipasa ndaa kunyazi tacinyuka uye Djehovha apangidza kuti atirekerera. Mushobo uu wekudzipasa ndaa ungakuwadza. (Pis. 31:10; 38:3, 4) Ngei? Onai muezaniso we hanzvadzi imweni yakanetseka nge kudzipasa ndaa nge zvishaishi zvayakaita kare. Iyona yakati: “Ndakazwa hingana kuti andingakwanisi kuseenza no simba mu basa ra Djehovha nge kuti zvaaita hingana kuti apacina nguwa kandiri.” Akawanda edu angakwanisa kuzwawo hingana hanzvadzi ii. Zvinokosha kuti tidzidziirire pa murau we kunyanya kudzipasa ndaa. Kusiya izvona, rangarirai kuti Sathani aizopfara kudini kana akationa tecinyaya kudzipasa ndaa—kunyazi Djehovha atiregerera!—Ezanisai na 2 Akorinti 2:5-7, 11.
w02 11/15 paji. 20 mandi. 1-2
Tingaita Kudini kuti Mazuwa Edu Apfarirhwe na Djehovha?
Mazuwa e upenyu wedu anoita hingana padoko basi uye anopinda nokukasika. Dhavhidhi mutari we pisarema akanyasa kurangarira ngezve kudodoka ke upenyo uye izvona zvakamuitisa kuti anamate eciti: “Djehovha ndibetsereiwo kuziya mugumisiro we upenyu wangu uye ndiziye kuti mazuwa angu ndi mangani. Zvezvirokwazvo mazuwa angu amakandipasa akadodoka; uye upenyu wangu auripi ciro pamberi penyu.” Caida Dhavhidhi ngecekurarama maererano nozvinopfadza Djehovha, ngo masoko ake kutobatanidzawo no zviito zvake. Ecipanganidza mushobo waanoda rubetso ra Mwari, iyena wakati: “Kariro yangu ndimwi basi.” (Pisarema 39:4, 5, 7) Djehovha akapurutana zvaakareketa. Zvezvirokwazvo iyena akapima kana kuti akaona mabasa a Dhavhidhi uye akamupasa mubairo waienderana.
Zviri nyore maningi kuwandirhwa no zviro zvokuita pa zuwa uye kugara no upenyu wakabatikana, kudzarirhwa no zviro zvakawanda zvokuita. Izvona zvingatiitisa kuti tigare tecidzirhya mwoyo, maka-maka kana tino zvakawanda zvokuita uye tinonguwa doko. Hino kuitawo hingana Dhavhidhi, tinonyasa kurangarira ngezve kugara no upenyu unopfadza Djehovha here? Djehovha zvezvirokwazvo anotiona uye anonyasa kurangarira umwe na umwe wedu. Djobo mwanarume waithya Mwari, wakazwisisa ke makore 3600 adarika kuti Djehovha aiona mushobo wake we kuita zviro uye aierenga mathanho ake ese. Djobo akadzibvunzisa kuti: “Ndingamudaira kudini kana iyena akada kuti ndidzidairire?” (Djob 31:4-6, 14) Tingaita kuti mazuwa edu apfarirhwe na Mwari ngekukanda zviro zvekumwinya pa mbhuto yokutanga, kuzwira mitemo yake uye ngekuseenzesa nguwa yedu no ungwaru. Ngatimbonyase kufunda nyaya ii.
Wakaizve Ushamwari Wenyu na Djehovha
Reketai na Djehovha nguwa dzese. Baba edu anoziya kuti mazwiro ekudzipasa ndaa, angamushuphira kuti muite munamato. (Aro. 8:26) Asi, “rumbwai mecinamata,” bvunzai Djehovha kuti munoda maningi kugara shamwari yake. (Aro. 12:12) Andrej unoedzurira eciti: “Ndaizwa hingana kuti ndino ndaa yakakura uye ndaipsveruka. Asi mumasure mekuita munamato, mazwiro awona aipunguka. Ndaizwa ndiri mu runyararo.” Kana musikazii zvokureketa pa munamato, fundai Pisarema 51 na 65 unopangidza ngezve munamto wa Mambo Dhavhidhi paakacinyuka.
Upfumi Watinogumira mu Bhaibheri
Pangidzai kuti Makagondeka
16 Kudzibata kunoita kuti anhu atigonde. Wara iri ricatibetsera kuti tikunde miedzo yekubararisa zviro zvakaigika. (Erengai Zvierengo 10:19.) Zvingatishuphira kugara anhu anodzibata patinoseenzesa interneti. Tikatama kungwarira, tingapedzesera taakubararisa zviro zvakaigika ku anhu akawanda. Uye mumasure mekuti tapedza kubararisa masoko akaigika mu interneti, tinonga tisikacazii maseenzeserhwe aacaizwa uye makuwadzire aacaita. Kudzibata kunotibetserawo, aphikisi paanoedza kuita kuti isusu tirekete masoko angaita kuti hama dzedu dzigare pangozi. Ngo muezaniso, izvona zvingaitikawo mu nyika irikurambidzwa basa redu uye hama dzinobvunziswa no mapurisiya. Pamigariro yakadaro, tingaseenzesa zano riri pana Pisarema 39:1 rinoti: “Ndicarinda muromo wangu no cinofukidza muromo.” Isusu tinodikana kugara anhu akagondeka nguwa dzese ku mhuri yedu, shamwari dzedu, hama uye hanzvadzi dzedu uye no munhu upi hake. Uye kuti tigare anhu akagondeka tinodikana kugara anhu anodzibata.
MAYO 20-26
UPFUMI UNOBVA MU SOKO RA MWARI | PISAREMA 40-41
Ngei Tecidikana Kubetsera Amweni?
w18.08 paji. 22 mandi. 16-18
Anhu Ano Rupo Anopfara
16 Munhu ano rupo re zvirokwazvo aetseri kuhwirinzirhwawo ciro kana akapasa. Ndiyo ndaa Djesu akabhuya ngezvazvo kuti: “Paunopika anhu kuti auye ku mabiko, pika arombo, zvigono, anokhabinya, no mapofu; uye iwewe ucapfara, ngokuti aana caanozokuripa naco.” (Ruka 14:13, 14) Bhaibheri rinotigondesa kuti: “Munhu ano rupo ucakomborerhwa,” uye rinobhuyazve kuti: “Unopfara munhu wese unopangidza usisi ku aya asina zvakawanda.” (Zvie. 22:9; Pis. 41:1) Tinodikana kugara no rupo ngokuti kubetsera amweni kunotipasa mupfaro.
17 Pauro paakareketa masoko a Djesu ekuti “kupasa kuno mupfaro kudarika kutambira,” iyena wainga asikareketi nge zviro zvekurarama nazvo basi. Iyena waibatanidza kubambisa amweni, kurowedza uye rubetso ku uya anoda kubetserhwa. (Zviito 20:31-35) Pauro wakatifundisa no muezaniso wake kuti kunokosha maningi kugara no rupo patinopasa nguwa yedu, simba, kukoshesa uye kupangidzira rudo ku amweni.
18 Apsvakisisi akazwisisa kuti munhu ano rupo anopfara maningi. Fundo imweni yakabhuya kuti “anhu anozwa mupfaro wawo wecitunhudzirika mumasure me kuitira zvakanaka amweni.” Apsvakisisi anobhuyawo kuti kubetsera amweni kunoita kuti munhu “azwe akagutsikana pakuita zviro uye kugara no cinangwa” mu upenyu uye “kunogutsa unhu we munhu.” Ndiyo ndaa, azii amweni anokohomedzesa anhu kuti aite basa re kudzipira kuti agare no uthongo wakanakisisa uye no simba. Zvese izvi azvitishamisi ngokuti Musiki wedu Djehovha akatobhuya kakawanda kese kuti kugara no rupo kunounzisa mupfaro.—2 Ti. 3:16, 17.
w15 12/15 paji. 24 ndi. 7
Djehovha Aatisii Tega Patinonga Tecirhwara
7 Kunyazi zvakadaro, kana tecirhwara tingapsvaka Mwari kuti atinyaradze, atipase ungwaru, kuitawo hinga zvakaita aseenzi ake e kare. Mambo Dhavhidhi akatara kuti: “Unopfara munhu wese unopangidza usisi ku aya asina zvakawanda; Djehovha acamununura pa zuwa rekutambudzika. Djehovha acamudziirira uye oita kuti arumbwe ecirarama.” (Pis. 41:1, 2) Kubhuya zvazviri, mu mazuwa a Dhavhidhi, munhu wese waipangidza usisi ku aya asina zvakawanda wainga asikararami nokusikaperi. Ngokudaro, zviri pamhene kuti Dhavhidhi wainga asikadi kubhuya kuti Mwari aizoita kuti munhuwo arumbwe ecirarama nge mushobo unoshamisa ngekumupasa upenyu usikaperi. Masoko aya akafemerhwa anopangidza kuti Mwari aizobetsera munhu akagondeka uye ano unaki. Ngekudini? Dhavhidhi wakapanganidza kuti: “Djehovha acamutsigira paanonga ecirhwara ari pa kama yake. Paanonga ecirhwara mucanyasa kucinja kama yake.” (Pis. 41:3) Munhu uri kurhwara ungagara no rugondo rokuti Mwari aakanganwi zviro zvese zvakanaka zvaakaita uye kuti anozviziya muitiro wake wakagondeka. Uye zvinonyaradzawo kuziya kuti Djehovha akaita mwiri we munhu kuti ukwanise kutamba pa nhenda.
w17.09 paji. 12 ndi. 17
Teedzerai Usisi wa Djehovha
17 Kuziya kuti kuzwira amweni usisi kunobetsera, hino kunodikana kugara cikonzero cikuru cinoita kuti mude kugara no usisi here? Haiwa. Cikonzero cedu cikuru cinodikana kugara cekuteedzera Djehovha uye kuda kumukudza. (Zvie. 14:31) Djehovha ndiye muezaniso wedu mukuru we rudo uye usisi, uye isusu tinoda kuita zviri zvese zvatingakwanisa kuti timuteedzere. Ngekudaro ticabata hama dzedu nguwa dzese no rudo uye torarama zvakanaka no anhu amweni.—Aga. 6:10; 1 Juau 4:16.
Upfumi Watinogumira mu Bhaibheri
it-2 paji. 49
Djehovha
Zviitiko zvese zviri mu Bhaibheri, zvinocokuita nokudziirira ucangamire wa Djehovha, uye izvona zvinonyasa kusiya pamhene cikonzero cikuru ca Djehovha Mwari: kuceneswa ke zina rake. Izvi zvinoreya kuti panotodikana kucenesa zina ra Mwari pa manyepo ese aanosoizirhwa. Asi, kudarika zvese izvi, kunodikana kuti zina ra Mwari rireremedzwe hinga cena no zvisikwa zvese zvino ungwaru zve kudenga uye zve nyika. Ngekudaro, izvona zvinoda kureya kuzwisisa uye kureremedza mbuto ya Djehovha hingana cangamire, tecidzipira kamare, no cido co kumuseenzera, uye kuita zviri zvese pakuita kuda kake nge rudo kaari. Munamato wa Dhavhidhi kuna Djehovha uri pana Pisarema 40:5-10, unonyasa kupangidza maitiro awona uye kuceneswa ke zvirokwazvo ke zina ra Djehovha. (Onai kuti mupostori Pauro wakaseenzesa kudini kuna Djesu Kristu masoko aya e pisarema pana Ahe 10:5-10.)
MAYO 27–JUNHO 2
UPFUMI UNOBVA MU SOKO RA MWARI | PISAREMA 42-44
Nyasai Kubetsereka no Fundiso Inobva Kuna Mwari
w06 6/1 paji. 9 ndi. 4
Mafundo Makuru Anobva mu Bhuku Recipiri ra Pisarema
42:4, 5, 11; 43:3-5. Kana pakaitika ciro cingatiitisa kuti timbogare kure no ungano yedu ye Cikristu, kuedzurira mupfaro watainga tinawo kare kungatibetsera. Kunyazi pakutanga zvingatunhudzira kurhwadziwa kedu nge kugara tiri tega, zvinotiedzurirawo kuti Mwari ndi mbuto yedu ye kutizira uye kuti tinoda kuetsera iyena kuti atinyaradze.
w12 1/15 paji. 15 ndi. 2
Mungaita Kudini kuti Fundo Yenyu ye Bhaibheri Inyase Kumupfadzai uye Ibudirire
1 MUNAMATO: Ciro cokutanga i kuita munamato. (Pis. 42:8) Ngei? Tinodikana kuona fundo yo Soko ra Mwari hinga dii ye kunamata kudu. Ngokudaro, tinodikana kukumbira Djehovha kuti atibetsere kuti tigare no maonero akanaka uye atipase mwiya mucena wake. (Ruka 11:13) Barbara, uri kuseenza ke nguwa yakareba hinga misiyonaria unobhuya kuti: “Nguwa dzese ndinotanga kuita munamato ndisati nda erenga uye kufunda Bhaibheri. Mumasure mazvo, ndinozwa kuti Djehovha ari neni uye kuti anotendera zvandiri kuita.” Kuita munamato musati mafunda zvinofungura ndangariro uye mwoyo kuti munyase kutendera zvokurhya zvakawanda zvo kumwiya zvatinazvo.
w16.09 paji. 5 mandi. 11-12
“Musasiye kuti Nyara Dzenyu Dzirembe”
11 Djehovha anotifundisawo eciseenzesa misangano, magungano, magungano e mutanha uye zvikora zvo Bhaibheri. Kutifundisa uku kaanosotiita kunotibetsera kuti timuseenzere no cikonzero cakanaka, tigare no zvinangwa zve kumwiya uye kucengetedza ubaba wakawanda watinawo we Cikristu. (Pis. 119:32) Djehovha anoseenzesa rowedzo idzi kuti atibambise. Hino, munokoshesa here rubetso iri?
12 Djehovha akabetsera a Israeri kuti anyise Aamareki no Aaetiyopi. Iyena akapasawo simba Neemiya uye no Adjudha kuti apedzese kuwaka muru we Djerusarema. Nge mushobo umwewo, iyena acatipasa simba kuti tikunde kuteererhwa, kudzirhya mwoyo uye kutama kupfarira kunoita anhu mu basa re kuparidzira. (1 Ped. 5:10) Atietseri kuti Djehovha aite cishamiso pakutibetsera. Tinodikana kuita dii redu. Kuerenga Bhaibheri mazuwa ese, kugadzirira misangano uye kuipinda masumana ese, kuita fundo yo munhu ega, kunamata ke mhuri, uye nguwa dzese kunamata kuna Djehovha nokumugonda. Djehovha anotipasa rubetso irona kuti atibambise. Asi iyena angatibetsera kudini kana tikatendera kuti mabasa amweni atore mbuto yo kuita izvona? Kana imwimwi mukaona kuti nyara dzenyu dziri kuremba pa imwe ye nyaya idzi, kumbirai kuti Djehovha amubetserei. Imwimwi mucaona kuti, eciseenzesa mwiya mucena iyena acamupasai “cido ce kuita zviro no simba re kuzviita.” (Afi. 2:13) Asi cinyi camungaita kuti mubambise nyara dze amweni?
Upfumi Watinogumira mu Bhaibheri
it-1 paji. 479
Imbwa yo Mushango
Mu Matarhwa, imbwa yo mushango kakawanda kakhona inoseenzeswa pa zviitiko zvekuezanisira. Djobo ecipanganidza ngezve mugariro wake unotsukwarisa, unobhuya kuti wakagara “hama yo imbwa dzo mushango.” (Djob 30:29) Pano cokuita nokurhwiswa kunopsverusa ke anhu a Mwari, mutari we pisarema pamweni ecirangarira mbuto inoizirhwa hondo, yokuti imbwa dzo mushango dzinosoungana kuti dzirhye anhu akafa (ezanisai na Pis 68:23), wakabhuya kuti: “Imwimwi makatisiya tecinyiswa pa mbuto inogara imbwa dzo mushango.” (Pis 44:19) Mbuto ye Djerusarema ku Bhabhironi, muna 607 K.A.A., yakaunzisa nzara yakakura zveciita kuti madzimai abate ana awo nge mushobo wakashata maningi. Ngokudaro, Djeremiya nge mushobo wakanaka wakasiyanisa utsinye we “anhu a Mwari” no kubata kunoita imbwa dze mushango ana adzo.—Mari 4:3, 10.
JUNYO 3-9
UPFUMI UNOBVA MU SOKO RA MWARI | PISAREMA 45-47
Ngoma Yakaringana no Mucato wa Mambo
w14 2/15 mapaji. 9-10 mandi. 8-9
Pfarai no Mucato we Bira!
8 Erengai Pisarema 45:13, 14a. Mwanakadzi uri kuda kucata unoezaniswa hinga “rukudzo” pa mucato wa mambo. Pana Zvakapangidzwa 21:2, Mwanakadzi uri kuda kucata unoezaniswa hinga thaundi, Djerusarema Ripsva, uye “wakarungamiswa maningi kuti atambire mwamuna wake.” Thaundi iri rekudenga, rino “rukudzo ra Mwari,” uye kunyetukira karo kaiita hingana buwe rinokosha maningi, “hingana buwe ro jaspe yakanakisisa.” (Zvak. 21:10, 11) Rukudzo re Djerusarema Ripsva, rinonyasa kupanganidzwa mu bhuku ra Zvakapangidzwa. (Zvak. 21:18-21) Ndiyo ndaa, mutari we pisarema unopanganidza mwanakadzi uri kuda kucata hinga “rukudzo”! Pakupedzesera, mucato wa mambo ucaitika kudenga.
9 Mwanakadzi uri kuda kucata unoendeswa kuno Mwanarume waari kuda kucata naye—Mambo Mesiya. Iyena akamugadzirira ‘ecimusuka no kumusambidza no mvura eciseenzesa soko.’ Mwanakadziwo, “wakacena asina kana pakakhatika.” (Aef. 5:26, 27) Iyena unodikanawo kupfeka zvinoenderana no ciitiko icona. Uye ndiona mapfekere aakaita! Zvezvirokwazvo, “zvekupfeka zve mwanakadzi uri kuda kucata zvakarungamiswa no oro,” uye “iyena unoendeswa kuna mambo akapfeka macira akarungama maningi.” Pamucato we Bira, iyena “wakatenderhwa kupfeka djira rakanaka, rinonyetukira uye rakacena, ngokuti djira rakanaka rinoimirira mabasa e unatsi e akacena.”—Zvak. 19:8.
Zvakapangidzwa—Zvinoreyei Kune Ramangwana Renyu
10 Djehovha acaitei paacaona anhu ake ecirhwiswa? Iyena anoti: “Shungu dzangu dzicakwira.” (Ezek. 38:18, 21-23) Zvakapangidzwa kapituro 19 inoreketa zviro zvicaitika mu masure mazvo. Djehovha acatuma Mwana Wake kuti adziirire anhu Ake uye atsakatise azondi ake. “Masurudado e kudenga”—awo anoumbwa no ngirozi dzakagondeka uye no akadzodzwa anokwana kuita 144 000, acabatana pamwepo na Djesu kuti arhwise azondi a Mwari. (Zvak. 17:14; 19:11-15) Asi ngaupi mugumisiro we hondo iyona? Masangano ese, kutobatanidzawo anhu ese asikatsigiri Djehovha acatsakatiswa!—Erengai Zvakapangidzwa 19:19-21.
11 Edzai kurangarira mupfaro ucazogara no aseenzi a Mwari akagondeka pasi pano paacapukunyuka mu masure mekutsakatiswa ke azondi a Mwari! Zvezvirokwazvo, ii icagara nguwa inopfadza maningi! Kuparadzwa ke Bhabhironi Guru kucaita kuti kudenga kugare no mupfaro wakakura maningi. (Zvak. 19:1-3) Asi cicanyanya kuita kuti kudenga kugare no mupfaro wakakura maningi—“mucato we Bira,” ngekuti uwona ndiyona fundo ye pamusoro yo bhuku ra Zvakapangidzwa.—Zvak. 19:6-9.
12 Mucato uwona ucaitika rini? Akadzodzwa ese anokwana kuita 144 000, anonga ari kudenga hondo ye Amagedhoni isati yatanga. Asi nguwa iyona andiyopi icazoitika mucato we Bira. (Erengai Zvakapangidzwa 21:1, 2.) Mucato we Bira ucaitika mumasure mekupera ke hondo ye Amagedhoni uye mumasure mekutsakatiswa ke azondi ese a Mwari.—Pis. 45:3, 4, 13-17.
it-1 paji. 1099
Hondo
Mukupera ke hondo ii, nyika icagara murunyararo ke makore 1000. Pisarema inobhuya kuti: “[Djehovha] acapedza hondo mu nyika yese. Ano gura uta uye anogura-gura masupada, anopisa karu dze hondo ngo muriro,” zvakadzadzika kekutanga Mwari paakaunzisa runyararo ku nyika ye Aisraeri ngekutsakatisa midziyo ye hondo ye azondi awo. Mumasure mekuti Djesu akunda pa Amagedhoni, anhu acararama kumuceto ke nyika ino acapfara ari murunyararo rakakura. (Pis 46:8-10) Anhu acararama upenyu usikaperi ndiwo aya “acacinja supada dzawo kuti dzigare zvekurima nazvo uye mipasha dzawo kuti dzigare mapanga ekudjedera nawo miti.” Uye “aazofundirizve hondo.” “Ngokuti muromo wa Djehowa we anyahondo ndiwo wazvireketa.”—Isa 2:4; Mik 4:3, 4.
Upfumi Watinogumira mu Bhaibheri
w17.04 paji. 11 ndi. 9
Cinyi Cicabviswa Umambo wa Mwari Ukauya?
9 Zvinyi zvicagara pa mbuto ye masangano anoita zveudyekeri? Mu masure me Amagedhoni, kodi pacazoonekazve masangano amweni pa nyika here? Bhaibheri rinoti: “Asi kuno matenga mapsva no nyika ipsva zvatiri kuetsera maererano no gondeso yake, uye imona mucagara no unatsi.” (2 Ped. 3:13) Matenga no nyika zvokare zvinoda kureya utongi unoita zvakashata unodzvinyirira anhu mazuwa ano, ucabviswa. Ucatsakatiswa kudini? Soko rekuti “matenga mapsva” rinoreya utongi upsva uye “nyika ipsva” zvinoreya anhu acararama pasi pe utongi uu. Umambo wa Mwari ucatongwa na Djesu, uye iyena acanyasa kupangidza zvakaita mawara a Djehovha, Mwari akarongeka. (1 Ako. 14:33) Hino, “nyika ipsva” icagara yakarongeka. Uye anarume akagondeka ndiwo acaicengetedza. (Pis. 45:16) Kuti aite basa iri, anarume aya acatambira nhungamiriro dza Djesu uye dze 144 000 acatonga naye. Cimborangarirai kuti zvicapfadza zvakadini masangano ese anodyekerhwa paacatsiiwa no sangano rimwe rakabatana risina udyekeri!
JUNYO 10-16
UPFUMI UNOBVA MU SOKO RA MWARI | PISAREMA 48-50
Abereki—Itai kuti Mhuri Yenyu Ibambise Kugonda Kaanoita Sangano ra Djehovha
Kunamata ke Cokwadi Kucatunhudzira Mupfaro Wenyu
11 Isusu tinonamata Djehovha patinofunda Bhaibheri uye patinofundisa ana edu nge zvake. Aisraeri ainga asikaseenzi mu ma Sabudu, asi aikanda ndangariro dzawo pakubambisa ushamwari wawo na Djehovha. (Eki. 31:16, 17) Aisraeri aifundisa ana awo nge zva Djehovha uye nge zve zviro zvakanaka zvaaiita. Nyamasi uno, isusu tinodikana kupsvaka nguwa kuti tierenge uye tifunde Soko ra Mwari. Izvona zvinobatanidzwawo pakunamata kedu uye zvinotikhwededza dhuze naye. (Pis. 73:28) Uye patinofunda hinga mhuri, tingabetsera mubarirhwana mupsva, kana kuti—ana edu—kuti asakurire ushamwari we padhuze na Baba edu e kudenga ano rudo.—Erengai Pisarema 48:13.
w11 3/15 paji. 19 mandi. 5-7
Imwimwi Muno Cikonzero Cakanaka kuti Mupfare
“Hambai mecitenderedza Ziyoni, ritenderedzei erengai nyumba dzakakwirira. Kandai mwoyo yenyu pa muru, nyasai kuona nyumba dzopamusoro dzakanyasa kubamba kuti muzozvibvunzewo mubarirhwana unoteera.” (Pis. 48:12, 13) Nge mushobo uu, mutari we pisarema wakakohomedzesa Aisraeri kuti aone Djerusarema. Kodi munokwanisa here kurangaridza zviedzuriro zve mhuri dze Aisraeri padzaiita rhwendo dzecienda ku thaundi cena ku mutambo we pagore paaiwona tempro inoshamisa? Zvezvirokwazvo izvona zvaiita kuti agare no cido “cekuzozvierengerawo mubarirhwana unoteera.”
Rangarirai ngezve mambokadzi we ku Shebha, wekuti pakutanga wainga asina cokwadi ngezve rukudzo re utongi wa Soromoni uye no uzii wake. Cinyi cakamuitisa kuti agare no cokwadi cekuti zvaainga azwa zvainga zviri zvezvirokwazvo? Iyena unoti: “Asi andizi kutendera masoko awona dakara ndauya kuti ndione no madziso angu kamare.” (2 Mak. 9:6) Zvezvirokwazvo, zvatinoona no “madziso edu kamare,” zvingakwanisa kubaya mwoyo yedu.
Mungabetsera kudini ana enyu kuti aone no “madziso awo kamare” zviro zvinoshamisa zvo sangano ra Djehovha? Kana pano firiyari yo Apupuri a Djehovha (Bheteri) isikaripi kure maningi no kamunogara, petai masimba kuti muivhakacire. Ngo muezaniso, Mandy na Bethany, aigara kumukuwo ungakwana 1500 km dakara ku Bheteri mu nyika yawo. Asi abereki awo aiita urongwa nguwa dzese kuti avhakacire Bheteri, maka-maka awona paainga aciri madjaha. Awona anoti: “Patainga tisati tavhakacira Bheteri, isusu tairangarira kuti yainga iri imbuto ino zvimitemo zvakawanda, uye mbuto inogarhwa basi no anhu acembera basi.” “Asi takaona madjaha ekuti aiseenzera Djehovha no simba uye ecipfara nge kuita izvona! Takazoona kuti sangano ra Djehovha rakakura kudarika zvatairangarira ku mutanha wataigara uye pese pataivhakacira Bheteri, taizwa ushamwari wedu na Djehovha wecitunhudzira kubamba.” Kuona sangano ra Djehovha kakaitisa kuti Mandy na Bethany ade kugara mapionero, uye no kuhamba ke nguwa awona akapikwa kuti abetsere Bheteri.
w12 8/15 paji. 12 ndi. 5
Itai Hinga Agari e Muumambo wa Mwari!
5 Fundai zvakaitika. Munhu unoda kugara nhego ye utongi we anhu pamweni ucadikana kufunda ngezve zvakaitika no utongi uwona. Nge mushobo umwewo, ese aya anoda kugara nhengo ye Umamabo acaita zvakanaka nge kufunda ngezve Umanbo wa Mwari. Onai muezaniso we ana a Kora aiseenza mu Israeri ye kare. Awona aipfarira maningi Djerusarema mbuto yawo ye kunamatira uye aipfarirawo kureketa ngezve thaundiro. Cainyanya kuashamisa ainga asiripi mapuwe no mushobo yainga yakagadzirhwa, asi cainyanya kukosha ndizviya zvaiimirirhwa no thaundi uye mbuto yokunamatira. Djerusarema rainga riri “thaundi ra Mambo mukurusa, “Djehovha, rainga riri mbuto ye kunamatwa kakacena. Ndimona maifundiswa Mutemo wa Mwari. Djehovha akapangidzira unaki wake ku anhu aaitonga. (Erengai Pisarema 48:1, 2, 9, 12, 13.) Kuita hingana awona, imwimwi munaco cido ce kureketa ngezve zviitiko zve dii ro pasi pano ro sangano ra Djehovha here? Pamunonyasa kufundira ngezve sangano ra Djehovha uye mushobo waanobetsera anhu ake, Umambo wa Mwari ucanyasa kugara we cokwadi kamuri. Cido cenyu cekuparidza masoko akanaka cicatundudzira.—Djer. 9:24; Ruka 4:43.
Upfumi Watinogumira mu Bhaibheri
it-2 paji. 859
Upfumi
Hingana dzinza raibudirira, Aisraeri aikwanisa kuraira zvokurhya uye zvokumwa (1 Md 4:20; Mp 5:18, 19), uye upfuma wawo waiabetsera pakuadziirira pa zvinetso zvo urombo. (Zvie 10:15; Mp 7:12) Hino, kunyazi cainga ciri cinangwa ca Djehovha kuti Aisraeri ararame asina caanoshoterhwa maererano no zvaaiona pa basa rawo, (ezanisai na Zvie 6:6-11; 20:13; 24:33, 34), Djehovha akaitawo kuti awona aziye ngezve ngozi ye kukanganwa kuti iyena ainga ari Manyuku e upfumi wawo uye otanga kugonda no upfumi wawo kamare. (Dhe 8:7-17; Pis 49:6-9; Zvie 11:4; 18:10, 11; Dje 9:23, 24) Akaedzurirhwa kuti upfumi wainga uri we nguwa doko basi (Zvie 23:4, 5), wainga usikapaswi Mwari kuti aasudzunure pa rufu (Pis 49:6, 7), uye wainga usikaseenzi ku akafa (Pis 49:16, 17; Mp 5:15). Akapangidzwa kuti kunyanya kudisa upfuma zvaizoita kuti aite zviro zvisikapfadzi Djehovha. (Zvie 28:20; compare Dje 5:26-28; 17:9-11.) Akakohomedzeswawo kuti “akudze Djehovha no zviro zvawo zvinokosha.”—Zvie 3:9.
JUNYO 17-23
UPFUMI UNOBVA MU SOKO RA MWARI | PISAREMA 51-53
Ngwarirai kuti Musaite Zvishaishi Zvakakura
w19.01 paji. 15 mandi. 4-5
Mungadziirira Kudini Mwoyo Wenyu
4 Pana Zvierengo 4:23, soko rokuti “mwoyo“ rinoda kureya “unhu we cemukati” kana kuti “unhu wakaigika.” (Erengai Pisarema 51:6 uye masoko o pasi.) Nge masoko amweni “mwoyo”unoimirira marangariro, mazwiro, zvikonzero uye zvido zve mukati-kati. Uwona unoimirira zviya zvatiri nge cemukati, haiwa zviya zvinorangarirhwa no anhu.
5 Zvakanaka maningi kudziirira zviya zvatiri nge cemukati. Kuti tiezanisire, rangarirai ngezve uthongo we mwiri wenyu. Kuti mwiri urumbwe zvakanaka nge cemukati imwimwi munodikana kurhya zvakanaka uye kuita maezersisiyo nguwa dzese. Kuti uthongo wedu we kumwiya urumbwe wakanaka, tinodikana kurhya zvakanaka zviro zve kumwiya uye kuroedza kutenda kedu nguwa dzese. Tinorowedza kudini kutenda kedu? Nge kuseenzesa zviya zvatinofunda uye nge kubhuya no amweni zviya zvatinotenda. (Aro. 10:8-10; Tig. 2:26) Pano mubatano uripo pakati pe uthongo we mwiri no uthongo we kumwiya. Nguwa dzimweni mwiri wedu ungaita hingana kuti wakanaka ngece kunza, asi nge ce mukati wecirhwara. Nge mushobo umwewo, kugara no zviro zvakawanda zvekuita zve kumwiya zvingapangidza kuti uthongo wedu we kumwiya wakanaka. Asi nge cemukati usikazi kutamba nge ndaa ye zvido zvakashata. (1 Ako. 10:12; Tig 1:14, 15) Sathani unoda kuti isusu tirangarire nge mushobo waanorangarira. Asi iyena unozviita kudini? Pano mushobo we kudzidziirira here?
w15 6/15 paji. 14 mandi. 5-6
Imwimwi Mungarumbwa Makacena
5 Zvinokosha kugara no rugondo rakabamba kuna Djehovha, uye kupangidza rugondo irona nge kuita munamato ngezve marangariro asikazi kucena. Patinokwedera dhuze na Djehovha nge munamato, iyena anokwederawo dhuze nesu. Iyena anotipasa mwiya wake mucena uye izvona zvinobambisa kudzipira kedu pakurhwisana no marangariro asikazi kucena uye nge kurumbwa takacena. Hino, ngatibvunze Djehovha cido cedu cekuda kumupfadza nge marangariro edu. (Pis. 19:14) Hino tinokumbira tecidzidodosa here kuti iyena aongorore kuti mukati medu muno “gwanza rakashata”—cido kana marangariro akashata—angaita kuti tiite citema? (Pis. 139:23, 24) Tinokumbira kakawanda kuti iyena atibetsere tirumbwe takagondeka patinobatana no miedzo?—Mat. 6:13.
6 Zvingaita kuti kurerhwa katakaizwa uye muitiro wedu we kare zvakatitora kuti tiite zviro zvisikapfarirhwi na Djehovha. Kunyazi zvakadaro, iyena ungatibetsera kuti tiite cinjo dzinodikanwa kuti tirumbwe tecimuseenzera nge mushobo waanoda. Mambo Dhavhidhi wakazvitendera izvi. Mumasure me kuita uhure na Bhati-Sebha, iyena wakadeketera kuna Djehovha eciti: “Ndipei mwoyo wakacena ndapota Mwari, . . . uye kandai marangariro mapsva mandiri akabamba.” (Pis. 51:10, 12) Citema cingapfadza nyama yedu, asi Djehovha anokwanisa kuita kuti tigare no cido cakabamba cekuda kumuzwira. Kunyazi zvido zvakashata zvikanyasa kudzika katiri uye zvoita kuti tisarangarire zviro zvakacena, Djehovha anokwanisa kutungamirira makwanza edu kuti tizwire mitemo yake uye toikwanisa kuteerera zuwa no zuwa. Iyena angawanisa kutibetsera kuti tisarangarire zviro zvakashata.—Pis. 119:133.
Upfumi Watinogumira mu Bhaibheri
it-1 paji. 719
Dhoegi
Muedhomita waiseenzera Mambo Sauri hinga muushi, basa rainga rakakwirira uye rino ubaba. (1Sa 21:7; 22:9) Zvese zvinopangidza kuti Dhoegi wakatendeuka kuti agare Mudjudha. Ngekuti wainga “ ari pamberi pa Djehovha,” pamweni nge ndaa ye mhiko, kutama kucena kana kuti ainga ano zvipangidzo zve mapere, Dhoegi wainga aripo Mupristi Mukuru Aimereki paakapasa Dhavhidhi pau dzo mupiro uye supada ya Goriyati. Asi mumasure mazvo, Sauri paakaenda ku aseenzi ake, oapumha kuti awona aimurongera zvakashata, Dhoegi akareketa zvaakaona ku Nobhe. Mumasure me kudainza mupristi mukuru no apristi amweni e ku Nobhe, uye oita mubvunzo kuna Aimereki, Sauri wakapasa mutemo ku agogomi kuti auraye apristi. Agogomi paakaramba kuzviita, Dhoegi ecitenderhwa na Sauri wakauraya apristi 85 asikarangariri kairi. Mumasure mekuita cishaishi cakakura, Dhoegi wakaronga kuti Nobhe itsakatiswe, wakauraya agari ese e ku Nobhe madjaha kutobatanidzawo acembera uye no zvinyama.—1Sa 22:6-20.
Hingana zvinoreketwa pa musoro we bhuku ra Pisarema 52, Dhavhidhi wakatara ngezva Dhoegi eciti: “Ririmi rako rakapinza hingana rezi, unoronga kuita zvakashata uye unozviita no ucengedzi. Iwewe unopfarira zvakashata kudarika zvakanaka. Unosanagura kunyepa pane kureketa zvirokwazvo, iwewe unoda maningi masoko anoparadza masoko anocengedza.”—Pis 52:2-4.
JUNYO 24-30
UPFUMI UNOBVA MU SOKO RA MWARI | PISAREMA 54-56
Mwari Ari ku Dii Renyu
w06 8/1 paji. 22 mandi. 10-11
Pangidzai Ungwaru nge—Kuthya Mwari!
10 Pamugariro umweni, Dhavhidhi wakakumbira rubetso kuna Akiji, mambo we thaundi re Firistiya we Gate, thaundi ra Goriyati. (1 Samueri 21:10-15) Aseenzi a mambo akadudzira Dhavhidhi hinga muzondi wawo. Dhavhidhi wakaitei pa mugariro uwona waimukanda pa ngozi? Iyena wakafunungura mwoyo wake nge kunamata kuna Djehovha. (Pisarema 56:1-4, 11-13) Kunyazi wakadziitisa hingana benzi kuti akwanise kutiza, Dhavhidhi waizviziya kuti zvezvirokwazvo ainga ari Djehovha akamuponesa ecikomborera kupeta masimba kake. No rubetso ra Djehovha uye kumugonda no mwoyo wese, Dhavhidhi wakapangidza kuti zvezvirokwazvo waithya Mwari.—Pisarema 34:4-6, 9-11.
11 Kuita hingana Dhavhidhi, tingapangidza kuthya kuna Mwari nge kugonda pa zvipikirhwa zvekuti iyena anotibetsa pa matambudziko atinobatana nawo. Dhavhidhi wakabhuya kuti: “Siya kuti Djehovha atungamirire gwanza rako gonda naye uye iyena acaita ciito.” (Pisarema 37:5) Izvona azvireyei kuti tinosiya matambudziko edu kuna Djehovha totama kuita ciro uye toetsera kuti iyena aite ciito. Dhavhidhi aazi kuita munamato kuna Djehovha ecikumbira rubetso uye osiya zvakadaro. Iyena wakaseenzesa zvese zvaanokwanisa kuita nge nyara dzake uye ndangariro zvaakapaswa na Djehovha uye wakarhwisana no matambudziko. Dhavhidhi waiziya kuti wainga asikadikani basi kugonda kupeta masimba kake kuti abudirire. Zvimwezvo zvinodikana kuiitikawo katiri. Mumasure mekuita zvese zvatinokwanisa, zvimweni tinodikana kusiya munyara ma Djehovha. Kajinji apana catinokwanisa kuita tisikazi kugonda na Djehovha. Ipona ndipo panopinda kuthya Mwari nge mushobo wakasisira. Tingakwanisa kunyaradzwa nge masoko e pa mwoyo a Dhavhidhi anoti: “Ushamwari we padhuze na Djehovha uno aya anomuthya.”—Pisarema 25:14.
cl paji. 243 ndi. 9
Apana “Cingatiparadzanisa no Rudo ra Mwari”
9 Djehovha anokoshesawo kushingirira kedu. (Mateu 24:13) Edzurirai kuti Sathani unoda kuti imwimwi mufuratire Djehovha. Paya pamunorumbwa makagondeka kuna Mwari munonga mecitopangidzawo kuti muri kudaira mhinduro ye kushora ka Shatani. (Zvierengo 27:11) Azviripi nyore kushingirira nguwa dzese. Zvinetso zve uthongo, zvinetso zve kutama mare, zvinetso zve mudangariro uye zviro zvimweni zvingaita kuti zuwa rimwe na rimwe rigare muedzo. Zviya zvataietsera zvikatama kuitika tingakwanisa kuora mwoyo. (Zvierengo 13:12) Patinosongana no miedzo uye torumbwa takabamba Djehovha anonyasa kukoshesa kushingirira kedu. Ndiyo ndaa Mambo Dhavhidhi wakakumbira kuti Djehovha aige misodzi yake mu “cigubu co dewe” uye akatundudzira no rugondo eciti: “Adzizi kutarhwa mu bhuku renyu?” (Pisarema 56:8) Zvezvirokwazvo Djehovha anokoshesa maningi misodzi yedu uye matambudziko atinoshingirira patinorumbwa takagondeka kaari, uye aazozvikanganwi. I zviro zvinokosha kaari.
Rudo Rinotibetsera Kukunda Kuthya
16 Sathani unoziya kuti upenyu unokosha maningi katiri. Asi iyena wakabhuya kuti ticapasa zvese zvatinazvo—kutobatanidzawo ushamwari wedu na Djehovha—kuti tiponese upenyu wedu. (Djobo 2:4, 5) Asi andizvopi! Kunyazi zvakadaro, ngekuti iyena “uno simba rekukonzera rufu” Sathani unoseenzesa kuthya katinoita kufa kuti tisiye Djehovha. (Aheb. 2:14, 15) Nguwa dzimweni, Sathani unoseenzesa anhu kuti athyisidzire aseenzi a Djehovha kuti acaauraya kana akarumbwa akagondeka kuna Djehovha. Pa migariro dzimweni Sathani unoseenzesa nhenda yakakura kuti aedze kuti tisateerere mitemo ya Djehovha. Ngo muezaniso, mamedhiko uye anyaukama asikaseenzeri Djehovha angaedza kutibambidzira kuti tikandhwe ngazi ciro cisikapfarirhwi na Djehovha. Nguwa dzimweni awona angaedza kutibambidzira kuti titendere mishobo yekuraphwa isikapindirani no mitemo ya Djehovha.
17 Apana munhu unoda kufa, asi kana zvikaitika ngatigare ne rugondo rokuti Djehovha aazotikanganwi uye aazosii kutida. (Erengai Aroma 8:37-39.) Kana shamwari ya Djehovha ikafa, iyena acarumbwa ecimurangarira, unoita hingana kuti iyena uciri mupenyu. (Ruka 20:37, 38) Iyena anoda maningi kumumutsa. (Djobo 14:15) Djehovha akaripa mutengo wakakura kuti “tiwone upenyu usikaperi.” (Juau 3:16) Isusu tinokwanisa kuzwa kuda kunotiita Djehovha. Ndiyo ndaa patinobatana nekurhwara kakakura uye ne migariro ingatitora dakara pakufa, tinopsvaka Djehovha kuti atipase nyaradzo ungwaru uye simba. Ndizvo zvakaizwa na Valérie ne mwamuna wake—Pis. 41:3.
Upfumi Watinogumira mu Bhaibheri
it-2 paji. 708
Kuziya Zvicaitika, Kuronga Zvicaitika
Cisananguro cakaita Djudhasi Iskariyoti cekutengesa Djesu cakadzadzisa uphorofiti we kudenga uye cakapangidza kuziya ka Djehovha, kubatanidzawo ka Mwana wake. (Pis 41:9; 55:12, 13; 109:8; Zvt 1:16-20) Asi, azviiti kubhuya kuti Mwari aizviziya kana kuti akazvironga kuti Djudhasi aite izvona kamare. Uphorofiti waibhuya kuti umwe we aihamba na Djesu waizogara mutengesi, asi, uphorofiti uwona wainga usikabhuyi munhu waizoita izvona. Kusiya izvona, zvaizoda kusiyana no zvinorekethwa no Bhaibheri kudai Mwari akaronga kuti waizoita izvona ndi Djudhasi. Muphostori wakabhuya kuti: “Usakasike kukanda nyara yako pa musoro pe munhu; rumbwa wakacena.” (1Ti 5:22; ezanisai izvi na 3:6.) Djesu ecipangidza kunyasa kurangarira ngezve kukosha ke kusanagura aphostori 12 kuitike nge mushobo we ungwaru uye wakanaka, iyena akapedza usiku wese eciita munamato kuna Baba ake asati aita kuti cisananguro cake ciziikanwe. (Ruk 6:12-16) Kudai zvainga zvakarongwa na Mwari kuti Djudhasi waizogara mutengesi, izvona zvaizoita kuti nhungamiriro dza Mwari dzisapindirane, uye maererano no mutemo, zvaizoita kuti Mwari abatanidzwewo pa citema ici.
Ngokudaro zvagara pamhene kuti, Djudhasi paakasanangurhwa kuti agare mupostori, mwoyo wake wainga usikapangidzi kuti zvainga zvakarongwa kuti iyena wainga uno maitiro e utengesi. Iyena wakatendera kuti ndzinde yakashata ipfipfitire maari uye imureruse, zveciita kuti iyena apauke uye otendera kutungamirirhwa na Diyabhurosi kuti abe uye atengese Djesu, pane kuteerera nhungamiriro dza Mwari. (Ahe 12:14, 15; Ju 13:2; Zvt 1:24, 25; Tg 1:14, 15; onai DJUDHASI N.° 4.) Kupauka uku kudai kakura, Djesu aizoziya zviri mu mwoyo ma Djudhasi uye obhuya ngeve ucengedzi wake.—Juau 13:10, 11.