Mareferensiya e Urongwa we Musangano Basa Redu uye Kurarama
© 2024 Watch Tower Bible and Tract Society of Pennsylvania
JANEIRO 6-12
UPFUMI UNOBVA MU SOKO RA MWARI PISAREMA 127-134
Abereki—Rumbwai Meciriritira Zvakanaka Ana Enyu
Cengetedzai Mbuto Yenyu mu Mhuri ya Djehovha
9 Djehovha akasika anhu kuti akwanise kubara ana, uye mutoro we kuwafundisa kuti ade kumuseenzera. Kana imwimwi muri baba kana mai, munotenda nge cipo ici here? Icokwadi kuti Djehovha akapasa simba ngirozi kuti dzikwanise kuita zviro zvakasiyana-siyana, asi idzona adzizi kutambira cipo camunaco. Ndiyo ndaa, abereki anodikana kureremedza cipo ce kurera ana. Kurera ana, “mukupangira uye mukutungamirira ka Djehovha” imhiko ye rugondo yakatambira abereki, uye ibasa rakacena. (Aef. 6:4; Dhe. 6:5-7; Pis. 127:3) Kuti ribetsere abereki, sangano ra Djehovha rinopasa mafaramenta akawakirhwa mu Bhaibheri, akaita hingana mabhuku, mavhidhiyo, ngoma, uye no zviro zvimweni zviri mu interneti. Zviri pamhene kuti, Baba edu ari kudenga pamwepo no Mwana wawo Djesu, anokoshesa madjaha. (Ruka 18:15-17) Abereki paanogonda Djehovha uye oita zvese zvaanokwanisa kuti ariritire ana awo, Djehovha anopfara. Uye abereki awona, anopasa ana awo mukana wokuti azogarewo nhengo ye mhuri ya Djehovha nokusikaperi!
w19.12 paji. 27 ndi. 20
Abereki—Fundisai Ana Enyu kuti Ade Djehovha
20 Tinodikana kuziya zvakanaka ana edu. Pisarema 127 inoezanisa ana no mipasha. (Erengai Pisarema 127:4.) Kuita hingana mipasha yakasiyana pa kureba kayo uye magadzirirhwe ayakaizwa, ana akasiyanawo. Ndiyo ndaa abereki anodikana kusanangura kuti acafundisa kudini ana awo. Kazado imweni inogara ku Israeri yakabetsera ana awo airi kuti aseenzere Djehovha. Awona anopanganidza kuti akabudirira kudini: “Isusu taifundisa fundo yo Bhaibheri ku mwana umwe na umwe.” Musoro we mhuri ndiye unodikana kusanangura kuti zvinoita here kufunda no mwana umwe na umwe ari ega.
Upfumi Watinogumira mu Bhaibheri
it-1 paji. 543
Miti Dzo mu Bhaibheri
Mutari we pisarema wakareketa ngezve zvipangidzo zvo muti we muorivhi, ecibhuya ngezve aya anothya Djehovha: “Ana ako acaita hinga kupfipfitira ke muti we muorivhi akatenderedza mesa yako.” (Ps 128:1-3) Zvinopfipfitira pa muti wakagurhwa we muorivhi kakawanda kakhona zvinoseenzeswa pa kusima miti ipsva. Kusiya izvona, pa miti yokare ye miorivhi pamweni pangapfipfitirawo miti ipsva pa midzi, yeciita kuti ibatane uye yogara yakanyasa kubamba. Eciita hingana miti inopfipfitira, ana aizotenderedza baba awo, eciita dii rawo kuti mhuri ipfare.
JANERO 13-19
UPFUMI UNOBVA MU SOKO RA MWARI PISAREMA 135-137
“Tenzi Wedu Mukuru Kudarika Madzimwari Amweni”
it-2 paji. 666 mandi. 3-4
Simba uye Mabasa Ano Simba
Mushobo unoonerera Mwari zviro zvaakasika kakasiyana. Kuti Djehovha apangidze kuti iyena ndi Mwari we zvirokwazvo, zvaidikanwa kuetserhwa kuti apangidzire simba rake pakuonerera zviro zvaakasika, eciita kuti zina rake ribatanidzwe pa izvona. (Ps 135:5, 6) Sezvo zuwa, mwedzi, uye mapraneta zvinoseenza maererano no mushobo we zvakasikwa, uyewo maatmosfera o pa nyika (anoita kuti paoneke dutu, mvura uye no zviitiko zvimweni) zvinozwira mutemo maererano no mushobo we zvakasikwa, uye sezvo makwiza anoumba cikwata uye shiri dzinocinja mbuto yokugara, izvi no zviitiko zvimweni zvainga zvisikazokwani kuti zina ra Mwari riceneswe pamberi pe kuphikiswa uye kunamata ke kunyepa.
Djehovha aizoita kuti zvisikwa zvipase upupuri we simba rake nge kuzviseenzesa kuti adzadzise zvinangwa zvake zvakananga, kusiya zviya zvaanosoita, maka-maka panguwa yakasisira. Kunyazi panoitika zviitiko zvakaita hingana kutama mvura, dutu rinosimba kana kuti mugariro wo kunza wakatodzana, kuitika kazvo pakudzadzisa uphorofita wa Djehovha kakazvisianisa no zvimweni. (Ezanisai izvi na 1Md 17:1; 18:1, 2, 41-45.) Asi kakawanda kakhona, zviitiko izvona zvaiitika zvoga nge mushobo unoshamisa panocokuita no kukura kana simba (Eki 9:24), nge mushobo usikaetserhwi, zvisikazi kuizwa ngo munhu, kana kuti panguwa yokuti azvikarirhwi kuti zvingaitika.—Eki 34:10; 1Sa 12:16-18.
Rudo Rakagondeka ra Djehovha Rinoreyei Kamuri?
16 Patinoona Djehovha hingana Citiziro cedu, tinozwa takacengeteka. Kunyazi zvakadaro, pano mazuwa atingarhwadziwa maningi zvekutokonerhwa simba. Pa nguwa dzakadaro, Djehovha angatibetsera kudini? (Erengai Pisarema 136:23.) Iyena anokanda moko dzake pasi pedu uye anotibetsera kuti timukezve. (Pis. 28:9; 94:18) Tinobetsereka kudini: Kuziya kuti tingagonda no rubetso ra Mwari nguwa dzese, kunotiedzurira nge zve makomborero mairi. Cikomborero cekutanga, tino citiziro cakacengeteka pasinei nekatinogara. Cikomborero cecipiri, Baba edu ekudenga ano rudo anorangarira ngezve umwe na umwe wedu.
Upfumi Watinogumira mu Bhaibheri
it-2 paji. 15
Djah
Soko rokuti Djah, rakabatana no mazwiro ekukudza uye e ngoma dze munamato uye dzekudeketera, uyewo rinoseenzeswa pa mugariro unocokuita no mupfaro unobva pa kukunda, pakusudzunurhwa kana pa mugariro we kuona simba re nyara uye simba ra Mwari. Ngatione miezaniso dze soko iri. Soko rokuti: “Kudzai Djah!” (Areruya) rinooneka mu Mapisarema hinga soko re kukudza Mwari, rinooneka ke kutanga pana Pisarema 104:35. Mu mapisarema amweni ringaoneka mu masoko okutanga (Ps 111, 112), pamweni paya pa dii rimweni ro pisarema (135:3), uyewo pakupedzesera basi (Ps 104, 105, 115-117), asi kakawanda kakhona rinooneka pakutanga uye pakupedzesera (Ps 106, 113, 135, 146-150). Mu bhuku ra Zvakapangidzwa, zvisikwa zvo kudenga kakawanda kakhona zvinokudza Djehovha zveciseenzesa soko irona.—Zvak 19:1-6.
Matii amweni ano soko iri rokuti “Djah,” rinoonekawo pa ngoma uye pa zvikumbiro kuna Djehovha. Pano ngoma yekusudzunurhwa yakaembwa na Mozesi. (Eki 15:2) Pa masoko akatarhwa na Isaya, tinogumira masoko ese mairi, “Djah Djehovha.” (Isa 12:2; 26:4) Ezekiyeri, paainga akapfara maningi mumasure me kuporeswa no cishamiso paainga aadhuze kufa, wakareketa ngezve mazwiro ake ecemukati eciseenzesa soko rokuti Djah. (Isa 38:9, 11) Anosiyanisa akafa asikakwanisi kukudza Mwari no aya ari apenyu anokwanisa kumukudza. (Ps 115:17, 18; 118:17-19) Mapisarema amweni anopangidza kutenda pa munamato nge kusudzunurhwa, kudziirirhwa uye kupangirhwa.—Ps 94:12; 118:5, 14.
JANERO 20-26
UPFUMI UNOBVA MU SOKO RA MWARI PISAREMA 138-139
Musasiye kuti Kuthya Kumupingaidzei Kudaira pa Misangano
w19.01 paji. 10 ndi. 10
Kudzai Djehovha mu Ungano
10 Imwimwi munosothya maningi pamunorangarira basi ngezve kumutsa nyara kuti mudaire here? Kana imwimwi mecizwa kudaro ziyai kuti andimwipi mwega. Cokwadi ngece kuti akawanda edu anozwa kuthya paanodaira. Asi kuti mukwanise kukunda kuthya uku, imwimwi munodikana kuziya cikonzero cakhona. Kodi imwimwi munothya kukanganwa zvamucabhuya kana kuposha zvamucabhuya here? Munorangarira kuti mhinduro yenyu aizi kunaka hingana yo hama dzimweni? Zvezvirokwazvo mazwiro awona akanaka. Awona anopangidza kuti imwimwi munodzidodosa uye munoona amweni hinga akuru kamuri. Djehovha anoda aya anodzidodosa. (Pis. 138:6; Afi. 2:3) Asi Djehovha anodawo kuti imwimwi mu mukudze uye mubambise hama dzimweni mu misangano. (1 Ate. 5:11) Djehovha anomudai uye acamupasai ushingi wamunoda.
Bambisanai pa Misangano ye Ungano
7 Imwimwi mungaerengazve zvimweni zvakabuda mu fundo ye Murindiri. Ngo muezaniso, imwe yakhona nge yekuti, nyasai kugadzirira. (Zvie. 21:5) Pamucanyasa kuziya zvamucafunda ku misangano, zvicamuitirai nyore kuti mupase mhinduro. Cimweni camungaita, nge cekupasa mhinduro dzisikazi kureba. (Zvie. 15:23; 17:27) Imwimwi pamweni amuzogari mecithya kana mukapasa mhinduro isikazi kureba. Kusiya izvona, hama no hanzvadzi dzinonyasa kuzwisisa mhinduro yakhona yakafupika, mutsetse umwe kana kuti miiri pane kupasa mhinduro yakareba ino masoko akawanda. Pa munopasa mhinduro yakafupika nge masoko enyu kamare, imwimwi mucanyasa kupangidza kuti makanyasa kugadzirira uye kuti mazwisisa kamare zviri kurekethwa ipona.
Upfumi Watinogumira mu Bhaibheri
it-2 paji. 630 ndi. 5
Kurekerera
Kusiya izvona, tinodikana kurekerera zvishaishi zve amweni, azvinei nokuti tashaishirhwa kangana, ngokuti ndizvona zvinoetserhwa ku Akristu. (Ruk 17:3, 4; Aef 4:32; Ako 3:13) Mwari aarekereri aya asikarekereri amweni. (Mt 6:14, 15) Kunyazi munhu ‘akashaisha’ zvekutoguma pa kubviswa mu ungano, no kuhamba ke nguwa kana iyena akacinyuka zvezvirokwazvo angarekererhwa. Pa mugariro uwona, ese mu ungano angapangidza rudo rawo kaari. (1Ak 5:13; 2Ak 2:6-11) Asi azvietserhwi ku Akristu kurekerera aya anoita citema ecida uye asikacinyuki. Anhu akadaro, anogara azondi a Mwari.—Ahe 10:26-31; Ps 139:21, 22.
JANERO 27–FEVRERO 2
UPFUMI UNOBVA MU SOKO RA MWARI PISAREMA 140-143
Itai Maererano no Zviya Zvamadeketerera pa Munamato
w22.02 mapaji. 12-13 mandi. 13-14
“Purutanai Masoko Ano Ungwaru”
13 Onai mazano hinga cipangidziro ce rudo ra Mwari. Djehovha anoda zvakatinakira nguwa dzese. (Zvie. 4:20-22) Iyena paanotipasa mazano eciseenzesa Soko rake, mabhuku anotsamira mu Bhaibheri uye ne hama, icona i cipangidzo cekuti anotida. Maererano na Ahebheru 12:9, 10 “iyena anoita izvi kuti tibetsereke.”
14 Kandai ndangariro pa zano ramapaswa, haiwa mushobo wamapaswa. Nguwa dzimweni, tingarangarira kuti zano irona, atizi kuripaswa nge mushobo wakanaka. Zviri pamhene kuti munhu anopasa zano anodikana kupasa nge mushobo wakanaka. (Aga. 6:1) Asi zvakadini kana tiri isusu tiri kuapaswa mazano? Kana zvakadaro tinodikana kukanda ndangariro dzedu pa zano haiwa kurangarira kuti taidikana kuripaswa nge mushobo wakanaka. Zvakanaka kurangarira kuti: ‘Kunyazi ndisikazi kupfarira mushobo wandapaswa zano iri, apana ciro cakanaka candingakhorovhera pa zano iri here? Ndingasiya kurangarira kusama kukwana ke munhuwo ndokanda ndangariro pa zviro zvaabhuya here?’ Tingakwanisa kufunda zvakanaka pa zano ratapaswa.—Zvie. 15:31.
w10 3/15 paji. 32 ndi. 4
Kugara “Takacena mu Mwoyo” Kunyazi Tecibatana no Miedzo
Kubambidzirhwa no aphikisi, kukonerhwa zvekurarama nazvo, uye nhenda dzakakura, zviri kuita kuti aseenzi a Mwari anganani aore mwoyo. Izvona nguwa dzimweni zvinotoakuwadza. Kunyazi Mambo Dhavhidhi wakatobatanawo no mugariro uwona, iyena wakati: “Simba rangu riri kupera, mwoyo wangu uri kupera simba.” (Pis. 143:4) Iyena wakakwanisa kudini kukunda nguwa iyona ii ye matambudziko? Dhavhidhi waiedzurira mabatire aaiita Djehovha aseenzi Ake. Iyena wairangarira ngezve zviya zvaiizwa na Djehovha nge ndaa ye zina Rake guru. Dhavhidhi waikanda ndangariro dzake pa mabasa a Mwari. (Pis. 143:5) Nge mushobo umwewo, kurangarira ngezve Musiki wedu, ngezve zviya zvaakaita uye ngezve zviya zvaari kutiitira, zvicatibetsera kunyazi tecibatana no miedzo.
w15 3/15 paji. 32 ndi. 2
Mutemo we Kuwakana “Muna Tenzi Basi”—Uciri Kuseenza Here?
Pamweni paya mungazwa hingana Dhavhidhi wakati: “Ndapota Djehovha, ndidairei nokukasika; simba rangu rapera. Musandifisire hope yenyu.” (Pis. 143:5-7, 10) Pa migariro yakadaro, tinodikana kuetsera kuti Baba edu e kudenga apangidze kuda kawo katiri. Mungaita izvona nge kupsvaka nguwa kuti muerenge Bhaibheri uye kunyasa kurangarira zvamunoerenga. Ngokudaro, mucaziya mitemo ya Mwari uye mucaona zvaakaita kuti abetsere anhu ake kare. Nge kumupurutana, imwimwi mucagara no rugondo rokuti kumuzwira i mushobo wamungapangidza nawo kuti muno uzii.
Upfumi Watinogumira mu Bhaibheri
it-2 paji. 610
Vheneno Inogara mu Nyoka
Mushobo we kuezanisira. Masoko ekunyepa uye e kureya amweni, anokuwadza unhu we munho unonga ecireiwa uye kunyeperhwa, zvinoezaniswa no vheneno yo nyoka. (Ps 58:3, 4) Aya anoreya anobhuiwa kuti: “Pamuromo pawo pano vheneno hinga yo nyoka,” (kana kuti, “sure ke miromo yawo”), kuitawo hingana ganda rinodusa vheneno ro nyoka riri sure ke muromo no mazino e shaya yaro ye pa musoro. (Ps 140:3; Aro 3:13) Rurimi ro munhu kana rikasenzeswa kuti rireye umweni, kubararisa masoko, fundiso ye kunyepa kana kuti soko rinokuwadza, rurimi rakadaro “rakadzara no vheneno ino uraya.”—Tg 3:8.
FEVRERO 3-9
UPFUMI UNOBVA MU SOKO RA MWARI PISAREMA 144-146
“Anopfara Aya Ekuti Mwari Wawo ndi Djehovha!”
w18.04 paji. 32 mandi. 3-4
Mibvunzo Inobva ku Aerengi
2. Tsamba yakagadziriswa inonyasa kupindirana pa masoko ari pana Pisarema 144. Kuseenzeswa ke soko rokuti “hino” pa vhersikura 12 rinopangidza kuti zviro zvese zvakanaka zvakatarhwa pa mavhersikuro 12 dakara 14 zvinoseenzeswa ku anatsi—aya anokumbira kusudzunurhwa uye kuponeswa pane akashata (vhersikuro 11). Cinjo i inobata-batawo 15, yokuti zvino ino marangariro mairi akatodzana. Kana kuti, kuoneka ke masoko mairi aya okuti “mupfaro” anoreya anhu amwewo, okuti “Mwari wawo ndi Djehovha.” Zvinokoshawo kuziya kuti tsamba ye Cihebheru yainga isikaseenzesi maaspa mairi. Ndiyo ndaa, aturikiri anodikana kuziya kuti ndi mushobo upi wakanaka we kuturikira, ecitsamira mushobo wainga wakaita poeziya yo Cihebheru, zvazvinoreya uye tsamba dzimweni dze Bhaibheri dzakatodzana.
3. Tsamba yakagadziriswa inopindirana no mavhersikuro amweni o mu Bhaibheri anopangidza kuti Mwari acakomborera aya akagondeka. Cinjo inooneka pa soko rokuti asher, inoenderana no kariro yainga ino Dhavhidhi mutari we Pisarema 144. Iyena waitendera kuti Djehovha aizosudzunura dzinza re Israeri pakati pe azondi awo oakomborera no mupfaro uye kubudirira. (Rev. 26:9, 10; Dhe. 7:13; Ps. 128:1-6) Ngo muezaniso, Dheuteronomiyo 28:4 inoti: “Ana ako acakomborerhwa, zvibereko zvo munda wako uye zvibereko zve zvipfuyo zvako, n’ombe dzako uye mabira ako.” Izvona zvakaitikadi kamare mukutonga ke mwana wa Dhavhidhi Soromoni. Yainga iri nguwa yekuti Israeri yainga iri mu runyararo uye kubudirira kaainga asati akamboita kare. Kusiya izvona, zviro zvinganani zve umambo wa Soromoni zvinopangidza kuti umambo wa Mesiya ucange wakadini.—1 Mad. 4:20, 21; Pis. 72:1-20.
Rumbwai Mecibambisa Kariro Yenyu
16 Kariro yedu ye kurarama nokusikaperi i cipo cakanakisisa ca Mwari. Tinoetsera no mwoyo wese ngezve ramangwana—zvatinorugondo kuti zvicaitikadi kamare. Kariro yedu inoita hingana ankora, yecitigarisa takabamba kuti tirhwisane no zvinetso, tishingirire kuteererhwa uye kutotama kuthya. Kariro yedu inoita hingana kapaseti, yecidziirira ndangariro dzedu kuti tirambe zvakashata uye tiite zvakanaka. Kariro yedu inotsamira mu Bhaibheri inonyasa kutikhwededza kuna Mwari uye inotipangidza mushobo wakakura rudo rake katiri. Ticagara no makomborero akawanda mu upenyu wedu kana kariro yedu ikabamba.
17 Muphostori Pauro mu tsamba yake ku Aroma unoreketa kuti: “Pfarai no kariro.” (Aro. 12:12) Pauro waikwanisa kupfara ngekuti wainga ano cokwadi cekuti kana akarumbwa akagondeka waizogara no upenyu usikaperi kudenga. Isusu tingapfarawo no kariro yedu ngekuti tinorugondo rekuti Djehovha acadzadzisa zvipikirhwa zvake. Hingana zvakatarhwa no mutari we pisarema: “Anopfara munhu . . . anokanda kariro yake kuna Djehovha Mwari wake . . . Uya akagondeka nguwa dzese.”—Pis. 146:5, 6.
w18.01 paji. 26 mandi. 19-20
Mupfaro we Zvirokwazvo Unobva pa Rudo Rakaita Kudini?
19 Paakudarika makore anokwana kuita 6000 ekuti nyika ino ya Sathani iri kuita kuti anhu ashuphike. Mu mazuwa ano ekupedzesera nyika yadzara no anhu anonyanya kudzida anoda maningi mare uye anonyanya kuda mapfaro. Anhu akadaro anorangarira basi zvakaanakira uye anogutsa maningi zvido zvawo kudarika zve amweni. Awona aakwanisi kupfara zvezvirokwazvo. Mutari we pisarema wakabhuya ngezve aya anomupfaro we zvirokwazvo. Iyena wakati: “Anopfara munhu ano Mwari wa Djakobo se mubetseri wake anokanda kariro yake muna Djehovha Mwari wake.”—Pis. 146:5.
20 Rudo redu kuna Djehovha riri kurumbwa recikura maningi. Makore ese anhu ari kubatana nesu pakunamata Djehovha. Ici icipangidzo cekuti Umambo wa Mwari uri kutonga uye ucaunzisa makomborero akawanda ku anhu. Mupfaro mukuru kuziya kuti tiri kupfadza Djehovha. Aya anoda Djehovha acapfara nokusikaperi. Mu fundo inoteera ticaona zvipangidzo zvakawanda zvakashata zve mugumisiro we kunyanya kudzida uye kusiyana ke anhu a Djehovha.
Upfumi Watinogumira mu Bhaibheri
it-1 paji. 135 ndi. 5
Zvinyama
Bhaibheri rinotifundisa kuti tinodikana kubata zvakanaka zvinyama. Djehovha anobhuya kuti iyena ndiye Akasika zvinyama. (Zvie 12:10; Ps 145:15, 16) Mutemo wa Mozesi waibhuya kuti Aisraeri aidikana kubata zvakanaka zvinyama. Zvinyama zve panyumba pe zvaipsveteka, uya waaizviona waidikana kuhwirinza ku muridzi dzakacengeteka. Awona ainga asikadikani kuthwarisa cinyama mutoro wairema maningi. (Eki 23:4, 5) Zvaidikana kuseenzeswa no usisi. (Dhe 22:10; 25:4) Anhu kutobatanidzawo no zvinyama aidikana kuzorora mu Sabudu. (Eki 20:10; 23:12; Dhe 5:14) Zvinyama zvaikuwadza anhu zvaidikana kuonererhwa kana kuti kuuraiwa. (Ge 9:5; Eki 21:28, 29) Zvairambidzwa kusongana ke zvinyama zviri zvakasiyana.—Re 19:19.
FEVRERO 10-16
UPFUMI UNOBVA MU SOKO RA MWARI PISAREMA 147-150
Tino Zvikonzero Zvakawanda kuti Tikudze Djah
w17.07 paji. 18 mandi. 5-6
“Ngei Tinodikana Kukudza Djah”?
5 Djehovha aazi kunyaradza Aisraeri hinga cikwata basi, asi iyena akanyaradzawo ku munhu umwe na umwe. Uye nyamasi uno iyena ari kubetsera munhu umwe na umwe. Mutari we pisarema wakatara kuti: “Iyena anoporesa aya ano mwoyo wakakuwadzika uye anorapa zvironda zvawo.” (Pis. 147:3) Zvinopfadza maningi kuziya kuti Djehovha anotibetsera patinosongana no matambudziko. Zvezvirokwazvo iyena anoda maningi kutinyaradza uye kuporesa marhwadzo edu e mu mwiri uye e mu ndangariro. (Pis. 34:18; Isa. 57:15) Iyena anotipasa uzii uye simba kuti tikwanisane no cinetso cipi haco catingabatana naco.—Tig. 1:5.
6 Pedzepo mutari we pisarema wakabhuya ngezve zviro zviri kudenga uye wakabhuya kuti “anoerenga nyeredzi dzese” uye “anodzidainza no mazina.” (Pis. 147:4) Ngei mutari we pisarema wakatanga kureketa ngezve nyeredzi? Ngo kuningira basi kudenga, iyena waikwanisa kuona kuti kainga kuno nyeredzi dzakawanda. Asi pa nguwa iyona zvainga zvisikaiti kuona kuti kainga kuno nyeredzi ngana. No kuhamba ke makore, takazoona kuti kuno nyeredzi dzakawanda maningi kudarika zviya zvatairangarira. Amweni anobhuya kuti kuno mabhiriyonji e nyeredzi mu galáxia. Uye pamweni kuno mabhiriyonji e galáxias mu Nyika! Isusu atitokwanisi kuerenga nyeredzi dziripo. Asi Musiki anoziya dzese kadziri uye anopasa zina nyeredzi imwe na imwe. (1 Ako. 15:41) Mutari we pisarema waida kufundisa fundo ipi? Kana Mwari eciziya nyeredzi dzese, iyena anonyasawo kuziya zvese nge zvedu. Djehovha anoziya zina renyu. Pa nguwa ipi hayo, co masikati kana co usiku Djehovha anoziya kamuri, zvamurikuzwa uye zvamurikuda.
w17.07 paji. 18 ndi. 7
“Ngei Tinodikana Kukudza Djah”?
7 Pane kunyasa kumuziyai basi, Djehovha anodawo kumubetsera kuti murhwisane no matambudziko amunosongana nawo mu upenyu wenyu. Iyena ano simba rekutibetsera uye anonyasa kuziya mazwiro edu. (Erengai Pisarema 147:5.) Pamweni imwimwi muri kusongana no mugariro unoshupha maningi uye pamweni amucina simba. Mwari anoziya zvamusikakwanisi kuita, uye ‘anoedzurira kuti imwimwi muri mataka.’ (Pis. 103:14) Nge ndaa ye kusama kukwana kedu, isusu tinoshaisha kakawanda uye izvona zvinotisiya takatsukwara. Tese isusu takambogara no cido cekuda kuita zvakashata, tinosoitira bibvu anhu amweni kana kuti tinososhaisha kureketa. Djehohva aasati amboita zvakadaro. Kunyazi zvakadaro, iyena anozwisisa mazwiro edu kudarika zviya zvatinorangaridza.—Isa. 40:28.
w17.07 paji. 21 ndi. 18
“Ngei Tinodikana Kukudza Djah”?
18 Mutari we pisarema waiziya kuti Aisraeri ainga akakomborerhwa maningi na Djehovha. Ndirona basi dzinza rainga rakapaswa “soko” ra Mwari, “mitemo” uye “zvaakatonga.” (Erengai Pisarema 147:19, 20.) Nyamasi uno, anhu a Djehovha akakomborerhwawo. Tisu tega tinodainzwa no zina ra Mwari. Soko rake rinotungamirira upenyu wedu. Isusu tinoziya Djehovha uye tino ushamwari naye. Hinga zvakatarhwa pana Pisarema 147, tino zvikonzero zvakawanda zve “Kukudza Djah!” uye kukohomedzesa amweni kuti aite zvimwezvo.
Upfumi Watinogumira mu Bhaibheri
it-1 paji. 262
Shiri
Mutari we pisarema wakabhuya ngezve “shiri” dzinokudza Djehovha (Ps 148:1, 10), uye shiri idzona dzinoita izvona nge ndaa ye mushobo wadzakasikwa. Shiri imwe basi ingakwanisa kugara no manhenga anokwana 1000 kana kudarika 20 000 manhenga. Ngokudaro, nhenga rimwe no rimwe rinoumbwa no mubatanidzwa we manhenga, awo ekuti panobuda mazana e zvimanhenga ngece mukati uye pazvimanhenga izvi pano mazana e zvimanhenga zvidoko-doko zvekuti cinhenga cimwe cino mazana e zvimanhenga uye no zviya zvinoita kuti manhenga asambwere. Nhenga rimwe ro njiwa rino 15 sentimetro, maerenano no zvinosobhuiwa, kuno mazana e zvimanhenga zvinozwi bárbulas kureya kuti mamiriyonji e barbicelas. Zviro zvakakandwa pa mabaphiro uye pa mwiri we shiri zvinoita kuti dzimburuke zvakanyasa kurongeka uye zvinoseenza zvakanaka kudarika ndeka dzo mazuwa ano. Mushobo wakaizwa makodo e shiri unobetsera kuti isaremerhwe, ngokudaro makodo e shiri inozwi alcatraz kana kuti fragata, iyo yekuti kana ikatambanudza mabaphiro ayo, anodarika 2 metro, pamweni makodo ayo angarema magrama 110. Makodo manganani anogara pa mabaphiro e shiri dzakakura dzinomburuka dzisikapondi mabaphiro kakawanda, mabaphiro adzo ano zviro zvakaita hinga tirantes (zviro zvinobetsera kuti mabaphiro asabude pa mbuto pawo) mukati me makodo e manhenga e shiri, hingana nervuras mukati me mabaphiro e ndeka.
FEVRERO 17-23
UPFUMI UNOBVA MU SOKO RA MWARI ZVIERENGO 1
Madjaha—Imwimwi Mucapurutana Ani?
w17.11 paji. 29 mandi. 16-17
Musasiye kuti Ciro Cipi Hako Cimuitisei kuti Musawine Mubairo
16 Madjaha akawanda anozwa hingana kuti abereki awo aazwisisi uye ari kuda kuonerera zvese zvaanoita. Imwimwi munozwawo kudaro here? Pakadaro, pamweni imwimwi mungatanga kuremba nge ndaa ye zviya zvamunokumbirhwa kuti muite uye mokana-kana kuti kuseenzera Djehovha i ciro cakanakisisa camungaita mu upenyu wenyu. Kudai imwimwi makasiya kuseenzera Djehovha, maizoona ciriporipoco kuti apana anomudai maningi kudarika abereki enyu uye shamwari dzenyu dze mu ungano.
17 Rangarirai kuti kudai abereki enyu asikamusumuririi, pamweni mungatanga kurangarira kuti: Awona aana basa na inini. (Aheb. 12:8) Asi pamweni camusikapfariri i mushobo wamunosumururhwa no abereki enyu. Kana zviri izvona, musakande ndangaririo dzenyu pa zviro izvona. Edzai kuzwisisa kuti ngei awona ari kumusumururai. Kana abereki enyu akabhuya zviro zvamusikadi, garai makaterama uye musakasike kunyangadzwa. Bhaibheri rinoti: “Munhu ano uzii anoonerera masoko ake uye munhu ano ungwaru anorumbwa akaterama.” (Zvie. 17:27) Imwimwi mungakwanisa kupeta masimba kuti mugare munhu wakakura pa kunamata, anonyasa kukwanisa kuzwa mazano akaterama uye asikanetseki maningi nge mushobo waapaswa mazano. (Zvie. 1:8) Kugara no abereki anoda Djehovha ndi makomborero. Musakanganwe kuti awona anoda maningi kumubetserai kuti muwine mubairo we upenyu.
w05 2/15 mapaji. 19-20 mandi. 11-12
Kuita kuti Tirumbwe Teciziikanwa Hinga Akristu
11 Pfadzai Mwari haiwa anhu. Zvinooneka kuti tiri anhu akadini nge ndaa ye anhu atinosanangura kutamba nawo. Anhu ese anoda shamwari, uye kugara no mashamwari kunoita kuti tizwe zvakanaka. Patinonga tiri madjaha—kutobatanidzawo no kuhamba ke nguwa—kubambidzirhwa no shamwari dzo kucikora kungakura, zvokuita kuti tigare no cido co kuda kuteedzera amweni uye nokuapfadza. Asi madzishamwari uye no makorega anguwapi dzese dzokuti anoda kuti zviro zvitihambire zvakanaka. Nguwa dzimweni awona anoda kuti tiite nawo zviro zvakashata. (Zvierengo 1:11-19) Kana Mukristu akatendera kubambidzirhwa no makorega, pamugariro uwona iyena unonga ecifisa kuti ndi Mukristu. (Pisarema 26:4) Muphostori Pauro wakati: “Siyai kuteedzera zviro zvinoizwa nge anhu e nyika ino.” (Aroma 12:2, Bhaibheri ro Djerusarema) Djehovha anopasa simba ratinoda kuti tikwanisane no kubambidzirhwa ke zviro zvo nyika ino.—Ahebheru 13:6.
12 Kana kubambidzirhwa keciita kuti kubate-bate kuziikanwa kedu hinga Akristu, tinodikana kuedzurira kuti kugondeka kedu kuna Mwari kunokosha maningi kudarika zviya zvinobhuiwa uye zvinoizwa no anhu akawanda. Masoko ari pana Ekisodho 23:2 i zvokwadi zvisikacinji zvinokosha maningi. Awona anoti: “Musaite zviro zvakashata basi nge ndaa yekuti akawanda ari kuitawo.” Aisraeri akawanda paakakana-kana kuti Djehovha aizokwanisa kudzadzisa zvipikirhwa zvake, Karebhi wakaramba zvacose kuatsigira. Iyena waiga ano rugondo rokuti zvipikirhwa zva Djehovha zvakagondeka uye iyena wakakomborerhwa maningi nge kurumbwa wakagondeka. (Numero 13:30; Djoshuwa 14:6-11) Kuti murumbwe muno ushamwari wenyu na Djehovha, imwimwiwo munoda kusiya kuteedzera zvinoizwa no anhu akawanda here?
Upfumi Watinogumira mu Bhaibheri
it-2 paji. 1140
Benzi
Pane kubhuya munhu uno nhenda yo pfungwa, soko rokuti “benzi” maererano no Bhaibheri kakawanda kakhona rinonga recibhuya munhu usikakoshesi cokwadi uye unoita zviro zvo upenzi, asikatenderani no nhugamiriro ye unatsi wa Mwari. Pano masoko akawanda mu Cihebheru anobhuya ngezve munhu wakadaro: kesilʹ (‘munhu usina nzero’; Zvie 1:22), ʼewilʹ (“benzi”; Zvie 12:15), na·valʹ (‘upenzi’; Zvie 17:7), uye lets (“mushori”; Zvie 13:1). Mu Cigrego aʹfhron rinoda kureya “benzi” (Ruk 12:20), a·noʹe·tos to rinodawo kureya “mapenzi” (Ag 3:1), uye mo·rosʹ rinoreyazve “benzi.” (Mt 23:17; 25:2).
FEVRERO 24–MARSO 2
UPFUMI UNOBVA MU SOKO RA MWARI ZVIERENGO 2
Ngei Munodikana Kuita Fundo Yenyu yo Munhu Ega no Cido?
“Rumbwai Mecihamba mu Cokwadi”
16 Aesepi anopfarira kuerenga uye kufunda. Asi Djehovha anotipika kuti “tirumbwe tecipsvaka” uye “tinyase kupsvaka” zviro zvakadzika zvakaringana no cokwadi. (Erengai Zvierengo 2:4-6.) Tinorumbwa tecibetsereka kana tikapeta masimba kuti tizviite. Hama imweni inozwi Corey inobhuya kuti painoerenga Bhaibheri inokanda ndangariro dzayo pa vhersikuro imwe na imwe. Iyona inoti: “Ndinoerenga masoko ese e pasi, ndinopsvaka mareferesiya anondiendesa kutsamba dzimweni uye ndinokwarakwatisa tsamba dzimweni. . . . Ndinofunda zvakawanda pandinoita izvona!” Pasinei no mushobo watinoseenzesa kuti tifunde Bhaibheri, isusu tinopangidza kuti tinokoshesa Bhaibheri kana tikapsvaka nguwa kuti tirierenge uye topeta masimba kuti tizviite.—Pis. 1:1-3.
Ungwaru we Zvirokwazvo Urikudainzira
3 Bhaibheri rinoti: “Kuthya Djehovha ndiko kutanga ke ungwaru uye kuziya Mucena-Cena ndiko kuzwisisa.” (Zvie. 9:10) Ungwaru unobatanidza kuseenzesa zvatinoziya kuti tiite zvisananguro zvakanaka, asi tinopangidza kuti tino ungwaru we zvirokwazvo kana “tikaziya Mucena-Cena” kana kuti tikapsvaka maonero a Djehovha tisati taita cisananguro cinokosha. Tingaita izvona nge kupsvaka zvinorekethwa no Bhaibheri uye no mabhuku edu. Kana tikaita izvona tinopangidza ungwaru we zvirokwazvo.—Zvie. 2:5-7.
4 Djehovha ndiye basi angatipasa ungwaru we zvirokwazvo. (Aro. 16:27) Ngei? Cekutanga, ngekuti Djehovha ndiye Musiki, uye iyena anoziya zvakawanda ngezve zviro zvaakasika. (Pis. 104:24) Cecipiri, zvese zvinoizwa na Djehovha zvinopangidza kuti iyena ano ungwaru. (Aro. 11:33) Cecitatu, wese unoseenzesa mazano e ungwaru a Djehovha unobetsereka. (Zvie. 2:10-12) Kana tecida kugara ne ungwaru we zvirokwazvo tinodikana kutenda zvokwadi izvi zvinokosha uye kutendera kuti izvona zvitungamirire zvisananguro zvedu uye zviito.
w16.09 paji. 23 mandi. 2-3
Madjaha, Bambisai Kutenda Kenyu
2 Nyamasi uno, anhu akawanda aatendi kuti Mwari ndiye Musiki, anoona kuti zvakanaka kutendendera kuti zviro zvakaita zvekuphinduka-phinduka. Kana muri mudjaha unoseenzera Djehovha kana kuti muri kutanga kufunda nge zvake, pamweni mungadzibvunzisa kuti mungapangidza kudini kuti kuno musiki? Kana zviri izvona, imwimwi mungakwanisa kuita zviro kuti mubambise kutenda kenyu. Mwari wakatipasa simba rekukwanisa kurangarira kureya kukwanisa kuseenzesa ndangariro, uye “izvona zvicamudziirirai.” Zvicamubetserai kuti murambe marangariro e nyika angakuwadza kutenda kenyu.—Erengai Zvierengo 2:10-12.
3 Kuti tigare no kutenda ke zvirokwazvo, tinodikana kunyasa kuziya Mwari. (1 Ti. 2:4) Ndiyo ndaa pamunonga mecifunda Bhaibheri, musandoerenge basi. Edzai kupsvaka kuzwisisa zvamuri kuerenga. (Mat. 13:23) Mu fundo ino ticaona kuti izvi zvingamubetserai kudini kuti mugare no rugondo rokuti musiki ariyo uye kuti “Bhaibheri i Soko ra Mwari.”—Aheb. 11:1, masoko e pasi.
Upfumi Watinogumira mu Bhaibheri
it-1 paji. 1237 ndi. 1
Kuperera
Kugara munhu wakaperera zvinobvira nge ndaa ye kutenda kakabamba uye rugondo kuna Djehovha uye simba Rake rekuponesa. (Ps 25:21) Gondeso ya Mwari nge yekuti Iyena acagara “civhikhiro” uye “mbuto yekutizira,” ecicengeta gwanza re aya anohamba akaperera kaari. (Zvie 2:6-8; 10:29; Ps 41:12) Kugara no cido ce kutenderhwa na Djehovha kunoaunzisira upenyu wakaterama, zveciaita kuti asapauke. (Ps 26:1-3; Zvie 11:5; 28:18) Hinga zvakabhuiwa na Djobo, munhu usina ndaa ungatambudzika nge ndaa ye kutonga ke aya akashata uye ungafa pamwepo nawo, asi Djehovha anogondesa kuti anoedzurira munhu uya usina ndaa uye anogondesa kuti nhaka yo munhu iyena icagara nokusikaperi uye kuti ramangwana rake ricagara rakanaka uye ucapinda mu zororo rakanaka. (Djob 9:20-22; Ps 37:18, 19, 37; 84:11; Zvie 28:10) Hinga zvakaitika na Djobo, cinoita kuti munhu akoshe uye asisire rureremedzo ikugara munhu wakaperera, pane kugara no upfumi. (Zvie 19:1; 28:6) Ana akomborerhwa nge kugara no baba uye mai akaperera kuna Djehovha, anodikana kuzwi akapfara (Zvie 20:7), ecitambira muezaniso wakanaka we upenyu wa baba awo ecipfara nge zina rakanaka rawo uye rureremedzo raakaita kuti agare naro.