Mareferensiya e Urongwa we Musangano Basa Redu uye Kurarama
© 2024 Watch Tower Bible and Tract Society of Pennsylvania
MARSO 3-9
UPFUMI UNOBVA MU SOKO RA MWARI ZVIERENGO 3
Pangidzai kuti Munogonda Djehovha
ijwbv fun. 14 mandi. 4-5
Zvierengo 3:5, 6—“Usagonde no Kuzwisisa Kako”
“Gonda Djehovha no mwoyo wako wese.” Tinopangidza kuti tinogonda Mwari patinoita zviro zvinoenderana no cido cake. Tinodikana kugonda Mwari no mwoyo wese kamare. Mu Bhaibheri, soko rokuti mwoyo rinoda kureya zvatiri ngecemukati; izvona zvinobatanidza mazwiro e munhu, zviya zvinotiitisa kuti tiite ciro, marangariro uye maitiro edu. Asi, kugonda Mwari no mwoyo wedu wese kunobatanidza zviro zvinopinda mazwiro edu. I cisananguro catinoita ngekuti tinonyasa kugonda kuti Musiki wedu anonyasa kuziya zvakatinakira.—Aroma 12:1.
“Usagonde no kuzwisisa kako.” Tinodikana kugonda Mwari ngokuti marangariro edu aazi kukwana. Kana tikadzigonda isusu pacedu, kana kuti tikasiya kuti marangariro edu asanangure zviya zvatiri kuda kuita, tingakwanisa kuita zvisananguro zvekuti pakutanga zvingaita hingana kuti zvakanaka asi pakupedzesera zvinounza mugumisiro wakashata. (Zvierengo 14:12; Djeremiya 17:9) Uzii wa Mwari wakakura maningi kupinda wedu. (Isaya 55:8, 9) Kana tikatungamirirhwa no marangariro ake, upenyu wedu unobudirira.—Pisarema 1:1-3; Zvierengo 2:6-9; 16:20.
ijwbv fun. 14 mandi. 6-7
Zvierengo 3:5, 6—“Usagonde no Kuzwisisa Kako”
“Murangarirei mumakwanza enyu ese.” Tinodikana kugara no maonero a Mwari mu zviro zvese zvinokosha mu upenyu wedu uye pazvisananguro zvese zvinokosha zvatinoita. Tinoita izvona nge kuita munamato tecikumbira nhungamiriro dzake uye nge kuzwira zviya zvaanobhuya eciseenzesa Soko rake, Bhaibheri.— Pisarema 25:4; 2 Timoti 3:16, 17.
“Iyena acagadzirisa makwanza enyu.” Mwari acagadzirisa makwanza edu nge kutibetsera kurarama maererano no nhungamiriro dze unatsi wake. (Zvierengo 11:5) Ngokudaro, tinodzidziirira pa mirau uye ticapfara maningi mu upenyu.—Pisarema 19:7, 8; Isaya 48:17, 18.
be paji. 76 ndi. 4
Rumbwai Mecikura—Pakunamata
Mumasure me kubatana no migariro yakasiyana-siyana mu upenyu, munhu ungakwanisa kurangarira kuti: ‘Ndakambobatana no mugariro uu. Inini ndinoziya zvekuita.’ Zvakanaka here kurangarira kudaro? Zvierengo 3:7, inotingwadza kuti: “Usadzione hinga wakangwara.” Esperiyensiya yatingabatana nayo inodikana kutibetsera kuona zvakadjeka zvatinodikana kuita patinobatana no migariro yakasiyana-siyana. Asi kana tecikura pakunamata, maitiro edu anodikana kupangidza kuti tinoda makomborero a Djehovha kuti tibudirire. Ngokudaro, kubudirira kedu akuoneki nge kudzigonda, asi kunooneka nge kupsvaka nhungamiriro dza Djehovha. Tinopangidza kubudirira kedu nge kugonda kuti apana catingaita tisikazi kutenderhwa na Djehovha uye nge kurumbwa tino ushamwari wakagondeka uye rudo kuna Baba edu e kudenga.
Upfumi Watinogumira mu Bhaibheri
w06 9/15 paji. 17 ndi. 7
Mafundo Makuru Anobva mu Bhuku ra Zvierengo
3:3. Tinodikana kukoshesa usisi no rudo uye kudzipangidza pamhene hinga korari inodhura. Tinodikanawo kutara mawara aya mu mwoyo medu, tecirarama maererano nawo.
MARSO 10-16
UPFUMI UNOBVA MU SOKO RA MWARI ZVIERENGO 4
“Cengetedzai Mwoyo Wenyu”
w19.01 paji. 15 ndi. 4
Mungacengetedza Kudini Mwoyo Wenyu?
Pana Zvierengo 4:23, soko rokuti “mwoyo” rinoseenzeswa recida kureya zvakaita “munhu nge cemukati.” (Erengai Pisarema 51:6 uye masoko e pasi.) Nge masoko amweni, “mwoyo” unoimirira marangariro edu, mazwiro, maitiro uye zvido zvedu zvemukati. Uwona unoreya zvatiri nge cemukati haiwa zviya zvinorangarirhwa no amweni.
w19.01 paji. 17 mandi. 10-11
Mungacengetedza Kudini Mwoyo Wenyu?
10 Kuti tidziirire mwoyo wedu, tinodikana kuona ngozi uye totiza ciripo-ripoco. Soko rakaturikirhwa rokuti “kudziirira” pana Zvierengo 4:23 rinotiedzurira basa re murindiri. Mu nguwa ya Mambo Soromoni, arindiri aigara pa muru we thaundi. Paaiona ngozi yecikhwedera padhuze airidza ciro. Marangariro aya anotibetsera kuona zvatinodikana kuita kuti tisasiye Sathani ecipsvipisa mushobo wedu wekurangarira.
11 Pane arindiri basi, thaundi raicengethwawo no acengeti e misuwo. (2 Sam. 18:24-26) Acengeti e misuwo paaiona muzondi eciuya, awona aipsvaka kuona kuti musuwo we thaundi wakafungwa here. (Nee. 7:1-3) Murindiri we mwoyo wedu i hana yakarowedzwa no Bhaibheri. Iyona inotingwadza kana Sathani akaedza kupinda mu mwoyo medu kana kuti, kana iyena akaedza kupfuridzira marangariro edu, mazwiro, maitiro uye zvido zvedu. Ndiyo ndaa, kana hana yenyu ikamungwadzai, musanonoke, fungai misuwo ye mwoyo wenyu.
w19.01 paji. 18 ndi. 14
Mungacengetedza Kudini Mwoyo Wenyu?
14 Azvikwani basi kufunga mwoyo yedu kuti zvakashata zvisapinde, asi tinodikanawo kufungura mwoyo yedu kuti zvakanaka zvipinde. Rangariraizve ngezve basa raiizwa no anhu aicengetedza misuwo. Azondi paaiedza kupinda mu thaundi, acengeti e misuwo aifunga misuwo, asi paiuya zvekurhya kana kuti zviro zvimweni zvinobetsera, awona aifungura misuwo. Ngokuti kudai aitama kuita izvona, agari e mu thaundi aida kufa no nzara. Nge mushobo umwewo, isusu tinodikanawo kufungura mwoyo yedu kuti tikande marangariro a Mwari.
w12 5/1 paji. 32 ndi. 2
“Cengetedzai Mwoyo Wenyu!”
Ngei tinodikana kucengetedza mwoyo wedu wekuezanisira? Mwari akafemera Mambo Soromoni kutara kuti: “Cengetai mwoyo yenyu kupinda zviro zvese zvamungacengetedza, ngokuti imona ndimo munobva zviro zvinopa upenyu.” (Zvierengo 4:23) Zvakaita upenyu wedu zvino uye kariro yedu ye ramangwana, zvese izvona zvinobva ku zviya zvakaita mwoyo wedu wekuezanisira zvino. Ngei? Ngokuti Mwari anoona zvakaita mwoyo wedu. (1 Samueri 16:7) Zvatiri ngece mukati kana kuti zvakaita “unhu wecemukati we mwoyo,” ndizvo zvicaita kuti Mwari atide kana kutama kutida.—1 Pedru 3:4.
Upfumi Watinogumira mu Bhaibheri
Makagadzirira Kuetsera Djehovha Here?
4 Zvierengo 4:18 inoti: “Gwanza re anatsi rakaita hingana ciedza cemacibesi cinorumbwa cecidjeka dakara aamasikati.” Masoko aya anocokuita no mabetsere anoita Djehovha aseenzi ake kuti azwisise cinangwa cake—Djehovha anoita izvi padoko no padoko. Asi tsamba ii, inotibetserawo kuti tizwisise kuti Akristu anoita kudini cinjo mu upenyu wawo kuti arumbwe ecikhwedera dhuze na Djehovha. Kukura pakunamata akuitiki ciriporipoco. Asi zvinotora nguwa. Kana tikagara afundi anopeta masimba kuti tirumbwe tecifunda uye toseenzesa mazano atinotambira kubva mu Bhaibheri no atinopaswa nge sangano ra Djehovha, padoko no padoko ticakwanisa kuteedzera mawara Akristu. Uye ticatunhudzira kuziya kedu Mwari. Ngatione muezaniso wakaizwa ndi Djesu kuti anyase kupanganidza fundo ii.
MARSO 17-23
UPFUMI UNOBVA MU SOKO RA MWARI ZVIERENGO 5
Garai Kure no Uhure
w00 7/15 paji. 29 ndi. 1
Imwimwi Mungarumbwa Makacena mu Nyika Yakapsvipa
Pa tsamba ii ya Zvierengo, munhu akapauka anoezaniswa no “mwanakadzi unoita zvakashata”—hure. Masoko aanoseenzesa kuti acengedze nawo munhu, anotapira maningi hingana uci uye akanaka maningi kupinda azeite. Mishobo yakawanda ye uhure aitangi nge mushobo uu here? Ngo muezaniso, onai zvakaitika na Amy uno makore 27, iyena unoseenza musekretariya. Iyena unoti: “Pano mudoni umweni wandinoseenza naye waindipfarira maningi uye nguwa dzese waindibambisa. Zvinopfadza maningi kukosheswa. Asi ndirikuona kuti kupfarira kaarikundiita kunotsamira pakuita zvepamaponde basi. Asi anditenderi ucengedzi uu.” Masoko ekubambisa e munhu unocengedza kakawanda kakhona anonga ecipfadza, kunze kekuti isusu tanyasa kuziya cinangwa cake. Kuti tiite kudaro tinodikana kuseenzesa kukwanisa kedu kurangarira.
w00 7/15 paji. 29 ndi. 2
Imwimwi Mungarumbwa Makacena mu Nyika Yakapsvipa
Mugumisiro we uhure wakashata maningi kudarika kuwawa kunoita muti unowawa uye unopinza maningi kupinda supada inoceka no kwese—zvinorhwadza maningi uye zvinouraisa. Mugumisiro wakashata we maitiro aya, kakawanda kakhona kunoita kuti hana ireme, kubata mimba isikaetserhwi kana kuti kubata nhenda inopaswana pa kuita zve pamaponde. Uye rangarirai ngezve kurhwadziwa mundangariro kungaitika nge ndaa ye uya asikazi kugondeka mu mucato. Kutama kugondeka mu mucato kunyazi padoko basi kungaita kuti munhu waizirhwewo arhwadziwe maningi dakara ke upenyu wake wese. Uhure unokuwadza zvezvirokwazvo.
w00 7/15 paji. 29 ndi. 5
Imwimwi Mungarumbwa Makacena mu Nyika Yakapsvipa
Tinodikana kuita zviri zvese kuti tigare kure no anhu anoda kuita zve uhure. Ngei tingadzikanda pa ngonzi, nge kupurutana ngoma dzisikapfadzi, kuona mavhidhiyo anokuwadza ndangariro dzedu kana kuti kuona zviro zvinobatanidzwa pa mapornografiya? (Zvierengo 6:27; 1 Akorinti 15:33; Aefeso 5:3-5) Uyewo waizonga uri upenzi kudzionesa ku anhu aya tecipangidza hingana kuti tinoada uye kupfeka nge mushobo usikazi kusisira!—1 Timoti 4:8; 1 Pedru 3:3, 4.
Upfumi Watinogumira mu Bhaibheri
w00 7/15 paji. 29 ndi. 7
Imwimwi Mungarumbwa Makacena mu Nyika Yakapsvipa
Soromoni unopangidza mutengo wakakura maningi unogara no munhu nge kuita uhure. Upombwe no kutama kureremedzwa kana kuti kutama kudzida zvinohamba zviri pamwepo. Azvipsverudzi here kuseenza basi kuti tiguse cido cedu cekuda kuita uhure kana kuti ce munhu umweni? Azvipangidzi kutama kudzida pamunoreketa zviro zvepamaponde no munhu wamusikazi kuwakana naye here?
MARSO 24-30
UPFUMI UNOBVA MU SOKO RA MWARI ZVIERENGO 6
Tingafundei Kubva ku Usunzi?
it-1 paji. 999 mandi. 1-2
Usunzi
‘Ungwaru we Kubarhwa Nawo.’ ‘Ungwaru’ we usunzi aubvi pakurangarira asi unobva pakusikwa kawakaizwa no Musiki. Bhaibheri rinobhuya kuti usunzi ‘unogadzirira uye kuunganidza zvekurhya pa nguwa ye kukorora.’ (Zvie 6:8) Mishobo yakasiyana-siyana ye usunzi yakaoneka ku Palestina, usunzi unounganidza zvekurhya kana kuti kukorora (Messor semirufus), unounganidza zviro zvakawanda pa nguwa ye kupisa no ye kutonhora uye unozviseenzesa mu nguwa yekuti inoshupha kuona zvekurhya. Usunzi unosooneka padhuze no panopurirhwa zviro, panonga pakadzara no tsangu dze zvirimwa. Mvura painonaya yototesa tsangu dzinonga dzakacengethwa, usunzi idzi dzinotora tsangu dzobudisa kunza kuti dziome no zuwa. Dzinotozikanwa kamare kuti idzona dzinotobvisa mwoyo unomera we mbeu kuti isamere pa nguwa yainonga yakacengethwa. Zvikwata zve usunzi zvinokorora, zvinooneka nge kucera gwanza kadzinoita no mateko e mbeu adzinosiya pa musuwo we muparo wadzo.
Muezaniso we Zviito zve Usunzi. Ngokudaro, kuongorora padoko usunzi kunopasa ngwadzo inosimba: “Funda no usunzi, iwewe nyanungo; ongorora makwanza adzo uye gara munhu uno ungwaru.” (Zvie 6:6) Usunzi auoneki basi nge kugadzirira kaunoita ramangwana wadzo, asiwo nge kurumbwa dzakashinga, kakawanda kakhona dzakathwara zviro kana kuti kukwekweredza zviro zvinorema maningi kudarika maremere adzinoita, dzeciita zviri zvese kuti dzipedze basa radzo uye dzotama kuremba, kunyazi kumbwera, kutserendendeka kana kuti kusungwa no ciro. Zvecioneka nge kuseenza dzakabatana, dzinosiya nyumba yadzo yakacena uye dzinopangidza kukoshesa usunzi dzimweni, nge kuthwara usunzi dzimweni dzakakuwadzika kuti dzihwirire padzinogara.
w00 9/15 paji. 26 mandi. 3-4
Dziirirai Zina Renyu
Atidikaniwo here kuseenza no simba hinga usunzi? Kuseenza no simba uye kupeta masimba pa kutunhudzira basa redu zvakatinakira, azvinei kuti tiri kutungamirirhwa here kana kuti haiwa. Kunyazi patinonga tiri ku cikora, ku basa uye patinonga teciita mabasa e kumwiya, tinodikana kuita zvese zvatinokwanisa. Kuita hinga usunzi unobetsereka nge kuseenza no simba, Mwari anodawo kuti isusu ‘tipfadzwe no zviro zvese zvakanaka pa basa redu ratinoseenza no simba.’ (Muparidzi 3:13, 22; 5:18) Hana yakacena uye kugutsikana ke munhu zvinobva pa kuseenza no simba.—Muparidzi 5:12.
Eciseenzesa mibvunzo miiri isina mhinduro, Soromoni wakapsvaka kutsungudza anyanungo pa unungo wawo, eciti: “Iwe nyanungo, ucarumbwa weciwata dakara riini? Ucamuka riini pa hope dzako?” Eciteedzera masoko e nyanungo, mambo anotunhudzira eciti: “Hope padoko basi, kukotsira padoko basi, kumbosenga nyara padoko basi kuitira kumbozorora, uye urombo wako ucauya kauri hinga mauire anoita mbavha, uye matambudziko ako acauya hinga munhu akagadzirira kurhwa hondo.” (Zvierengo 6:9-11) Nyanungo paanonga ecizorora, urombo unouya nokukasika hinga mbavha, uye matambudziko acamurhwisa hinga kurhwisa kunoita munhu akagadzirira kurhwa hondo. Minda dze nyanungo dzinodzara mashango nokukasika anouraya zvirimwa. (Zvierengo 24:30, 31) Bhizi rake rinombwera nokukasika. Munhu waizotendera kuseenzerhwa no museenzi ano nungo ke nguwa yakareba kudini? Uye mufundi uno nungo maningi dze kufunda ungaetsera here kuti ucabudirira ku cikora?
Upfumi Watinogumira mu Bhaibheri
w00 9/15 paji. 27 ndi. 3
Dziirirai Zina Renyu
Zviro zvinomwe zvinorekethwa no Zvierengo ndizvo zvikuru zvakhona uye zvingatobatanidza mushobo wese we zviro zvakashata. “Madziso anodzikudza” uye “mwoyo unoronga mazano akashata” ndi zvitema zvinoizwa mu ndangariro. “Rurimi rinoreketa zve kunyepa” uye “mupupuri we kunyepa unoreketa manyepo” ndi masoko e citema. “Nyara dzinodurura ngazi isina ndaa” uye “tsoka dzinogogomera zvakashata” ndi mabasa akashata. Uye Djehovha anonyanya kuzonda munhu uya unopfarira kubara woyo-woyo pakati pe aya anopfarira kugara ari mu runyararo. Kutunhudzirika ke numero yo citanhatu kuenda yo cinomwe zvinonga zvecida kureya kuti mundandanda uu we zvishaishi unonga usikazi kukwana, ngokuti zviito zvakashata zve anhu zvinorumbwa zvecitunhudzirika nguwa dzese.
MARSO 31–ABRIRI 6
UPFUMI UNOBVA MU SOKO RA MWARI ZVIERENGO 7
Dzingwarirei pa Migariro Yemuedzo
w00 11/15 paji. 29 ndi. 5
“Cengeta Mitemo Yangu uye Rumbwa Wecirarama”
Janera rakaseenzeswa na Soromoni kuti aone, rainga rino gradhi—zvinoita hingana rainga riri gradhi rakaizwa no zvimatabwa zvakanyasa kutsetswa uye zvainga zvino zviro zvaiita kuti zvinyase kurungama. Pakainga kecidoka, mu makwanza makatanga kusvipa. Iyena anoona djaha riri nyore kucengedzerhwa. Risikwanisi kuziya cakashata no cakanaka, kana kuti risina ungwaru, rinokonerhwa nzero. Pamweni waitonyasa kuziya maitiro e nyacigarisano wake kuti akadini uye zviro zvaizoda kuitika ikona. Djahero rakakhwederera “pacikhona pake,” pekuti i gwanza rokuenda kumba kake. Nyacigarisanoo wainga ari ani? Zvinyi zvaaida kuita?
w00 11/15 paji. 30 mandi. 4-6
“Cengeta Mitemo Yangu uye Rumbwa Wecirarama”
Miromo ye mwanakadzi uu yakazverera. No masoko ake asikapsveruki, iyena anoreketa no rugondo. Zvese zvaanoreketa zvakanyasa kugadzirirhwa kuti acengedzere mudjahewo. Nge kubhuya kuti pa zuwa irona kamare ainga abva kuita zvibairo zve runyararo uye kudzadzisa mhiko yake, zvaipangidza hingana kuti ndi munatsi, zvecipangidza kuti anonamatawo. Zvibairo zve runyararo zvaipirhwa mu tempro mu Djerusarema zvaibatanidza cinyama, ufu, azeiti, uye vhinyu. (Revhitiko 19:5, 6; 22:21; Numero 15:8-10) Sezvo uya waiita mipiro waizotora dii rake uye no ro mhuri yake pa zvibairo zve runyararo, mwanakadzi uu unoreketa kuti kumba kake kainga kuno zvokurhya no zvokumwa zvakawanda. Zvaida mwanakadzi uu zvainga zvakanyasa kudjeka: Mudjahewo waizopfara maningi ikona. Iyena wabuda pa nyumba pake kuti anyanye kupsvaka mudjaha uu. Izvi zvaizotsukwarisa maningi—kudai munhu akatendera nyaya ii. Bhaibheri rimweni rinobhuya kuti: “Izvirokwazvo kuti mwanakadziwo wainga ecipsvaka munhu, asi iyena akauya koonyanya kupsvaka mudjaha uu ega basi here? Benzi basi—pamweni mudjaha uu—ndiye waizomutenda.”
Pane kuti adzirungamise no ciimo ce mapfekero ake, no masoko e kucengedzera uye no kupfawa ke muromo wake, mucengedzi wakaseenzesa zvinonuhwirira. Iyena wakati: “Ndawara macira akanaka pa kama yangu, macira e makori akawanda e ku Edjipitu. Ndapfapfaidzira mira, bhabhoza, no kanera pa kama yangu.” (Zvierengo 7:16, 17) Iyena wakagadzirira no ungwaru eciseenzesa macira e makori akawanda e ku Edjipitu uye akaapfapfaidzira no munuhwi unonuhwirira maningi we mira, bhabhoza, no kanera.
“Uya tigutswe no rudo dakara mangwana kaedza,” iyena unoenderera no masoko ake, “ngatidakadzwe nge kupasana rudo rinopisa.” Mupiko uu unodarika kurarira zviro zvinonaka zve anhu aiiri. Iyena wainga ecimupika kuti aite uhure. Ku mudjaha uu, mupiko uu unopangidza hingana kuti iyena waizowaraidzwa uye kupfara maningi! Kuti abambirire kumucengedzera, mwanakadziwo unotunhudzira eciti: “Ngokuti mwamuna wangu aaripi pa nyumba; iyena wakaita rhwendo re kuenda ku mbuto iri kure maningi. Iyena wakatora pasta yo mare, uye aazohwirire mwedzi usati waguma pakati.” (Zvierengo 7:18-20) Iyena wakamugondesa kuti painga pasikazooneki ngozi, ngokuti mwamuna wake wainga ari pa rhwendo ro bhizi rake uye waizotora nguwa yakareba asati ahwirira. Zvezvirokwazvo, iyena waiziya zvokuita kuti acengedzere mudjaha uu! “Iyena wakamupausa no masoko ake anogutsa. Iyena anomucengedza no masoko ake anotapira.” (Zvierengo 7:21) Zvaizodikana mwanarume hinga Zuzee kuti akunde ucengedzi wakaita hingana uu. (Genesi 39:9, 12) Mudjaha uu ndiye waizokwanisa kuzvikunda here?
w00 11/15 paji. 31 ndi. 2
“Cengeta Mitemo Yangu uye Rumbwa Wecirarama”
Mupiko uu waizoshupha kuti mudjahewo aurambe. Recitama kunyasa kurangarira zvakanaka, iyena wakaenda kaari ‘hinga n’ombe iri kuenda kouraiwa.’ Kuitawo hinga mwanarume asikakwanisi kupona pa kuphanicwa, mudjaha uu wakacengedzwa kuti aite citema. Iyena wakaziya ngozi yazvo mumasure me “kubaiwa no mupasha pa ciropa,” zvecida kureya kuti, dakara agara no cironda cingamuitisa kuti afe. Rufu iri raizogara ro pa nyama, nge ndaa ye kugara no nhenda inopaswana ngo kuita uhure. Cirondeco caizoitawo kuti afe pakunamata; “upenyu wake kamere wainga uri pangozi.” Upenyu wake wese wakabatwa-batwa, iyena waita citema cakakura kuna Mwari. Iyena wakaenda mugwandza ro rufu, eciita hingana shiri iri kuenda kooteiwa!
Upfumi Watinogumira mu Bhaibheri
w00 11/15 paji. 29 ndi. 1
“Senzesai Mitemo Yangu kuti Murarame”
Soromoni wakabhuya kuti: “Sungira [mitemo yangu] pa zvinwe zvako, uye zvitarire mu mwoyo mako.” (Zvierengo 7:3) Kuita hingana zvinwe zvatinogara tecizviona nguwa dzese uye zvinokosha kuti tiite zviro zvatinoda, zvatinofunda mu Bhaibheri, kana kuti uzii watinogumira mu Bhaibheri, zvinodikana kuseenza hinga zviedzuriro uye zvinodikana kutitungamirira pa zvese zvatinoita. Tinodikana kuzvisungira mu mwoyo medu, zveciita dii re mugariro wedu.
ABRIRI 7-13
UPFUMI UNOBVA MU SOKO RA MWARI ZVIERENGO 8
Izwai Uzii wa Djesu
cf paji. 131 ndi. 7
“Inini Ndinoda Baba”
7 Pa vhersikuro 22, ungwaru unobhuya kuti: “Djehovha akandisika kuti ndigare wekutanga mu gwanza rake, wekutanga mu mabasa ake e kare.” Apa zvinoita hingana kuti parikurekethwa ngezve ciro cinopinda ungwaru, ngekuti wara iri arizi kumbobvira “rakasikwa” kana kugara no maambo, ngokuti Djehovha akagara aripo uye agara ano ungwaru. (Pisarema 90:2) Mwana wa Mwari ndiye “wekutanga pa zvisikwa zvese.” Iyena wakaizwa kana kuti kusikwa; iyena ndiye wekare kare pa mabasa ese a Djehovha. (Akorosi 1:15) Djesu ainga aapo denga no nyika zvisati zvasikwa maererano no zvakatarhwa pana Zvierengo. Kuita hingana Soko kana kuti Muziisi we Masoko a Djehovha kamare, iyena wainga ari cipangidzo cakakwana co ungwaru wa Djehovha.—Juau 1:1.
cf mapaji. 131-132 mandi. 8-9
“Inini Ndinoda Baba”
8 Djesu Mwana wa Mwari akaitei pa nguwa yake yese asati auya pa nyika? Pa vhersikuro 30 panobhuya kuti iyena ainga ari pa dii ra Mwari “hingana Muzii we basa.” Izvona zvinoda kureyei? Akorosi 1:16 inoti: “Ngokuti peciseenzeswa iyena zviro zvese zvimweni zvakasikwa kudenga no pa nyika . . . Zviro zvese zvimweni zvakasikwa peciseenzeswa iyena uye zvakasikirhwa iyena.” Ngokudaro Djehovha Musiki, akaita kuti zviro zvese zvisikwe peciseenzeswa Mwana wake “Muzii we basa.”—zvisikwa zvo kudenga no nyika, zvisimwa uye zvinyama no cisikwa cinonyanya kukosha pa nyika: munhu. Nge mushobo uwona, tingaezanisa basa rinoizwa na Baba no Mwana hingana basa riya rinoizwa no uya unotara zviya zvinoda kuwakwa no uya ucada kuzviwaka. Muwaki ndi uya unoteerera zviya zvaizwa no uya watara zvinoda kuwakwa. Paya patinoshamiswa no zviro zvakasikwa zve zvirokwazvo tiri kukudza Musiki. (Pisarema 19:1) Asi tingaedzurirawo basa rinopfadza rakaizwa no Musiki pamwepo no “Muzii we basa” ke nguwa yakareba.
9 Kana anhu airi asikazi kukwana akaseenza pamwepo, pamweni paya angakwanisa kutama kupindirana. Izvona azvizi kuitika kuna Djehovha no Mwana wake. Mwana wakasenza na baba ake ke makore akawanda uye iyena wakati: “Nguwa dzese inini ndaigara ndecipfara pamberi pake.” (Zvierengo 8:30) Iyena waida maningi kugara na Baba ake uye Baba ake aipfara maningi kugara naye. Djesu akarumbwa ecitodzana na baba ake uye ecifundira kuteedzera mawara awo. Ngokudaro azvishamisi kuti rudo rawo rakanyasa kukura! Zvakasisira kubhuya kuti i rudo re kare-kare uye rakanyasa kubamba mu nyika yese.
w09 4/15 paji. 31 ndi. 14
Reremedzai Djesu—Dhavhidhi Mukuru uye Soromoni Mukuru
14 Zvinopangidza kuti mwanarume umwe basi ndiye wakagara no ugwaru kudarika wa Soromoni. Mwanarume iyena ndi Djesu Kristu, wakabhuya ngezvake hinga “mukuru kudarika Soromoni.” (Mat. 12:42) Djesu akabhuya “masoko e upenyu usikaperi.” (Juau 6:68) Ngo muezaniso, Mharidzo ye pa Dunhu yakatunhudzira zvierengo zvinganani zva Soromoni uye yakapanganidza zviro zvakawanda zvinounza mupfaro ku uya unonamata Djehovha. (Zvie. 3:13; 8:32, 33; 14:21; 16:20) Djesu akanyasa kubhuya kuti mupfaro we zvirokwazvo unouya nge kunamata Djehovha uye kudzadzika ke zvipikirhwa zvake. Iyena wati: “Anopfara aya anoziya kuti anoda kutungamirirhwa na Mwari, ngokuti Umambo we kudenga nge wawo.” (Mat. 5:3) Aya anoseenzesa zvokwadi zvisikacinji zvakafundiswa na Djesu anokweerhwa kuna Djehovha “manyuku e upenyu.” (Pis. 36:9; Zvie. 22:11; Mat. 5:8) Kristu ndiye “uzii wa Mwari.” (1 Ako. 1:24, 30) Hingana Mambo Mesiya iyena uno “mwiya we uzii.”—Isa. 11:2.
Upfumi Watinogumira mu Bhaibheri
g 5/14 paji. 16
‘Ungwaru uri Kudainza’—Imwimwi Muri Kukwanisa Kuuzwa Here?
▪ Bhaibheri i “bhuku rinonyanya kuerengwa kudarika mabhuku amweni ese” uye rakaturikirhwa kakawanda uye mu mireketero dzakawanda kudarika bhuku ripi haro maererano no The World Book Encyclopedia. Parizvino Bhaibheri riri kuoneka rese kana kuti dii rimwe mu mireketero inoda kuguma 2600 uye ringaerengwa mu mireketero inodarika 90% inorekethwa nge anhu.
▪ Ungwaru uri “kurumbwawo wecikhuwa” nge mushobo unonyasa kuoneka kamare. Pana Mateu 24:14, panoti: “Uye masoko aya akanaka e Umambo acaparidzwa mu nyika yese inogarhwa, kuti anhu ese aazwe uye zvadaro mugumo [we nyika ino] ucauya.”
ABRIRI 14-20
UPFUMI UNOBVA MU SOKO RA MWARI ZVIERENGO 9
Gara Munhu Wakangwara, Haiwa Munhu Unoramba Mazano
“Purutanai Masoko Ane Ungwaru”
4 Kubhuya zvazviri, zvinoshupha maningi kutendera mazano akananga. Kunyazi tecitendera kuti tiri anhu asikazi kukwana, zvinganetsa maningi kutendera mazano munhu paanobhuya ngo mushobo wakananga zviro zvatinodikana kucinja. (Erengai Muparidzi 7:9.) Isusu tingapedzesera taakupasa zvikonzero. Tingapedzesera tanyangadzirhwa munhuwo tecirangarira kuti iyena waita izvona ngekuti aatipfariri. Tingapedzesera taakurangarira kuti: ‘Iyena unombodziona hingana ani kuti andipase mazano? Iyena ndi munhuwo usikazi kukwana!’ Pakupedzesera, kana zanoro ratinonga tapaswa risiripi irona rataida kuzwa, tingapedzesera taramba zvinonga zvarekethwa uye tokumbira mazano ku anhu amweni. Kana kuti tingakumbira mazano ku anhu amweni dakara tagumira zviro zvatinoda kuzwa.
“Purutanai Masoko Ane Ungwaru”
12 Cinyi cingatibetsera kutenda mazano? Tinodikana kudzidodosa ngekuti kajinji kakhona tinoshaisha. Djobo wainga ano maonero akashata. Asi iyena wakacinja maonero ake e kurangarira uye Djehovha akamukomborera nge nda yazvo. Ngei? Ngekuti Djobo waidzidodosa. Iyena wakapangidza kuti waidzidodosa paakatendera mazano aakapaswa na Eriyu, kunyazi hazvo Eriyu wainga ari djaha kupinda Djobo. (Djobho 32:6, 7) Kudzidodosa kucatiitisa kuti titende mazano kunyazi tisikatenderani nawo, kunyazi patinopaswa ne munhu mudoko kupinda isusu. Mukuru we ku Canadá wakati: “Isusu atikwanisi kuona zvishaishi zvedu asi izvona zvinoonekwa nge anhu amweni, hino tingagadzirisa kudini pasina munhu unotipasa mazano?” Cokwadi ngecekuti tese tinodikana kugadzirisa zviro uye hingana Akristu tinodikana kuseenza ne simba kuti tigare ne cibereko ce mwiya mucena uye kugadzirisa maparidzire atinoita.—Erengai Pisarema 141:5.
13 Onai mazano hinga cipangidziro ce rudo ra Mwari. Djehovha anoda zvakatinakira nguwa dzese. (Zvie. 4:20-22) Iyena paanotipasa mazano eciseenzesa Soko rake, mabhuku anotsamira mu Bhaibheri uye ne hama, icona cipangidzo cekuti anotida. “Iyena anoita izvi kuti tibetsereke,” inodaro Ahebheru 12:9, 10.
14 Kandai ndangariro pa zano ramapaswa, haiwa mushobo wemapaswa. Nguwa dzimweni tingarangarira kuti zano irona, atizi kuripaswa nge mushobo wakanaka. Zviri pamhene kuti munhu anopa zano anodikana kupasa nge mushobo wakanaka. (Aga. 6:1) Asi zvakadini kana tiri isusu tiri kuapaswa mazano? Kana zvakadaro tinodikana kukanda nzero dzedu pa zano haiwa kurangarira kuti taidikana kuripaswa nge mushobo wakanaka. Ndiyo ndaa tinodikana kurangarira kuti: ‘Izvirokwazvo kuti andizi kupfarira mushobo wandapaswa zano iri. Asi pane zvandingafunda no zano iri here? Ndingasama kurangarira kusama kukwana ke munhuwo ndokanda ndangariro pa zviro zvaabhuya here?’ Kana tikagara anhu ano ungwaru tingakwanisa kufunda zvakanaka pa mazano atingapaswa.—Zvie. 15:31.
w01 5/15 paji. 30 mandi. 1-2
‘Tikagara no Ungwaru, Ticararama Mazuwa Akareba’
Munhu wakangwara unotambira mupango ngo mushobo wakasiyana no munhu usina ungwaru. Soromoni wakati: “Pasai mupango munhu wakangwara uye iyena unozomudai. Fundisai munhu ano ungwaru uye iyena ucatunhudzira kugara no ungwaru.” (Zvierengo 9:8b, 9a) Uya uno ungwaru unozviziya kuti “apana kupangirhwa kunopfadza pa nguwa iyona, asi kunorhwadza; kunyazi zvakadaro, kuno aya anoroedzwa ngo mupango, uwona unobara mucero we runyararo no unatsi.” (Ahebheru 12:11) Kunyazi zano recirhwadza panguwa iyona, ngei tingaramba nepoo kana tikariteerera tinonga tecipangidza kuti tino ungwaru?
Mambo Soromoni akabhuyazve kuti: “Fundisai munatsi uye iyena ucarumbwa ecitunhudzira uzii wake.” (Zvierengo 9:9b) Apana ano ungwaru kudarika umweni uye apana nguwa yakasisira kuti tifundire ciro. Zvinopfadza maningi kuona anhu akakura pa thunga ecitenda cokwadi uye ecidzipira kuna Djehovha! Isusu tinodikanawo kupeta masimba kuti tigare no cido cokufundira uye ndangariro dzedu dzirumbwe dzakangwarira.
w01 5/15 paji. 30 ndi. 5
‘Tikagara no Ungwaru, Ticararama Mazuwa Akareba’
Ubaba we kugara no ungwaru nge wedu tega ndiyo ndaa tinodikana kupeta masimba. Ecibhuya ngezvazvo Soromoni wakati: “Kana mukagara munhu uno ungwaro, ungwaru wenyu ucabetsera imwimwi pacenyu; asi kana mukagara munhu usina ungwaru kutama kenyu ungwaru kucakuwadza imwimwi pacenyu.” (Zvierengo 9:12) Uya uno ungwaru unobetsereka no ungwaru wake, asi zvinomugumisiro wakashata ku uya usina ungwaru. Isusu tinokorora zviya zvatinosima. Ngokudaro, “ngatinyase kupurutana ungwaru.”—Zvierengo 2:2.
Upfumi Watinogumira mu Bhaibheri
w06 9/15 paji. 17 ndi. 5
Mafundo Makuru Anobva mu Bhuku ra Zvierengo
9:17—“Mvura yokubiwa,” ndi cinyi uye ngei “inotapira”? Sezvoo Bhaibheri reciezanisira kuita zve pamaponde ku mwamuna no mukadzi hinga kumwa mvura yakatonhorera ye mucimbo, mvura yokubiwa inoimirira kuita zve pa maponde no munhu watisikazi kuwakana naye. (Zvierengo 5:15-17) Kuita izvona pacifise-fise kunoita kuti mvura yakadaro iite hingana kuti inotapira.
ABRIRI 21-27
UPFUMI UNOBVA MU SOKO RA MWARI ZVIERENGO 10
Tingagara Kudini no Upfumi we Zvirokwazvo?
w01 7/15 paji. 25 mandi. 1-3
‘Anatsi Anokomborerhwa’
Munatsi anokomborerhwazve nge mushobo umweni. “Nyara dzino nungo dzinoita kuti tigare arombo, asi nyara dzinoseenza no simba dzinounza upfumi. Mwana anoita zviro no ungwaru unokorora panguwa yokupisa, asi mwana unoita zviro zvinopsverudza unowata panguwa yokukorora.”—Zvierengo 10:4, 5.
Masoko aya a mambo Soromoni anokosha maningi ku aya anoita basa ro kukorora. Nguwa yo kukorora ainguwapi yokuwatisisa maningi. Iyona i nguwa yokuseenza no simba uye ke nguwa yakareba. Kubhuya zvazviri nguwa iyona inodikana kunyasa kukhorovherhwa.
Ecibhuya ngezve kukorora, haiwa kukorora ke zvirimwa, asi ke anhu, Djesu akati ku afundi ake: “Zvezvirokwazvo basa re kukorora i guru, asi aseenzi ashoma, ngokudaro, kumbirai Muridzi we munda kuti atumire aseenzi amweni kuti akorore munda wake.” (Mateu 9:35-38) Mu gore ra 2000, anhu anodarika 14 mirionji akapinda Cirangaridzo co rufu ra Djesu Kristu—anhu aya ainga akawanda kudarika Apupuri a Djehovha. Hino ndiani angaramba kuti ‘zvirimwa zvaibva kuti zvikororhwe’? (Juau 4:35) Anamati e cokwadi anokumbira aseenzi kuna Tenzi, pamwepo ecinyasa kubatikana pa basa ro kuita afundi, maererano no maitiro awo. (Mateu 28:19, 20) Djehovha ari ku komborera kupeta masimba kaanoita! Mu gore re basa ra 2000 anhu apsva anodarika 280 000 akabhabhatidzwa. Awona anopeta masimba kuti agara afundisi e Soko ra Mwari. Ngatipfare mu nguwa ino ye ku korora nge kupeta masimba pa basa iri ro kuita afundi.
w01 9/15 paji. 24 mandi. 3-4
Hambai mu ‘Gwanza ro Unatsi’
Soromoni wakabhuya ngezve kukosha ke unatsi. Iyena wakati: “Pfuma yo munhu mupfumi yakaita hingana thaundi rake rakatenderedzwa no muru. Arombo anotsakatiswa no urombo wawo. Basa re munhu munatsi rinoita kuti agare no upenyu; asi basa re munhu anoita zvakashata rinoita kuti aite citema.”—Zvierengo 10:15, 16.
Upfumi ungakwanisa kutidziirira pa zviro zvatisikakariri mu upenyu, hingana zvakaita thaundi rino muru rinodziirira aya anogara mariri. Uye urombo ungakwanisa kutsakatisa pakaitika zviro zvisikakarirhwi. (Muparidzi 7:12) Ngokudaro, zvingaita kuti Soromoni waida kubhuyawo ngezve ngozi inocokuita no urombo uye upfumi. Mupfumi ungakanda rugondo rake basi pa upfumi wake, ecirangarira kuti zviro zvake zvinokosha zvingagara “muru unodziirira.” (Zvierengo 18:11) Uye murombo ungagara no marangariro akasha ekuti urombo wake unoita kuti asagare no kariro ye ramangwana rakanaka. Ngokudaro, ese aya anosiya kuita zina rakanaka pamberi pa Mwari.
it-1 paji. 315
Makomborero
Djehovha Anokomborera Anhu. “Makomborero a Djehovha ndiwo anoita kuti munhu apfume—uye awona aauyi no marhwadzo.” (Zvie 10:22) Djehovha anokomborera aya anomuseenzera nge kuadziirira, kuita kuti abudirire, kuatungamirira, kuita kuti zviro zvawo zvibude zvakanaka uye kuapasa zvaanoda kuti ararame, no mugumisiro wakanakisisa kaari.
Upfumi Watinogumira mu Bhaibheri
w06 5/15 paji. 30 ndi. 18
Mupfaro we Kuhamba Takaperera
18 “Makomborero a Djehovha”—awona ndiwo anoita kuti anhu ake abudirire pakunamata. Uye tinorugondo rokuti “iyena anoita kuti asauye no marhwadzo.” (Zvierengo 10:22) Hino ngei aseenzi akawanda akagondeka a Mwari ecisongana no zvinetso zvinoita kuti atambudzike maningi? Isusu tinosongana no zvinetso uye kurhwadziwa nge zvikonzero zvitatu. (1) Takabarhwa no citema cinoita kuti tide kushaisha. (Genesi 6:5; 8:21; Tiyago 1:14, 15) (2) Sathani no madhimoni ake. (Aefeso 6:11, 12) (3) Nyika ino yakashata. (Juau 15:19) Kunyazi Djehovha ecitendera kuti zviro zvakashata zviitike katiri, iyena andiyepi anozviitisa. Zvezvirokwazvo, “cipo cese cakanaka uye cipo cese cakakwana cinobva kumusoro, kuna Baba e ciedza ce kudenga.” (Tiyago 1:17) Makomborero a Djehovha aaunzi marhwadzo.
ABRIRI 28–MAYO 4
UPFUMI UNOBVA MU SOKO RA MWARI ZVIERENGO 11
Zvamusikadikani Kureketa
w02 5/15 paji. 26 ndi. 4
Kuperera Kunotungamirira Anatsi
Kuperera ke anhu anoita zviro zvakanaka uye zviro zviya zvinoizwa no aya anoita zvakashata zvinobata-batawo amweni. Mambo Soromoni wakati: “No muromo uya akapauka pakunamata unokuwadza unweni wake, asi uzii unoponesa aya ano unatsi.” (Zvierengo 11:9) Aizvirokwazvopi kuti mapsveda, kureketesa maningi, zviro zvinopsverusa uye makani asina basa zvinokuwadza amweni here? Asi nge dii rimweni, munatsi unosanangura masoko akangwarira, ecireketa zviro zvakacena uye zvakanaka. Iyena unobetserhwa no uzii, ngokuti kuperera kake kunomupasa mushobo we kurangarira kuti apangidze ku aya anomupumha kuti ari kunyepa.
w02 5/15 paji. 27 mandi. 2-3
Kuperera Kunotungamirira Anatsi
Anhu anogara mu thaundi anoita zviro zvakanaka anoita kuti imona mugare no runyararo, upenyu wakanaka, uye anoreremedza amweni mu mutanha. Zveciita kuti thaundiro rikudzwe—irona rinobudirira. Aya anobhuya mapsveda, zviro zvinokuwadza uye zvakashata anoita kuti pasagare no runyararo, mupfaro, rubatano uye matambudziko. Izvona zvinoitika maka-maka kana anhu akadaro ano ubaba kana kuti kacigaro muthaundi imona. Thaundi rakadaro rinonga risina kurongeka, rino udyekeri uye rino tsika dzakashata kana upfumi wakaterera.
Cokwadi cisikacinji ciri pana Zvierengo 11:11 cinoseenzeswa nge mushobo umwe umwewo ku aseenzi a Djehovha, paya paanonga eciungana mu ungano kuitawo hingana thaundi. Ungano ino anhu akakura pakunamata—anhu e unatsi, anotungamirirhwa nge kuperera kawo—i cikwata ce anhu anopfara, anonyasa kuseenza uye anodzipira, ecipasa rukudzo kuna Mwari. Djehovha anokomborera ungano iyona uye inobudirira pakunamata. Nguwa dzimweni anganani pamweni aapfari ndizvona, awona anophikisa uye aatenderani no mushobo uri kuitika zviro mu ungano. Awona akaita hingana “nzinde ino vheneno” yokuti hingabararika ku amweni. (Ahebheru 12:15) Awona kakawanda kakhona anoda maningi kugara no masimba uye kudzionesa. Anobararisa kuti mu ungano muno zviro zvisina unatsi uye muno rusananguro, zviro zvakandodaro ku akuru. Murumo wawo unoita kuti ungano isabatane. Tinodikana kufunga nzee paanonga ecireketa uye topeta masimba kuti tigare anhu akakura pakunamata, anoita kuti ungano igare no runyararo uye rubatano.
w02 5/15 paji. 27 ndi. 5
Kuperera Kunotungamirira Anatsi
Munhu usikazwisisi kana kuti “usina ungwaru” unokuwadza maningi adoni ake! Anorumbwa ecireketa zviro asikazi kurangarira dakara aguma pakuita mapsveda. Akuru akagadzwa anodika kukasika kupedza tsika ii yakashata. Kusiyana no “munhu asina ungwaru,” munhu anozwisisa anoziya paanodika kunyarara. Pane kubhuya zvakaigika, iyena anozvifukidza. Eciziya kuti rurimi risikadzibati rinokwanisa ku kuwadza, munhu anozwisisa “ano mwoyo wakagondeka.” Iyena wakagondeka ku aya aanonamata nawo uye aabudisi zviro zvakaigika zvinokwanisa kuakanda pangozi. Anhu akagondeka kudaro makomborero akakura mu ungano!
Upfumi Watinogumira mu Bhaibheri
g20.1 paji. 11, bhokisi
Tingaita Kudini kuti Tipedze Strese
“UNAKI UNOPEDZA STRESE”
“Munhu ano unaki anoita zviro zvinomubetsera asi munhu asina unaki anodziunzira dambudziko.”—ZVIERENGO 11:17.
“Unaki Unopedza Strese.” Uu ndi umwe we musoro we bhuku rinozwi Vencendo o Estresse. Maererano no zvakabhuiwa no mutari unozwi, Dr. Tim Cantopher, iyena wakati: Kubata amweni no unaki kunobetsera kuti tigare no uthongo wakanaka uye kunoita kuti tipfare. Nge dii rimweni munhu unobata amweni no shungu kana kuti utsinye unogara asina mupfaro ngokuti apana munhu unoda kugara padhuze naye.
Imwimwi mungapedzawo strese nge kugara no unaki na imwimwi kamare. Ngo muezaniso, azvizi kunaka kugara mecirangarira kuti maidikana kuita zvakawanda kudarika zviya zvamunokwanisa kuita kana kuti kurangarira kuti amukoshi. Djesu akati: “Ida mudoni wako hinga mushobo waunodziita.”—Marko 12:31.