1921 Makore Zana Akadarika

“IBASA ripi rinokosha raticaona gore rino?” Uu ndiwo mubvunzo wakaizva no Torre de Vigia (nyamasi uno waakuzwi Murindiri) wa 1 ya Mavhiza ya 1921, ku Afundi e Bhaibheri aipeta masimba. Hinga mhinduro, revhista iyona yakareketa masoko akabhuiwa pana Isaya 61:1, 2, yakaaedzurira nge zve basa rawo re kuparidzira yeciti: “Tenzi akandidzodza, kuti ndiziise masoko ku anatsi . . . kuti ndiparidze gore rokupfarirhwa na Djehovha uye zuwa re kutsiya ka Mwari wedu.”

APARIDZI ANO USHINGI

Kuti akwanise kuita basa rawo, Afundi e Bhaibheri, aidikana kugara anhu ano ushingi. Awona aidikana kuparidzira haiwa basi “masoko akanaka” ku apfawi, asi aidikanawo kuparidzira “zuwa re kutsiya” anhu anoita zviro zvakashata.

Hama John Henry Hoskin, aigara ku Canadá, akaparidzira no ushingi kunyazi no kuphikiswa. Mu gore ra 1921, iyena wakasongana no muparidzi we ciMetodista. Hama Hoskin akatangisa makani awo eciti: “Tinodikana kucedza ne ushamwari nge zve Bhaibheri, kunyazi kana tikagara no maonero akasiyana nge zve fundo dzimweni dze Bhaibheri, izwai makasudzunuka kupasa maonero anyu uye inini ndicapasawo maonero angu, asi tecizviita no ushamwari.” Asi andizvopi zvakazoitika. Hama Hoskin akapanganidza eciti: “Isusu tainga takambocedza ke miseswa minganani basi, apo muparidzi we ciMetodistewo paakaponda musuwo no simba, zvekutoti ndaitorangarira kuti vidhru yainga iri pamusuwopo yaizophwanyika.”

Muparidzi we ciMetodhistewo wakakhuwa eciti: “Ngei iwewe auendi kumahedheni kuti ucedze nawo?” Hama Hoskin aazi kudaira ciro, asi paainga ecienda, iyena wakatanga kurangarira eciti: ‘Inini ndaitorangarira kuti ndaitocedza no umwe muhedheni!’

Mangwana akhona muparidzi we ciMetodistewo paakaita mharidzo yake, iyena akarumbwa eciambira hameyo. Hama Hoskin akaedzurira: “Iyena akaziisa anhu aipinda mugereja make nge zvangu, akaabvunza kuti inini ndainga ndiri tsotsi rakakura maningi rainga rapinda muthaundiro, uye ndainga ndakasisira kufurhwa no pfuti.” Asi izvona azvizi kuitisa kuti hama yedu iime, iyona yakarumbwa yeciparidzira uye pakaoneka migumisiro yakanaka. Iyona inoti: “Yainga iri nguwa yakanaka yekuparidzira yakaitika mu upenyu wangu. Anhu amweni akatoreketa eciti: ‘Inini ndinozviziya kuti imwimwi muri munhu wa Mwari!’ uye akadzipira kuti andipase zviro zvandaida.”

FUNDO YE MUNHU EGA UYE YE MHURI

Kuti akwanise kubetsera aya ano mwoyo unoda kuti abudirire, afundi e Bhaibheri akabudisa revhista yaizwi, The Golden Agea (mu ciPutukezi rinozwi, A Idade de Ouro) yainga ino urongwa we kufunda Bhaibheri. Umwe we urongwa wakhona waizwi: Estudo Bíblico Juvenil. Mundandanda we musoro uyu, wainga uno mibvunzo dzekuti abereki aidikana kufunda no ana awo. “Abereki aidikana kuita mibvunzo idzona ku ana awo, uye kuwabetsera kuti agumire mhinduro mu Bhaibheri.” Mibvunzo minganani yakhona, ndi ii: “Bhaibheri rino mabhuku mangana?” Mubvunzo uu waifundisa fundo dzinodikanwa. Umwenizve waiti: “MuKristu wese we zvirokwazvo unodikana kuetsera mushobo wese wekuteererhwa here?” Waigadzirira madjaha kuti agare aparidzi ano ushingi.

Urongwa umweni waidainzwa Estudos Avançados no Plano Divino das Eras. Urongwa iwona wakaizirhwa fundo dze Bhaibheri dzainga dzaano ruziyo rakakura. Uye urongwa iwona wainga uno mibvunzo dzaiita kuti munhu agare no cido ce kufunda dzaitorerhwa mu bhuku rekutanga raizwi Estudos das Escrituras. Mamirionji e aerengi aifunda zviro zvakawanda pa urongwa iwona. Ndiyo ndaa, revhista yaizwi A Idade de Ouro yakabudiswa mu 21 ya Mbudzi ya 1921, yakaziisa kuti urongwa uwiri uu wainga usikacabudisizwe. Ngazvipi zvakaitisa kuti paoneke cinjo ii isikakarirhwi?

BHUKU RIPSVA!

Bhuku raizwi *A Harpa de Deus*

Kartau yaipangidza ma pajiama aidikana kuerengwa

Kartau dze mibvunzo

Hama dzaitungamirira basa pa nguwa iyona, dzakaona kuti mushobo wakanaka we kufundisa munhu Bhaibheri, wainga wekufundisa fundo imwe na imwe. Ndiyo ndaa, mu mwedzi wa Gumiguru we gore ra 1921, pakabudiswa bhuku ripsva raizwi A Harpa de Deus. Munhu anopfarira paaitambira bhuku irona, iyena waitarirhwa pa kursu inozwi, Curso de Estudo Bíblico da Harpa. Mu kursu iyona munhuwo waifunda ega, uye aifunda nge zve “urongwa wa Mwari we kukomborera anhu no upenhu usikaperi.” Kursu iyona yaiizwa kudini?

Munhu paaitendera kutambira bhuku irona, waitambirawo kartau doko, kartauyo yaipangidza mapajina ebhukuro ekuti munhuwo waidikana kuerenga pa sumana iyona. Pa sumana inoteera, munhuwo waitambira kartau imweni yainga ino mibvunzo yakawanda yaitsamira pa mapajina aaidikana kuerenga. Pakupedzesera, kartauyo yaipangidza mapajina aidikana kuerengwa no munhuwo pa sumana inoteera.

Pa sumana imwe na imwe dakara masumana 12, munhuwo waitambira kartau, yaitumidzwa no classe parizvino yaakuzwi ungano, peciseenzeswa koreyo. Kajinji kakhona makartau iwona aitumidzwa no aya ainga akura kana kuti aya ainga asikakwanisi kuparidzira pa nyumba no nyumba. Ngo muezaniso, Anna K. Gardner, we ku Millvale, Pennsylvania, Estados Unidos, wakareketa eciti: “Hama yangu Thayle yainga yakaremara, asi paakatambira bhuku rainga rabudiswa raizwi, A Harpa de Deus, iyena wakatanga kubatikana mu basa re kuparidzira, wakatanga kutumira makartau ano mibvunzo ma sumana ese.” Mufundi we Bhaibheri paaipedza kursu iyona, munhu we mu ungano waimuvhakacira kuti amubetsere kuti afunde zvimweni zvakawanda nge zve Bhaibheri.

Thayle Gardner akagara pa kadera yake ye marodha

BASA RIRI MBERI

Mu kupera ke gore, Hama Joseph Franklin Rutherford, akatumira matsamba ku ma classe ese. Tsambeyo yaiti: “Kuparidzira kakaizwa nge zve Umambo gore rino, kainga kakakura maningi uye kakabudirira maningi kudarika kuparidzira kakaizwa mu gore ripi haro mu nguwa yekukorora.” Ecirangarira nge zve nguwa ye mberi, Hama Rutherford akatunhudzira eciti: “Ticino basa rakawanda maningi kuti riizwe. Kohomedzesai amweni kuti apindewo mu basa iri rakakomborerhwa.” Zvezvirokwazvo, Afundi e Bhaibheri akanyasa kutondoedza zano irona. Uye mu gore ra 1922, awona akaziisa no ushingi nge zve Umambo nge mushobo unoshamisa.

Shamwari Dzino Ushingi

Afundi e Bhaibheri akapangidzirana rudo kuna umwe na umwe. Ainga ari ‘shamwari dzisikatyi dzakabarirwha kubetsera pakunonga kuno kutambudzika’ hinga na zvinopangidzwa mu shwiro inoteera.”—Zvie. 17:17.

Mucipiri, 31 ya Mauwe muna 1921, rakazodainzwa agogomi we Tulsa Race Massacre yakaputika mu Tulsa, Oklahoma, Estados Unidos, mumasure mekuti mwanarume umweni wecibhoyi wakonyerwha mukaraboso nge ndaa ye kuponda mwanakadzi umweni muzungu. Anhu anokwana kuita 1000 akarhwisana no cikwata cidoko ce anarume emabhoyi. Kurwisana kukabarararika nokukasika mu bairro remabhoyi re Greenwood, asi nyumba dzinokwana kuita 1400 dzakaphambwa uye dzakapiswa. Anhu anokwana kuita 36 akafa, asi numero yakaguma ku mazana awo.

Hama Richard J. Hill, mufundi umweni we Bhaibheri wecibhoyi anogara ku Greenwood, wakati no zvakaitika: “Pa usiku wekureketedzana uku takaita fundo yedu ye Bhaibheri hingana mazuwa yese. Pasure pekuti tapedza kufunda, takazwa kurira ke pfuti pakati pe thaundi, takaenda koowata teindozvizwa.” Macibesi ecitatu mu mwedzi wa Junho, zviro zvainga zvashupha. “Anhu amweni akauya akabhuya kuti, dai tikada kudziirirhwa zvirinane kuti tiende ku nyumba ka hama Hill.” Hino hama Hill no mukadzi no ana awo ashanu akatizira ku nyumba ya hama Hill. Ikona, anakadzi no anarume emabhoyi anokwana 3000 akacengetwa no magwardha, akadainzwa kuti agadzirise runyararo.

Pa nguwa imwewo, Hama Arthur Claus, uwo wainga ari muzungu, wakaita cisananguro ne ushingi. “Pandakazwa kuti zvikwata zve apanduki pezvaigogoma ku muceto ke Greenwood, zvecipamba ne kupisa nyumba, ndakarangarira shamwari yangu inodiwa, hama Hill.”

Arthur Claus ecifundisa classe ino ana anokwana kuita 14, eciseenzesa bhuku raizwi A Harpa de Deus

“Kudai ndakamudaira zvisirizvopi iyena kudai akandifura no pfuti,” unoedzurira kudaro Arthur. “Ndakamugondesa kuti ndainga ndiri shamwari ya Hama Hill uye ndaimbouya kumba kake kakawanda.” Arthur no anyacigarisano ake akadziirira nge mwazvo nyumba kuti isabiwe.

Nokukasika, Arthur wakaziya kuti Hama Hill no mhuri yawo yainga iri ku nyumba ye magungano. Arthur wakabvuzwa kuti mabhoyi ainga asikadikani kubudepo pasina phepha rinowatendera rakatarhwa na General Barrett, ofisiari unoonerera. Arthur unopanganidza kuti: “Rainga riri basa kuonana no mukuru we anya hondo. Pandakamubvunza urongwa wangu, iyena wakandibvunzisa kuti: ‘Iwewe ucazocengeta mhuri iyi nokuwariritira here?’ Ndakatendera no mwoyo wese.”

No phepha mu nyara raitendera kuti abude, Arthur wakagogoma ecienda ku nyumba dze magungano. iyena wakapangidza phephero kuna ofisiari iyena wakagomba eciti: “Phepha iri rakasinarwhi na General! Iwewe unoziya kuti ndiwe wekutanga kutora munhu kubva ku mbuto ino zuwa rese here?” Pa nguweyo, hama Hill ne mhuri yawo akaeneka. Awona ese akapakira mukaru ya Arthur uye woenda kumba.

Ne phepha raititendera, Arthur wakagogoma oenda ku Centro de Convenções. Paakapangidza murindiri, iyena wakati: “Ona basi, iwewe watenderhwa ndi general!” Mumasuremo murindiri wakazoonana na hama Hill ne mhuri yawo. Ese akapfanhana mu karu uye akaenda kumba.

Hama Claus akaita kuti Hama Hili no mhuri yawo agare akadziirirhwa. Muezaniso we Hama dzisikatyi wakabetsera zvakanaka amweni. Arthur wakapanganidza eciti: “Nyacigarisano wakaabetsera kucengetedza Hill wakazopfarira cokwadi. Anhu akawanda akapfarira masoko e Umambo nge kuti akaona kubatana hinga hama dzisina musananguro, ese ari amwewo hinga hama dzakadzipira kuna Mwari.”

a Mu gore ra 1937 The Golden Age rakazozwi Consolation (mu ciPutukezi rinozwi, Consolação rakazobudawo muna 1938) uye mu gore ra 1946 rakazocinjwa kuti rigare Awake! (mu ciPutukezi rinozwi, Despertai! rakazobudawo muna 1947.)