Abereki—Betserai Ana Enyu kuti Ade Djehovha

1-2. Ngei tingakwanisa kutanga kugara no maonero akasiyana nge zve mazano amweni e mu Bhaibheri?

PA ZUWA re mucato, aya anonga eciwakana anonyasa kupurutana mharidzo ye mucato. Mazano anonga ecipanganidzwa pa mharidzo iyona, anonga asiripi mapsva kaari. Asi kubvira zuwa irona, mazano aya anonga aakureya zviro zvipsva kaari. Ngei? Ngekuti kubvira zuwa irona awona anonga aakuda kuseenzesa mazano aya hingana kazado.

² Izvi ndizvona zvinoitikawo ku kazado ye ciKristu painogara no mwana. Zvingakwanisa kuita kuti awona akambozwa mharidzo dzakawanda dzinoreketa nge zve kurera ana. Asi parizvino, mazano awona anonga ecireya zvimweni kaari. Uye uwona ndi ubaba wakakura maningi! Zvezvirokwazvo, cinjo dzinoitika mu upenyu wedu dzingakwanisa kuita kuti tione mazano e mu Bhaibheri nge maonero amweni. Ndiyo ndaa, zvinokosha maningi kuti tese hedu tiite zviya zvakarekethwa na Djehovha ku madzimambo e Aisraeri. Tinodikana kuerenga Bhaibheri uye tonyasa kurirangarira “mazuwa ese” e upenyu wedu.—Dhe. 17:19.

3. Ticaonei mu fundo ino?

³ Abereki, imwimwi muno cikomborero cakakura maningi cingakwanisa kugara no mu Kristu cekufundisa ana enyu nge zva Djehovha. Asi imwimwi munodikana kuita zvakawanda pano basi kureketa no mwana wenyu nge zva Djehovha. Imwimwi munodikana kubetsera ana enyu kuti ade Djehovha no mwoyo wese. Asi mungazviita kudini? Mu fundo ino, ticaona mazano marongomuna e mu Bhaibheri angakwanisa kumubetserai hinga abereki. (2 Tim 3:16) Uye ticaonawo kuti abereki amweni akabetsereka kudini no mazano awona e mu Bhaibheri.

MAZANO MARONGOMUNA ANGAKWANISA KUBETSERA ABEREKI

4. I zano ripi ringaseenzeswa no abereki kuti abetsere ana awo kuti ade Djehovha no mwoyo wese? (Tiyago 1:5)

⁴ Zano 1: Psvakai nhungamiriro dza Djehovha. Kumbirai Djehovha ruziyo ringamubetsera kuti mukwanise kubetsera mwana wenyu kuti amude. (Erengai Tiyago 1:5.) Apana munhu ungakwanisa kunyasa kumubetserai kupinda Djehovha, nge ndaa ye zvikonzero zvakawanda. Onai zviiri zvakhona. Cekutanga, Djehovha ndiyena ano maeshiperiensiya akawanda kupinda abereki ese. (Pis. 36:9) Uye cecipiri, kuseenzesa mazano a Djehovha kakatinakira nguwa dzese.—Isa. 48:17.

5. (a) Rubetso ripi rinopaswa abereki nge sangano ra Djehovha? (b) Maererano no vhidhiyo, mafundei kubva pakurera kakaita kazado Amorim ana awo?

⁵ Eciseenzesa sangano rake uye Bhaibheri, Djehovha anopasa abereki mazano akanaka maningi aangaseenzesa pakubetsera ana awo kuti ade Djehovha. (Mat. 24:45) Ngo muezaniso, abereki angakwanisa kugumira mazano akanaka maningi angaabetsera pakurera ana awo pa fundo ye mu saite ino musoro unoti “Mazano Ekubatsira Mhuri,” zvekuti kare yaibudiswa mu Mukai!, asi parizvino yaakuoneka mu saiti yedu. Uye mavhidhiyo akawanda atinogumira mu saiti yedu jw.org ano mazano a Djehovha angakwanisa kubetsera abereki pakurera ana awo.b—Zvie. 2:4-6.

6. Joe no mukadzi wake anosoozwa kudini no nhungamiriro dzaanotambira dzecibva ku sangano ra Djehovha?

⁶ Abereki akawanda anokoshesa maningi rubetso raanopaswa na Djehovha eciseenzesa sangano rake. Mubereki umweni unozwi Joe unoti: “Kurera ana atatu mu cokwadi zvezvirokwazvo azviripi nyore. Nguwa dzese, inini no mukadzi wangu tinonamata kuna Djehovha tecikumbira rubetso. Kakawanda kakhona, tinosoona kuti paya patinosongana no zvitsinzwa kana kuti zvinetso zvekurera ana edu, panosobuda vhidhiyo kana kuti fundo ye mu saiti inoreketa izvona kamare. Zvezvirokwazvo, pasina nhungamiriro dza Djehovha zvaizotishuphira kurera ana edu.” Joe no mukadzi wake anoona kuti mavhidhiyo uye mafundo aya ari mu saiti anosobetsera maningi ana awo kuti akhwedere kuna Djehovha.

7. Ngei abereki ecidikana kupeta masimba ari ese kuti apase muezaniso wakanaka ku ana awo? (Aroma 2:21)

⁷ Zano 2: Garai muezaniso wakanaka ku ana enyu. Ana anoona maningi zvinoizwa no abereki uye anoteedzera izvona. Zviri pamhene kuti apana mubereki wakakwana. (Aro. 3:23) Kunyazi zvakadaro, abereki anodikana kupeta masimba ari ese kuti apase muezaniso wakanaka ku ana awo. (Erengai Aroma 2:21.) Onai zvakarekethwa no mubereki umweni nge zve ana, iyena unoti: “Awona akaita hingana esponja inokweya zviro zvese. Kana awona eciona kuti isusu atiripi kuita zviya zvatinonga tecireketa, anototibvunza.” Kana isusu tecida kuti ana edu ade Djehovha, rudo redu kaari rinodikana kugara rakanyasa kubamba uye recinyasa kuoneka.

8-9. Mafundei no masoko akarekethwa na Andrew uye na Emma?

⁸ Abereki anokwanisa kufundisa ana awo kuti ade Djehovha nge mishobo yakasiyana-siyana. Onai zvakarekethwa no hama imweni inozwi Andrew ino makore 17, iyena unoti: “Abereki angu akandifundisa kuti ngei zvecikosha kuita munamato. Baba angu aiita munamato na inini tisati tawata kunyazi ndaita kare munamato. Nguwa dzese, baba edu aitibvunza kuti: ‘Mungacedza na Djehovha pese pamunonga mecida kuzviita.’ Ndiyo ndaa, munamato wakagara ciro cinokosha maningi mu upenyu wangu uye nyamasi uno zviri nyore maningi kandiri kuita munamato nguwa dzese uye ndinoona Djehovha hingana Baba kamare kandiri.” Abereki, edzurirai kuti rudo renyu kuna Djehovha ringakwanisa kubetsera maningi ana enyu.

⁹ Onaizve muezaniso we hanzvadzi imweni inozwi Emma. Baba ake paakatiza pa nyumba, akasiya magaa akawanda maningi kuti mai akhona aripe. Emma unoti: “Mai angu aidikana kuseenza no simba kuti akwanise kuripa magaa ese uye kuti ariritire mhuri, asi awona aireketa kuti Djehovha anopasa aseenzi ake zvese zvaanoda. Ndaikwanisa kuona muezaniso wawo kuti zvezvirokwazvo awona aitenda izvona. Awona aiita zvese zvaaitifundisa.” Tingafundei? Izvona zvinopangidza kuti abereki angakwanisa kupasa muezaniso wakanaka ku ana awo kunyazi pa mugariro we zviro unoshupha.—Aga. 6:9.

10. Mu nguwa ye Aisraeri e kare, abereki ainga ano mikana ipi kuti acedze no ana awo? (Dheuteronomiyo 6:6, 7)

¹⁰ Zano 3: Reketai no ana enyu nguwa dzese. Djehovha akabvunza dzinza re Aisraeri kare kuti awona aidikana kureketa no ana awo nge zvake nguwa dzese. (Erengai Dheuteronomiyo 6:6, 7.) Abereki e pa nguwa iyona, ainga ano mikana yakawanda maningi pa zuwa kuti abetsere ana awo kuti aziye uye ade Djehovha no mwoyo wese. Ngo muezaniso, mwana we cidjaha waipedza nguwa yakawanda maningi na baba ake mu munda ecirima ese uye ecikorora. Uye mwana we musikana waipedza nguwa yakawanda na mai ake eciita mabasa e pa nyumba. Hino, pa nguwa yese ii yekuti abereki aipedza no ana awo, aikwanisa kuafundisa zviro zvinokosha. Ngo muezaniso, awona aikwanisa kureketa nge zve mawara a Djehovha uye kuti ayena ari kubetsera kudini mhuri yawo.

11. Abereki anokhorovhera mukana upi kuti acedze no ana awo?

¹¹ Zviri pamhene kuti nyamasi uno, zviro zvacinja. Mu mbuto dzakawanda abereki aaoni mukana wekupedza nguwa yakawanda no ana awo pa zuwa. Abereki amweni anoseenza kure uye ana anopedza nguwa yakawanda ari kucikora. Ndiyo ndaa, abereki anodikana kupeta masimba ari ese kuti aone nguwa yekucedza no ana awo. (Aef. 5:15, 16; Afi. 1:10) Uye nguwa yakanaka yekuita izvona, i zuwa rekunamata ke mhuri. Djaha rimweni rinozwi Alexander rinoti: “Baba angu anoitisa kunamata ke mhuri nguwa dzese uye aasii kuti ciro cipi haco ciapingaidze. Uye mu masure mekunamata ke mhuri, tinokhorovhera nguwa iyona kuti ticedze.”

12. Musoro we mhuri unodikana kuedzurira mazano api paanonga eciitisa kunamata ke mhuri?

¹² Kana imwimwi muri musoro we mhuri, ngazvipi zvamungaita kuti kunamata kenyu ke mhuri kupfadze ana enyu? Zvakadini kufunda no ana enyu bhuku ripsva rinozwi Pfadzwai ne Upenyu Nokusikaperi! Bhuku irona ringabetsera maningi kuti mucedzesane nge mushobo wakanaka no ana enyu. Edzurirai kuti imwimwi munoda kukhorovhera mukana uwona kuitira kuti ana enyu azwe akasudzunuka uye arekete zviya zvirikuanetsa. Ndiyo ndaa, musakhorovhere mukana wekunamata ke mhuri kuti muareketere uye muabvunze zviro zvaakashaisha. Uye garai no mwoyo unononoka kutsamwa paanoreketa mazwiro awo asikapindirani no Bhaibheri. Pane kudaro, imwimwi munodikana kupfara nge kugondeka kawo pakureketa mazwiro awo kamuri. Itai kuti awona azwe akasudzunuka kuti arekete mazwiro awo. Zvezvirokwazvo, mungakwanisa kunyasa kubetsera ana enyu kana meciziya zviya zvaari kurangarira.

13. Abereki anodikana kuetsera basi nguwa yekufunda no ana awo kuti aafundise nge zva Djehovha? Panganidzai.

¹³ Abereki, khorovherai mikana yese inobuda pa zuwa rimwe na rimwe kuti mufundise ana enyu nge zva Djehovha. Amudikani kuetsera nguwa yekufunda basi kuti murekete no ana enyu nge zva Djehovha. Onai zvakarekethwa na mai amweni anozwi Lisa, iyena unoti: “Isusu tinokhorovhera zvese zvatinoona kuti tifundise ana edu nge zva Djehovha. Ngo muezaniso, imbwa yedu painoita zviro zvinosekesa isusu tinokhorovhera mukana uwona kuti tifundise ana edu kuti Djehovha ndi munhu anopfara uye anoda upenyu hingana isusu.”

14. Ngei abereki ecidikana kubetsera ana awo kuti agare no shamwari dzakanaka? (Zvierengo 13:20)

¹⁴ Zano 4: Betserai ana enyu kuti agare no shamwari dzakanaka. Soko ra Mwari rinonyasa kubudisa pamhene kuti shamwari dzingakwanisa kutipfuridzira—pakuita zviro zvakanaka kana kuti zvakashata. (Erengai Zvierengo 13:20.) Abereki, munoziya here shamwari dze ana enyu? Makambopedza nguwa no shamwari dze ana enyu here? Mungabetsera kudini ana enyu kuti agare no shamwari dzinoda Djehovha? (1Ako. 15:33) Mungakwanisa kubetsera ana enyu nge kupika hama dzakabamba pane zvekunamata kuti dziuye kuzopedza nguwa no ana enyu.—Pis. 119:63.

15. Abereki angabetsera kudini ana awo kuti agare no shamwari dzakanaka?

¹⁵ Onai muezaniso wa baba amweni anozwi Tony. Awona anoreketa zviro zvakaabetsera pamwepo no mukadzi wawo pa kubetsera ana awo kuti agare no shamwari dzakanaka, awona anoti: “Inini pamwepo no mukadzi wangu, tainga tino musambo we kupika hama no hanzwadzi dze mathunga akasiyana-siyana kuti dziuye kopedza nguwa na isusu. Nguwa dzimweni tairhya pamwepo uye pedzepo toita kunamata ke mhuri. Wainga uri mushobo wakanaka maningi kuziyana no hama idzi dzinoda Djehovha uye dzinomuseenzera no mupfaro. Takagara no makomborero e kutambira aonererei e nharaunda, mamisiyonariyo uye no amweniwo pa nyumba pedu. Ana edu akafundira maningi no maeshiperiyensiya, kuseenza no simba uye miezaniso ye hama idzi. Izvona zvakabetsera maningi ana edu kuti anyase kugara shamwari dza Djehovha.” Abereki, garai makashinga pa kubetsera ana enyu kuti agare no shamwari dzakanaka.

MUSARUZE KARIRO!

16. Abereki anodikana kurangarirei kana mwana wawo akasanangura kusiya Djehovha?

¹⁶ Asi zvakadini nokupeta masimba kamunonga maita, umwe we mwana wenyu otama kusanangura kuseenzera Djehovha? Kana izvona zvikaitika, imwimwi amudikani kurangarira kuti pano ciro camakaposha hinga mubereki. Djehovha akapasa umwe na umwe wedu cipo ce kusanangura—kana kuti mwana wenyu anacoo cipo icona cekusanangura—kuti acaseenzera Djehovha here kana kuti haiwa. Hino kana mwana wenyu akasanangura kusiya Djehovha, rumbwai mune kariro yekuti ucazohwirira. Edzurirai muezaniso we mwana unohwirira kumba. (Ruka 15:11-19, 22-24) Mwana unorekethwa pa mufanikiso iwona, wakaita zviro zvakashata zvakawanda maningi. Asi pakupedzesera wakazohwirira kuna baba ake. Pamweni amweni angadzibvunzisa kuti, “Uu utori muezanisoo hawo, zvingakwanisa kuitika mu upenyu we munhu here?” Zvezvirokwazvo zvingaitika! Onai muezaniso we djaha rimweni rinozwi Elie.

17. Eshiperiyensiya ya Elie inomubambisai kudini?

¹⁷ Ecireketa nge zve abereki ake, Elie wakati: “Awona akaita zvese zvaaikwanisa kuti andibetsere kuda Djehovha uye no Soko rake Bhaibheri. Asi pandainga ndaa djaha, ndakatanga kupanduka.” Elie wakatanga kugara no upenyu uwiri, uye abereki ake paainga ecida kumubetsera iyena aazi kupurutana. Iyena wakabuda pa nyumba uye wakatanga kuita zviro zvakashata. Kunyazi zvakadaro, iyena wairumbwa ecicedza no shamwari yake nge zve Bhaibheri. Iyena unoti: “Pandairumbwa ndecicedza no shamwari dzangu nge zva Djehovha, ndairumbwa ndecimurangarira. Hino padoko no padoko, mbeu dziya dzainga dzasimwa no abereki angu—dzakatanga kukurazwe.” No kuhamba ke nguwa, iyena wakahwirira mu cokwadi.c Zvezvirokwazvo, abereki ake akapfara maningi nge kumufundisa kuti ade Djehovha kubvira aciri mwana mudoko!—2 Tim 3:14, 15.

18. Munozwa kudini nge kuona miezaniso ye abereki anopeta masimba pakufundisa ana awo kuti ade Djehovha?

¹⁸ Abereki, imwimwi muno makomborero akakura maningi e kurera mubarirhwana mupsva we anamati a Djehovha. (Pis. 78:4-6) Iri ibasa rakakura, asi tinomusimbai maningi nge kupeta masimba kamuri kuita kuti mubetsere ana enyu! Asi kana mukarumbwa mecipeta masimba pa kubetsera ana enyu kuti ade Djehovha uye arumbwe ecimuzwira, garai no rugondo rekuti Baba edu e kudenga acapfara maningi.—Aef. 6:4.