MUSORO WE KUFUNDA 22
Mazano Ane Ungwaru Anocengetedza Upenyu
“Djehovha pacake anopasa ruziyo.”—ZVIE. 2:6.
NGOMA 89 Purutanai, Mozviita Kuti Mukomborerhwe
ZVATICAFUNDAa
1. Ngei tese isusu tecidikana kugara no ruziyo rakawanda? (Zvierengo 4:7)
KANA makamboita cisananguro mu upenyu wenyu, pamweni makambonamata mecikumbira ruziyo—zvezvirokwazvo, kuita izvona zvinokosha maningi. (Tg. 1:5) Ndiyo ndaa, Mambo Soromoni wakatara eciti: “Ruziyo ciro cinonyanya kudikanwa.” (Erengai Zvierengo 4:7.) Soromoni wainga asikareketi nge zve ruziyoo haro. Asi, iyena wainga ecireketa nge zve ruziyo rinobva kuna Djehovha Mwari. (Zvie. 2:6) Hino zviri kuda kubhuya here kuti ruziyo rinobva kuna Djehovha, ringakwanisa kutibetsera kuti tikwanisane no matambudziko edu e zuwa no zuwa? Ndizvona kamare, uye izvona ndizvo zvaticaona mu fundo ino.
2. Tinodikana kuitei kuti tigare no ruziyo?
2 Tingakwanisa kugara no riziyo nge kufunda uye kuseenzesa zviro zvakafundiswa no anarume airi ainga ano ruziyo rakawanda maningi. Kutanga, ticafunda muezaniso wa Soromoni. Bhaibheri rinobhuya reciti: “Mwari akapa Soromoni uzii ne ungwaru wakakura.” (1 Mad. 4:29) Pedzepo, ticafunda nge zve muezaniso wa Djesu, uyo ainga ano ruziyo rakawanda maningi kupinda anhu ese akamborarama pasi pano. (Mat. 12:42) Uphorofiti umweni watinogumira mu bukhu ra Isaya wakareketa kudai nge zvake: “Mwiya wa Djehovha ucagara paari, mwiya we uzii no mwiya wokuzwisisa.”—Isa. 11:2.
3. Ticaonei mu fundo ino?
3 Mwari akapasa Soromoni uye Djesu ruziyo rakawanda maningi. Ndiyo ndaa, awona angakwanisa kutipasa mazano anokosha maningi atingaseenzesa mu upenyu wedu. Mu fundo ino, ticaona kuti: Tingagara kudini no maonero ari pakati no pakati pa nyaya yo mare, basa ro kudziriritira uye maonero atinodziita.
MAONERO ARI PAKATI NO PAKATI PA NYAYA YO MARE
4. Upenyu wa Soromoni ne wa Djesu wainga wakasiyana papi?
4 Soromoni wainga akapfuma maningi uye wainga ano zvese zvaaida. (1 Mad. 10:7, 14, 15) Asi nge dii rimweni, Djesu ainga asina zviro zvakawanda uye ayena ainga asitona nyumba yake kamare. (Mat. 8:20) Kunyazi zvakadaro, anarume airi aya ainga ano maonero ari pakati no pakati panyaya ye zviro zve kurarama nazvo ngekuti ruziyo rawo raibva kuna—Djehovha Mwari.
5. Maonero api ainga ana Soromoni pa nyaya ye mare?
5 Soromoni wakabhuya kuti mare i “cidziiriro.” (Mup. 7:12) No mare, tinokwanisa kutenga zviro zvatinoda mu upenyu uye kunyazi no zviro zvisikakoshi mu upenyu wedu asi tecizvida. Asi nge zviro zvaakasongana nazvo mu upenyu wake kamare, Soromoni wakareketa eciti mare aciropi cinokosha maningi. Ngo muezaniso, iyena wakatara kuti: “Zina rakanaka [kana kuti, “muhambiro wakanaka,” masoko e pasi] rinodikana kusanangurhwa pa mbuto pe upfumi ujinji.” (Zvie. 22:1) Soromoni wakaonawo kuti anhu ano mare yakawanda zvinoashuphira kugara no mupfaro kunyazi ano zviro zvakawanda. (Mup. 5:10, 12) Iyena wakabhuyawo kuti atidikani kuona mare hingana ciro cinokosha maningi mu upenyu wedu, ngekuti ingatiperera pa nguwa yatisikakariri.—Zvie. 23:4, 5.
Kodi maonero edu nge zve zviro zvekunyama kunotipingaidza kuti tisakande zvido zve Umambo pa mbuto ye kutanga mu upenyu wedu here? (Onai mandima 6-7)d
6. Maonero api ari pakati no pakati ainga na Djesu pa nyaya ye zviro zvekurarama nazvo? (Mateu 6:31-33)
6 Djesu aingawo ano maonero ari pakati no pakati pa nyaya ye zviro zvekurarama nazvo. Ayena aipfarirawo kurhya zviro zvakanaka uye pamweni paya kutomwa kamare. (Ruka 19:2, 6, 7) Uye cishamiso cake cekutanga caakaita nge cekucinja mvura kuti igare vhinyu yakanakisisa maningi. (Juau 2:10, 11) Uye pa zuwa raakafa ayena ainga akapfeka macira anodhura. (Juau 19:23, 24) Asi Djesu aazi kusiya kuti zviro zvekurarama nazvo zvigare pa mbuto yekutanga mu upenyu wake. Ayena akati ku ateeri ake: “Akuna munhu angaseenzera madzitenzi airi . . . Amukwanisi kugara muranda wa Mwari uye we Pfuma.” (Mat. 6:24) Djesu akafundisa kuti kana tikatanga kukanda Umambo wa Mwari pa mbuto yekutanga, Djehovha aizotipasa zviro zvese zvatinoda.—Erengai Mateu 6:31-33.
7. Daniel wakabetsereka kudini ngekugara no maonero ari pakati no pakati pa zviro zvekurarama nazvo?
7 Kutondowedza mazano atinopaswa na Djehovha panyaya ye kugara no maonero ari pakati no pakati pa zviro zvekurarama nazvo, kuri kubetsera maningi hama no hanzvadzi dzedu. Onai muezaniso we hama inozwi Daniel. Iyona inoti: “Pandainga ndiri djaha ndakasanangura kukanda zviro zvekunamata pa mbuto yekutanga mu upenyu wangu.” Nge ndaa yecisananguro caakaita cekusama kugara no zviro zvakawanda mu upenyu wake, Daniel wakakwanisa kuitira Djehovha zviro zvakawanda maningi, zvakadai hingana kubetsera panoitika njodzi uye kubetsera ku Bheteri. Iyena unotizve: “Ndingareketa no rugondo rese kuti andizotsumbi nge cisananguro candakaita. Zvirokwazvo kuti ndaizowina mare yakawanda maningi kudai ndakakanda ndangariro dzangu pa zviro zve nyika. Asi ndainga ndisikazogari no mukana wekuziyana no shamwari dzakanaka maningi dzandinadzo nyamasi uno, ndisikabatanidzi mupfaro wandirikuzwa nyamasi uno nge kuziya kuti ndiri kukanda Umambo wa Mwari pa mbuto yekutanga mu upenyu wangu. Apana ciro ciri mu nyika caizoezaniswa no makomborero andakapaswa na Djehovha.” Ndiyo ndaa zvakanaka maningi kuti tikande ndangariro dzedu pa zviro zvekunamata, haiwa pa zviro zvekurarama nazvo.
MAONERO ARI PAKATI NO PAKATI PA BASA REKUDZIRIRITIRA
8. Tinoziya kudini kuti Soromoni wainga ano maonero ari pakati no pakati pa nyaya ye basa? (Muparidzi 5:18, 19)
8 Soromoni wakabhuya kuti basa ringauzisa mupfaro wakakura maningi ku munhu, uye wakabhuyawo kuti irona “i cipo cinobva kuna Mwari.” (Erengai Muparidzi 5:18, 19.) Iyena wakatara kuti: “Kuno rubetso rakakura ngekuseenza ne simba.” (Zvie. 14:23) Soromoni waiziya zvaaireketa, ngekuti iyenga waiseenza no simba! Iyena wakawaka nyumba dzakawanda, wakasima miti ye miorivhi, wakasima maruwa uye wakagadzira mapisina. Iyena wakatowakawo mathaundi. (1 Mad. 9:19; Mup. 2:4-6) Zvezvirokwazvo, mabasa aya akaita kuti iyena apfare ke cinguwa cidoko. Asi iyena waiziya kuti mupfaro we zvirokwazvo wainga usikazobvi pa mabasa awona. Iyena waidikana kuita ciro cimweni, ndiyo ndaa iyena wakabatikana pa zviro zvekunamata. Ngo muezaniso, ndiyena wainga ari pa mberi pakuwakwa ke tempro yaizoseenzeswa pakunamata Djehovha—yakapera makore manomwe yeciwakwa! (1 Mad. 6:38; 9:1) Nge ndaa ye maeshiperiensiya aakasongana nawo mu upenyu wake, Soromoni wakaona kuti ciro cinokosha ku munhu, kuseenzera Djehovha. Iyena wakatara kuti: “Iyi ndiyo mhedziso ye nyaya yakhona mumasure mekuzwa zvese: Ithya Mwari we cokwadi ucengete nhungamiriro yake.”—Mup. 12:13.
9. Tinoziya kudini kuti Djesu ainga ano maonero ari pakati no pakati pa nyaya ye basa?
9 Djesu ainga ari munhu aiseenza no simba. Paainga ari djaha, ayena aiseenza hinga karpintero. (Mk. 6:3) Zvezvirokwazvo, ayena aibetsera maningi baba ake awo ainga ano ubaba we kuriritira mhuri yakakura maningi. Ngekuti ainga ari munhu akakwana, Djesu aiita basa rakanaka maningi! Zviri pamhene kuti anhu akawanda aida maningi kuizirhwa basa naye. Djesu aipfarira maningi basa irona, kunyazi zvakadaro, ayena aitora nguwa kuti aite zviro zvekunamata. (Juau 7:15) Paakazotanga basa rake rekuparidzira, ayena akati ku apurutani ake: “Musaseenzere zvekurhya zvinopera, asi seenzerai zvekurhya zvinorumbwa zviripo ke upenyu usikaperi.” (Juau 6:27) Uye pa Mharidzo yake ye pa Dunhu, Djesu akati: “Dziunganidzirei upfumi ku denga.”—Mat. 6:20.
Tingagara kudini no maonero ari pakati no pakati nge zve basa redu rekudziriritira uye zviro zvekunamata? (Onai mandima 10-11)e
10. Kana tikatama kungwarira, cinyi cingakwanisa kuitika katiri nge ndaa ye basa redu?
10 Ruziyo rinobva kuna Djehovha ringatibetsera kuti tigare no maonero ari pakati no pakati pa nyaya ye basa rekudziriritira. Akristu anoziya kuti awona anodikana ‘kuseenza no simba . . . , oita basa rakanaka.’ (Aef. 4:28) Anhu atinoseenzera, uye aya anonga ecitionerera angakwanisa kuona kuti isusu tiri anhu akagondeka uye anoseenza no simba uye awona anotisimba nge ndaa yazvo. Hino nge cinangwa cakanaka, tingatanga kuseenza no simba kuitira kuti aya atinoseenzera agare no maonero akanaka nge zve Apupuri a Djehovha. Asi kana tikatanga kuita izvona, tingapedzesera tisikacaoni nguwa yekugara pamwepo no mhuri dzedu uye yekuita mabasa e kunamata. Ndiyo ndaa zvinokosha maningi kuti tigare—no maonero ari pakati no pakati.
11. William wakafundei nge zve kugara no maonero ari pakati no pakati pa nyaya ye basa?
11 Hama ye cidjaha inozwi William yakafundira ngo muezaniso wakanaka we hama imweni yaaiseenza nayo. Ecireketa nge zve hama ii yaaiseenza nayo, William unoti: “[Hama ii] i muezaniso wakanaka we munhu ano maonero ari pakati no pakati. Iyona inoseenza no simba, uye nge ndaa ye basa rakanaka raanoita unozwirana maningi no makrienti ake. Asi panopera zuwa, iyona inokanda ndangariro pa mhuri yayo uye pa zviro zvekunamata. Asi pa anhu ese andakamboziya, hama ii inopfara maningi!”b
MAONERO ARI PAKATI NO PAKATI PA MAONERO ATINODZIITA
12. Soromoni wakapangidza kudini kuti wainga ano maonero ari pakati no pakati pa maonero aaidziita, asi cinyi cakazoitika nokuhamba ke nguwa?
12 Paainga aciri munamati wa Djehovha akagondeka, Soromoni wainga ano maonero ari pakati no pakati pa maonero aaidziita. Uye paainga aciri djaha, iyena waiziya paaigumira, ndiyo ndaa wakakumbira rubetso ra Djehovha. (1 Mad. 3:7-9) Paakatanga kutonga, Soromoni waiziya ngozi yekudzikudza. Iyena wakatara kuti: “Kudzikudza kunotangira kumbwera, uye mwiya unodzikudza kunotangira kukugunyika.” (Zvie. 16:18) Asi zvinotsukwarisa kuti no kuhamba ke nguwa, Soromoni aazi kuseenzesa zano iri. Iyena wakatanga kudzikudza uye kutama kupurutana mitemo ya Mwari. Ngo muezaniso, mutemo umweni waibhuya kuti mambo we ciHebheru wainga asikadikani “kuwaka akadzi akawanda, kuitira kuti mwoyo wake usapauke.” (Dhe. 17:17) Soromoni aazi kutondowedza mutemo uwona uye wakawaka anakadzi 700 no makonkubhina 300, uye akawanda akhona ainga asikanamati Djehovha! (1 Mad. 11:1-3) Pamweni Soromoni wairangarira kuti “zvese zvainga zvecihamba zvakanaka” uye apana zvaizoitika kaari. Asi yakazoguma nguwa yekuti Soromoni wakashuphika nge ndaa yekusiya Djehovha.—1 Mad. 11:9-13.
13. Tinofundei kubva pa muezaniso wa Djesu wekudzidodosa?
13 Djseu akarumbwa ano maonero ari pakati no pakati nge zvake uye ecidzidodosa. Djesu asati auya pa nyika, iyena akagara no cikomborero cekuita zviro zvinoshamisa pakuseenzera Djehovha. Bhaibheri rinobhuya kuti peciseenzeswa Djesu, “zviro zvese zvimweni zvakasikwa ku denga no pa nyika.” (Ako. 1:16) Djesu paakabhabhatidzwa, wakarangarira zviro zvese zvaainga aita na Baba ake paainga aciri kudenga. (Mat. 3:16; Juau 17:5) Asi Djesu aazi kudzikudza paakarangarira zviro zvese izvi. Zvezvirokwazvo, aazi kudziona hingana munhu unokosha kupinda anhu amweni. Ayena akabvunza afundi ake kuti akauya panyika, “haiwa kuti aseenzerhwe, asi kuzoseenzera nokupasa upenyu wake kuti asudzunure anhu ajinji.” (Mat. 20:28) Djesu akapangidza kuti aidzidodosa nge kuziya kuti apana ciro caaikwanisa kuita nge kuziya kake. (Juau 5:19) Zvezvirokwazvo, Djesu aidzidodosa maningi! Uye akatisiirawo muezaniso wakanaka wekuti titeedzere.
14. Djseu akareketa masoko api anotibetsera kuti tigare no maonero ari pakati no pakati nge zvedu?
14 Djesu akafundisa ateeri ake kuti agare no maonero ari pakati no pakati nge maonero aanodziita. Zuwa rimweni, Djesu akaagondesa kuti: “Bvudzi riri mu musoro menyu rakaerengwa rese.” (Mat. 10:30) Masoko aya anotinyaradza maka-maka kana tino maonero asikazi kunaka nge maonero atinodziita. Masoko aya anopangidza madire atinoizwa na Baba edu e kudenga—uye kukosha katinoita kaari. Kana ari Djehovha akatisanangura kuti timuseezere uye ayena obhuya kuti imwimwi munokosha kuti murarame mu nyika ipsva, isusu tiri ani kuti timubvunze kuti mashaisha.
Cinyi cingaitika kana tikasama kugara no maonero ari pakati no pakati nge maonero atinodziita? (Onai ndima 15)f
15. (a) Murindiri umweni wakabhuya kuti tinodikana kugara no maonero api ari pakati no pakati nge maonero atinodziita? (b) Hingana zviri kupangidzwa pamufanikiso we pa pajina 24, makomborero api aticaruza kana tikanyanya kurangarira nge zvedu?
15 Mu makore 15 akadarika, Murindiri umweni wakareketa masoko anoteera akaringana nge zve kugara no maonero ari pakati no pakati nge maonero atinodziita: “Zvezvirokwazvo, atidi kunyanya kurangarira nge zvedu dakara kuguma pakudzikudza, uye atidiwo kurangarira kuti isusu atibetseri ciro. Pane kudaro, tinodikana kugara no maonero akanaka nge zvedu, anotibetsera kuona zviro zvatinokwanisa kuita uye zvatisikakwanisi kuita. Hanzvadzi imweni ye ciKristu yakabhuya kuti: ‘Inini andiripi munhu wakashata, uye andinyanyi kukoshawo. Asi ndino maitiro akanaka no akashata, hingana munhu wese.’”c Murikuona here kuti zvingatibetsera kudini kugara no maonero ari pakati no pakati nge maonero atinodziita?
16. Ngei Djehovha anotipasa mazano?
16 Djehovha anoseenzesa Bhaibheri kuti atipase mazano akanaka. Ayena anoita izvona ngekuti anotida uye anoda kuti tipfare. (Isa. 48:17, 18) Uye cisananguro cakanaka catingaita—nge cekukanda kuda ka Djehovha pa mbuto yekutanga mu upenyu wedu—uye ndizvona kamare zvicaita kuti tipfare zvezvirokwazvo. Kukanda zviro zvekunamata pa mbuto yekutanga, zvicaita kuti tisasongane no matambudziko e kunyanya kurangarira basa ro kudziriritira, mare uye maonero atinodziita. Ndiyo ndaa shingai kuita zviro no uzii uye kupfadza mwoyo wa Djehovha!—Zvie. 23:15.
NGOMA 94 Kutenda Soko ra Mwari
a Soromoni uye Djesu ainga ano ruziyo rakawanda maningi. Uye Djehovha Mwari ndiyena aiyapasa ruziyo irona. Mu fundo ino, ticaona mazano manganani akafemerhwa Soromoni uye Djesu nge zve kugara no maonero ari pakati no pakati pa nyaya yo mare, basa ro kudziriritira, uye maonero atinodziita. Uyewo ticada kuona kuti hama dzimweni, dzakabetsereka kudini no mazano awona e mu Bhaibheri mu upenyu wawo.
b Onai fundo ino musoro unoti: “Zvaungaita Kuti Ufarire Kushanda Nesimba” mu Murindiri wa 1 ya Fevrero ya 2015, mu ciShona.
c Onai fundo ino musoro unoti: “Bhaibheri Rinogona Kukubatsira Kuti Ufare” mu Murindiri wa 1 ya Agosto wa 2005, mu ciShona.
d KUPANGANIDZWA KE MUFANIKISO: Juau na Tom i madjaha mairi e ungano imweyo. Juau unotora nguwa yakawanda ecigadzirisa karu yake. Uye Tom unoseenzesa karu yake kuti apakidze hama kuti dziende ku misangano uye mu basa re kuparidzira.
e KUPANGANIDZWA KE MUFANIKISO: Juau unoseenza dakara usiku ngekuti unoda kupfadza patrau ake. Uye pese paanokumbirhwa kuti aseenze oras extras iyena unotendera. Pa usiku umwe-umweo, Tom, mubati unoseenzera urikuenda koousha pamwepo no mukuru umweni. Kareko, Tom wakapanganidzira patrau ake kuti nguwa dzimweni pakati pe sumana aakwanisi kuseenza oras extras ngekuti uno mabasa amweni e kuita.
f KUPANGANIDZWA KE MUFANIKISO: Juau unonyanya kurangarira nge zvake kamare. Asi Tom, unorumbwa ecikanda zviro zvekunamata pa mbuto yekutanga mu upenyu wake, ndiyo ndaa uno mikana yakawanda yekuita shamwari dzakawanda paanobetsera kugadziriswa ke Nyumba dze Magungano.