“Unonga Uneni mu Paraizo”

1. Djesu asati afa akabvunzei mbavha yainga iri padii pake? (Ruka 23:39-43)

DJESU no mbavha mbiri pa dii rake, ainga akakhomerhwa pa nguwa yekupedzesera ye upenyu wake. (Ruka 23:32, 33) Pa nguwa yainga yambodarika awona ainga amboseka Djesu. Zvakabuda pamhene kuti awona ainga asiripi afundi ake. (Mat. 27:44; Mark. 15:32.) Asi umwe wawo wakacinja marangariro ake. Iyena wakati: “Djesu ndirangarireiwo kana mapinda mu Umambo wenyu.” Djesu akadaira kuti: “Zvezvirokwazvo ndinokubvunza nyamasi, ucagara neni mu Paraizo.” (Erengai Ruka 23:39-43.) Apana cinopangidza kuti mbavha ii yainga yatendera masoko anocokuita no “Umambo we kudenga” akaparidzirhwa na Djesu paainga ari pasi pano. Uye Djesu apana paakamboreketa kuti mwanarume uu waizopinda mu Umambo we kudenga. (Mat. 4:17) Zvezvirokwazvo Djesu aireketa ngezve Paraizo ye ramangwana pa nyika pano. Tingaziya kudini izvona?

2. Cinyi cinopangidza kuti mbavha ii yainga yacinyuka wainga ari Mudjudha?

² Mbavha iya yakacinyuka pamweni yainga iri Mudjudha. Mbavheyo yakabvunzawo mudoni wake wainga ari ku dii rake kuti: “Iwewe authyi Mwari here zvatatongwa zvakaezana?” (Ruka 23:40) Adjudha ainamata Mwari umwe basi, asi anhu e madzinza amweni aitenda mu madzimwari akawanda. (Eki. 20:2, 3; 1 Ako. 8:5, 6) Kudai mwanarume uya wainga asiripi Mudjudha, pamweni waizoti: “Iwewe authyi anamwari here?” Zvimweni zvinopangidza kuti mwanarume uu wainga ari Mudjudha, ngezve kuti Djesu aazi kumbotumwa ku madzinza amweni basi asi ku “mabira akapsveteka e nyumba ya Israeri.” (Mat. 15:24) Ngokuti mwanarume uu wainga ari Mudjudha, iyena waiziya kuti Mwari ainga akapikira Aisraeri kuti aizomutsa akafa. Masoko aakabvunza Djesu akapangidza kuti ayena waizviziya kuti Mwari aizomutsa Djesu kuti aende kudenga. Ngekudaro, iyena wainga ano kariro yekuti waizomutswawo kuti ararame nokusikaperi.

3. Panganidzai kuti mbavha iya pamweni yakarangarirei Djesu paakareketa ngezve Paraizo? (Genesi 2:15)

³ Ngekuti mbavha ii yainga iri Mudjudha, iyona yaiziya ngano inobhuya ngezva Adhamu na Evha no Paraizo yaainga akasikirhwa ndi Mwari. Hino paakazwa masoko a Djesu pamweni wakarangarira ngezve Paraizo yakanaka pasi pano.—Erengai Genesi 2:15.

4. Masoko a Djesu aakabvunza mbavha anoita kuti tirangarire ngezvei?

⁴ Masoko a Djesu aakabvunza mbavha ngezve Paraizo, anodikana kutiitisa kuti isusu tirangarire kuti Paraizo icange yakadini. Zviro zvicatibetsera kuti tikwanise kuita kudaro kurangarira ngezve utongi wa Mambo Soromoni. Ngei? Ngekuti Bhaibheri rinobhuya kuti Djesu mukuru maningi kupinda Soromoni. Hino tinoetsera kuti Mambo wedu Djesu Kristu pamwepo no 144 000 acaita zviro zvakawanda maningi pasi pano mu Paraizo. (Mat. 12:42) Uye zviri pamhene kuti aya e “mabira amweni” anokariro yekurarama pasi pano anoda kuziya kuti ndizvipi zvaanodikana kuita kuti ararame nokusikaperi.—Juau 10:16.

UPENYU UNONGA WAKADINI MU PARAIZO?

5. Munorangarira kuti upenyu unonga wakadini mu Paraizo?

⁵ Cinyi cinouya mundangariro menyu pamunorangarira nge zve Paraizo? Pamweni munorangarira parki yakarungama maningi yakaita hingana munda we Edheni. (Gen. 2:7-9) Zvingaita kuti imwimwi mungaedzurira masoko a Mika paakabhuya kuti “munhu umwe na umwe acazogara pasi pe muvhinyu wake ne pasi pe muonde wake.” (Mik. 4:3, 4) Uye pamweni imwimwi mungaedzurira mavhersikuro amweni e Bhaibheri anobhuya ngezve kuti kucagara nozvokurhya zvakawanda. (Pis. 72:16; Isa. 65:21, 22) Hino zvingaita kuti imwimwi murangaridze muri mu jardim yakarungama maningi, muri pameza ino zvokurhya zvakawanda uye zvinonaka uye mecizwa kunuhwirira ke mafurori no miti dzimweni, uyewo nguwa dzimweni mecizwa kuseka ke hama ne shamwari dzenyu dzimweni—kutobatanidzawo aya anonga amutswa—ecitamba uye ecicedza. Kubhuya zvazviri, zviro zvese izvi zvicaitikadi pasi pano. Kusiya izvona kuita basa mu Paraizo ricange riri basa rinopfadza uye rakanaka maningi.

6. Cinyi caticaita mu Paraizo? (Onai mufanikiso.)

⁶ Djehovha akatisika no simba rekuita basa uye kupfara ndiro. (Mup. 2:24). Mukutonga ke Makore Ciuru, ticagara no basa rakawanda rekuita. Ese aya acapona mukutambudzika kukuru no mamiriyonji acamutswa acada macira ekupfeka, cokurhya no mbuto dzekuti agare. Izvi zvinoreya kuti ticada kuseenza maningi uye basa iri ricatipasa mupfaro wakakura. Djehovha akabvunza Adhamu na Evha kuti acengete munda we edheni uye kuti auite kuti ukure. Zvimwe-zvimwezvoo, ticagara no makomborero ekucinja nyika ino kuti igare Paraizo. Cimborangarirai kupfadza kazvicaita kufundisa mamiriyonji e anhu anonga amutswa ngezva Djehovha uye nge zve zvinangwa zvake, uye cimborangariraizve kupfadza kazvicaita kubvunza aseenzi akagondeka e kare zviro zvakaitika mumasure mekufa kawo!

7. Tingagara no rugondo ripi, uye ngei?

⁷ Isusu tingakwanisa kugara no rugondo rekuti anhu mu Paraizo acagara ari murunyararo, akarongeka uye anozvese zvaanoda. Ngei? Ngekuti Djehovha akaita kuti tiwone kuti upenyu unonga wakadini mu nyika ipsva Mwana wake paanonga otonga. Tingaona izvona mu muezaniso wa Mambo Soromoni paaitonga.

UMAMBO WA SOROMONI, UNOPANGIDZA ZVINONGA ZVAKAITA UPENYU MU PARAIZO

8. Masoko ari pana Pisarema 37:10, 11, 29 akadzadzika kudini mu nguwa yekare? (Onai “Mibvunzo inobva ku Aerengi” uri mu Murindiri uno.)

⁸ Mambo Dhavhidhi wakafemerhwa kuti atare kuti upenyu waizonga wakadini mambo ano uzii uye wakagondeka paaizotanga kutonga. (Erengai Pisarema 37:10, 11, 29.) Patinoerengera anhu Pisarema 37:11 tinonga tecida kubhuya ngezve Paraizo. Izvi zvino musoro ngekuti Djesu akabhuya ngezvazvo paaita Mharidzo yake ye pa Dunhu. ecipangidza kuti zvicadzadzika mune ramangwana. (Mat. 5:5) Asi masoko a Dhavhidhi akapangidza kuti upenyu waizonga wakadini mu mazuwa ekutonga ka Mambo Soromoni. Iyena paakagara Mambo we Israeri, anhu a Mwari ainga ano runyararo uye aibudirira, yainga iri nyika “yaierera uci no mukaka.” Mwari akabhuya kuti: “Kana mukarumbwa meciteerera mutemo wangu . . . , Ndicaunzisa runyararo pa nyika, uye imwimwi mucawata musikathyi ciro.” (Rev. 20:24; 26:3, 6) Uye utongi wa Soromoni wainga wakatodaro kamare. (1 Mak. 22:9; 29:26-28) Djehovha ainga akabhuya kuti anhu akashata “aizoparadzwa.” (Pis. 37:10) Ndiyo ndaa, masoko ari pana Pisarema 37:10, 11, 29 akatodzadzika kare uye acatodzadzikawo mune ramangwana.

9. Mambokadzi weku Shebha wakabhuyei ngezve kutonga ka Mambo Soromoni?

⁹ Mambokadzi we ku Shebha wakaguma pakuziya kuti kutonga ka Mambo Soromoni kakaunza runyararo uye kubudirira ku dzinza re Aisraeri. Iyena wakatoguma pakuita rhwendo rakakura ecienda ku Djerusarema kuti aone zvaiitika no madziso ake kamare. (1 Mad. 10:1) Mumasure mekuona umambo wa Soromoni, iyena wakati: “Zvaakandibvunza azvizi kutoguma pa hafu. . . . Anopfara anarume anoita basa renyu, uye anopfara aseenzi enyu ari pamberi penyu nguwa yese, ecizwa ungwaru wenyu!” (1 Mad. 10:6-8) Asi upenyu pakutonga ka Soromoni wainga uri cipangidzo co zviro zvicaizwa na Djehovha Mwana Wake Djesu paanonga aakutonga pa nyika.

10. Djesu akakwirira kudarika Soromoni nge gwanza ripi?

¹⁰ Djesu akakhwirira kupinda Mambo Soromoni pa zviro zvese. Soromoni wainga ari munhu asikazi kukwana wakaita zvishaishi zvakakura maningi uye pakupedzesera zvakabara matambudziko akawanda ku anhu a Mwari. Djesu, Mutongi wakakwana uye aazoshaishi. (Ruka 1:32; Aheb. 4:14, 15) Djesu akarumbwa akagondeka kuna Djehovha pasinei no zvese zvainga zvaizwa na Sathani kuti ayena asarumbwe akagondeka. Djesu akapangidza pamhene kuti aazomboshaishi kana kuita ciro cingatikuwadza. Apana mubvunzo kuti ayena ndi Mambo akanaka watingagonda naye.

11. Djesu acazobetserhwa ndiyani?

¹¹ Djesu acabetserhwa nge Akristu akadzodzwa anokwana kuita 144 000 kuti abetsere anhu, aacengete uye kuti adzadzise cinangwa ca Djehovha cakaringana no nyika ino. (Zvak. 14:1-3) Akadzodzwa aya anonyasa kuzwisisa ngekuti akasongana no miedzo uye nozvitsinzwa zvakawanda, uye anarume no anakadzi aya akamboraramawo pa nyika pano, ndiyo ndaa awona anozokwanisa kuzwisisa mazwiro edu. Asi i basa ripi kamare ricaizwa nge Akristu akadzodzwa?

ZVICAIZWA NE AKADZODZWA

12. Djehovha acapasa makomborero api ku Akristu 144 000?

¹² Djesu no Akristu 144 000 anonga ano basa rakakura kudarika rainga rina mambo Soromoni. Mambo Soromoni waionerera mamiriyonji e anhu e mu nharaunda imwe basi, asi Akristu akadzodzwa acaonerera ma bhiriyonji e anhu ari pasi rese. Djehovha acapasa akadzodzwa makomborero asikaezaniswi!

13. Ngaupizve ubaba umweni unokosha ucapaswa Akristu akadzodzwa?

¹³ Hinga Djesu, Akristu akadzodzwa 144 000 anonga ari madzimambo uye apristi. (Zvak. 5:10) Mutemo wa Mozesi waiti apristi ndiwona aidikana kudziirira anhu mu zviro zvekunyama no zve kumwiya. Mutemo uu wainga uri “cipangidzo ce zviro zvicauya.” Tinoguma pakutoti Akristu akadzodzwa 144 000 acabetsera anhu mune zve kunyama uye zvekumwiya. (Aheb. 10:1) Atisati taakuziya kuti atongi aya no apristi acaseenzesei kuti arekete nesu pa nyika. Asi tino rugondo rekuti Djehovha acaita kuti ese mu Paraizo agare no nhungamiriro dzaanoda.—Zvak. 21:3, 4.

“MABIRA AMWENI” ANODIKANA KUITEI KUTI AZORARAME MU PARAIZO?

14. Mubatano upi uripo pakati po “mabira amweni” no hama dza Kristu?

¹⁴ Djesu akadainza aya aacatonga nawo kuti “cikwata cidoko.” (Ruka 12:32) Ayena akabhuyazve ngezve cikwata cecipiri, caakadainza kuti “mabira amweni.” Zvikwata zviiri izvi zvinoumba cikwata cimwe basi. (Juau 10:16) Ese anoita dii re zvikwata zviiri izvi ari kuseenza pamwepo nyamasi uno, uye acarumbwa eciseenza pamwepo nyika painonga yaa Paraizo. Mu nyika ipsva “cikwata cidoko” cinonga ciri kudenga uye o “mabira amweni” anonga ano kariro yokurarama pasi pano nokusikaperi. Zviri pamhene kuti o “mabira amweni” anodikana kuita cinjo kubvira zvino kuitira kuti azorarame mu nyika ipsva.

15. (a) “Mabira amweni” anobetsera kudini hama dza Kristu? (b) Mungateedzera kudini muezaniso we hama imweni yainga iri mu farmasiya? (Onai mufanikiso.)

¹⁵ Mbavha iya yakafa isati yaona mukana we kupangidza kutenda zviya zvayainga yakaizirhwa na Djesu. Asi nyamasi “mabira amweni” ano mukana we kupangidza rudo raanaro kuna Djesu. Nge muezaniso, isusu tinopangidza kuti tino rudo kuna Djesu nge mushobo watinobata Akristu akadzodzwa. Djesu akatobhuya pamhene kuti aizotonga mabira amweni nge mabatire aaizota akadzodzwa. (Mat. 25:31-40) Tingakwanisa kutsigira hama dza Kristu nge kubetsera anhu kuti agare afundi. (Mat. 28:18-20) Mushobo umweni we kuita izvi ngewe kuseenzesa zvakanaka bhuku ripsva ra Pfadzwai ne Upenyu Nokusikaperi! Kana imwimwi musati maano fundo ye Bhaibheri, madini kugara no cinangwa kuti mupase anhu akawanda kuti mutange fundo?

16. Tinodikana kuitei zvino kuti tigadzirire kuzorarama mu nyika ipsva?

¹⁶ Isusu atidikani kuetsera kuzogara mu Paraizo kuti tizopete masimba kuti tigare anhu akanaka. Kubvira zvino tinokwanisa kupeta masimba kuti tigare anhu akagondeka mu zviro zvatinoita, nozvatinoreketa, kugara no upenyu uri pakati no pakati tisikanyanyisi. Tingakwanisa kugara takagondeka kuna Djehovha, ku uya watakawakana naye no ku hama dzedu. Kana tikapurutana Djehovha mu nyika ino yakashata, zvinozotiitira nyore maningi kuti tizomupurutane toorarama mu Paraizo. Ndiyo ndaa tinodikana kusakurira mawara anopangidza kuti tiri kugadzirira kuzorarama imona. Onai musoro unoti: “Makagadzirira kuti ‘Mugare Nhaka ye Nyika Here’?” uri mu Murindiri uno.

17. Panganidzai kuti ngei tisikadikani kudzipasa ndaa nge zvishaishi zvetakaita kare?

¹⁷ Zvinokoshawo maningi kuti tisadzipase ndaa nge cishaishi catakaita kare. Zviri pamhene kuti “atingaiti citema tecizviziya kamare” nge ndaa yekugonda kuti takapaswa cibairo ce rusudzunuro. (Aheb. 10:26-31) Asi tingagara no rugondo rekuti kana tikacinyuka zvezvirokwazvo, pazvitema zvedu uye topsvaka rubetso kuna Djehovha uye kuno akuru tocinja mushobo wedu wekuita zviro, zvezvirokwazvo Djehovha acatirekereradi kamare. (Isa. 55:7; Zvii. 3:19) Edzurirai zvakabhuya Djesu ku Afarisi: “Andizi kuuya koodainza anatsi, asi ashaishi.” (Mat. 9:13) Mutengo we rusudzunuro wakakura uye unokosha maningi zvekutoti unokwanisa kufukidza zvitema zvedu zvese.

MUNGAKWANISA KURARAMA NOKUSIKAPERI MU PARAIZO

18. Imwimwi maizoda kubvunzisei ku mwanarume uya wakafa ari pa dii pa Djesu?

¹⁸ Edzai kurangarira muri mu Paraizo, mecicedza no mbavha iya yakafa iri pa dii ra Djesu. Zvezvirokwazvo mwese muri airi mucange mecicedza ngezve kutenda kamunoita mu cibairo ca Djesu Kristu. Pamweni imwimwi mungada kumubvunzisa kuti yainga yakadini nguwa yekupedzesera muri pa dii ra Djesu uye wakazwa kudini Djesu paakati waizogara mu Paraizo. Pamweni iyena ungamubvunzisawo kuti zvainga zvakadini kurarama mu mazuwa ekupedzesera o nyika ya Sathani. Acagara makomborero akakura kufunda Bhaibheri no anhu akaita hinga mwanarume uu!—Aef. 4:22-24.

19. Ngei upenyu mu Paraizo usikazorembesi? (Onai foto ye pa kapa.)

¹⁹ Upenyu we mu Paraizo auzomborembesi. Ticagara no basa rekuita uye kuziyana no anhu akawanda. Uye cinonyanya kukosha ngecekuti padoko no padoko tinonga tecinyasa kuziya Baba edu e kudenga Djehovha tecipfara nge zviro zvakawanda zvaakatigadzirira. Atizoimi kuziya zviro zvakawanda ngezva Djehovha uye kufunda ngezve zvisikwa zvake. Patinonga tecirarama, rudo redu na Djehovha rinorumbwa recikura. Zvezvirokwazvo tinotenda maningi Djehovha na Djesu ngekutipasa kariro yekurarama nokusikaperi mu Paraizo!