ZVAKAITIKA MU UPENYU
“Kurhwa nge ka Djehovha”
YAINGA IRI 28 ya Janero ya 2010. Zuwa irona kaitonhora maningi uye inini ndainga ndiri mu thaundi yakarungama manngi inozwi Estrasburgo, ku França. Inini ndainga ndiri umwe we nhengo ye dhepartamento rinoonerera ngezve mutemo rainga ragadzwa kuti ridziirire Apupuri a Djehovha ku Tribhunari ye ku Europa Inodziirira ngezve Zvitenderhwa zve Anhu. Nyaya yakhona ngeye kuti anyautongi e ku França ainga abhuya kuti Apupuri a Djehovha aidikana kuripa musoho unokwana kuita 64 mirioji ye euro. Hino isusu tainga tiri ikona kuti tipangidze kuti awona ainga asikadikani kukumbira mare iyona. Asi cikonzero cakakura caitiitisa kuti isusu tide kukunda nyaya iyona ii, aimarepi yakawanda yaaikumbira, asi taida kuita kuti zina ra Djehovha rikudzwe, anhu ake agare no mbiri yakanaka uye kuti arumbwe ecimuseenzera akasudzunuka ku França. Mugumisiro wakhona wakazopangidza kuti: “Kurhwa nge ka Djehovha.” (1 Sam. 17:47) Ndicanyasa kumupanganidzirai kuti zvinyi zvakaitika.
Muna 1999 anyautongi e ku França akabhuya kuti Firiyari ye ku França yaidikana kuripa musoho pa mipiro yakabudiswa muna 1993 dakara 1996. Isusu takaedza kupsvaka kutongwa zvino unatsi mu matribhunari ku França asi azvizi kubudirira. Mumasure mazvo, anyautongi akaiga mare ye firiyari inokwana kuita 4,5 mirionji dze euro. Isusu tainga tino kariro yekuti Tribhunari ye ku Europa Inodziirira ngezve Zvitenderhwa zve Anhu yaizokwanisa kutibetsera. Asi, asati abata-bata nyaya yedu, tribhunariyo yakatikumbira kuti isusu timboungane no cikwata ce mutemo we anyautongi pamberi pe muimiriri we tribhunari.
Cinangwa cainga ciri ce kuona kuti taizokwanisa here kuguma pa citenderano tisati tatora nyaya iyona kuti iende kootongwa. Isusu tairangarira kuti muimiriri we tribhunari waizokumbira kuti tiripe padoko pa mare iya yatakumbirhwa. Asi tainyasa kuziya kuti kunyazi kuripa padoko basi zvainga zvisikapindirani no zvinodiwa no Bhaibheri. Hama no hanzvadzi dzainga dzaita mipiro kuti mareyo itsigirhwe Umambo. Hino iyona yainga isikadikani kupaswa anyautongi. (Mat. 22:21) Kunyazi zvakadaro, takaenda ku musangano uwona kuti tipangidze kuti tinoreremedza mitemo dze tribhunari.
Cikwata cedu ce dhepartamento re mutemo ku Tribhunari ye ku Europa Inodziirira ngezve Zvitenderhwa zve Anhu mu 2010
Isusu takaungana mu mbuto yakarungama maningi ku tribhunari. Muimiriri we tribhunari wakabhuya kuti Apupuri a Djehovha aidikana kuripa dii rimwe pa mare iya yaaikumbirhwa no anyautongi e ku França. Ciriporipoco, mwiya mucena wa Djehovha wakatiitisa kuti tibvunzise kuti: “Maizviziya here kuti anyautongi akaiga mare yedu inodarika 4,5 mirionji ye euro?”
Muimiriri we tribhunari wakashamisika nazvo. Cikwata co anyautongi pacakatendera kuti ainga aita izvona, muimiriri wakacinja marangariro ake. Iyena wakacinja ciriporipoco uye wakaita kuti isusu tikunde nyaya iyona. Inini ndakazwisisa kuti Djehovha akacinja nyaya iyona ciriporipoco nge mushobo wekuti tainga tisikakariri. Isusu takabva imona tecipipira nge mupfaro tisikakwanisi kutendera kuti izvona zvainga zvaitika.
Muna 30 ya Junyo ya 2011, Tribhunari ye ku Europa Inodziirira ngezve Zvitenderhwa zve Anhu, yakaita cisananguro cinotidziirira. Cisananguro icona cakabhuya kuti musoho uwona waiga usiripi pa mutemo uye akabvunza anyautongi kuti ahwirinze mare iya yaainga aiga, uye aidikana kuihwirinza no juru. Dakara nyamasi uno, cisananguro ici cinokosha ciciri kudziirira kunamata kakacena ku França. Mubvunzo uya wekuti tainga tisikazvizii kuti taizouita, wakaita hinga buwe rakauraya Goriyati. Wakaita kuti nyaya iya icinje. Ngei isusu takawina nyaya iyona? Ngekuti hingana zvakabhuya Dhavhidhi kuna Goriyati, “kurhwa nge ka Djehohva.”—1 Sam. 17:45-47.
Asi ikona kainga kusiripi kekutanga teciwina mu matribhunari. Dakara nyamasi uno, kunyazi teciphikiswa no anyautongi uye magereja anosimba, isusu takawina nyaya dzinokwana kuita 1225 mu matribhunari akakwirira e mu nyika dzinokwana kuita 70 uye nyika dzimweni dzakasiyana-siyana. Kuwina katinoita kunotidziirira pa kuzikanwa pa mutemo hingana Apupuri a Djehovha, kukwanisa kuparidzira takasudzunuka, tisabatanidzwe pa mbemberero dze mu nyika uye kuti tisatende kukandwa ngazi.
Kodi ndakaenda kudini ku Europa kuti ndiende koobetsera dhepartamento rinoonerera ngezve mutemo sezvo ndaiseenza ku Sedhi Mundiyari ye Apupuri a Djehovha ku Nova York, Estados Unidos?
MWIYA WE UMISIYONARIO WE ABEREKI ANGU
Abereki angu George uye Lucille, akakursari turma 12 ye cikora ce Giriyadhi uye aiseenza ku Etiópia paakandibara muna 1956. Awona akandipasa zina rokuti Philip, nge daa ya Firipi muevhangeri unorekethwa mu Bhaibheri. (Zvii. 21:8) Mu gore rakazoteera, anyautongi akarambidza basa re Apupuri a Djehovha. Kunyazi ndainga ndiciri mwana mudoko, inini ndiri kuedzurira kuti abereki angu aiita zvekunamata nge cifise-fise. Pandainga ndiri mwana mudoko zvese zviya zvandaiona zvaindipfadza maningi. Zvinotsukwarisa kuti muna 1960 anyautongi akatibambidzira kuti tibude mu nyika iyona.
Nge dii re moko boshwe hama Nathan H. Knorr ecivhakacira mhuri yangu ku Adis-Abeba, Etiópia muna 1959
Mhuri yangu peyakathutha kuenda ku Wichita ku Kansas Estados Unidos, abereki angu akatora ciro cinokosha maningi: Mwiya we umisionariyo. Awona ainga ano ana atatu inini, yaya angu akuru Judy uye mudoko wangu Leslie. Tese tiri atatu takabarhwa ku Etiópia. Abereki edu aida maningi cokwadi uye akatifundisa kuda Djehovha uye kumuseenzera no mwoyo wese. Inini ndakabhabhatidzwa ndino makore 13. Makore matatu akazoteera, mhuri yangu yakaenda kooseenzera ku mbuto yaidiwa aparidzi akawanda ku Arequipa, ku Peru.
Muna 1974 pandainga ndino makore 18, Bheteri re ku Peru rakandigadza pamwepo no hama dzinokwana kuita 4 kuti tiseenze hinga mapiyonero espesiyari. Isusu takaenda kooparidza ku mbuto inozwi Cordilheira dos Andes mu ndima mekuti mainga musati mamboparidzirhwa. Basero raibatanidza kuparidzira anhu aireketa mureketero we Quéchua uye Aimará. Isusu taiita rhwendo no karu yetakazodainza kuti “Arka” ngekuti yainga ino kasha yakakura maningi. Inini ndaiseenzesa maningi Bhaibheri kuti ndipangidze anhu kuti Djehovha nokukasika acapedza urombo, nhenda uye rufu. (Zvak. 21:3, 4) Akawanda e ikona akagara Apupuri a Djehovha.
“Areka,” 1974
NDAKAGADZWA KUTI NDISEENZE KU SEDHI MUNDIYARI
Muna 1977 paaivhakacira ku Peru, Albert Schroeder wainga ari nhengo ye Dare Rinotungamirira re Apupuri a Djehovha akandikohomedzesa kuti ndidzadzise petisau kuti ndiseenze ku Sedhi Mundiyari, uye ndizvona kamare zvandakaita. Paapadarika nguwa doko, muna 17 ya Junyo ya 1977, ndakatanga kuseenza ku Bheteri re Brooklyn. Ndakaseenza mu Dhepartamento Rekucenesa uye Rekugadzirisa Zviro ke makore anokwana kuita 4.
Zuwa ro mucato wedu muna 1979
Muna Junyo ya 1978, ndakaziya Elizabeth Avallone pa gungano re nyika yese ku Nova Orleans. Iyena wainga arerhwa no abereki aiseenzera Djehovha no mwoyo wese kuitawo hingana abereki angu. Elizabeth wainga waakuseenza hingana mupiyonera we nguwa dzese ke makore 4 uye waida kuseenzera Djehovha mu nguwa yakadzara ke upenyu wake wese. Isusu taiziyana uye no kuhamba ke nguwa takadanana. Takacata mu dhiya 20 ya Otubro ya 1979, uye takatanga kuseenza ku Bheteri se kazado.
Hama no hanzvadzi dze ungano yedu yekutanga ye mureketero we Espanhola ku Brooklyn dzakatitambira no mwoyo wese. Pakuhamba ke makore, isusu takaseenza mu ungano dzimweni dzitatu uye ikona hama dzakatipangidzirawo rudo, dzakatitambira no mwoyo wese uye dzaitsigira basa redu ku Bheteri. Isusu tinotenda maningi rubetso rese retakapaswa no hama idzona uyewo no kutsigirhwa ketakaizwa no shamwari pamwepo no mhuri pakutibetsera kucengeta abereki edu ainga akura.
Mabheterita e ungano ye mureketero we ci Espanhola ku Brooklyn muna 1986
BASA RANGU MU DHEPARTAMENTO RINOONERERA NGEZVE MUTEMO
Mu Janero ya 1982, ndakashamisika maningi pandakagadzwa kuti ndiseenze mu Dhepartamento Rinoonerere ngezve Mutemo ku Bheteri. Paapadarika makore matatu, hama dzakandibvunza kuti zvaibvira here kuti ndifunde ku cikora ce pamusoro-soro (faculdade) kuti ndizogare adhivhogadho (munhu unodairira ndaa mu tribhunari). Pandainga ndecifunda, ndakapfara maningi pandakaziya kuti zvitenderhwa zvakawanda zvino anhu e mu Estados Unidos uye mu nyika dzimweni, zvakabvira nge ndaa ye kuwina ke Apupuri a Djehovha mu matribhunari uye isusu taifunda maningi ngezve nyaya idzi dzinokosha.
Muna 1986 pandainga ndino makore anokwana kuita 30, inini ndakagadzwa hinagana muonereri we Dhepartamento Rinoonerera ngezve Mutemo. Aya ainga ari makomborero akakura maningi ngekuti kunyazi ndaiga ndino makore 30 basi, izvona zvakapangidza kuti hama dzaindigonda maningi. Kandiri, ubaba uwona wainga wakakura maningi sezvo basa irona rainga risiripi nyore uye ndainga ndisikazii zviro zvakawanda.
Ndakagara adhivhogadho muna 1988. Asi ndainga ndisikazvizii kuti kufunda uku kakandicinja uye kakabata-bata ushamwari wangu na Djehovha. Cikora ce pamusoro-soro cingaitisa kuti munhu ade kudzikhwidziridza uye kurangarira kuti unokosha maningi kudarika amweni ngekuti uno uzii wakakura. Elizabeth wakandibetsera kuti ndihwirirezve kuita zviya zvandaiita kuti ndigare no ushamwari wakabamba na Djehovha. Izvona zvakatora nguwa, asi ndakahwirirazve kugara no ushamwari wakabamba na Djehovha. Parizvino, ndinonyasa kubhuya kuti kugara no uzii wakakura aciropi cinonyaya kukosha mu upenyu. Cinoitisa kuti upenyu ukoshe i kugara no ushamwari wakabamba na Djehovha uye rudo rakakura ku hama no hanzvadzi.
NDECIDZIIRIRA UYE KUITA KUTI BASA RE KUPARIDZIRA RISARAMBIDZWE
Mumasure me kupedza cikora, inini ndakabatikana pakubetsera dhepartamento rinoonerera zve mutemo ku Bheteri uye kudziirira sangano ra Djehovha uye zvido zve Umambo. Basa rangu raipfadza maningi uye nge dii rimweni raindishuphira ngekuti sangano rairumbwa recicinja. Ngo muezaniso, isusu tainga tino musambo we kukumbira mupiro panocokuita no mabhuku edu. Asi muna 1990, hama dzakakumbira nhungamiriro ku dhepartamento redu kuti aziye kuti cinyi caizoitika kana tikaima kukumbira mipiro idzona. Mumasure mazvo, Apupuri a Djehovha akatanga kupasa mabhuku asikakumbiri mipiro. Izvona zvakaita kuti basa redu rireruke uye dakara nyamasi zvinotidziirira kuti tisagare no zvinetso panocokuita no musoho. Anhu anganani airangarira kuti cinjo iyona yaizoita kuti tisagare no mare uye kuti zvaizokuwadza basa re kuparidzira. Asi andizvopi zvakaitika. Kubvira muna 1990, anhu anoseenzera Djehovha atunhudzira maningi uye na nyamasi uno anhu angakwanisa kugara no zvokurhya zvokumwiya asikaripi ciro. Inini ndafundira kuti cinjo mu sangano dzinobudirira nge ndaa ye rubetso ra Djehovha uye no nhungamiriro dzatinotambira no muranda akagondeka.—Eki. 15:2; Mat. 24:45.
Isusu atizi kuwina nyaya idzona ngekuti tino maadhivhogadho akanaka basi. Kakawanda kakhona cinoita kuti tibudirire maitiro edu hinga anhu a Djehovha. Inini ndakaona muezaniso muna 1998 hama dzitatu dze Dare Rinotungamirira no akadzi awo paakapinda gungano rinokosha ku Cuba. Awona akapangidza unaki uye rureremedzo ku anhu ese. Muezaniso wawo wakakosha maningi kudarika musangano upi hawo watakamboita no anyautongi kuti tipangidze kuti takaperera panocokuita no zvematongerhwa e nyika.
Nyaya dze pamutemo dzikatama kugadziriswa zvakanaka, isusu tinoenda mu matribhunari kuti tidziirire uye kuita kuti basa rekuparidzira risarambidzwe. (Afi. 1:7) Ngo muezaniso, ke makore akawanda anyautongi ku Europa uye ku Coreia do Sul ainga asikatendi citenderhwa cedu ce kuramba kuita basa re usurudado. Nge ndaa yazvo, hama dzinokwana kutia 18 000 ku Europa uye dzinodarika 19 000 ku Coreia do Sul, dzakasungwa nge kuramba kuenda ku hondo nge ndaa ye hana yawo.
Muna 7 ya Julho ya 2011, Tribhunari ye ku Europa yakaita cisananguro cinokosha maningi panocokuita no nyaya inozikanikwa kuti Bayatyan vs. Armênia. Nyaya iyona yaibhuya kuti nyika dzese dze ku Europa dzaidikana kupsvaka mabasa amweni ku aya ainga asikadi kueda ku hondo. Cisananguro icona cakaizwawo ku tribhunari yo ku Coreia do Sul muna 28 ya Junyo ya 2018. Izvona zvainga zvisikazoitiki kudai hama dzedu adzizi kurumbwa dzakaperera.
Dhepartamento rinoonerera ngezve no mutemo ku sedhi mundiyari no Mabheteri e nyika dzimweni, arikuseenza ese kuti adziirire citenderhwa cedu cekuseenzera Djehovha uye kuparidzira masoko akanaka e Umambo. Makomborero akakura maningi katiri kuimirira hama no hanzvadzi dzinophikiswa no anyautongi. Kunyazi patisikawini, isusu tiri kupasa upupuri ku anyautongi, ku madzimambo, uye ku anhu e madzinza ese. (Mat. 10:18) Aya anotonga nyaya dze nyika no aimiriri e anyautongi, apeperusi e masoko, kutobatanidza anhu ese kamare, anosoona tsamba dze Bhaibheri dzatinokanda mu madhokumento uye anopurutana zviya zvatinonga tecibhuya patinonga tecifirmarhwi. Akawanda ano mwoyo unoda anotoziya kuti Apupuri a Djehovha ndi api uye anoona kuti zvatinotenda zvinobva mu Bhaibheri. Mugumisiro wakhona ngewe kuti anganani akatosanangura kugara hama dzedu.
MAITA BASA DJEHOVHA!
Mukupera ke makore 40 inini ndakagara no makomborero ekubatikana pa dhepartamento rinoonerera zve mutemo mu Mabheteri e nyika yese uye kupinda mu matribhunari anokosha maningi pamwepo no anhu anokosha. Inini ndinoda maningi uye ndinoreremedza hama dzinoseenza na inini mu Dhepartamento Rinoonerera ngezve Mutemo ku Sedhi Mundiyari pamwepo no madhepartamento amweni anoonerera ngezve mutemo mu nyika yese. Ndinozwa ndakagutsikana uye ndiri kukomborerhwa maningi.
Elizabeth urikurumbwa ecindibetsera akagondeka uye no rudo ke makore aya 45 tiri tese mu nguwa dzakanaka uye dzinoshupha. Ndinomureremedza maningi ngekuti iyena wakaita izvona kunyazi ecibatana no nhenda inomusiya akaremba maningi.
Mu upenyu wedu, takafundira kuti simba uye kukunda a mugumisiropi we zviya zvatinokwanisa kuita. Hingana zvakabhuiwa na Dhavhidhi kuti: “Djehovha i simba re anhu ake.” (Pis. 28:8) Zvezvirokwazvo, “kurhwa nge ka Djehovha.”