Imwimwi “Mungafundira Kugara no Mupfaro” Here?

1. Zvinoda kureyei kugara no mupfaro, uye izvona azvidi kureyei?

IMWIMWI muri kugutsikana here no zviya zvamunazvo? Munhu unogutsikana unogara no mupfaro uye runyararo, uyewo unokanda ndangariro dzake pa makomborero aanawo zvino. Iyena aatsukwari no zviya zvaasina. Ngokudaro, kugara no mupfaro azvirei kuti atidikani kunetseka no mushobo watiri kurarama. Ngo muezaniso, Akristu anoita zviri zvese kuti atunhudzire basa rawo kuna Djehovha. (Aro. 12:1; 1 Ti. 3:1) Kunyazi zvakadaro, Mukristu aaruzi mupfaro nge kuti aaripi kupaswa ubaba waaikarira.

2. Ngei zvino ngozi kutama kugara no mupfaro?

² Kutama kugara no mupfaro kungatiunzira mugumisiro wakashata. Aya asikagari no mupfaro angakwanisa kuseenza nguwa yakawanda kuti agare no zviro zvakawanda zvekunyama zvisikanyanyi kukosha. Zvinotsukwarisa kuti Akristu anganani akatoba mare kamare no zviro zvimweni zvaaida. Pamweni nguwa iyona yaaiba awona airangarira kuti: ‘Icona caidikana kugara cangu,’ ‘ndaetsera ke nguwa yakawanda’ kana kuti ‘ndicaitora mumasure mazvo ndoihwirinza.’ Hino, kuba azvinei nokuti iciro cipi haco, tinonga tisikaripi kureremedza Djehovha uye tinoita kuti iyena atsukware. (Zvie. 30:9) Anhu anganani akatsukwara maningi nge kutama kupaswa ubaba waaida musangano, zvekuti akasiya kuseenzera Djehovha. (Aga. 6:9) Cinyi cinoita kuti munamati wakadzipira kuna Djehovha aite izvona? Cinoitisa ngecekuti pamweni iyena waiima kugara no mupfaro.

3. Cokwadi cipi catinofundira pana Afiripi 4:11, 12?

³ Tese isusu tingakwanisa kugara no mupfaro. Muphostori Pauro wakatara kuti: “Mu zvese uye pa migariro yese ndakafundira zvandingaita.” (Erengai Afiripi 4:11, 12.) Iyena wakatara masoko awona pa nguwa yekuti wainga akasungwa. Kunyazi zvakadaro, aazi kuruza mupfaro. Iyena “wainga afundira kugara no mupfaro no zviya zvaainga anazvo.” Zvakaitika na Pauro zvinopangidza kuti isusu tingakwanisa kugutsikana no zviya zvatinazvo. Atidikani kuetsera kuti mugariro wedu we zviro ugare wakanaka kuti tikwanise kupfara, pane kudaro tinotodikana kufundira kugara no mupfaro. Tingazviita kudini? Ngatione mawara anotibetsera kufundira kugara no mupfaro.

GARAI ANHU ANOTENDA NO ZVIYA ZVAANAZVO

4. Kugara no mwoyo unotenda, kunotibetsera kudini kuti tipfare? (1 Atesaronika 5:18)

⁴ Kugara anhu anotenda kunoita kuti tipfare. (Erengai 1 Atesaronika 5:18.) Ngo muezaniso, kana tikatenda no zviro zvatinazvo mu upenyu, atinetseki no zviro zvatinoda zvekuti atina. Kana tikanyasa kurangarira ngezve basa ratinaro zvino, zvinoita kuti tipase zvakanakisisa zvedo pa basa irona pane kurangarira kuti tinodikana kupaswa basa rimweni. Djehovha anoziya kuti zvinokosha kuti titende, ndiyo ndaa, iyena anotibvunza mu Bhaibheri kuti tinodikana kutenda patinoita minamato! Kugara no mwoyo unotenda, kunotibetsera kuti tizwe “runyararo ra Mwari rinodarika kuzwisisa kese.”—Afi. 4:6, 7.

5. Ngei Aisraeri aidikana kugara anhu anotenda? (Onai mufanikiso.)

⁵ Rangaridzai zvakaitika no Aisraeri. Kakawanda kakhona aigurunguta kuna Djehovha kuti aishoterhwa no zviya zvaairhya ku Edjipitu. (Num. 11:4-6) Izvirokwazvo kuti upenyu wawo ku renje wainga usiripi nyore. Cinyi caizoabetsera kuti apfare? Aidikana kurangarira zviya zvaakaizirhwa na Djehovha. Ku Edjipitu, kuya kaakaseenzeswa hinga aranda, Djehovha akaunzisa matambudziko gumi ku aya aiyatambudza. Mumasure mekubudiswa pa uranda, Aisraeri “akatorera Aedjipitu” prata, oro uye macira. (Eki. 12:35, 36) Paakateerhwa dakara mu Bahari re Kupsvuka, Djehovha akaita cishamiso cekuparadzanisa mvura kuti awona apinde uye paiita rhwendo rawo ku renje, Djehovha aiapasa mazuwa ese zvekurhya zve manaa. Hino cinetso cawo cainga ciri cipi? Aisraeri ainga asikagutsikani haiwa ngokuti aishoterhwa ngezve kurhya asi ngokuti ainga asikatendi no zviya zvaainga anazvo.

6. Mishobo ipi minganani inotibetsera kuti titende ngo zviya zvatinazvo?

⁶ Hino, mungagara kudini munhu unotenda no zvaanazvo? Cekutanga, gadzirirai nguwa mazuwa ese kuti murangarire zviro zvakanaka zvamunopfarira. Imwimwi mungatotarira zviro zviiri kana zvitatu zvamunotenda. (Mari. 3:22, 23) Cocipiri, pangidzai kuti munotenda no zvamunazvo. Tendai zviya zvamunoizirhwa no anhu amweni uye kupinda zvese, tendai Djehovha nguwa dzese. (Pis. 75:1) Cocitatu, sanangurai shamwari dziya dzokuti dzinotenda. Ngekuti kana shamwari dzedu dzikagara anhu asikatendi uye dzecigurunguta nguwa dzese, isusu tingakwanisawo kugara anhu akadaro. Asi kana shamwari dzedu dzikagara anhu anotenda, isusu tingatoitawo zvimwezvo. (Dhe. 1:26-28; 2 Ti. 3:1, 2, 5) Patinopsvaka mikana yo kutenda no zviya zvatinazvo, tinogara anhu asikanyangadzwi ngekuda zviro zvekuti atina.

7. Aci wakaitei kuti apangidze kutenda uye izvona zvakamupasa mugumisiro upi?

⁷ Mishobo ipi minganani yatingapangidza nayo kutenda? Onai zvakaitika na Aci unogara ku Indonesia, iyena unoti: “Mu nguwa yo COVID-19, ndakatanga kuezanisa mugariro wangu no mugariro we hama dzangu dzekutenda. Mugumisiro wakhona ngewe kuti ndakatsukwara.” (Aga. 6:4) Cinyi cakamubetsera kuti acinje marangariro ake? Iyena unoti: “Ndakatanga kuerenga makomborero andaitambira mazuwa ese uye kunyasa kurangarira zviro zvakawanda zvakanaka zvandakatambira nge kuita dii re sangano ra Djehovha. Hino, ndakatenda Djehovha nge zvese izvona. Mugumisiro wakhona ngewe kuti ndakatanga kuzwa mupfaro we zvirokwazvo.” Kana imwimwi mukazwa kutsukwara nge ndaa ye mugariro wenyu we zviro, mungateedzera here muezaniso wa Aci?

DZIDODOSEI

8. Bharuki wakatsukwara ngei?

⁸ Bharuki mutari we muphorofita Djeremiya, wakatsukwara nge ndaa ye mugariro wake. Iyena waidikana kubetsera Djeremiya pakuziisa Aisraeri asikatendi zviya zvaida kuitika kaari nge ndaa yekuti ainga asikazi kuzwira Djehovha. Pano nguwa yekuti Bharuki wakarangarira maningi zvido zvake, pane kurangarira zviya zvaida Djehovha kuti iyena aite. Eciseenzesa muphorofita Djeremiya, Djehovha akati kuna Bharuki: “Iwewe uri kudzipsvakira zviro zvakawanda. Usarumbwe wecipsvaka zviro izvona.” (Djer. 45:3-5) No masoko amweni, Djehovha ainga ecibhuya kuti: “Gutsikana no mugariro wako we zvino.” Bharuki wakapurutana zvaakabvunzwa na Djehovha uye wakarumbwa ari shamwari ya Djehovha.

9. Maererano na 1 Akorinti 4:6, 7, kudzidodosa kunotiitisa kuti tiziyei? (Onaiwo foto.)

⁹ Nguwa dzimweni, Mukristu ungazwa akasisira kugara no ubaba. Iyena ungakwanisa kunyasa kuita zviro, kuseenza zvakanaka kana kuti kugara no maesperiensiya akawanda, pamweni kutogara no zviro zvese zvitatu. Asi pamweni, amweni angatambira ubaba iwona kamare waaida. Iyena unodikana kuedzurirei pa mugariro uwona? Iyena unodikana kuedzurira ngezve zviya zvakatara muphostori Pauro pana 1 Akorinti 4:6, 7. (Erengai.) Ubaba wese watinotambira uye zvese zvatinokwanisa kuita zvinobva kuna Djehovha. Djehovha aatipasi zviro izvona ngekuti takakhwirira kupinda amweni. Pane kudaro, Djehovha anotipasa izvona ngekuti anotida maningi uye akanaka maningi.—Aro. 12:3, 6; Aef. 2:8, 9.

10. Tingasakurira kudini kudzidodosa?

¹⁰ Tingasakurira kudzidodosa nge kunyasa kurangarira muezaniso wakatipasa Djesu. Onai zvakaitika pa usiku wekuti Djesu akasuka mirenje ye aphostori ake. Muphostori Juau wakatara kuti: “Djesu aizviziya kuti Baba ainga akanda zviro zvese mu nyara dzake uye kuti iyena ainga abva kuna Mwari uye kuti aienda kuna Mwari, . . . akatanga kusuka tsoka dze afundi.” (Juau 13:3-5) Djesu angadai arangarira kuti aphostori ake ndiwo aidikana kusuka murenje dzake. Asi pa nguwa yese yaakararama pa nyika, iyena aazi kumborangarira kuti aidikana kurarama upenyu wakakwirira. (Ruka 9:58) Djesu aidzidodosa uye iyena aipfara. Iyena akatisiira muezaniso wakakwana.—Juau 13:15.

11. Kudzidodosa kakabetsera kudini Dennis kuti azwe mupfaro?

¹¹ Dennis we ku Holanda wakaedza kuteedzera muezaniso wa Djesu we kudzidodosa asi zvainga zvisiripi nyore. Iyena unoti: “Nguwa dzimweni, ndinozwa mazwiro e kudzikudza uye kutsukwara kecikura kandiri. Ngo muezaniso, amweni paanotambira ubaba we kuseenza mu basa ra Djehovha. Izvona pazvinoitika, inini ndinofunda nyaya inocokuita no kudzidodosa. Mu JW Library^® ndakakanda pamhene tsamba dzinocokuita no kudzidodosa kuti ndizodzione nokukasika kuti ndi erenge. Ndakacitisa mu foni mangu mharidzo dzinocokuita no kudzidodosa uye ndinosogara ndecidzipurutana.a Ndakafundira kuti mabasa ese atinoita ngee kuti tikudze Djehovha haiwa isusu kamare. No unaki, Djehovha anotendera kuti umwe na umwe wedu aite mabasa asi iyena ndiye anoita kuti basa irona rinyase kubudirira.” Kana imwimwi mukatanga kutama kuzwa mupfaro pa zviya zvamunonga meciita, tangai kusakurira cido co kudzidodosa. Izvona zvicabambisa ushamwari wenyu na Djehovha uye zvicamubetserai kuzwa mupfaro.—Tig. 4:6, 8.

KANDAI NDANGARIRO DZENYU PA KARIRO YE RAMANGWANA

12. Ikariro ipi yatinayo mune ramangwana inotibetsera kuti tipfare? (Isaya 65:21-25)

¹² Tinozwa mupfaro wakakura patinonyasa kurangarira ngezve kariro inoshamisa yatinayo mune ramangwana. Mu bhuku ra isaya, Djehovha anotibvunza kuti iyena anozwisisa kuti isusu tino matambudziko akawanda uye anotigondesa kuti acabvisa matambudziko awona. (Erengai Isaya 65:21-25.) Ticagara no nyumba dzakanaka uye dzakacengeteka, ticagara no basa rakanaka, zvokurhya zvinopasa uthongo uye zvinonaka maningi. Atizonetsekizve nge ndaa ye zviro zvakashata, katiri uye ku ana edu. (Isa. 32:17, 18; Ezek. 34:25) Ramangwana redu rakagondeka uye ricadzadzika.

13. Matambudziko api atinawo zvino uye kurangarira ngezve kariro yatinayo mune ramangwana kunotibetsera kudini?

¹³ Kubvira zvino kuenda mberi, ngei tinodikana kukanda ndangariro dzedu pa kariro? Ngekuti tiri kurarama mu mazuwa ekupedzesera uye tese isusu tino zvinetso ‘zvinoshupha kushingirira.’ (2 Ti. 3:1) Zuwa no zuwa, Djehovha anotibetsera kushingirira, anotipasa nhungamiriro, anotipasa simba uye anotitsigira. (Pis. 145:14) Kusiya izvona, kariro yedu inotibetsera pa nguwa inoshupha. Pamweni imwimwi muri kunetseka kuti muriritire mhuri yenyu. Izvona zvinoda kureya kuti imwimwi mucandorumbwa mecirhwisa kuti murarame? Zvezvirokwazvo haiwa. Djehovha akagondesa kumupasai zvamunoda zvino, uye mune ramangwana mu Paraizo. (Pis. 9:18; 72:12-14) Pamweni imwimwi muri kubatana no nhenda isikarapiki, dhepresau kana kuti zviro zvimweni zvinomusiyai makaremba. Kodi mucandobatana nazvo kuenda no kwenda here? Haiwa. Nhenda uye rufu zvicapera mu nyika ipsva ya Mwari. (Zvak. 21:3, 4) Kariro iyona inotibetsera kuti tisanyangadzwe uye tisagare no shungu ngo zviro zvatiri kubatana nazvo zvino. Tingazwa mupfaro kunyazi tecibatana no zviro zvisina unatsi, kuruza zviro, nhenda kana kuti zviro zvimweni. Ngei? Ngokuti azvinei no zvatiri kubatana nazvo zvino, tinoziya kuti ‘matambudziko atinawo ngee nguwa doko’ uye mu nyika ipsva aticazotambudzikizve.—2 Ako. 4:17, 18.

14. Tingabambisa kudini kariro yedu?

¹⁴ Sezvo kariro yedu inokosha maningi kuti tipfare, hino tingaibambisa kudini? Kuita hingana munhu ungada kupfeka maokro kuti anyase kuona zviro zviri kure nge mushobo wakadjeka, isusuwo pamweni tingada zviro zvingabambisa kariro yedu uye kuona Paraizo zvakadjeka. Ngo muezaniso, patinonetseka nge kutama mare kuti tirarame, tingarangaridza kuti upenyu ucange wakadini mu Paraizo mekuti tinonga tisikadi mare uye apana unonga ari murombo. Kana tikanetseka nge ndaa ye basa ratisati tapaswa, tingarangarira kuti izvona azvikoshi teciezanisa no upenyu wakakwana unoshamisa waticagara nawo. (1 Ti. 6:19) Isusu tinonetseka maningi no zviro zvatiri kubatana nazvo zvino, zvekuti zvingatishuphira kurangarira ngezve zviro zviri kugondeswa mune ramangwana. Asi tikakanda ndangariro dzedu pa ramangwana rinoshamisa ratiri kugondeswa na Djehovha, zvicagara nyore kuzvirangarira pane kurangarira zvinetso zvedu.

15. Zvinyi zvamafunda no zvinobhuiwa na Christa?

¹⁵ Onai kuti kariro yakabetsera kudini Christa mukadzi wa Dennis, watambobhuya pa ndima dzadarika. Iyena unoti: “Inini ndino nhenda inoita kuti mwiri wangu urhwadze maningi zvekuti ndinogara ndakaremba. Andikwanisi kuhamba asi ndinohamba no kadera ye marodha uye nguwa dzese ndinogara ndindori pakama. Mazuwa ese ndinonga ndecirhwadziwa, medhiko wangu wakandibvunza kuti andicatambi. Asi nokukasika ndakarangarira kuti: ‘Iyena unoona ramangwana nge mushobo wakasiyana na inini.’ Inini, ndinokanda ndangariro dzangu mune ramangwana uye izvona zvinondipasa runyararo re mu mwiya. Nyamasi uno, inini ndinodikana kushingirira mu nyika ino, asi ndicanyasa kukhorovhera upenyu mu nyika ipsva!”

“APANA CINOSHOTA KU AYA ANOMUSEENZERA”

16. Ngei Mambo Dhavhidhi akatara kuti aya anoseenzera Djehova “apana caanoshoterhwa”?

¹⁶ Kunyazi patinonga tecipfara ticandobatana no matambudziko. Mambo Dhavhidhi wakafirhwa no ana anokwana kuita atatu. Anhu anganani akamupumha kuti iyena wainga waita zviro zvekuti iyena wainga asikazi kuita. Shamwari dzake dzakamupandukira uye mambo Sauri wakaedza kumuuraya uye kumuteerera ke makore akawanda. Kunyazi ecibatana no zvese izvi, iyena wakati ngezva Djehovha: “Aya anomuthya apana caanoshoterhwa.” (Pis. 34:9, 10) Ngei iyena wakabhuya izvona? Ngekuti iyena waiziya kuti kunyazi Djehovha ainga asikaiti kuti iyena asabatane ne matambudziko, nguwa dzese aizomupasa zviya kamare zvaaida. (Pis. 145:16) Hingana Dhavhidhi tingagonda kuti Djehovha acatibetsera kuti tigare anhu akagondeka patinonga tecibatana no matambudziko. Tingakwanisa kupfara.

17. Ngei imwimwi munoda kupfara?

¹⁷ Djehovha anoda kuti imwimwi mupfare. (Pis. 131:1, 2) Hino petai masimba kuti imwimwi mupfare. Kana imwimwi mukapeta masimba kuti mugare munhu anotenda no zviya zvaanazvo, kurumbwa mecidzidodosa uye kubambisa kariro yenyu, mucabhuya kuti: “Honde ndiri kupfara.”—Pis. 16:5, 6.