Mwari Anoreketa na Mozesi pa Pfiba Raibaka

Mozesi wakararama ku Midhiyani ke makore 40. Ikona, iyena wakawaka uye wakabara ana. Zuwa rimweni iyena wainga ari dhuze no Dunhu re Sinai ecicengeta mabira ake. Hino iyena wakaona ciro caishamisa. Pfiba raibaka asi rainga risikapsvi! Mozesi wakada kuzviona nge padhuze kuti zvinyi zvaiitika. Paakakhwedera dhuze no pfibero, wakazwa izwi reciti: ‘Mozesi! Ima pauripo. Reremedza mbuto yauri kutsika uye khumura masandarya ako.’ Ainga ari Djehovha aireketa na Mozesi, eciseenzesa ngirozi.

Mozesi wakathya maningi uye wakafukidza hope yake. Djehovha akati: ‘Inini ndinozviziya kuti Aisraeri ari kushuphika maningi. Inini ndicaatora ese kuti aende koorarama ku mbuto yakanaka maningi. Awona aacagarizve aranda e Aedjipitu uye inini ndasanangura iwewe kuti uende koodusa anhu angu ku Edjipitu.’ Mozesi pamweni wakathya maningi Djehovha paakamubvunza izvona. Ndiyo ndaa, iyena wakabvunzisa kuti: ‘Kana Aisraeri akabvunzisa kuti ndiani wandituma, ndicaadaira kudini?’

Djehovha akamubvunza kuti: ‘Abvunze kuti Djehovha, Mwari wa Abrahamu, wa Izaki uye Mwari wa Djakobo, ndiye akutuma kaari.’ Mozesi wakati: ‘Asi kana awona akatama kutenda zvandicaabvunza?’ Sezvo Mozesi wainga aciri kuthya, Djehovha akasanangura kumupasa cipangidzo caizomubetsera. Iyena akabvunza Mozesi kuti akhandire ndonga yake pasi. Ndongeyo payakambwera pasi, yakacinja yogara nyoka! Mozesi paakaibata no pa mushwe, iyona yakacinja yogarazve ndonga. Djehovha akamubvunzazve kuti: ‘Kana Aisraeri akakuona weciita izvi, acatendera kuti ndini ndakutuma.’

Mozesi wakati: ‘Tenzi, kandiri zvinoshupa kureketa pakadzara anhu.’ Djehovha akamubvunza kuti: ‘Inini ndicakubvunza zvaunodikana kureketa uye hama yako Aroni inonga inewe.’ Parizvino, Mozesi wainga ano rugondo rokuti Djehovha aizomubetsera, hino iyena wakatora mukadzi wake no ana ake uye wakahwirira ku Edjipitu.