Ngirozi Gabriyeri Inovhakacira Mariya

Pano musikana umweni we cidjaha waizwi Mariya, waigara ku thaundi re Nazareta ku Garireya. Iyena wainga ari we mhuri ya Erizabheti uye wainga akagondesana kuwakana no karpintero waizwi Zuzee. Erizabheti paainga ano pamwiri pe mwedzi inokwana kuita 6, ngirozi Gabriyeri yakaenda kooreketa na Mariya. Uye iyona yakabvunza Mariya kuti: ‘Unotamba here Mariya? Djehovha akupfarira maningi.’ Mariya aazi kunyasa kuzwisisa kuti ngirozi yaida kureyei. Hino ngirozi yakamupanganidzira kuti: ‘Iwewe ucagara no mwana, uye iyena acazwi Djesu. Iyena acagara Mambo we Umambo wekuti ucagara nokusikaperi.’

Asi Mariya wakanetseka ngekuti wainga ari mhandwe. Iyena waizogara kudini no mwana? Ngirozi Gabriyeri yakati: ‘Mariya, kuna Djehovha apana cisikaitiki. No simba Rake, iwewe ucagara no mwana. Erizabheti umwe we mu mhuri yako utoriwo no pamwiri.’ Mariya wakabvunza ngirozi kuti: ‘Zvakanaka. Ngazviitike kandiri maererano no zvinodiwa na Djehovha.’

Hino, Mariya wakaenda koovhakacira Erizabheti. Asi Mariya paakabhuya naye, Erizabheti wakazwa mwana ecitamba-tamba. Uye wakabhuya kuti: ‘Mariya, iwewe uri mwanakadzi wakakomborerhwa na Djehovha. I mupfaro kandiri kutambira mai a Mesiya.’ Mariya wakadaira eciti: ‘I zvirokwazvo Erizabheti, inini ndinotenda maningi Djehovha nge ndaa yazvo.’ Mariya wakagara kumba ka Erizabheti ke mwedzi mitatu, pedzepo wakazohwirira kumba ku Nazareta.

Zuzee paakaziya kuti Mariya wainga ano pamwiri, iyena wakarangarira kumuramba. Asi iyena wakarota ngirozi ya Djehovha yecimubvunza kuti: ‘Usathye kuwakana na Mariya. Iyena aazi kuita ciro cakashata.’ Hino, Zuzee wakawakana na Mariya uye wakamutora oenda naye kumba kake.