Djesu Anohamba Pamusoro pe Mvura

Pane basi kurapa uye kumutsa akafa, Djesu aionererawo dutu uye mvura. Mumasure mekuti Djesu aenda ku dunhu kuti aite munamato, Djesu akaringira Bahari ro Garireya uye akaona kuti kaitanga kuita dutu. Ipona, iyena akaona aphostori ake mu bharko ecicapa no simba rese kuti akunde mhepo. Djesu akacita kubva mu dunhu uye akahamba pamusoro pe mvura dakara aguma kuno bharko. Aphostori paakaona munhu ecihamba pamusoro pe mvura, awona akathya maningi. Asi Djesu akaabvunza kuti: ‘Ndini. Musathye!’

Pedru wakadaira eciti: ‘Tenzi kana muri imwimwi, itai kuti ndiuye kamuri.’ Djesu akabvunza Pedru kuti: ‘Uya.’ Hino, dutu recivhuvhuta no simba, Pedru wakabuda mu bharko wotanga kuhamba no pamusoro pe mvura ecienda kuna Djesu. Asi paakaguma dhuze na Djesu, Pedru wakaringira dutu uye wakatanga kuthya. Ipona, iyena wakatanga kundondomera. Pedru wakadainzira eciti: ‘Tenzi, ndiponeseiwo!’ Djesu akabata nyara ya Pedru uye omubvunza kuti: ‘Ngei wathya? Kutenda kako kuripi?’

Mumasure mekuti Djesu na Pedru akwira mu bharko, dutu rakaima. Rangaridzai kuti aphostori akazwa kudini paakaona zviro izvi? Awona akabhuya kuti: “Zvezvirokwazvo imwimwi muri Mwana wa Mwari.”

Apa andipopi basi pakaonerera Djesu mugariro we kunza. Zuwa rimweni, Djesu uye no aphostori ake ainga ari mu bharko uye iyena akaenda koowata. Paainga eciwata, kakatanga kuitika dutu rakakura. Uye mafungo aiponda bharko, zvekutoti bharko rainga raakutanga kudzara no mvura. Aphostori akamutsa Djesu ecikhuwa eciti: ‘Tenzi amuripi kuona kuti taakuda kufa! Tibetsereiwo!’ Iyena akamuka uye akati ku bahari: “Nyarara!” Ciriporipoco dutu rakaima. Djesu akabvunzisa aphostori ake kuti: ‘Amusati maano kutenda here?’ Hino aphostori akabvunzana pacawo eciti: “Kunyazi dutu no bahari zvinomuzwira.” Ngokudaro, aphostori akafunda kuti apana caaidikana kuthya kana akagonda Djesu no mwoyo wese.