Djesu Anohwirira Kudenga

Djesu akaenda koonana no afundi ake, ku Garireya. Ikona, iyena akaapasa basa rinokosha uye akati: ‘Endai mooita kuti anhu e mbuto dzese agare afundi angu. Afundisei zvese zvandakamufundisai uye abhabhatidzei.’ Djesu akaagondesa kuti: ‘Ndicarumbwa ndinemwi.’

Mumasure me mazuwa 40, Djesu akadzipangidza ku afundi ake ku Garireya uye ku Djerusarema. Iyena akafundisa afundi ake fundo rinokosha uye akaita zvishamiso zvakawanda. Djesu akati ku aphostori ake: ‘Musabude ku Djerusarema. Rumbwai mecietsera Mwari kuti aite zviya zvaakagondesa.’

Pa nguwa iyona Aphostori aazi kunyasa kuzwisisa zvaida kubhuiwa na Djesu. Pedzepo, Djesu akasongana no aphostori ake kekupedzesera ku Dunhu re Miorivhi. Awona akabvunzisa kuti: ‘Tenzi, mucagara Mambo we Israeri here?’ Asi Djesu akapanganidza kuti: ‘Kuna Djehovha aisati yaguma nguwa yekuti ndigare Mambo. Nokukasika imwimwi mucatambira mwiya mucena uye mucagara apupuri angu. Paridzirai ku Djerusarema, ku Djudhiya, ku Samariya dakara ku mbuto dziri kure ke nyika.’

Hino Djesu akatanga kukwira ecienda kudenga. Ipona, makuta akamufukidza uye afundi ake aazi kukwanisazve kumuona.

Afundi ake akabuda ku Dunhu re Miorivhi uye akaenda ku Djerusarema. Nguwa dzese awona aiungana uye ainamata ecietsera kuti Djesu aabvunze zviro zvaaidikana kuita.