Tingaseenzesa Kudini Makani e Kuezanisira

Kubvira mu mwedzi wa Mavhiza we gore ra 2018, makani e kuezanisira akatanga kubudiswa pa pajina yokutanga yo Urongwa we Musangano—Basa Redu uye Kurarama Kedu ke CiKristu. Makani aya angaseenzeswa kudini?

Kana Mukadomwa kuti Muite Dii pa Musangano: Munodikana kuseenzesa mubvunzo, tsamba no shwiro inoteera yo makani e kuezanisira. Kunyazi hazvo tecidikana kuseenzesa makani e kuezanisira, izvi azvirei kuti ticateedzera zvese zvinonga zvabudiswa pa vhidhiyo. Imwimwi mungaseenzesa mukhaindi umweni we kucedzesana, mukhaindi umweni we kutanga makani no zvimweniwo zvakasiyana-siyana. Imwimwi mungakwanisawo kupasa bhuku re mu Bhokisi re Mafaramenta e Kufundisa, kunyazi pasikazi kududzwa bhuku rinodikana kupaswa samuzi.

Kana Muri mu Basa re Kuparidzira: Makani e kuezanisira anotibetsera kuti tione mushobo we kuzviita. Kana tikaparidzira munhu uye iyena opangidza kuti azvipfarira zve zvirokwazvo uye kuti anoda kuziya zvakawanda, imwimwi mungaenderera mberi no makani, pamweni meciseenzesa makani e pamunohwirira. Imwimwi mungakwanisa kucinja makani e kuezanisira kana kutoseenzesa makani amweni akasiyana. Mungaseenzesa here makani e kuezanisira e mwedzi dzapinda? Kamunogara kuno zviro zvinosoitika zvekuti anhu anosopfarira kureketa nge zvazvo here? Pasinei no mushobo wamucaseenzesa makani e kuezanisira, cido cenyu cinodikana kugara ce ‘kuita zviri zvese ngo ndaa ye masoko akanaka, kuitira kuti muaziise amweni.’—1Ako 9:22, 23.