Ngei Mwari Asikadairi Minamato Yese?

“Paunonga wecinamata, usaphinde-phinde zviro zvimwezvo.”—Mateu 6:7.

Djehovha aadi kuzwa minamato inoita zve kukandwa mu ndangariro kana kuti inoita zve kuerengwa mu bhuku re minamato. Pane kudaro, iyena anoda kuti masoko edu abve mukati me mwoyo. Cimborangaridzai mushobo wamaizozwa kudai shamwari yenyu ikauya kooreketa nemwi yeciseenzesa masoko amwewo basi zuwa no zuwa. Zviri pamhene kuti mainga musikazozvipfariri, andizvopi? Shamwari dzakanaka dzinoreka masoko anobva mukati me mwoyo uye dzinozwa dzakasudzunuka ku umwe na umwe wadzo. Patinonamata kuna Mwari ngezve zviro zvatiri kuzwa, teciseenzesa masoko edu kamare, tinopangidza kuti tinoda kugara shamwari dzake.

“Pamunokumbira amupaswi, ngokuti imwimwi muri kukumbira no cinangwa cakashata.” —Tiyago 4:3.

Atingaetseri kuti Mwari adaire minamato yedu kana tikakumbira ciro caasikapfariri. Ngo muezaniso, Bhaibheri rinosiya pamhene kuti Mwari aapfariri makaro uye kuti isusu atidikani kutendera zviro zvinocokuita no zvemasarapita, zvakadai hingana sorti yakanaka. Hino, kana munhu akabheca uye onamata kuti agare no sorti yakanaka, kodi Djehovha aizotendera here mukumbiro uu? (Isaya 65:11; Ruka 12:15) Zviri pamhene kuti Djehovha aazodairi minamato yakadaro! Kuti Mwari apurutane minamato yedu, zvatinokumbira zvinodikana kuenderana no zvinobhuiwa no Bhaibheri.

“Uya anoramba kuzwira mutemo, munamato wake unonyanyasa kuna Mwari.”—Zvierengo 28:9.

Mu nguwa yo Bhaibheri, Mwari ainga asikadairi minamato ye uya airamba kuzwira mitemo yake ye unatsi. (Isaya 1:15, 16) Kunyazi mazuwa ano, iyena aazi kucinja. (Marakiya 3:6) Kana tecida kuti Mwari adaire minamato yedu, tinodikana kupeta masimba kuti tizwire mitemo yake. Zvakadini kana kareko isusu takaita ciro cakashata? Zvinoda kureya kuti Djehovha aazombopurutani minamato yedu here? Haiwa! Mwari angatirekerera kana tikasiya kuita zviro zvakashata uye topeta masimba kuti tiite zviro zvakanaka.—Zviito 3:19.