Hama Mbiri Dzipsva dze Dare Rinotungamirira

MUNA 5 YA OTUBRO YA 2024, pakaizwa ciziiso cinokosha maningi pa musangano we pa gore. Ciziiso icona caibhuya kuti Hama Jody Jedele uye Jacob Rumph ainga agadzwa kuti agare nhengo dze Dare Rinotungamirira re Apupuri a Djehovha. Hama mbiri idzi, dziri kuseenza dzakatendeka kuna Djehovha ke makore akawanda.

Hama Jedele akabarirhwa ku Missouri, Estados Unidos da America uye akarererhwa mu cokwadi. Mhuri yawo yaigara mu ndima mekuti mainga musikaparidzirhwi maningi. Nge kudaro, awona akaziya hama dzakasiyana-siyana dzakaenda ikona kooparidza masoko akanaka. Rudo rainga rino hama dziya uye rubatano, zvakaita kuti hama Jedele ashamisike maningi. Awona akabhabhatidzwa muna 15 ya Otubro ya 1983. Awona aipfarira maningi kuparidzira uye mumasure me kupedza cikora, akatanga kuseeenza hinga mupiyonero we nguwa dzese muna Setembro ya 1989.

Pa udjaha wawo, abereki awo aiatora pamwepo no munukuna wawo we mwanakadzi kuti aende koovhakacira Bheteri. Izvona zvakaita kuti awona no munukuna wawo ade kuseenza ku Bheteri. No kuhamba ke nguwa, awona ari airi akazokwanisa kuseenzera ikona. Hama Jedele akaguma ku Bheteri ro ku Wallkill muna Setembro ya 1990. Pakutanga awona akaseenza mu Dhepartamento ro Kucenesa uye mumasure mazvo mu Dhepartamento Rinoonerera ngezve Uthongo.

Pa nguwa iyona, ungano dze padhuze dze mureketero we Espanhola dzaikura uye dzaida rubetso re hama. Hino, Hama Jedele akaenda ku imwe yakhona uye akatanga kufundira mureketero we Espanhol. Paapadarika nguwa doko, awona akaziyana na hanzvadzi Damaris, ekuti ainga ari mupiyonera mu nharaunda imweyo. No kuhamba ke nguwa akacata uye akaseenza ese ku Bheteri.

Mu gore ra 2005, awona akasiya kuseenzera mu Bheteri kuti aende koocengeta abereki awo akatendeka. Pa nguwa iyona, awona aiseenza hingana mapiyonero e nguwa dzese. Hama Jedele akabetsera pa kugara hingana mufundisi we cikora ce mapiyonero uye akaseenza mu Comissão de Ligação com Hospitais uyewo mu Comissão Regional de Construção mu nharaunda mawo.

Muna 2013, Hama Jedele na hanzvadzi Damaris, akapikwazve kuti ahwirire ku Bheteri kuti aseenze pa projecto ye kuwaka ku Warwick. Kubvira ipona, awona akaseenzawo ku Patterson ku Wallkill. Hama Jedele akaseenza mu Dhepartamento ro Projeto/Construção Local uye Serviços de Informações Hospitalares. Muna Marso ya 2023, akagadzwa kuti agare Mubetseri we Dare re Basa. Paanoedzurira ngezve mabasa awo, awona anoti: “Pamunopaswa mabasa mapsva, nguwa dzimweni imwimwi mungazwa makaremerhwa. Asi ndipona pamunodikana kuedzurira kugonda Djehovha ngekuti ndiyena anoita kuti zviitike.”

Hama Rumph akabarhwa ku California, ku Estados Unidos da America. Pa udoko wawo, mai akhona ainga asikacaiti mabasa e kunamata, asi akapeta masimba kuti aafundise zvokwadi zve Bhaibheri. Uyewo makore ese iwona aivhakacira mbia awo ekuti ainga ari Mupupuri wa Djehovha wakatendeka. Mbiyewo akabetsera Hama Rumph kuti asakurire cido mu cokwadi. Uye paainga ano makore 13 ekubarhwa iwona akakumbira fundo yo Bhaibheri. Muna 27 ya Setembro ya 1992 pa udjaha wawo, iwona akabhabhatidzwa. Zvinopfadza ngezve kuti mai akhona akahwirirazve kuita mabasa ekunamata uye mhuri yawo yese yakatanga kubudirira pakunamata uye yakabhabhatidzwa.

Pa udjaha wawo, Hama Rumph akaona kuti mapiyonero ainga ecipfara maningi. Nge kudaro, mumasure me kupedza cikora, iwona akatanga kuseenza hingana mupiyonero muna Setembro ya 1995. Muna 2000 akaenda ku Equador kuti aseenze kunodiwa aparidzi akawanda. Ikona akaziyana na Inga mupiyonera we ku Canadá, uye nokuhamba ke nguwa akawakana. Awona akatanga upenyu wawo hinga kazado eciseenza ku thaundi rimweni rinogara ku Equador rainga rino aparidzi padoko. Nyamasi uno raano ungano iri kubudirira maningi.

No kuhamba ke nguwa, Hama Rumph no mukadzi wawo akagadzwa hinga mapiyonero espesiyari uye mumasure mazvo aonereri e nharaunda. Muna 2011 akapikwa mu turma 132 ye Giriyadhi. Mumasure me cikora akaseenza mu mbuto dzakasiyana-siyana dze nyika uye akaseenza mabasa akasiyana-siyana akaita hingana basa re Bheteri, basa re umisionariyo uye basa re mu nharaunda. Hama Rumph akagarawo no makomborero ekugara Mufundisi we Cikora ce Aziisi e Umambo.

Nge ndaa ye pandemiya ya COVID-19, Hama Rumph no mukadzi wawo akahwirira ku Estados Unidos. Awona akapikwa kuti aende ku Bheteri re Wallkill, kekuti Hama Rumph akarowedzwa kuti aseenze mu Dhepartamento Rinoonerera ngezve Basa. Paapadarika nguwa, akagadzwa kuti ahwirirezve ku Equador kekuti Hama Rumph akaseenza mu Dare re Firiyari. Muna 2023 akaenda ku Warwick. Mu Janero ya 2024 Hama Rumph akagadzwa kuti aseenze hinga Mubetseri we Dare re Basa. Paanoedzurira ngezve mu mbuto maakaseenzera, iwona anoti: “Ciro cinoita kuti basa rikoshe aimbutopi yatinoseenzera, asi ndi anhu atinoseenza nawo.”

Tinotenda maningi no basa re hama idzi dzinoseenza no simba, uye ‘tinorumbwa tecikoshesa anhu akaita hinga aya.’—Afi. 2:29.