Kumutswa ka Djesu

Mumasure me kufa ka Djesu, mwanarume wainga akapfuma waizwi Zuzee wakaenda kuna Pirato uye wakakumbira kuti aduse mutumbi wa Djesu pa mutanda. Hino, Zuzee wakaputiridza mutumbi wa Djesu mu djira no mafuta anonuhwirira. Ipona, iyena wakakanda mutumbi wa Djesu mu guwa uye wakafunga no buwe rainga rakakura maningi. Mumasure mazvo, akuru no apristi akaenda koobvunza Pirato kuti: ‘Tiri kuthya kuti anhu uye afundi amweni a Djesu acauya otora mutumbi wake ozobhuya kuti amutswa kubva ku akafa.’ Hino, Pirato wakadaira kuti: ‘Namai guwero uye mokanda arindi kuti aririnde.’

Papera mazuwa matatu, aciri macibese, Mariya Madharena no anakadzi amweni akaenda ku guwa. Ikona, akaona kuti kainga kuno munhu wainga abvisa buwe rainga riri pa musuwo. Paakapinda mu guwa, akaona ngirozi uye iyona yakati: ‘Musathye. Djesu amutswa. Endai koobvunza afundi ake kuti aende ku Garireya kuti asongane naye.’

Izvona pazvaiitika, Mariya Madharena wainga atogogoma koopsvaka Pedru na Juau. Paakaaona, iyena wakati: ‘Pano munhu watora mutumbi wa Djesu!’ Pedru na Juau akaenda no kukasika ku guwa. Paakaguma kweneyo, akaona kuti guwero rainga risina ciro uye awona akahwirira kumba kawo.

Mariya paakahwirira ku guwa, iyena wakaona ngirozi mbiri mu guwemo, wakati kadziri: ‘Andizii kuti akandepi Tenzi wangu’. Ipona, iyena wakaona mwanarume umweni uye wakarangarira kuti wainga ari muonereri we munda. Mariya wakati kaari: ‘Ndapota, ndibvunzei! Djesu mamukandepi?’ Asi mwanarumewo paakadainza kuti: “Mariya!” iyena akabva aziya kuti ainga ari Djesu. Ipona, akadainza eciti: ‘Mufundisi’ uye akabva amukhumbatira. Djesu akabvunza Mariya kuti: ‘Enda oobvunza hama dzangu kuti wandiona.’ Hino, iyena wakaenda ecigogoma koobvunza afundi ake kuti iyena wainga aona Djesu.

Pa nguwa yakazoteera, afundi ake airi aienda ku mbuto yaizwi Emausi. Mwanarume umweni wakatanga kuhamba nawo uye wakaabvunzisa kuti ainga ecicedza ngezvei. Awona akati: ‘Imwimwi amuzvizi here? Mazuwa matatu akadarika, akuru no apristi akauraisa Djesu. Zvino anakadzi amweni arikubhuya kuti iyena aa mupenyu!’ Mwanarumewo akabvunzisa kuti: ‘Asi imwimwi amutendi ku aphorofita here? Awona akabhuya kuti Djesu aizofa uye aizomutswa.’ Mwanarumewo wakarumbwa ecipanganidza masoko a Mwari ku afundi a Djesu. Hino, awona akaenda koorhya ese. Asati arhya pau, mwanarumewo wakaita munamato. Pa nguwa iyona, afundi akaziya kuti iyena ainga ari Djesu. Asi ciriporipoco iyena wakangara-ngara.

Afundi aya airi akagogoma kuenda ku Djerusarema kainga kuno aphostori uye akaabvunza zvainga zvaitika. Asikakariri, Djesu akaguma mu nyumba yaainga ari. Pakutanga, awona ainga asikatenderi kuti ainga ari Djesu. Hino, Djesu akati: ‘Ringirai nyara dzangu uye ndibatei. Zvakatarhwa mu Soko ra Mwari kuti Kristu aizofa uye aizomutswa kubva ku akafa.’