Gondeso kuna Djehovha

Paa padarika mwedzi miiri Aisraeri paakabuda ku Edjipitu, awona akaguma dhuze no Dunhu re Sinai uye akagara ikona ke cinguwa. Ipona, Djehovha akatuma Mozesi kuti akwire mu Dunhu re Sinai uye akamubvunza kuti: ‘Inini ndakaponesa Aisraeri. Kana awona akandizwira, awona acagara anhu angu anokosha.’ Mozesi wakacita mu dunhu uye wakapanganidzira Aisraeri zvese zvaainga abvunzwa na Djehovha. Awona akadaira kudini? Awona akadaira kuti: ‘Ticaita zvese zvatabvunzwa na Djehovha kuti tiite.’

Mozesi wakakwirazve mu Dunhu re Sinai. Djehovha akamubvunza kuti: ‘Ndicareketa no Aisraeri mumasure memazuwa matatu. Abvunzei kuti asakwire mu Dunhu re Sinai.’ Mozesi paakacita mu Dunhu re sinai, iyena wakabvunza Aisraeri kuti agadzirire ngekuti Djehovha ainga ano ciro cinokosha cekuti aabvunze.

Pakadarika mazuwa matatu, Aisraeri akaona mheni uye makuta ekusvipa ecifukidza dunhu re Sinai. Awona akazwawo mheni dzecitinhira maningi uye kurira ke mabhuzina. Pedzepo, awona akaona muriro wecibva mu dunhu. Paakaona zvese izvi Aisraeri akatanga kuthya maningi. Dunhu re Sinai rakadzara no cutsi uye rakatekenyeka maningi, kurira ke bhuzina kakatunhudzirika. Hino, Aisraeri akazwa izwi ra Mwari recibva pakati pe muriro, reciti: ‘Ndini Djehovha. Imwimwi amudikani kunamata anamwari amweni.’

Mozesi wakakwirazve mu Dunhu re Sinai uye Djehovha akabhuya mitemo yekuti Aisraeri aidikana kuizwira. Mitemo iyona yaibhuya kuti Aisraeri aidikana kunamata kudini Mwari. Yaipanganidza zviya zvaidikana kuizwa no Aisraeri uye zviya zvaainga asikadikani kuita. Mozesi wakatara zvese uye wakaerengera Aisraeri mitemo. Pedzepo, Aisraeri akagondesa kuti: ‘Djehovha, isusu ticaita zvese zvamabhuya.’ Kodi awona akaita zvese zvaakagondesa here?