Djehovha Acadaira Minamato Yangu Here?

1-2. Ngei nguwa dzimweni tingarangarira kuti Djehovha aaripi kudaira minamato yedu?

Pisarema 37:4 inoti:“Gumira mupfaro mukuru kuna Djehovha, uye iyena acakupasa zvinodiwa no mwoyo wako.” Ici cipikirhwa cakanaka maningi! Asi tinodikanadi kuetsera kuti Djehovha atipase zvese zvatinomukumbira? Ngei tecidziita mubvunzo uwona? Cimborangarirai ngezve mugariro uu. Hanzvadzi imweni inoita munamato kuna Djehovha ngekuti inoda kuenda ku Cikora ce Aziisi e Umambo. Asi panodarika makore akawanda uye iyona aipikwi kuti iyende. Hama ye cidjaha inoita munamato kuna Djehovha yecikumbira kubetserhwa pa nhenda yayo inoshupha kuti iyona iite zvakawanda muungano. Asi kunyazi zvakadaro, iyona inorumbwa yecirhwadziwa. Abereki e mudjaha umweni anonamata ecikumbira kuti mwana wawo arumbwe ari mu cokwadi. Asi pakupedzesera mwana wawo anosanangura kusiya cokwadi.

² Pamweni imwimwi makanamata mecikumbira ciro, asi amuzi kutambira ciya camakakumbira. Nge ndaa yazvo, pamweni imwimwi makarangarira kuti Djehovha anodaira minamato ye anhu amweni basi. Pamweni imwimwi makatanga kurangarira kuti maita ciro cakashata. Hanzvadzi imweni inozwi Janiceb yaizwa kudaro. Iyona no mwamuna wayo akanamata ngezve cido cawo cekuseenza pa Bheteri. Iyona inoti: “Inini ndainga ndino rugondo rekuti mumasure mazvo isusu taizodainzwa.” Asi pakadarika makore akawanda uye awona aazi kudainzwa. Janice unoti: “Inini ndakanetseka uye ndakatsukwara. Inini ndairangarira kuti pamweni tainga tashaishira Djehovha. Inini ndainga ndatozviitira munamato kamare. Ngei iyena aazi kudaira munamato wangu?”

3. Ticaonei mu fundo ino?

³ Nguwa dzimweni tingadzibvunzisa kuti Djehovha ari kupurutanadi here minamato yedu. Kunyazi anarume anganani akatendeka e kare aidziitawo mubvunzo uwona. (Djobo 30:20; Pis. 22:2; Abha. 1:2) Cinyi cingamupasai rugondo rekuti Djehovha acadaira minamato yeyu? (Pis. 65:2) Kuti tidaire mubvunzo uu, tinodikana kutanga tadaira mibvunzo dzinoteera: (1) Cinyi catingaetsera kuna Djehovha? (2) Djehovha anoetserei katiri? (3) Ngei pamweni tinodikana kugadzirisa minamato yedu?

CINYI CATINGAETSERA KUNA DJEHOVHA?

4. Maererano na Djeremiya 29:12, Djehovha anopikira kuitei?

⁴ Djehovha anotigondesa kuti acapurutana minamato yedu. (Erengai Djeremiya 29:12.) Mwari wedu anoda aseenzi ake akagondeka, hino iyena aambofuratiri minamato yawo. (Pis. 10:17; 37:28) Asi izvona azvireyi kuti iyena acatipasa zvese zvatinomukumbira. Zviro zvimweni zvatinomukumbira ticazvitambira mu nyika ipsva basi.

5. Djehovha anorangarirei paanopurutana minamato yedu? Panganidzai.

⁵ Djehovha anoona kuti zvikumbiro zvedu zvinoenderana kudini no cinangwa cake. (Isa. 55:8, 9) Dii rimweni re cinangwa ici rinobatanidza kudzadza nyika no anhu acagara no rubatano uye mupfaro pasi pe utongi wake. Asi Sathani unobhuya kuti anhu acazopfara maningi kana akadzitonga ega. (Gen. 3:1-5) Kuti apangidze pamhene kuti zvakabhuyiwa na Dhiyabhurosi i manyepo, Djehovha anotendera kuti utongi we anhu uoneke nyamasi uno. Asi utongi we anhu ndiwona uri pamberi pakubara matambudziko e anhu anooneka nyamasi uno. (Mup. 8:9) Isusu tinozviziya kuti Djehovha aapedzi zvino matambudziko ari kubarhwa mazuwa ano. Ngekuti kana akaita izvona, amweni aizorangarira kuti utongi we anhu uri kubudirira uye kuti wakwanisa kugadzirisa matambudziko e anhu.

6. Ngei nguwa dzese tinodikana kugara no cokwadi cekuti Djehovha anoita zviro no rudo uye no unatsi?

⁶ Djehovha angadaira minamato yakaezana nge mishobo yakasiyana. Ngo muezaniso, Mambo Ezekiya paakarhwara, iyena wakadeketera kuti Djehovha amuporese uye Djehovha akaita izvona. (2 Mad. 20:1-6) Asi nge dii rimweni, muphostori Pauro paakadeketerera kuna Djehovha kuti abudise “munzwa mu nyama,” pamweni cinetso ce uthongo, Djehovha aazi kuita izvona. (2 Ako. 12:7-9) Onaiwo zvakaitika no muphostori Tiyago uye Pedru. Mambo Herodhi waida kuauraya. Ungano yakaaitira munamato. Asi Tiyago wakauraiwa uye Pedru wakaponeswa no ngirozi nge mushobo unoshamisa. (Zvii. 12:1-11) Pamweni tingadzibvunzisa kuti: ‘Ngei Djehovha akaponesa Pedru uye aazi kuita zvimwezvo na Tiyago?’ Bhaibheri aridjekesi.c Asi tinodikana kugara no cokwadi cekuti Djehovha aamboiti “zvisina unatsi.” (Dhe. 32:4) Isusu tinozviziya kuti Djehovha aida maningi Tiyago uye Pedru. (Zvak. 21:14) Pamweni paya Djehovha angadaira minamato yedu nge mushobo watainga tisikakariri. Asi apana mubvunzo kuti Djehovha nguwa dzese anoita zviro no rudo uye unatsi. Uye nge ndaa yazvo, atigari no mubvunzo we mushobo waanodaira minamato yedu.—Djobo 33:13.

7. Zvinyi zvatisikadikani kuita, uye ngei?

⁷ Asi isusu atidi kuezanisa mugariro wedu no we anhu amweni. Ngo muezaniso, pamweni tingaita munamato kuna Djehovha tecikumbira kuti atibetsere pa cinetso catinonga tinaco, asi cikumbiro cedu acidairhwi. Padarika nguwa, tozoona kuti uripo wakaita munamato umwe umwewo asi Djehovha akamudaira. Hanzvadzi imweni inozwi Anna yakabatana nazvo. Iyona yakanamata kuti mwamuna wayo araphwe pa nhenda ye kankro. Panguwa imweyo hanzvadzi mbiri dzacembera dzaibatanawo no kankro. Anna wakanamata maningi eciitira mwamuna wake uye hanzvadzi mbiri idzi. Hanzvadzi mbiri idzi dzakapora, asi Matthew wakafa. Pakutanga, Anna wakarangarira kuti hanzvadzi idzi dzapora nge kuti Djehovha adzibetsera. Hino kana zviri izvona, ngei Djehovha asikazi kuitawo izvona kuno mwamuna wake? Zviri pamhene kuti azviiti kubvunzisa kuti ngei hanzvadzi idzi dzakapora. Asi zvatinoziya ngezve kuti Djehovha acagadzirisa zvese izvi kwenda no kwenda uye iyena anoda kumutsa shamwari dzake dzakafa.—Djobo 14:15.

8. (a) Maererano na Isaya 43:2, Djehovha anotibetsera kudini? (b) Minamato inotibetsera kudini patinobatana no zvinetso? (Onai vhidhiyo yakazwi: Munamato Unotibetsera kuti Tishingirire.)

⁸ Djehovha acagara ku dii redu nguwa dzese. Hinga Baba edu ano rudo, Djehovha aadi kutiona tecitambudzika. (Isa. 63:9) Kunyazi zvakadaro iyena aatiitisi kuti tisabatane no zvinetso, zvingaezaniswa no murambo kana kuti murazvi. (Erengai Isaya 43:2.) Asi iyena anotigondesa kuti acatibetsera kuti matambudziko aya “adarike.” Uye iyena anotigondesa kuti matambudziko aya aarumbwi aripo kwenda no kwenda. Kusiya izvona, Djehovha anotipasa mwiya wake mucena uno simba kuti utibetsere kuti tisarembe. (Ruka 11:13; Afi. 4:13) Ndiyo ndaa, tingagara no rugondo rekuti Djehovha acatipasa zviya zvatinoda kuti tirumbwe tecishingirira uye takagondeka.d

DJEHOVHA ANOETSEREI KATIRI?

9. Maererano na Tiyago 1:6, 7, ngei tinodikana kugonda kuti Djehovha acatibetsera?

⁹ Djehovha anoetsera kuti isusu timugonde. (Aheb. 11:6) Nguwa dzimweni, matambudziko edu angagara hinga mutoro uye tingaaona hingana kuti atiakwanisi. Uye tingatoguma pakuona kuti Djehovha aakwanisi kutibetsera. Asi soko ra Mwari Bhaibheri rinoreketa kuti simba ra Mwari ringatiitisa kuti “tikhwire muru.” (Pis. 18:29) Hino pano kuti tidzibvunzise kuti Djehovha acatibetseradi kamare, tinodikana kunamata no kutenda kakakura tecigonda kuti iyena acadaira minamato yedu.—Erengai Tiyago 1:6, 7.

10. Pasai muezaniso wekuti tingaita kudini zviro zvinoenderana no minamato yedu.

¹⁰ Djehovha anoetsera kuti tiite maererano no minamato yedu. Ngo muezaniso, hama ingaita munamato yecikumbira kuti itenderhwe kubasa kuti iyende koopinda gungano. Djehovha aizodaira kudini munamato uu? Pamweni iyena aizoipasa ushingi kuti iyende kooreketa na patrau. Asi iyona yaidikana kuita dii rayo yoenda kooreketa na patrau wayo kuti iite cikumbiro cayo. Pamweni iyona inodikana kuzviita kakawanda. Ingazviita nge kupangana no shamwari yayo ye kubasa kuti acinjane nguwa. Kana zveciita iyona inodikana kutendera kuti patrau agure mare yaanotambira pa zuwa irona.

11. Ngei tinodikana kuita munamato kakawanda ngezve zvinetso zvedu?

¹¹ Djehovha anoetsera kuti tirumbwe teciita munamato ngezve zviya zvinokosha katiri. (1 Ate. 5:17) Djesu akapangidza pamhene kuti zvikumbiro zvedu zvimweni azvidairhwi ciriporipoco. (Ruka 11:9) Hino, musarembe kuita munamato! Zviitei kakawanda uye no mwoyo wese. (Ruka 18:1-7) Patinorumbwa teciita munamato ngezve nyaya inotishupha, isusu tinopangidza kuna Djehovha kuti cikumbiro cedu cinokosha maningi katiri, uye kuti acidopi cinopinda nokukasika. Kusiya izvona tinopangidza kuti tinotenda kuti iyena angatibetsera.

NGEI PAMWENI PAYA TINODIKANA KUGADZIRISA ZVIYA ZVATINOKUMBIRA?

12. (a) Mibvunzo dzipi dzatingadziita dzakaringana no zvikumbiro zvedu, uye ngei? (b) Tingapangidza kudini kuti tinoreremedza Djehovha pa minamato yedu? (Onai bhokisi rakazwi: “Zvikumbiro Zvangu Zvinopangidza Here kuti Ndinoreremedza Djehovha?”)

¹² Zviya zvatinokumbira mumunamato kuna Djehovha zvikatama kuitika, tingaita mibvunzo mitatu. Wokutanga unoti: ‘Candiri kukumbira ici cakanaka here?’ Kakawanda kakhona, isusu tinorangarira kuti tinozviziya zvakatinakira. Asi pamweni zviya zvatiri kukumbira azvitikosheri ke nguwa yakareba. Kana teciita munamato tecikumbira kuti dambudziko redu rigadziriswe, pamweni pano mushobo umweni wakanaka maningi wekugadzirisa dambudziko irona. Uye zvimweni zvatinokumbira Djehovha, pamweni azvienderani no kuda kake. (1 Juau 5:14) Rangarirai ngezve muezaniso we abereki arekethwa pa ndima ye kutanga. Awona akakumbira kuna Djehovha kuti mwana wawo arumbwe ari mu cokwadi. Zviri kuita hinga kuti apana cakashata pa cikumbiro ici. Asi Djehovha aabambidziri munhu kuti amuseenzere. Iyena anoda kuti tese isusu kutobatanidzawo ana edu, asanangure kumuseenzera. (Dhe. 10:12, 13; 30:19, 20) Hino pane kukumbira kuna Djehovha kuti mwana wawo arumbwe ari mu cokwadi, abereki angakumbira kuti Djehovha aabetsere kuti akwanise kubaya mwoyo ye ana awo, ade Djehovha uye kuti akwanise kugara shamwari Yake.—Zvie. 22:6; Aef. 6:4.

13. Maererano na Ahebheru 4:16, Djehovha acatibetsera rini? Panganidzai.

¹³ Mubvunzo wecipiri watingadzibvunzisa ngewe kuti: ‘Kodi ii i nguwa yakasisira here kuti Djehovha andipase zvandiri kumukumbira?’ Pamweni imwimwi mungarangarira kuti munoda mhinduro ciriporipoco. Cokwadi ngece kuti, Djehovha anoiziya nguwa yakasisira kuti atibetsere. (Erengai Ahebheru 4:16.) Zvikumbiro zvedu zvikatama kudairhwa, tingarangarira kuti mhinduro ya Djehovha ngeyekuti: ‘Haiwa.’ Asi pamweni mhinduro ngeyekuti: ‘Azvisati zvaita.’ Ngo muezaniso, rangariraizve ngezve mudjaha wainamata kuti aporeswe pa nhenda yake. Kudai Djehovha aita cishamiso uye omurapa, Sathani waida kubhuya kuti hama iya iri kuseenzera Djehovha basi nge ndaa yekuti yaraphwa. (Djobo 1:9-11; 2:4) Kusiya izvona, Djehovha akatotigondesa kuti mune ramangwana anhu ese acaporeswa pa nhenda dzawo. (Isa. 33:24; Zvak. 21:3, 4) Dakara ikona atidikani kuetsera kuraphwa nge mushobo unoshamisa. Hino hama ii yaidikana kukumbira kuti Djehovha aipase simba uye runyararo mundangariro kuti irumbwe yecishingirira. Kunyazi yecirhwara, irumbwe yeciseenzera Djehovha yakagondeka.—Pis. 29:11.

14. Mafundei no muezaniso wa Janice?

¹⁴ Imwimwi muciri kuedzurira ngezva Janice, wainamata ecikumbira kuti aende kooseenzera ku Bheteri. Padarika makore anokwana kuita 5 dakara iyena azozwisisa kuti Djehovha akadaira kudini munamato wake. Iyena unoti: “Pa makore ese aya, Djehovha akandifundisa uye akandibetsera kuti ndigare Mukristu akanaka. Inini ndaidikana kunyasa kumugonda. Uye ndaidikana kugadzirisa fundo yangu ye munhu ega. Kusiya izvona, inini ndaidikana kufundira kuti mupfaro wangu autsamiri pa mbuto yandiri kuseenzera.” Paapadarika nguwa, Janice no mwamuna wake akapikwa kuti aende koonsenza hinga muonereri we nharaunda. Ecirangarira zvaakaita kare, Janice unopedzesa eciti: “Honde, Djehovha akadaira minamato yangu, asi nge mushobo wandaiga ndisikaetseri. Zvakambotora nguwa dakara pandakazozwisisa kuti mhinduro ya Djehovha yainga yakaita hingana cipo kandiri. Inini ndinotenda maningi mushobo wandakazwa rudo uye unaki wa Djehovha.”

15. Ngei nguwa dzimweni zvakanaka kukumbira zvimweni pa minamato yedu? (Onaiwo mafoto.)

¹⁵ Mubvunzo wecitatu unoti: ‘Kodi ndaidikana kunamata ngezve ciro cimweni?’ Kunyazi zvakanaka kamare kureketa zviya zvatinoda muminamato yedu, pamweni ticanyasa kuziya kuti Djehovha anodei katiri kana tikatama kubhuya zviya kamare zvatinoda. Onai muezaniso we hanzvadzi isati yawakwa yainamata ngezve Cikora ce Aziisi e Umambo. Iyona yaida kuenda ku cikora kuti iseenze kumbuto inodiwa aparidzi akawanda. Asi payairumbwa yecinamata kuti iyende ku cikora, iyona yaizokwanisawo kunamata kuna Djehovha yecikumbira kuti aibetsere kuona mikana imweni yekutunhudzira basa rayo pakumuseenzera. (Zvii. 16:9, 10) Pedzepo, iyona yaizokwanisa kuita ciito maererano no munamato wayo nge kubvunzisa muonereri we nharaunda kuti, pano ungano iri padhuze isina mapionero akawanda. Kana kuti kutotarira Bheteri kamare yecibvunzisa kuti kuno mbuto here inoda aparidzi akawanda.e

16. Tingagara no rugondo rei?

¹⁶ Hingana zvataona, tingagara no rugondo rekuti Djehovha acadaira minamato yedu no rudo uye unatsi. (Pis. 4:3; Isa. 30:18) Nguwa dzimweni, pamweni atizogari no mhinduro iya kamare yataida. Asi Djehovha aambofuratiri minamato yedu. Iyena anotida maningi uye aazombotisii. (Pis. 9:10) Hino rumbwai ‘mecimugonda nguwa dzese,’ mecidurura mwoyo yenyu kaari ngekuita munamato.—Pis. 62:8.