Rumbwai Makabamba uye Makagondeka Pamunoedzwa

1. Zvinoda kureyei kurumbwa makangwarira? (2 Timoti 4:5)

PATINOSONGANA no zvinetso, kugondeka kedu kuna Djehovha uye ku sangano rake kungaedzwa. Kana izvona zvikaitika tingaitei? Isusu tinodikana kurumbwa takangwarira, torumbwa takaima uye “torumbwa takabamba mu kutenda.” (Erengai 2  Timoti 4:5.) Isusu tingakwanisa kungwarira kana tikarumbwa takaterama, tokanda ndangariro dzedu mu mbuto yakanaka uye topeta masimba kuti tione zviro nge mushobo we maonero anoita Djehovha. Kana tikadaro, ndangariro dzedu adzionererhwi no mazwiro edu.

2. Ticaonei mu fundo ino?

² Mu fundo yadarika, taona zvinetso zvitatu zvinobuda kunza ke ungano. Mu fundo ino, ticaonawo zvinetso zvitatu zvinobuda mukati me ungano zvingaedza kugondeka kedu kuna Djehovha. (1) Patinoona kuti hama mu ungano yatibata nge mushobo wakashata, (2) patinopangirhwa, uye (3) patinodikana kujairana no cinjo dzinoitika mu sangano. Patinosongana no cinetso cimwe cakhona, tingaitei kuti tirumbwe takangwarira, totsigira Djehovha no mwoyo wese uye no sangano rake?

PATINOONA KUTI TABATHWA ZVISIKAZI KUNAKA MU UNGANO

3. Cinyi caizoitika kana tikaona kuti hama mu ungano yatibata nge mushobo usikazi kunaka?

³ Imwimwi makambobathwa nge mushobo usikazi kunaka no hama, pamweni no mukuru ano ubaba mu ungano? Pamweni awona ainga asikadi kuita izvona kamuri. (Aro. 3:23; Tig. 3:2) Kunyazi zvakadaro, imwimwi makatsukwara, pamweni mainga musikatowati nge ndaa yazvo. Uye pamweni makatodzibvunzisa kuti, ‘kana hama yecikwanisa kuita kudai, zvezvirokwazvo ndi sanganozve ra Mwari iri?’ Mushobo uu, ndiwona unoseenzeswa na Sathani kuti isusu tigare no marangariro akadaro. (2 Ako. 2:11) Kugara no marangariro aya, kungatiitisa kuti tiime kuseenzera Djehovha uye kutosiya sangano rake. Hino patinoona kuti hama kana kuti hanzvadzi yatibata nge mushobo wakashata, tingaitei kuti tirumbwe takangwarira uye tosiya kurangarira nge mushobo usikazi kunaka?

4. Kodi Zuzee akarumbwa akangwarira kudini paaibathwa nge mushobo wakashata, uye isusu tingafundei nge muezaniso wake? (Genesi 50:19-21)

⁴ Musacengete bundu. Zuzee painga ari mudjaha, hama dzake adzizi kumubata zvakanaka. Uye hama dzake dzimweni dzaitoda kumuuraya. (Gen. 37:4, 18-22) Pakupedzesera, awona akamutengesa hinga museenzi. Mugumisiro wakhona nge wekuti paainga aano makore anokwana kuita 13, Zuzee wakasongana no miedzo yakasiyana-siyana maningi. Pamweni, Zuzee wakatorangarira kuti Djehovha anondidadi zvezvirokwazvo, uye ngei andisiya pa nguwa ino yandiri kumuda maningi. Asi Zuzee aazi kugara munhu unohasha. Pane kudaro, iyena wakarumbwa wakangwarira uye wakaterama. Uye paakagara no mukana we kutsiira hama dzake, Zuzee aazi kuzviita asi iyena wakapangidza rudo kaari uye akaarekerera. (Gen. 45:4, 5) Zuzee wakakwanisa kuita izvi ngekuti wakarangarira nge mushobo wakanaka. Pane kurangarira nge zve matambudziko awona, iyena wakaedza kuona kutodarika nyayeyo—wakaonawo cinangwa ca Djehovha. (Erengai Genesi 50:19-21.) Tingafundei nge zvazvo? Kana hama imwe ikamubatai nge mushobo wakashata, musapase ndaa Djehovha kana kuti motorangarira kuti Djehovha amusiyai. Pane kudaro, nyasai kurangarira kuti Djehovha ari kumubetserai kudini kuti imwimwi mukwanise kushingira nyaya iyona. Kusiya izvona, kana amweni akamubatai nge mushobo wakashata, garai munhu unorekerera uye moedzurira kuti rudo rinofukidza zvishaishi zvakawanda.—1 Ped. 4:8.

5. Kodi Miqueas akarumbwa akangwarira kudini paakabathwa nge mushobo wakashata?

⁵ Onai eshiperiyensiya ye mukuru umweni unozwi Miqueasb unorarama ku América do Sul. Hama dzino ubaba mu ungano dzakaita ciro cakamutsukwarisa maningi. Iyena wakati: “Mu upenyu wangu wese andisati ndambopisikazve musoro kudaro. Inini ndainetseka maningi mu mwoyo. Usiku ndainga ndisikakwanisi kuwata, uye ndakatocema ngekuti ndainga ndisikazii zvekuita.” Kunyazi zvakadaro, Miqueas wakakwanisa kurumbwa akangwarira uye oonerera mazwiro ake. Iyena wakakwanisa kudini kuzviita? Iyena nguwa dzese ainamata kuna Djehovha ecikumbira mwiya mucena uye kuti amubetsere kushingirira. Uyewo iyena akatopsvakisisa mu mabhuku edu. Ngaipi fundo katiri? Pamunoona kuti hama kana kuti hanzvadzi yareketa kana kuita ciro camuitisai kuti munyangadzwe, rumbwai makaterama. Pamweni ciripo ciro cakaitika mu upenyu me hama kana kuti hanzvadzi uye caaitisa kuti aite kudaro uye imwimwi amuzvizii. Hino namatai kuna Djehovha, fungurai mwoyo wenyu kaari, uye mukumbirei kuti muone zviro nge mushobo we maonero aanoita. Kana tikadaro zvicagara zviri nyore maningi kuti tigare anhu anorekerera uye atizooni kuti hama yedu yatishaishira yecitozviziya kamare. (Zvie. 19:11) Edzurirai kuti Djehovha anonyasa kuzviziya zvamuri kusongana nazvo uye ayena acamupasai simba rinodiikanwa kuti mukwanise kushingirira.—2 Mak. 16:9; Mup. 5:8.

PATINOPANGIRHWA

6. Ngei zvecikosha kuona mupango wa Djehovha hinga cipangidzo ce rudo? (Ahebheru 12:5, 6, 11)

⁶ Djehovha paanotipangira tingakwanisa kutsukwara maningi. Asi kana tikakanda ndangariro dzedu pa mazwiro edu, tingararira kuti mupango uu auzi kusisira, auseenzi katiri kana kuti wanyanyisa. Kana tikadaro, tinonga tecikanganwa ciro cinokosha maningi—kuti mupango wa Djehovha cipangidzo ce rudo rake katiri. (Erengai Ahebheru 12:5, 6, 11.) Kana tikatendera kuti mazwiro edu akashata ationerere, tinonga teciita kuti zviite nyore kuti Sathani atirhwise. Iyena unoda kuti tisatendere mupango uye kudarika izvona, tosiya kuseenzera Djehovha uye tosiya kutsigira sangano rake. Hino kana imwimwi mapaswa mupango, mungarumbwa kudini makangwarira?

7. (a) Maererano no mufanikiso, Djehovha akaseenzesa kudini Pedru mu masure mekuti iyena akatendera mupango? (b) Mafundei nge muezaniso wa Pedru?

⁷ Tenderai mupango uye itai cinjo dzinodikanwa. Djesu akapangirazve Pedru pamberi pe aphostori amweni. (Mark. 8:33; Ruka 22:31-34) Pamweni Pedru akapsveruka maningi! Kunyazi zvakadaro, Pedru wakarumbwa wakagondeka kuna Djesu. Iyena wakatendera mupango uye akafunda nge zvishaishi zvake. Ndiyo ndaa Djehovha akakomborera kugondeka ka Pedru uye akapamupasa ubaba wakakura mu ungano. (Juau 21:15-17; Zvii. 10:24-33; 1 Ped. 1:1) Tingafundei nge muezaniso wa Pedru? Tikatama kukanda ndangariro dzedu pa kupsveruka kataita asi totendera mupango uye toiita cinjo dzinodikanwa, isusu ticabetsereka kutobanidzawo no hama dzedu dzicabetsereka. Nge kudaro, isusu ticagara anhu anokosha maningi kuna Djehovha uye kune hama dzedu.

8-9. Mu masure me kupaswa mupango, Bernardo wakazwa kudini pekutanga, asi cinyi cakamubetsera kuti agadzirise mushobo wake we kurangarira?

⁸ Onai zvakaitika no hama inozwi Bernardo, ye ku Moçambique. Iyona yainga iri mukuru we ungano, asi yakaruza ubaba wayo. Bernardo wakazwa kudini pakutanga? Iyena unoti, “Inini ndakacengeta bundu ngekuti ndainga ndisikatenderani no mupango wandakapaswa.” Iyena wakatanga kurangarira kuti hama dze mu ungano dzaizomuona kudini. Iyena unotendera eciti: “Ndakatora mwedzi minganani kuti ndikwanise kugara no maonero akanaka nge zve mupango uya uye ndohwirirazve kugonda Djehovha uye no sangano rake.” Cinyi cakabetsera Bernardo kuti acinje maonero ake?

⁹ Bernardo wakagadzirisa mushobo wake we kurangarira. Iyena unopanganidza eciti: “Pandainga ndiciri mukuru, ndaiseenzesa Ahebheru 12:7 kuti ndibetsere amweni kuti agare no maonero akanaka nge zve mupango wa Djehovha, pedzepo inini ndakarangarira kuti: ‘Ndiani unodikana kuseenzesa tsamba ii?’ Aseenzi ese a Djehovha—kutobatanidzawo inini.” Pedzepo Bernardo wakagadzirisazve zviro zvimweni kuti awhirire kugonda na Djehovha uye no sangano Rake. Iyena wakatanga kutunhudzira kuerenga kake Bhaibheri uye kunyasa kurangarira. Bernardo waindonetseka kuti hama dze mu ungano dzaimuona kudini, asi iyena waienda nadzo mu basa re kuparidzira uye wairumbwa ecipinda misangano. No kuhamba ke nguwa, Bernardo wakahwirirazve kugara mukuru we mu ungano. Kuita hingana Bernardo, kana imwimwi mukapaswa mupango, edzai kusama kukanda ndangariro dzenyu pa kupsveruka kamuri kuita, tambirai mazano uye itai cinjo dzinodikanwa.c (Zvie. 8:33; 22:4) Kana mukadaro, garai no rugondo rekuti Djehovha acamukomborerai nge kurumbwa makagondeka kaari uye no sangano rake.

PATINODIKANA KUDJAIRANA NO CINJO DZINOITIKA MU SANAGO

10. Cinjo dzipi dzekuti pamweni dzakaedza kugondeka ke Aisraeri amweni?

¹⁰ Cinjo dzinoitika mu sangano ra Djehovha dzingaedza kugondeka kedu. Kana tikatama kungwarira, ticapedzesera taparadzana na Djehovha. Onai kuti Aisraeri akabathwa-bathwa kudini no cinjo. Ngo muezaniso, paainga asati atambira Mutemo wa Mozesi misoro ye mhuri yaiita zviro zvekuti mu masure me cinjo zvaizoizwa no mu pristi basi. Awona aitenderhwa kuwaka artari uye oitira mhuri yawo zvibairo kuna Djehovha. (Gen. 8:20, 21; 12:7; 26:25; 35:1, 6, 7; Djobo 1:5) Asi mutemo pawakatanga kuseenzeswa, misoro ye mhuri yaidikana kusiya basa irona. Djehovha akagadza apristi e mu mhuri ya Aroni kuti ipire zvibairo. Mu masure me cinjo idzi, musoro umwe we mhuri kana akaita basa iri rinoizwa no apristi uye iyena asiripi e mu mhuri ya Aroni, aizouraiwa.d (Rev. 17:3-6, 8, 9) Kodi ndi cinjo idzi dzakaitisa kuti pamweni Kora, Dhatani, Abhiramu, uye no akuru anokwana kuita 250 kuti ade kurhwisa ubaba wa Mozesi uye no wa Aroni? (Num. 16:1-3) Atinyasi kuzviziya. Pasinei no zvakaitika, Kora, Dhatani, Abhiramu uye no anhu amweni ainga ari kudii rawo aazi kurumbwa akagondeka kuna Djehovha. Kana cinjo dze sangano dzikaedza kugondeka kenyu, mungaitei?

11. Tafundei no muezaniso we Akoati amweni?

¹¹ Tsigirai cinjo ipi hayo mu sangano ra Djehovha. Paainga ari murenje, Akoati ainga ano ubaba unokosha maningi. Pese pekuti Aisraeri aidikana kufuruka, Akoati anganani ainga akagadzwa kuti athware Areka ye citenderano ya Djehovha pamberi pe anhu. (Num. 3:29, 31; 10:33; Djs. 3:2-4) Ubaba wakakura waainga anawo! Asi zviro zvakacinja pa nguwa yekuti Aisraeri akapinda mu Nyika Yaakapikirhwa. Areka ye citenderano yainga isikacadikanwizve kucinjwa payaigara no kuhamba ke nguwa. Ngo kudaro, mu nguwa ya mambo Soromoni, Akoati amweni akagadzwa kuti agare aembi, amweni hinga arindi, uyewo amweni hinga aonereri mu mbuto yaiigwa zvekurhya. (1 Mak. 6:31-33; 26:1, 24) Apana zvinopangidza kuti nguwa dzimweni Akoati aigurunguta kana kuti aikumbira kuti atunhudzirhwe ubaba ngekuti kare aithwara Areka ye citenderano. Tingafundei nazvo? Kana sangano ra Djehovha rikaita cinjo, isusu tinodikana kutsigira no mwoyo wese kunyazi zvecitoita kuti ubaba wedu ucinjwe. Zvinokosha maningi kupfara no basa ripi haro ratinaro. Edzurirai kuti kukosha kamunoita kuna Djehovha akupimwi nge ubaba wamunawo. Kuna Djehovha, kumuzwira ndi ciro cinokosha kaari.—1 Sam. 15:22.

12. Zaina wakazwa kudini paakabuda ku Bheteri uye oenda kooseenzera eciparidzira mu nharaunda?

¹² Onai muezaniso wa Zaina, hanzvadzi inogara ku Oriente Médio. Iyona yakatambira cinjo mu basa rayo uye yakadikana kusiya basa rayaida. Mu masure me makore anodarika 23 yeciseenza pa Bheteri, iyona yakatumwa kuti iende kooseenza yeciparidzira ku mutanha. Iyona inoti: “Ndakashamisika maningi no cinjo ii yakaitika pa basa rangu. Ndakazwa hingana kuti andicabetseri uye ndaindogara ndecidzibvunzisa kuti, ‘Ndakashaishei?’ “Zvinotsukwarisa kuti hama no hanzvadzi dzimweni dze mu ungano dzakamubvunza kuti: “Kudai iwewe wainyasa kuita basa rako, dai uciri ku Bheteri dakara nyamasi.” Ke nguwa yakareba, Zaina wakaora mwoyo uye wakagara ecicema usiku wese. Iyena wakabhuya kuti: “Inini andizi kutendera kuti zviro zvese izvi zviite kuti ndisame kugonda sangano ra Djehovha uye ndotorangarira kuti Djehovha aandidi.” Zaina wakakwanisa kudini kurumbwa wakangwarira?

13. Zaina wakaitei kuti akwanise kukunda mazwiro ake e kuora mwoyo?

¹³ Zaina wakakwanisa kurhwisana no mazwiro e kuora mwoyo. Wakazviita kudini? Iyena wakaerenga mabhuku akawanda e sangano ano miezaniso ye zviitiko zvaaisongana nazvo. Fundo imweni yakamubetsera maningi, ndi iya yakabuda muna 1 ya Fevrero, ya 2001 yainga inomusoro waiti, “Unogona Kurarama Nokuora Mwoyo!”. Fundo ii inopanganidza kuti mutari we Bhaibheri Marko wakarhwisanawo kudini no mazwiro aya paakasongana no cinjo mu basa rake. Zaina wakati: “Muezaniso wa Marko wakaita hingana mutombo wakandibetsera kukunda mazwiro e kuora mwoyo.” Ciro cimweni cakabetsera Zaina ngecekugara dhuze no shamwari dzake. Iyena aazi kugara pake ega; uye aazi kugara ecizvizwira usisi. Iyena wakaona kuti mwiya mucena wa Djehovha unotungamira zvisananguro zve sangano uye hama dzaitungamirira dzaimuda manigi. Iyena wakaonawo kuti cinonyanya kukosha mu sangano ra Djehovha ngecekuti basa riizwe nge mushobo wakanaka.

14. Hama Vlado yakafundira kurarama no cinjo ipi, uye cinyi cakaibetsera kuti icinje maonero ayo?

¹⁴ Vlado, mukuru umweni uno makore 73 we ku Eslovênia, yakasongana no cinetso cekuti ungano yawo yakabatanidzwa no imweni uye Nyumba ye Umambo yakafungwa. awona anoti: “Kandiri, zvainga zvisina musoro kuti Nyumba ye Umambo yakarungama ifungwe. Cakanditsukwarisa nge cekuti painga pasikazi kudarika nguwa yakareba mumasure mekuti tabva kuigadzirisa. Inini ndiri karpintero, uye ndakatogadzirisawo zvimweni imona. Uyewo, kubatanidza ungano mbiri yainga iri cinjo yakakura maningi maka-maka ku hama dzakura dze ungano.” Cinyi cakabetsera hama Vlado? Awona anopanganidza eciti: “Kutsigira cinjo dzinoizwa mu sangano ra Djehovha zvinounza makomborero nguwa dzese. Zvezvirokwazvo cinjo idzi dzidoko dziri kuitika nyamasi uno, dziri kutigadzirira pa cinjo dzakakura dzicaitika mune ramangwana.” Imwimwi matambira cinjo pa basa renyu here, kana kuti ungano yenyu yabatanidzwa no imweni here? Pamweni azviripi nyore kurhwisana no mugariro wakaita hingana uu. Asi garai no rugondo rekuti Djehovha anozwisisa mazwiro enyu. Kana imwimwi mukatsigira no mwoyo wese cinjo idzi uye morumbwa makagondeka kuna Djehovha uye no sangano raanoseenzesa, mungagara no rugondo rekuti mucakomborerhwa maningi.—Pis. 18:25.

RUMBWAI MAKANGWARIRA PA ZVIRO ZVESE

15. Tingarumbwa kudini takangwarira patinosongana no zvinetso zvinobva mukati me ungano?

¹⁵ Ngekuti tiri kukhwedera ku mugumo we nyika ino, tingaetsera kusongana no zvinetso zvinobva mukati me ungano. Zvinetso izvi zvingaedza kugondeka kedu kuna Djehovha. Ndiyo ndaa, tinodikana kurumbwa takangwarira. Kana imwimwi makanyangadzwa nge ndaa ye hama imwe ye mu ungano, musacengete bundu. Kana imwimwi mukapaswa mupango, musakande ndangariro dzenyu pakupsveruka kamakaita, tendai mupango, uye itai cinjo dzinodikanwa. Uye kana sangano ra Djehovha rikaita cinjo dzinomubata-batai, dzitendei no mwoyo wese, uye teererai nhungamiriro dzamapaswa.

16. Mungarumbwa kudini mecigonda Djehovha uye no sangano rake?

¹⁶ Imwimwi mungarumbwa mecigonda na Djehovha uye no sangano rake, kana kugondeka kenyu kukaedzwa. Asi kuti muzviite, munodikana kurumbwa makangwarira, izvi zvinoreya kuti, munodikana kurumbwa makaterama, kunyasa kurangarira, uye kuona zviro mu maonero a Djehovha. Ciro cimweni cicamubetserai kuita izvona, ngecekufunda ngezve anhu anorekethwa mu Bhaibheri akakwanisa kurhwisana no migariro yakaita hingana yenyu uye nge kunyasa kurangarira ngezve miezaniso yawo. Namatai mecikumbira rubetso ra Djehovha, uye musagare kure no hama dze mu ungano. Kana mukadaro, pasinei no ciro cipi haco cicaitika, Sathani aazokwanisi kumuparadzanisai na Djehovha uye no sangano Rake.—Tig. 4:7.