MUSORO WE KUFUNDA 52
Hanzvadzi dze Cidjaha—Mungagara Kudini Akristu Akakura Pakunamata?
“Anakadzi anodikanawo kuita zviro no mwoyo wese . . . anodzibata, akatendeka mu zviro zvese.”—1TI. 3:11.
NGOMA 133 Namatai Djehovha Muciri Adoko
ZVATICAFUNDAa
1. Tinodikana kuitei kuti tigare Akristu akakura pakunamata?
TINOSHAMISIKA nge kuona mwana mudoko ecikura pa nguwa doko basi. Uye izvi zvinoitika zvega. Asi izvi, zvakasiyana no kukura pakunamata, ngekuti ikona akuitiki kega.b (1 Ako. 13:11; Aheb. 6:1) Kuti munhu agare no ushamwari wakabamba na Djehovha, iyena unodikana kupeta masimba. Kusiya izvona, iyena unoda rubetso re mwiya mucena wa Djehovha kuti agare no mawara akanaka, asakurire mishobo ye kuita zviro uye agadzirire ubaba waanozogara nawo mu nguwa ye mberi.—Zvie. 1:5.
2. Tafundei pana Genesi 1:27, uye ticaonei mu fundo ino?
2 Djehovha akasika anhu kuti agare mwanarumwe kana kuti mwanakadzi. (Erengai Genesi 1:27.) Zviri pamhene kuti mwanarume no mwanakadzi akasiyana mwiri, asi paripozve paakasiyana. Ngo muezaniso, Djehovha akaita mwanarume no mwanakadzi no ubaba wakasiyana uye akapasa umwe na umwe uzii uye cipo caizoabetsera kuti akwanise kuita ubaba wawo. (Gen. 2:18) Mu fundo ino, ticaona kuti hanzvadzi ye cidjaha ingagara kudini Mukristu akakura pakunamata. Uye mu fundo inoteera, ticaona kuti hama dze cidjaha dzingagara kudini anarume e zvirokwazvo.
MAWARA ANOPFADZA DJEHOVHA
Kuteedzera mawara akanaka e anakadzi akatendeka akaita hingana Rabheka, Esteri uye Abhigairi kungamubetserai kuti mugare mwanakadzi wakakura pakunamata (Onai mandima 3-4)
3-4. Hanzvadzi dze cidjaha dzingaonepi miezaniso yakanaka yekuti ateedzere? (Onaiwo mufanikiso.)
3 Bhaibheri rinoreketa ngezve anakadzi akawanda anoshamisa akada Djehovha uye akamuseenzera. (Onai fundo yakazwi: “Vakadzi Vanotaurwa muBhaibheri—Tingadzidzei kwavari?” iri mu jw.org, mu ciShona.) Hinga zvinorekethwa mu tsamba irikutungamirira fundo ino “awona aidzibata” uye “akatendeka mu zviro zvese.” Asi nyamasi uno, mu ungano muno miezaniso dzakawanda dze hanzvadzi dzakakura pakunamata dzekuti madjaha angakwanisa kudziteedzera.
4 Hanzvadzi dze cidjaha, zvakadini kupsvaka muezaniso we hanzvadzi ye Cikristu yakakura pakunamata uye moedza kufunda no muezaniso wayo? Ongororai kuti mawara api aanawo. Pedzepo, rangarirai kuti mungateedzera kudini mawara awona. Mu mandima anoteera, ticaona mawara matatu anokosha anodikana kugara no mwanakadzi.
5. Ngei kudzidodosa kecikosha ku mwanakadzi wakakura pakunamata?
5 Kudzidodosa i wara rinokosha maningi ku Mukristu. Kana mwanakadzi akadzidodosa, iyena ucagara no ushamwari wakabamba na Djehovha uye ucagarisana no amweni zvakanaka. (Tig. 4:6) Ngo muezaniso, mwanakadzi unoda Djehovha uye unodzidodosa, unosanangura kuzwira cokwadi cisikacinji cekupurutana musoro we mhuri wakasanangurhwa na Djehovha. (1 Ako. 11:3) Cokwadi icona cisikacinji, cinopanganidza kuti ndiani akasanangurhwa na Djehovha kuti atungamirire ungano uye mhuri.c
6. Hanzvadzi dze cidjaha dzingafundei kubva pakudzidodosa ka Rabheka?
6 Onai muezaniso wa Rabheka. Iyena wainga ari mwanakadzi ano uzii uye ushingi uyewo waiziya kuti ngapapi uye ndi riini waaidikana kuita ciito. (Gen. 24:58; 27:5-17) Kunyazi zvakadaro, iyena wainga ari munhu uno rureremedzo uye waidzikanda pasi. (Gen. 24:17, 18, 65) Kana imwimwi mukaita hingana Rabheka nge kudzidodosa uye kureremedza aya akapaswa ubaba na Djehovha, imwimwi mucagara muezaniso wakanaka ku mhuri yenyu uye mu ungano.
7. Hanzvadzi dze cidjaha dzingateedzera kudini Esteri pakupangidza maonero ari pakati no pakati?
7 Kugara no maonero ari pakati no pakati i wara rinodikana kugara no Mukristu wese. Bhaibheri rinobhuya kuti “ano maonero ari pakati no pakati ndiwona ano ungwaru.” (Zvie. 11:2) Esteri wainga ari museenzi wakatendeka wa Djehovha uye nge kugara no maonero ari pakati no pakati, iyena aazi kudzikudza paakagara mambokadzi. Iyena wakapurutana zano re mukoma ake mukuru Mordhekai uye wakariseenzesa. (Est. 2:10, 20, 22) Imwimwi mungakwanisawo kugara no maonero ari pakati no pakati hinga Esteri, nge kupsvaka mazano akanaka uye kuaseenzesa mu upenyu wenyu.—Tito 2:3-5.
8. Maererano na 1 Timoti 2:9, 10, kugara no maonero ari pakati no pakati kungabetsera kudini hanzvadzi pakusanangura zvekupfeka uye mushobo wekudzigadzira?
8 Esteri wakapangidzawo kugara no maonero ari pakati no pakati nge mushobo umweni. Iyena wainga ano “ciimo cakanaka uye wakarungama”; kunyazi zvakadaro, iyena wainga asikadzionesi. (Est. 2:7, 15) Hanzvadzi ingateedzera kudini muezaniso wa Esteri? Mushobo umweni wekuita izvona, ngewe kuseenzesa zano rinobhuiwa pana 1 Timoti 2:9, 10. (Erengai.) Muphostori Pauro wakabhuya kuti hanzvadzi dzinodikana kupfeka macira ano rureremedzo uye kugara no marangariro akanaka. Masoko e Cigrego aseenzeswa apa, anopangidza kuti mwanakadzi we Cikristu waidikana kupfeka nge mushobo wakanaka uye kupangidza kuti anokoshesa mazwiro uye maonero e amweni. Isusu tinodada no hanzvadzi dziya dzinotondowedza cokwadi ici cisikacinji, nge kupfeka macira anopangidza rureremedzo!
9. Tingafundei no muezaniso wa Abhigairi?
9 Kuzwisisa i wara rimweni rinokosha maningi ku Mukristu. Asi cinyi cinozwi kuzwisisa? I kukwanisa kusiyanisa—cakanaka no cakashata, mumasure mazvo kakusanangura kuita cakanaka. Onai muezaniso wa Abhigairi. Mwamuna wake wakaita cisananguro cakashata maningi cakakanda pa ngozi ese aaigara nawo uye aimuseenzera. Asi Abhigairi wakakasika kuita ciito. Nokukasika, iyena wakaona ciro cakanaka cekuita, ngo ndaa yazvo, wakaponesa anhu akawanda. (1 Sam. 25:14-23, 32-35) Kuzwisisa kunotibetserawo kuziya kuti ngaipi nguwa ye kunyarara uye nguwa ye kureketa. Uyewo kunotibetsera kukoshesa amweni asi tisikapindiri mu upenyu wawo.—1 Ate. 4:11.
FUNDIRAI ZVIRO ZVINOBETSERA MU UPENYU
Makabetserhwa kudini ngekufundira kuerenga uye kutara zvakanaka? (Onai ndima 11)
10-11. Kuziya kuerenga nokutara zvakanaka kungamubetserai kudini uye kungabetserawo kudini amweni? (Onaiwo mufanikiso.)
10 Hanzvadzi inodikana kufundira zviro zvinokwanisa kuibetsera zuwa no zuwa. Zvimweni zvakhona, ingazvifundira paya painonga yecikura uye zvicaibetsera mu upenyu wayo wese. Onai miezaniso minganani.
11 Fundirai kuerenga no kutara zvakanaka. Mu mbuto dzimweni, anhu anorangarira kuti anakadzi aadikani kufundira kuerenga no kutara. Asi izvi zvinokosha kuti Mukristu wese akwanise kuzviita.d (1 Ti. 4:13) Hino, musasiye kuti ciro cipi haco cimupingaidzei pa kufundira kutara no kuerenga. Ngaupi mungumisiro wakhona? Izvona zvicamubetserai kuti zviite nyore kuona basa uye kurumbwa muri pa basepo. Uyewo munokwanisa kugara mufundi wakanaka we Bhaibheri uyezve munokwanisa kubetsera amweni. Asi zvinokosha kupinda zvese, imwimwi munokwanisa kuerenga Bhaibheri uye kunyasa kurangarira zvakatarhwemo, nge kudaro munokhwedera dhuze na Djehovha.—Djs. 1:8; 1 Ti. 4:15.
12. Mungafundei pana Zvierengo 31:26?
12 Ziyai mushobo wakanaka we kucedza no amweni. Zvinokosha kuti Mukristu akwanise kucedza zvakanaka no amweni. Ndiyo ndaa, muphostori Tiyago wakatipasa zano rinoteera: “Munhu wese anodikana kukasika kuzwa, asi ononoka kureketa.” (Tig. 1:19) Kana imwimwi mukanyasa kupurutana zviya zvirikubhuiwa no amweni, munopangidza kuti muno “usisi” kana kuti munokoshesawo amweni. (1 Ped. 3:8) Kana musina cokwadi cekuti mazwisisa zvabhuiwa no umweni, kana kuti urikuzwa kudini, itai mibvunzo dzakasisira. Mumasure mazvo, torai nguwa kuti munyase kurangarira musati marumbwa mecireketa. (Zvie. 15:28, masoko e pasi) Dzibvunzisei kuti: ‘Zvandicabhuya i cokwadi here uye zvicabambisa munhu umweni? Zvicapangidza rureremedzo uye unaki here?’ Edzai kufundira no hanzvadzi dzinonyasa kupurutana uye dzinoreketa ngo mushobo uno unaki. (Erengai Zvierengo 31:26.) Nyasai kuona mushobo waanoreketa. Kukwanisa kucedzesana no amweni zvakanaka kucamubetserai kugumira shamwari dzakanaka uye kurumbwa muri murunyararo no amweni.
Mwanakadzi unofundira kucengeta zvakanaka nyumba ndi muezaniso wakanaka haiwa basi mu mhuri yake asiwo mu ungano (Onai ndima 13)
13. Mungafundira kudini kucengeta zvakanaka nyumba? (Onaiwo mufanikiso.)
13 Fundirai kucengeta nyumba. Mu mbuto dzimweni, anakadzi ndiwo anosocengeta nyumba. Pamweni hama yenyu kana kuti mai enyu angamubetserai kuita izvona. Hanzvadzi imweni inozwi Cindy inoti: “Cimwe ce zviro cinokosha candakaizirhwa na mai angu ngecekunfundiswa kuti basa rinoizwa no simba rinounzisa mupfaro. Kufundira kubika, kucenesa nyumba, kusona uye kootenga-tenga zviro, kakaita kuti upenyu wangu ugare nyore uye kakandibetsera kuti ndiite zvakawanda mu basa ra Djehovha. Mai angu akandifundisawo kutambira arendo zvakanaka, ngekuita izvona ndakaziya hama no hanzvadzi dzakanaka dzakagara muezaniso kandiri.” (Zvie. 31:15, 21, 22) Mwanakadzi unoseenza no simba, unotambira arendo zvakanaka uye unocengeta zvakanaka nyumba yake i makomborero ku mhuri yake uye muezaniso ku ungano.—Zvie. 31:13, 17, 27; Zvii. 16:15.
14. Mafundei no muezaniso wa Crystal, uye mungakanda ndangariro dzenyu pa zviro zvipi?
14 Fundirai kudzicengeta imwimwi pacenyu. Mukristu wese waidikana kufundira kuita izvona. (Afi. 4:11) Hanzvadzi imweni inozwi Crystal yakati: “Pandainga ndiciri kufunda ku cikora ce sekundariya, abereki angu akandibetsera kusanangura kursu yaizondifundisa kuita zviro zvinobetsera. Baba angu akandikohomedzesa kuita kursu ye kontabhiridhadhe uye izvona zvakandibetsera maningi.” Asi pano kufundira basi zviro zvinobetsera kuti muone basa, munodikanawo kufundira kuti mungaseenzesa kudini mare no uzii. (Zvie. 31:16, 18) Edzai kukanda ndangariro dzenyu pa zvinangwa zvenyu zvekunamata uye musandofiyari mare basi musina ciro cinokosha camunoda kuita. Ngekuita kudaro, imwimwi mungakwanisa kugara no upenyu uri nyore uye mucapfara maningi.—1 Ti. 6:8.
GADZIRIRAI RAMANGWANA RENYU
15-16. Ngei hanzvadzi dzisikazi kuwakwa makomborero mu ungano? (Marko 10:29, 30)
15 Kusakurira mawara e Cikristu uye kufundira kuita zviro zvinobetsera zvingamubetserai kugadzirira zviro zvingakwanisa kuitika mu upenyu wenyu mune ramangwana. Onai miezaniso minganani yamungasanangura kuita.
16 Imwimwi mungagara musikazi kuwakwa ke cinguwa. Djesu akabhuya kuti anakadzi amweni aizosanangura kutama kuwakwa, kunyazi mu mbuto yekuti anhu anokoshesa maningi kuwakwa. (Mat. 19:10-12) Amweni angagara asikazi kuwakwa nge ndaa ye zvikonzero zvimweni. Asi imwimwi mungagara no cokwadi cekuti Djehovha na Djesu anokoshesa maningi uya usikazi kuwaka kana kuwakwa. Mu nyika yese, hanzvadzi dzisikazi kuwakwa i makomborero mu ungano. Ngekupangidza rudo uye kukoshesa amweni, awona anopedzesera agara hanzvadzi uye mai ku amweni.—Erengai Marko 10:29, 30; 1 Ti. 5:2.
17. Hanzvadzi dze cidjaha dzingagadzirira kudini kuti dzipinde mu basa re nguwa yakadzara?
17 Imwimwi mungakwanisa kupinda mu basa re nguwa yakadzara. Hanzvadzi dzinoita zvakawanda mu basa re kuparidzira rinoizwa mu nyika yese. (Pis. 68:11) Kodi imwimwi mungakwanisa kuita urongwa kuti mupinde mu basa re nguwa yakadzara here? Imwimwi mungagara pionera, kubetsera pa basa re kuwaka kana kuti kuseenza pa Bheteri. Itai munamato ngezve cinangwa cenyu. Bhuyai no aya akakwanisa kudzadzisa cinangwa cawo uye edzai kuona kuti imwimwi mungaitei kuti muitewo zvimwezvo. Pedzepo itai urongwa ungamubetsera kuti mudzadzise cinangwa cenyu. Uye Garai no cokwadi cekuti kupinda mu basa re nguwa yakadzara kucamufunungurai mikana yakawanda inoshamisa icaita kuti muite zvakawanda mu basa ra Djehovha.
Kana imwimwi mecirangarira kuwakwa, munodikana kusanangura zvakanaka mwanarume wamucawakwa naye (Onai ndima 18)
18. Ngei zvecikosha kuti hanzvadzi inyase kusanangura zvakanaka munhu waacawakwa naye? (Onaiwo mufanikiso.)
18 Imwimwi mungasanangura kuwakwa. Mawara ese uye mishobo yese ye kuita zviro yataona dakara zvino, inomubetserai kuti mugare mukadzi wakanaka. Zviri pamhene kuti kana mecirangarira kuwakwa, imwimwi munodikana kusanangura zvakanaka mwamuna wenyu. Ici icimwe ce zvisananguro zvinonyanya kukosha zvamucaita mu upenyu wenyu. Musakanganwe kuti imwimwi mucadikana kutondowedza zvisananguro zvicaizwa no uya wamucasanangura kuti agare mwamuna wenyu. (Aro. 7:2; Aef. 5:23, 33) Hino, dzibvunzisei kuti: ‘Iyena Mukristu wakakura pakunamata here? Unokanda zviro zvekunamata pa mbuto yekutanga mu upenyu wake here? Unoita zvisananguro no ungwaru here? Iyena unokwanisa kutendera zvishaishi zvake here? Unoreremedza anakadzi here? Ucakwanisa kundiriritira pazviro zvekunamata, zvekunyama uye zvemundangariro here? Unobata zvakanaka ubaba waanawo here? Ngo muezaniso, ubaba upi waanawo mu ungano uye unoubata kudini?’ (Ruka 16:10; 1 Ti. 5:8) I zvirokwazvo kuti kana imwimwi mecida kugumira mwamuna wakanaka, munodikana kumbogadzirira kuti mugare mukadzi wakanaka.
19. Ngei mukadzi ungapfara ngekuzwi “mubetseri”?
19 Bhaibheri rinobhuya kuti mukadzi wakanaka ndi “mubetseri” ku mwamuna wake uye “wakasisira” kaari. (Gen. 2:18) Asi izvona zvirikuda kubhuya kuti mukadzi aakoshi here? Haiwa! Ngekuti basa re mukadzi rekugara mubetseri i basa rinokudzwa. Edzurirai kuti kakawanda kakhona, Djehovha kamare unosodainzwa mu Bhaibheri kuti “mubetseri.” (Pis. 54:4; Aheb. 13:6) Mukadzi ndi mubetseri we zvirokwazvo kana akatsigira mwamuna wake pa zvisananguro zvaanonga aita uye unoita zviri zvese kuti zvisananguro zve mwamuna wake zvibudirire. Ngekuda Djehovha, mukadzi unoita zviri zvese kuti amweni aone mawara akanaka ano mwamuna wake. (Zvie. 31:11, 12; 1 Ti. 3:11) Imwimwi mungagadzirira kuti mugare mukadzi wakanaka ngekubambisa rudo renyu na Djehovha uye kugara mubetseri ku amweni kutobatanidzawo mu mhuri menyu uye mu ungano.
20. Zviro zvipi zvakanaka zvingaizwa na mai mu mhuri yawo?
20 Imwimwi mungagara mai. Mumasure mekucata, imwimwi no mwamuna wenyu mungakwanisa kugara no ana. (Pis. 127:3) Asi zvinokosha kuti muziye zvinodiikanwa kuti mugare mai akanaka. Mawara uye mishobo yekuita zviro yataona dakara zvino zvingakwanisa kumubetserai kuti mugare mukadzi uye mai. Kana imwimwi mukapangidza rudo, unaki uye mwoyo unononoka kutsamwa, mhuri yenyu icanyasa kupfara uye ana enyu acazwa kudiwa uye kudziirirhwa.—Zvie. 24:3.
Hanzvadzi dze cidjaha dzakawanda dzinoseenzesa mu upenyu wawo zviya zvadzinofunda mu Bhaibheri, dzakagara Akristu akakura pakunamata (Onai ndima 21)
21. Tinozwa kudini no hanzvadzi dzedu uye ngei? (Onai foto ye pa kapa.)
21 Hanzvadzi dzinodiwa, isusu tinopfara maningi ngo zvese zvamunoitira Djehovha uye anhu ake. (Aheb. 6:10) Imwimwi munopeta masimba kuti mugare no mawara e ku mwiya, musakurire mishobo yekuita zviro inobetsera uye kudzigadzirira pa mabasa e ramangwana. Ngekuita izvona, munoita kuti upenyu wenyu upfadze maningi uye munoita zvakanaka ku anhu ese. Garai no rugondo rekuti imwimwi munokosha maningi mu sangano ra Djehovha!
NGOMA 137 Akadzi Akagondeka, Hanzvadzi dze ciKristu
a Hanzvadzi dzinodiwa, imwimwi munokosha maningi ku ungano. Imwimwi mungagara Akristu ano muezaniso wakanaka ngekusakurira mawara akanaka, kusakurira mishobo yekuita zviro inobetsera uye kugadzirira ramangwana. Ngekuita kudaro mucagara no makomborero akawanda mu basa ra Djehovha.
b NYASAI KUZWISISA: Mukristu wakakura pakunamata unotendera kutungamirirhwa ngo mwiya wa Djehovha haiwa pa uzii we nyika. Iyena unoteedzera muezaniso wa Djesu, unopeta masimba kuti agare no ushamwari wakabamba na Djehovha uye unopangidza rudo re zvirokwazvo ku amweni.
d Kuti muziye zvakawanda ngezve kukosha kekuziya kuerenga, onai fundo iri mu jw.org yakazwi: “Nei Zvichikosha Kuti Vana Vagare Vachiverenga?—Chikamu 1: Chii Chiri Nani: Kuverenga Kana Kuona Mavhidhiyo?” mu ciShona.