Rudo ra Mwari Rinogara Nokusikaperi

1-2. Akristu akawanda ari kubatana no zvinetso zvipi?

RANGARIDZAI bharko riri pakati pe bahari keciitika dutu rakakura. Mafungu akakura ecindunda bharko irona ku matii ese. Bharko irona ricaenda kwese kwarinoendeswa no mafungo kana pakasama kuoneka munhu unoseenzesa ankora. Ankora iyona icatsigira bharko uye icaribetsera kuti rirumbwe rakaima pa nguwa inonga yeciitika dutu.

² Kana imwimwi muri kubatana no muedzo unoshupha, imwimwi mungazwa hingana bharko irona. Mazwiro enyu angakwanisa kucinja ngo kukasika. Zuwa rimwe, imwimwi munogonda rudo uye rubetso ra Djehovha. Zuwa rinoteera imwimwi mungadzibvunzisa kuti iyena ari kuonadi kamare zvamuri kubatana nazvo here? (Pis. 10:1; 13:1) Pamweni shamwari yenyu ingamubvunzai masoko anobambisa uye imwimwi mungazwa zviri nani ke nguwa doko. (Zvie. 17:17; 25:11) Asi mungatangazve kukana-kana moguma pakurangarira kuti Djehovha andisiya. Mungakanda kudini ankora yekuezanisira pamunonga mecibatana no muedzo? Nge masoko amweni, imwimwi mungagara kudini no rugondo uye kurumbwa makabatisisa rudo uye rubetso ra Djehohva?

3. Pisarema 31:7 uye 136:1 inotifundisei ngezve “rudo rakagondeka ra Djehovha” uye ngei tingabhuya kuti Djehovha ndi muezaniso wakakura we rudo rakagondeka? (Onaiwo mafoto.)

³ Umwe we mushobo we kugara no ankora patinonga tecibatana no muedzo ngewe kuedzurira rudo rakagondeka ra Djehovha. (Erengai Pisarema 31:7; 136:1.) Soko rokuti “rudo rakagondeka” rinoda kureya ushamwari wakabamba uye unogara uripo ku anhu airi. Djehovha ndi muezaniso wakakura we rudo rakagondeka. Zvezvirokwazvo Bhaibheri rinopanganidza Djehovha hingana “akadzara no rudo rakagondeka.” (Eki. 34:6, 7) Bhaibheri rinobhuya ngezva Djehovha kuti: “Rudo renyu rakagondeka rakadzara maningi ku ese aya anomudainzai.” (Pis. 86:5) Izvona zvinoreya kuti Djehovha aazosii aseenzi ake akatendeka. Edzurirai kuti Djehovha akagondeka iyena angakwanisa kumupasai simba kuti mukwanise kubatana no miedzo inoshupha.—Pis. 23:4.

EDZURIRAI KUTI RUDO RAKAGONDEKA RA DJEHOVHA NDI FUNDISO YEKUTANGA YE BHAIBHERI

4. Pasai miezaniso dze fundiso dzekutanga dze Bhaibheri uye panganidzai kuti ngei tinonyasa kudzibatisisa?

⁴ Umwe we mushobo we kubambisa rugondo redu mu rudo ra Djehovha ngewe kuedzurira kuti rudo irona ndi fundiso yekutanga ye Bhaibheri. Soko rokuti “fundiso yekutanga ye Bhaibheri” rinoda kureyei kamuri? Pamweni imwimwi mungarangarira zvokwadi zvamakafunda mu Soko ra Mwari. Ngo muezaniso, imwimwi makafunda kuti zina ra Mwari ndi Djehovha, kuti Djesu ndi mwana wekutanga wa Mwari, kuti anhu akafa apana caanoziya uye kuti kucazooneka Paraizo pa nyika pano yekuti anhu acazorarama mairi nokusikaperi. (Pis. 83:18; Mup. 9:5; Juau 3:16; Zvak. 21:3, 4) Mumasure mekutendera fundiso idzona, zvinoshupha maningi kuti imwimwi musiyezve kudzitendera. Ngei? Ngekuti imwimwi makaona kuti idzona dzino padzinotsamira. Kuedzurira kuti rudo ra Djehovha icokwadi cekutanga ce Bhaibheri kungatibetsera kutama kutendera kuti iyena aaripi kuona zvatiri kubatana nazvo kana kuti aana basa nazvo. Ngatinyase kuzviona.

5. Panganidzai kuti munhu ungasiya kudini fundiso dze kunyepa?

⁵ Pamakatanga kufunda Bhaibheri, cinyi cakamubetserai kuti musiye fundiso dzekunyepa? Pamweni cakamubetserai ngece kuezanisa zviya zvamaifundiswa ku gereja kenyu no zviya zvinofundiswa no Bhaibheri. Nge muezaniso, ngatimboti imwimwi maitenda kuti Djesu ndi Mwari we masimba ese. Asi pamakafunda Bhaibheri pamweni makadzibvunzisa kuti fundiso ii ngeye zvirokwazvo here. Mumasure me kuongorora zvinofundiswa no Bhaibheri imwimwi makadaira kuti haiwa. Pedzepo makacinja fundiso dze kunyepa no cokwadi ce Bhaibheri cinoteera cokuti Djesu ndi “dangwe re zvisikwa zvese” uye kuti ndi “Mwana akabarhwa ari umwe ega wa Mwari.” (Ako. 1:15; Juau 3:18) Zviri pamhene kuti fundiso dze kunyepa dzingakwanisa kuita hingana zviro zvinoshupha “kuputsa” uye kushupha kusiya. (2 Ako. 10:4, 5) Mumasure me kufunda cokwadi, imwimwi amuzi kuhwirira pa fundiso dzekunyepa dzamakasiya sure.—Afi. 3:13.

6. Ngei imwimwi mungagara no rugondo rokuti “rudo rakagondeka ra Djehovha” rinogara nokusikaperi?

⁶ Imwimwi mungakwanisa kuita ciro cakatodzana no zvinofundiswa no Bhaibheri ngezve rudo ra Djehovha. Pamunonga mecibatana no zvinetso, kana mukatanga kukana-kana ngezve rudo ra Djehovha dzibvunzisei kuti: ‘Kodi marangariro angu akanaka here?’ Ezanisai kukana-kana kamuri kuita ngezve rudo ra Djehovha no masoko ari pana Pisarema 136:1—tsamba iri kutungamirira fundo ino. Ngei Djehovha ecibhuya kuti rudo rake “rakagondeka”? Ngei soko rokuti rudo rake rakagondeka rinogara nokusikaperi reciphindwa kanokwana kuita 26 mu bhuku iri ra Pisarema? Hingana zvataona, rudo rakagondeka ra Djehovha ku anhu ake i fundiso ye Bhaibheri inokosha yakatodzana no fundiso imweni yamakatenda nokukasika mu Soko ra Mwari. Marangariro ekuti Djehovha anomuonai hingana musikabetseri kana kuti amuzi kusisira rudo rake i manyepo. Rambai fundiso ii no rugondo rese hingana kuramba kamaizoita fundiso ipi hayo ye kunyepa!

7. Pasai miezaniso minganani ye matarhwa anotigondesa ngezve rudo ra Djehovha.

⁷ Bhaibheri rino gondeso dzakawanda dzekuti Djehovha anotida. Ngo muezaniso, Djesu akati ku ateeri ake: “Imwimwi munokosha maningi kudarika zvishiri zvakawanda.” (Mat. 10:31) Djehovha wene akabvunza anhu ake kuti: “Ndicamubambisai, ndicamubetserai uye ndicanyasa kumubatai no nyara yangu kwawo ye unatsi.” (Isa. 41:10) Onai kuti masoko aya anotigondesadi kamare. Djesu aazi kubhuya kuti: ‘Pamweni mungakwanisa kukosha.’ uye Djehovha aazi kubhuya kuti: ‘Pamweni ndigakwanisa kumubetserai.’ Asi awona akabhuya kuti: “Imwimwi munokosha maningi” uye “Ndicamubetserai.” Kana imwimwi mukakana-kana ngezve rudo ra Djehovha pamunobatana no miedzo, matsamba aya angakwanisa kumubetserai kuti muzwe kuti Djehovha anomudai uye angamubetseraiwo kuti muziye uye muzvitendere. Kunyasa kurangarira ngezvazvo pamunoita munamato, kucamupasai cido cekuphinda masoko ari pana 1 Juau 4:16: “Isusu tinoziya rudo rina Mwari katiri uye tinotenda mu rudo iri.”a

8. Cinyi camungaita kana nguwa dzimweni mecikana-kana kuti Djehovha anomudai?

⁸ Zvakadini kana mecikana-kana ngezve rudo ra Djehovha? Ezanisai mazwiro enyu no zviro zvamunoziya. Mazwiro edu angakwanisa kucinja maererano no mugariro wedu. Asi rudo ra Djehovha hingana zvinofundiswa no Bhaibheri aricinji. Kukana-kana ngezve rudo ra Djehovha zvinoreya kutama kuzwisisa unhu wa Djehovha.—1 Juau 4:8.

NYASAI KURANGARIRA NGEZVE “RUDO RINA DJEHOVHA KAMURI”

9-10. Masoko a Djesu ari pana Juau 16:26, 27 ekuti: “Baba anomudai” anoda kureyei? (Onaiwo mufanikiso.)

⁹ Tingafunda zvakawanda ngezve rudo ra Djehovha nge kunyasa kurangarira zvakabvunza Djesu afundi ake. Iyena akati: “Baba anomudai.” (Erengai Juau 16:26, 27.) Djesu aazi kubhuya izvona kuti aapfadze basi. Patinoerenga ngezve masoko awona tinoona kuti Djesu ainga ecireketa ngezve—munamato.

¹⁰ Djesu ainga abva koobvunza afundi ake kuti awona aidikana kunamata nge muzina rake haiwa kaari. (Juau 16:23, 24) Zvaikosha maningi kuti awona aziye izvona. Mumasure mekuti Djesu amutswa, pamweni afundi ainga ano cido cekunamata kaari ngekuti awona ainga agara mashamwari. Awona pamweni akarangarira kuti sezvo Djesu aiada maningi pamweni iyena aizoozwa zvikumbiro zvawo uye okumbira Baba ake kuti aabetsere. Asi Djesu akaabvunza kuti awona ainga asikadikani kurangarira kudaro. Ngei? Djesu akati: “Baba anomudai.” Masoko aya anoita dii re zvokwadi zvekutanga zve Bhaibheri ngezve munamato. Izvona zvinoda kureyei? Imwimwiwo makafundira ngezva Djesu uye makagara shamwari yake. (Juau 14:21) Asi kuita hinga afundi aya imwimwi munganamata kuna Mwari no rugondo meciziya kuti: “Baba anomudai.” Pese pamunoita munamato kuna Djehovha imwimwi munopangidza kuti munotenda masoko aya.—1 Juau 5:14.

PSVAKAI KUZIYA KUTI CINYI CINOITA KUTI MUKANE-KANE

11. Ngei Sathani waizopfara kana tikatanga kukana-kana ngezve rudo ra Djehovha?

¹¹ Ngei tinokana-kana ngezve rudo ra Djehovha? Imwimwi pamweni mungabhuya kuti tinokana-kana nge ndaa ya Sathani uye izvona izvirokwazvo. Sathani unoda ‘kutirhya’ uye waizopfara maningi kana tikatanga kukana-kana ngezve rudo ra Djehovha. (1 Ped. 5:8) Djehovha nge ndaa ye rudo raanaro katiri akaitisa kuti tigare no rusudzunuro uye Sathani unoda kutiitisa kuti tirangarire kuti isusu atisisiri rudo irona. (Aheb. 2:9) Hino ndiyani waizowina kana tikatanga kukana-kana ngezve rudo ra Djehovha? Zviri pamhene kuti ndi Sathani. Hino ndiyani waizopfara kana tikasiya kuseenzera Djehovha nge ndaa ye kuora mwoyo? Zviri pamhene kuti ndi Sathani basi. Asi cokwadi nge cekuti Sathani ndiye waruza rudo ra Djehovha uye pa imwe ye mirau yake iyena unotiitisa kuti tirangarire kuti tisu taruza rudo ra Djehovha uye kutenderhwa na Djehovha. (Aef. 6:11) Patinozwisisa kuti muzondi wedu uri kuedza kutiitirei tinogara takanyasa kubamba kuti “tirhwisane naye.”—Tig. 4:7.

12-13. Ngei kusama kukwana ketakagara nhaka kungaita kuti titange kukana-kana ngezve rudo ra Djehovha?

¹² Asi kukana-kana ngezve rudo ra Djehovha kungauyawo nge cikonzero cimweni. Cipi icona? Kusama kukwana ketakagara nhaka. (Pis. 51:5; Aro. 5:12) Citema cakatikhwededza kure no Musiki wedu. Izvona zvakabata-batawo mwiri wedu, marangariro edu uye no mwoyo wedu.

¹³ Citema cinoita kuti tigare no mazwiro akawanda akasiyana-siyana. Tinozwa tecidzipasa ndaa, kudzirhya mwoyo tisikazi kucengeteka uye kupsveruka. Izvona zvingaitika paya patinoita citema. Asi izvona zvinoitikawo ngokuti nguwa dzese tinoedzurira kuti tiri anhu asikazi kukwana, izvona zvakasiyana maningi no zviya zvaidiwa na Mwari paakatisika. (Aro. 8:20, 21) Kuita hingana karu yekuti aihambi zvakanaka ngekuti iri kupera mwiya, isusuwo ngekuti tiri anhu asikazi kukwana, atikwanisi kuita zviro ngo mushobo watakasikwa. Hino, azvitishamisi kuti nguwa dzimweni tinorhwisana nokukana-kana ngezve rudo ra Djehovha. Kana izvona zvikaitika tinodikana kuedzuria kuti Djehovha ndi “Mwari mukuru uye anoshamisa . . . anopangidza rudo rakagondeka ku aya anomuda uye ku aya anozwira mitemo yake.”—Nee. 1:5.

14. Kunyasa kurangarira ngezve rusudzunuro kungatibetsera kudini kuti tinyase kugonda kuti Djehovha anotida? (Aroma 5:8) (Onaiwo bhokisi rakazwi “Dzidziirirei pa ‘Simba ro Ucengedzi we Citema.’”)

¹⁴ Izvirokwazvo kuti nguwa dzimweni tingazwa tisikasisiri rudo ra Djehovha. Kubhuya zvazviri, isusu atisisiri kamare rudo irona uye izvona ndizvo zvinoita kuti rudo irona rikoshe maningi. Djehovha aatipangidziri rudo rake ngekuti isusu takasisira kuti iyena atipangidzire. Kunyazi zvakadaro, nge ndaa ye rudo raanaro katiri, Djehovha akaita gadziriro ye rusudzunuro kuti arekerere zvitema zvedu. (1 Juau 4:10) Edzurirai kuti Djesu akauya kooponesa ashaishi haiwa anhu akakwana. (Erengai Aroma 5:8.) Tese isusu atikwanisi kuita zviro nge mushobo wakakwana uye Djehovha aaetseri izvona katiri. Patinozwisisa kuti kusama kukwana kedu kungatiitisa kuti tikane-kane ngezve rudo ra Djehovha tinogara takagadzirira kurhwisa kuti izvona zvisaitike.—Aro. 7:24, 25.

SANANGURAI KURUMBWA MAKAGONDEKA

15-16. Kana tikarumbwa takagondeka kuna Djehovha tingagara no cokwadi cei uye ngei? (2 Samueri 22:26)

¹⁵ Djehovha anoda kuti isusu tiite cisananguro cakanaka ce “kugara dhuze naye.” (Dhe. 30:19, 20) Kana tikaita izvona tingagara no rugondo rokuti iyena acarumbwa akagondekawo katiri. (Erengai 2 Samueri 22:26.) Patinonga takagondeka kuna Djehovha, tinogara no rogondo rokuti iyena acatibetsera kurhwisana no mugariro upi hawo watingasongana nawo mu upenyu.

¹⁶ Hingana zvataona, tino zvikonzero zvakawanda kuti tirumbwe takabamba pa zvinetso zvo upenyu kuita hingana bharko rakanyasa kuima. Isusu tinoziya kuti Djehovha anotida uye kuti acatibetsera. Izvona zvinofundiswa no Bhaibheri. Kana tikazokana-kana no rudo ra Djehovha, tinodikana kuedzurira zviya zvatinoziya ngezve rudo ra Djehovha, pane kugonda zviya zvatiri kuzwa pa nguwa iyona. Tinoda kugonda mu cokwadi ce Bhaibheri cekuti rudo ra Djehovha rinogara nokusikaperi.