Salamo

TO DAVIDA HORORAA ˈTU I TE ATUA.

E Salamo na Davida.

26 Tei ia oe te parau ia ˈu, e Iehova; i haere noa na vau ma te haavare ore: te tiaturi nei au ia Iehova, e ore au e pahee.

2 E hiˈopoa mai oe, e tamata mai, e Iehova, e perehahu mai oe i tau aau e tau manaˈo: 3 e vai na to hamani maitai i mua i tau mata, e ua faaau vau i to ˈu haerea i te parau mau na oe ra. 4 Aore au i parahi i roto i te mau taata haapao ore i te parau, aore hoi i amui i roto i te feia haavare. 5 E mea ino na ˈu ia parahi i ǒ te feia parau ino; e ore hoi au e parahi i roto i te feia paieti ore. 6 E horoi au i o ˈu pue rima i te hapa ore, a haaati atu ai au i to fata, e Iehova! 7 A faaite atu ai ma te reo haamaitai, e a taio ai i ta oe atoa ra mau ohipa taa ê ra. 8 Ua hinaaro vau, e Iehova, i te vahi moˈa ra o to fare, e te vairaa o te sekene o to oe ra hanahana.

9 Eiaha e amui-atoa-hia tau varua i to te feia rave hara, e o vau atoa nei i to te feia toto ra: 10 e te vai ra te parau ino i roto i to ratou rima; ua î hoi to ratou rima atau i te tarahu haapiˈo ra. 11 Area vau nei, te haere nei au ma te hapa ore. E faaora oe ia ˈu, e aroha mai hoi ia ˈu. 12 Te taahi nei tau avae i te vahi papu; e haamaitai â vau ia Iehova i roto i te mau amuiraa ra.