Salamo

I PURE DAVIDA IA MATARA TA ˈNA HARA.

Na te Menasehe. E Salamo na Davida i te haerea mai o te peropheta ra o Natana ia ˈna ra i muri aˈe i to ˈna haereraa ˈtu ia Bate-seba ra.

51 E aroha mai oe ia ˈu, e te Atua e, i taua hamani maitai no oe ra, e no te rahi o to oe ra hamani maitai: e parai oe i ta ˈu nei mau hara. 2 E horoi hua mai oe ia ˈu i to ˈu nei ino, tamâ hua mai ia ˈu i ta ˈu nei hara. 3 Te faˈi nei hoi au i ta ˈu nei hara, e te vai noa nei â to ˈu ino i pihai iho ia ˈu. 4 I mua i to aro, to oe anaˈe ra, i hara ˈi au nei, e i mua i to mata i rave ai au i teie nei ino: ia faatiahia hoi ta oe parau, e eiaha e, faahapahia ia parauhia ra. 5 Inaha, i fanau mai au ma te hara! e i tôhia vau e tau metua vahine ma te ino. 6 Inaha, o te parau mau no roto ra ta oe e hinaaro! e haapii mai oe ia ˈu i te haapao maitai i te vahi moe ra. 7 E tamâ mai oe ia ˈu i te hisopa e ia mâ roa vau; e horoi oe ia ˈu, e uouo roa aˈera vau i to te hiona. 8 E faaite mai oe ia ˈu i te oaoa, e te rearea, ia oaoa te mau ivi i ofatihia e oe ra. 9 E huna ê atu oe i to mata i ta ˈu nei mau hara, e parai hua i to ˈu nei mau ino. 10 E faaau na oe i te aau mâ i roto ia ˈu nei, e tau Atua. E faahou na hoi oe i te aau manaˈo tia i roto ia ˈu nei. 11 Eiaha e faarue ia ˈu i mua i to aro nei, eiaha hoi e rave ê atu i to Varua Maitai ia ˈu nei. 12 E faahoˈi mai oe i te oaoa i te ora na oe ra; e ia tauturuhia mai au e te aau tiamâ ra. 13 E i reira vau e haapii ai i te feia rave hara i ta oe parau, e e faafariuhia mai te rave parau ino ra ia oe.

14 Ia ora vau ia oe i te hara toto ra, e te Atua e, te Atua e ora ˈi au nei; e na tau vaha e himene pii hua i to oe ra aroha. 15 E vevete na oe, e Iehova, i tau vaha, e na tau vaha e arue ia oe. 16 E ere hoi i te tusia ta oe i hinaaro, ahiri o te reira, ua horoahia ïa e au, aore hoi oe e au i te tusia taauahi. 17 O ta te Atua tusia hinaaro ra, o te aau paruparu ra ïa; o te aau paruparu ra e te oto ra, e ore roa te Atua e vahavaha i te reira.

18 Ei hamani maitai to oe ia Ziona; e patu hoi oe i te aua i Ierusalema nei. 19 Ei reira oe e mauruuru ai i te tusia parau-tia e te tusia taauahi taatoa mau ra: ei reira te puaatoro e hopoihia ˈi i nia i ta oe ra fata.