Mareko

TA TE MESIA RA PARAU I TE FAARUERAA VAHINE RA.

10 Ua tia aˈera oia i nia haere atura i te pae Iudea, i te hiti Ioridana ra; ua tairuru faahou maira te taata ia ˈna ra e ua haapii faahou atura oia ia ratou, o ta ˈna ïa peu mau. 2 Ua haere maira te mau Pharisea ia ˈna ra, ua ui maira ia ˈna, E au anei i te ture ia haapae te tane i ta ˈna vahine? râmâ maira ia ˈna. 3 Ua parau atura oia ia ratou, na ô atura, Eaha ta Mose parau i tuu mai ia outou i te reira? 4 Ua parau maira ratou, Ua tia ia Mose ia papai matou i te parau haapae, a tuu atu ai ia ˈna. 5 Ua parau atura Iesu ia ratou, na ô atura, No te mǎrû ore o to outou aau i papai mai ai Mose i te reira parau. 6 Area i te matamua ra, i te hamaniraa i te mau mea atoa nei, i hamani ihora te Atua i te taata i te tane hoê, e te vahine hoê. 7 E faarue ai te tane i tana metua tane e tana metua vahine, a ati atu ai i tana vahine; 8 e e riro hoi raua ei hoê, e ere atura raua i te toopiti, hoê râ. 9 E teie nei, ta te Atua i taati râ, eiaha te taata e faataa ê atu.

10 Ua ui faahou maira ta ˈna mau pǐpǐ ia ˈna i roto â i te fare i taua parau ra. 11 Ua parau atura oia ia ratou, O te haapae i tana vahine a faaipoipo ai i te tahi, ua faaturi ïa oia ia ˈna. 12 E ia haapae te vahine i tana tane a faaipoipo ai i te tahi, ua faaturi atoa oia.

13 Ua hopoi maira ratou i te tamarii rii ia ˈna ra, ia faatiaia ˈtu oia ia ratou; ua avau atura râ ta ˈna mau pǐpǐ i te feia i hopoi mai. 14 Ia ite atu râ Iesu, inoino atura, na ô atura ia ratou, A tuu mai i te tamarii rii ia haere noa mai ia ˈu nei, e eiaha e tapeahia ˈtu; mai ia ratou hoi to te basileia o te Atua ra. 15 Oia mau ta ˈu e parau atu ia outou nei, O te ore e farii i te basileia o te Atua mai te tamaiti aruaru ra, e ore roa ˈtu oia e ô i reira. 16 Ua rave atura ia ratou, ua hii ihora, ua tuu atura i tana rima i nia iho ia ratou, e ua faaora ˈtura oia ia ratou.

17 E te haere atura oia i nia i te aratia ra, te horo maira te hoê taata, ua tuu ihora i te turi i raro i mua ia ˈna, ua ui maira, E te orometua maitai ra, eaha vau e noaa ˈi te ora mure ore? 18 Ua parau atura Iesu ia ˈna, Eaha oe i haamaitai mai ai ia ˈu? o te Atua anaˈe ra te maitai. 19 Te ite na oe i te ture, Eiaha e faaturi; Eiaha e taparahi; Eiaha e eiâ; Eiaha e haavare; Eiaha e rave ino; E faatura ˈtu i to metua tane e to metua vahine. 20 Ua parau maira oia ia ˈna, na ô maira, E te Orometua, ua hope roa te reira i te haapaohia e au mai to ˈu apîraa mai â. 21 Ua hiˈo atura Iesu ia ˈna e ua aroha ˈtura ia ˈna, na ô atura, Te toe ra te hoê mea ia oe: a haere a hoo atu i ta oe ra e hope roa ˈˈe, a hopoi atu ai na te taata rii, e e taoˈa ta oe i te ao i reira; a haere mai ai, a rave ai i to satauro, a pee mai ai ia ˈu. 22 Taiâ atura oia i te reira parau, haere atura ma te oto, e taoˈa rahi hoi ta ˈna.

23 Ua hiˈo atura Iesu e ati noa ˈˈe, ua parau atura i ta ˈna mau pǐpǐ, Te faaô taiata o te feia taoˈa rahi i te Basileia o te Atua e! 24 Hitimaue atura te mau pǐpǐ i taua parau ra; ua parau faahou atura râ Iesu ia ratou, na ô atura, E te mau tamarii e, te faaô taiata o te feia i tiaturi i te taoˈa i te Basileia o te Atua e! 25 E faaô ohie aˈe te kamela na roto i te apoo au i te taata taoˈa ia faaô i te Basileia o te Atua ra. 26 Rahi roa aˈera to ratou maere, na ô aˈera ratou ratou iho, O vai ihora hoi te ora? 27 Ua hiˈo atura Iesu ia ratou, na ô atura, E ore roa ïa e tia i te taata, eita râ e ore i te Atua: e tia hoi te mau mea atoa nei i te Atua.

28 Ua parau maira Petero ia ˈna, Inaha matou ua faarue i te mau mea atoa e ua pee mai ia oe. 29 Ua parau atura Iesu, na ô atura, Oia mau ta ˈu e parau atu ia outou nei, Aore roa e taata i faarue i to ˈna fare, e te mau taeae, e te mau tuahine, e te metua tane, e te metua vahine, e te vahine iho, e te mau tamarii, e te fenua, no ˈu e no te evanelia nei, 30 e ore ai i te noaa ta ˈna e hanere atu i teie nei ao, i te fare, i te taeae, i te tuahine, i te metua vahine, i te tamarii, i te fenua, e te hamani ino; e i te ao to muri ra, o te ora mure ore ïa. 31 E rave rahi râ to mua e riro i muri; e to muri e riro i mua.

32 E te haere noa ra ratou na te eˈatia i Ierusalema; e ua na mua ˈtura Iesu ia ratou i te haere: ua maere ihora ratou, e pee atura ia ˈna ma te mǎtaˈu. Ua opai aˈera oia i te tino ahuru ma piti ra i te hiti, faaite faahou atura ia ratou i te mau mea e roohia mai ai oia ra, 33 na ô atura, Inaha, te haere nei tatou i Ierusalema; e e tuuhia te Tamaiti a te taata nei i te mau tahuˈa rarahi ra, e te mau papai parau, e e faahapa mai ratou ia ˈna ia pohe, e e pûpû atu hoi ia ˈna i te Etene ra: 34 e tâhitohito mai ratou ia ˈna, e e papai mai, e tufa mai hoi i te huare i nia ia ˈna, e e taparahi pohe roa mai hoi; e tia faahou mairâ oia ia tae i te rui toru.

35 Ua haere maira na tamarii a Zebedaio ra ia ˈna, o Iakobo raua o Ioane, na ô maira, E Rabi, te hinaaro nei mâua ia faatia mai oe i ta mâua e ani atu nei. 36 Ua na ô atura oia ia raua, Eaha to orua hinaaro ia faatia ˈtu vau? 37 Ua parau maira raua ia ˈna, Ia noaa ia oe to oe hinuhinu ia parahi te hoê o mâua nei i to rima atau, e te tahi i to rima aui. 38 Ua parau atura Iesu ia raua, Aita orua i ite i ta orua i ani mai nei, e tia ia orua ia inu i te auˈa ta ˈu e fatata i te inu nei? e ia bapetizohia i te bapetizo e bapetizohia ˈi au nei? 39 Ua na ô maira raua, E tia ïa ia mâua. Ua parau atura Iesu ia raua, E inu mau â orua i te auˈa ta ˈu e fatata i te inu nei, e e bapetizohia orua i te bapetizo e bapetizohia ˈi au nei: 40 area te parahi i tau rima atau e tau rima aui, eita ïa e tia ia ˈu ia horoa, maori râ no te feia e haapaohia ˈi ra.

41 E faaroo aˈera te tino ahuru ra, riri roa aˈera ratou ia Iakobo raua o Ioane. 42 Ua parau atura râ Iesu ia ratou e haere mai ia ˈna ra, e ua na ô atura, Ua ite outou e, te faahepo nei te hui mana o te mau fenua i to ratou, e te feia rarahi ra te mana ra ïa i nia iho ia ratou: 43 eita râ e tia ia na reira i roto ia outou; o te hinaaro râ i te faarahi i roto ia outou na, ia riro ïa oia ei tavini no outou; 44 e o te hinaaro ia hau oia ra, ei tavini ïa no outou atoa na e tia ˈi. 45 Aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.

46 Ua tae atura ratou i Ieriko, e muri aˈera, ia haere ê oia i Ieriko, oia e ta ˈna mau pǐpǐ, e te taata atoa e rave rahi, te parahi ra te tamaiti a Timaio, oia hoi Baretimaio matapo ra, i te pae aratia, te ani ra i te taoˈa. 47 E ite aˈera oia e, o Iesu i Nazareta ra, ua pii maira na ô maira, E te Tamaiti a Davida ra, e Iesu e, e aroha mai oe ia ˈu. 48 E rave rahi tei aˈo atu ia ˈna ia mamû oia; rahi roa maira râ to ˈna pii, E te Tamaiti a Davida e, e aroha mai oe ia ˈu. 49 Ua tia ihora Iesu, ua faaue atura e parau atu ia ˈna. Ua parau atura ratou i taua taata matapo ra, na ô atura ia ˈna, A faaitoito, a tia i nia; te parauhia maira oe e ana. 50 Ua haapae atura oia i ta ˈna ahu, tia aˈera i nia, haere maira ia Iesu ra. 51 Ua parau atura Iesu, na ô atura ia ˈna, Te hinaaro na oe ia aha ˈtu vau ia oe? Ua parau maira taua matapo ra ia ˈna, E Raboni, ia ora tau mata. 52 Ua parau atura Iesu ia ˈna, A haere; ua ora oe i to faaroo. Ora ihora ta ˈna mata i reira ra, e ua pee maira ia Iesu i te aratia ra.