Mareko

TE MESIA I TE VAHAVAHARAAHIA E TE MAU TAATA I O ˈNA IHORA.

6 Faarue ihora Iesu i taua vahi ra, haere atura i to ˈna iho fenua, ma ta ˈna mau pǐpǐ atoa, 2 E haapii atura oia i roto i to ratou mau sunago i te sabati, ua na ô aˈera te feia i faaroo ia ˈna e rave rahi ma te maere, Nohea te mau ravea a teie nei taata? e eaha teie nei paari i horoahia mai ia ˈna nei, i tia ˈi teie nei mau semeio rahi i ravehia e ana nei? 3 e ere anei teie i te tamuta, te tamaiti a Maria ra, te taeae o Iakobo ra, e no Iose, e no Iuda, e no Simona? e e ere anei tei i ô tatou atoa nei tana mau tuahine? Maheaitu ihora ratou ia ˈna. 4 Ua parau atura râ Iesu ia ratou, E ore te peropheta e ore i te haapaohia, maori râ i to ˈna ihora fenua, e i to ˈna iho fetii, e i to ˈna ihora utuafare. 5 Aita ˈtura e tia ia ˈna ia rave i te semeio i reira, maori râ i ve toofanu pue maˈi i faaorahia e ana i te tuuraa i tana rima i nia ia ratou. 6 Maere roa ˈtura oia i to ratou faaroo ore. Haere atura oia na roto i te mau oire rii i reira iho i te haapii haerea.

7 Ua parau atura oia i te tino ahuru ma piti e haere mai ia ˈna ra, tatoopiti atura i te tonoraa ia ratou; ua tuu atura i te mana ia ratou ia vi te mau varua faufau ra; 8 e ua parau atura ia ratou, e eiaha roa ei mea ê e hopoihia i to ratou tere: maori râ o te raau turutootoo hoê ra: eiaha ei pute, eiaha ei maa, eiaha ei moni i to ratou tatia: 9 ei tamaa hoi ta outou, e eiaha ia taipiti pereue ia ahu. 10 Ua parau atoa ˈtura oia ia ratou, Te vahi e tomo atu ai outou i roto i te fare ra, ei reira parahi iho ai, e reva noa ˈtu outou. 11 I te vahi râ aore ratou i ite mai ia outou, e aore hoi e faaroo mai ia outou, e ueue atu i te repo o to outou avae ia reva outou ra, ei tapaoraa ˈtu ia ratou. Oia mau ta ˈu e parau atu ia outou nei, E maitai aˈe Sodoma e Gomora ia tae i te mahana haavaraa ra i te reira oire. 12 Haere atura ratou, aˈo haere atura i te taata ia tatarahapa; 13 e tiavaru atura hoi i rapae i te demoni e rave rahi, e ua faaora ˈtura i te maˈi e rave rahi, ma te faatavai ia ratou i te monoˈi.

14 Ite aˈera te arii ra o Heroda ia ˈna (ua tuiroo hoi to ˈna iˈoa): e ua na ô aˈera, Ua tia faahou mai Ioane Bapetizo mai te pohe mai, i tia ˈi teie nei mau semeio na ˈna i rave. 15 Ua na ô aˈera vetahi, O Elia ïa. Na ô aˈera hoi vetahi, E peropheta ïa, mai te hoê peropheta tahito ra. 16 Ite aˈera râ Heroda i te parau ia ˈna, ua na ô aˈera, O Ioane ïa ta ˈu i tâpû i te upoo ra. Ua tia faahou oia mai te pohe mai. 17 Na Heroda hoi i faaue ia haruhia Ioane, e tapeahia ihora i roto i te tapearaa, no Herodia no te vahine a tana taeae ra a Philipa, tei faaipoipohia e ana ra. 18 I parau na hoi Ioane ia Heroda, Eita e au i te ture ia faaipoipo oe i te vahine a to taeae. 19 Riri roa aˈera Herodia ia ˈna, i hinaaro hoi e taparahi pohe roa ia ˈna, aita aˈera râ i tia; 20 te mǎtaˈu ra hoi Heroda ia Ioane, ua ite hoi e, e taata parau-tia oia e te maitai, e ua faatia ˈtu oia ia ˈna, e ua haapao i te mau mea a Ioane i parau maira e rave rahi, e ua faaroo hoi ia ˈna ma te popou. 21 Ia tae ra i te mahana au ra, oia te mahana fanauraa o Heroda ra, i faatupu ai oia i te hoê amuraa maa na te feia rarahi i o ˈna ra e te mau raatira rarahi faehau ra, e te feia mana i Galilea ra: 22 ua haere maira te tamahine a Herodia i roto, e ua upa maira i mua iho ia ratou, popou roa aˈera Heroda e te mau manihini atoa na ˈna ra, ua parau atura te arii i taua potii ra, A ani mai i ta oe e hinaaro ra, e na ˈu ïa e ho atu na oe. 23 E ua tǎpǔ atura hoi oia ia ˈna, E o ta oe e ani mai ia ˈu nei, e horoahia ˈtu ïa e au, e tae noa ˈtu i te afa i to ˈu nei basileia. 24 Haere ê atura oia, ua ui atura i tana metua vahine, Eaha ta ˈu e ani atu? Ua parau maira oia, Te upoo o Ioane Bapetizo ra. 25 Ua hoˈi ru noa maira oia i te arii ra, ua ani maira, na ô maira, Teie to ˈu hinaaro, e ho mai oe i te upoo o Ioane Bapetizo i roto i te hoê farii i teie nei â. 26 Oto rahi atura te arii, no te tǎpǔ râ na ˈna ra, e no te mau manihini hoi na ˈna, aita ˈtura oia i te faaore atu. 27 Faaue atura râ te arii i te hoê faehau i reira ra e tii i te upoo o Ioane Bapetizo e hopoi mai; haere atura oia, tâpû atura i to ˈna upoo i roto i te tapearaa ra, 28 ua hopoi maira i tana upoo i roto i te hoê farii, tuu maira i taua potii ra, hopoi atura oia i te metua vahine ra. 29 Ite aˈera râ ta ˈna mau pǐpǐ, ua tii maira ratou i te tino hopoi atura i roto i te hoê menema.

30 E putuputu maira te mau aposetolo ra, ua faaite maira ratou ia Iesu i ta ratou i rave, e ta ratou i haapii ra. 31 Ua parau atura oia ia ratou, A haere mai outou anaˈe iho, tatou i te hoê vahi moemoe e faaea iti noa ˈˈe; aita hoi o ratou maa taime e pau ai te maa i te rahi o te taata i te haerea mai e te haereraa ˈtu. 32 Hôe huna ˈtura ratou na nia i te pahi i te tahi vahi moemoe. 33 Ua ite ra te taata ia ratou i te fanoraa, e rave rahi hoi tei ite ia ˈna, e ua horo atura na uta mai roto atu i te mau oire atoa, o tei tae na ïa, e ua haaputuputu maira ia ˈna ra. 34 E tei te tipaeraa ˈtu Iesu ra, hiˈo atura oia i taua feia rahi ra, aroha ˈtura ia ratou; no te mea mai te nǎnǎ mamoe tiai ore ra ratou; haapii atura oia ia ratou i te parau e rave rahi. 35 E tapetape aˈera te mahana, ua haere maira te mau pǐpǐ ia ˈna ra, na ô maira, E vahi moemoe teie, e ua poto roa hoi te mahana; 36 a tuu atu i te taata ia haere na i te mau fare e te mau oire rii fatata nei, e hoo i te maa na ratou; aore roa hoi a ratou maa ia amu. 37 Ua parau atura oia ia ratou, na ô atura, Na outou iho e hopoi atu i te maa na ratou. Ua na ô maira ratou ia ˈna, E haere anei matou e hoo i e piti hanere moni veo i te maa, ei faaamuraa ˈtu ia ratou? 38 Ua parau atura oia ia ratou, Ehia ˈˈe a outou pane? a haere, a hiˈo, e ite aˈera ratou, ua na ô maira, E pae, e na iˈa hoi e piti. 39 Ua faaue atura oia ia ratou, e faataoto pǔpǔ i te taata atoa i raro i nia i te aretu. 40 Ua taoto pǔpǔ ihora ratou i raro, taihoê hanere i e tahi pǔpǔ, taipae ahuru i e tahi. 41 Ua rave ihora Iesu i na pane e pae, e i na iˈa hoi e piti ra, ua hiˈo atura i nia i te raˈi, haamaitai atura i te Atua, vavahi ihora i na pane, tuu atura i ta ˈna mau pǐpǐ ra, ia tuuhia ˈtu i mua i te aro o taua feia rahi ra; e ua opere atoa ˈtura oia e na iˈa na ratou atoa. 42 Amu anaˈe ihora ratou e paia roa aˈera. 43 Ua haaputu ihora ratou i te toea maa ra e te iˈa, e î aˈera na ete rarahi hoê ahuru e piti tiahapa. 44 E te feia i amu i taua maa ra, e pae paha tausani i te taata. 45 Ua faaue atura oia i ta ˈna mau pǐpǐ e haere i nia i te pahi i reira ra, e fano na mua i te tahi paeau i Betesaida ra, a tuu ai oia i taua mau taata ra. 46 E ia tuuhia ˈtura ratou e ana, haere atura oia e pure i nia i te hoê mouˈa. 47 E rui ihora tei ropu atura te pahi i taua roto ra, e oia anaˈe ra tei uta. 48 Ua hiˈo atura oia ia ratou ua rohirohi roa i te hôeraa, te na mua maira hoi te mataˈi ia ratou; e tae aˈera i te maha o te araraa i te rui ra, haere atura oia ia ratou ra i na nia i te are, e ua faahua haere ê atura oia i te haere i na pihai iho ia ratou ra. 49 Ia hiˈo mai râ ratou ia ˈna i te haere noa-raa i na nia i te are ra, manaˈo aˈera e e varua, e ua auě ihora: 50 ua ite hoi ratou atoa ia ˈna e mǎtaˈu roa aˈera; ua parau atura râ oia ia ratou i reira ra, na ô atura, E faaitoito, o vau, eiaha e mǎtaˈu. 51 Haere atura oia i nia i te pahi ia ratou ra; pohe ihora taua mataˈi ra, rahi roa ˈtura to ratou umere e te maere aita e faito. 52 Aore hoi ratou i manaˈo i na pane ra, i te etaeta hoi o to ratou aau.

53 E tae atura ratou i te tahi paeau ra, tipae atura ratou i te fenua ra o Genesareta, haere atura ratou i uta. 54 E tei te taeraa ˈtu ratou i uta ra, ite maira te taata ia ˈna, 55 horo haere noa ˈtura e ati noa ˈˈe taua fenua ra, i te hopoi-haere-raa i te mau maˈi ma te roi atoa i te mau vahi atoa ta ratou i ite e tei reira oia. 56 E te mau oire rii atoa, e te mau oire, e te mau vahi fare ta ˈna i tomo ra, ua tuu ratou i te feia maˈi i te mau aroâ, ua parau maitai maira ia ˈna ia faatiaia iti noa ˈˈe ratou i tana hiti ahu ra; e o tei faatiaia maira, ua ora anaˈe ïa.