Timoteo 1
Te Episetole hoê ia Timoteo ra
TE FAAITE-FAAHOU-HIA NEI TIMOTEO I TE POROI I FAAITEHIA ˈTU IA ˈNA RA.
1 Paulo, e aposetolo na Iesu Mesia, i haapaohia e te Atua to tatou ora, e to tatou Fatu o Iesu Mesia, to tatou tiaturiraa; 2 ia Timoteo, tau tamaiti mau i te faaroo ra; ei ia oe te aroha mau, e te hamani maitai, e te hau no ǒ mai i te Atua i to tatou Metua ra, e no te Mesia ra no Iesu to tatou Fatu nei ra.
3 I poroi maite atura vau ia oe ia ˈu i haere i Makedonia ra, e parahi â oe i Ephesia ra, ia aˈo atu oe i te tahi pae eiaha ratou e haapii i te parau ěê. 4 E eiaha e haapao i te fabula, e te aufau fanauraa hopea ore e tupu ai te mârô ra, aore te itoito a te Atua i te faaroo nei: 5 e te hopea o taua poroi nei o te aroha ïa no roto i te aau viivii ore ra, e te aau maitai, e te faaroo haavare ore; 6 o tei ore i haapaohia e te tahi pae ra, e ua ohipa ê aˈenei i te parau maamaa ra; 7 i hinaaro e ei haapii ture ratou; aita râ i ite i ta ratou iho e parau ra, e te mau mea i mârôhia e ratou ra. 8 Ua ite râ tatou e, e mea maitai te ture, ia au ta te taata raveraa i taua ture ra. 9 Ua itea hoi e, aore e ture i haapaohia no te taata parau-tia, no te faahapa ture râ, e te aˈo atâ, e te paieti ore, e te rave hara, e te viivii, e te haapao ore, e te papai metua tane e te papai metua vahine, e te taparahi taata, 10 e te faaturi, e te aipai, e te eiâ taata, e te haavare, e te tǎpǔ haavare ra, te mau mea atoa aore i au i te parau ora nei, 11 i te evanelia hanahana o te Atua no ˈna te ao i tuu mai ia ˈu nei ra. 12 E te haamaitai nei au i to tatou nei Fatu i te Mesia ra ia Iesu, i tei faaetaeta mai ia ˈu nei, oia i parau ia ˈu i te haavare ore, e ua faatoroa orometua mai ia ˈu nei; 13 i tei faaino hoi i mutaa iho, e te hamani ino, e te hauti: i arohahia mai râ vau, no te mea i na reira maua noa vau no te faaroo ore. 14 I rahi roa râ te aroha o to tatou Fatu ma te faaroo e te hinaaro i te Mesia ra ia Iesu. 15 E parau mau teie, e te au hoi ia fariihia e te taata atoa, e i haere mai te Mesia ra o Iesu i te ao nei e faaora i te feia hara: e o vau hoi to ratou i hau. 16 Teie râ te mea i arohahia mai ai au, ia itea te faaoromai rahi roa o Iesu Mesia ia ˈu, i tei hau i te hara nei, ei hiˈo-tapao-raa na te feia e faaroo ia ˈna a muri atu, e noaa ˈtu te ora mure ore ra. 17 E teie nei, ei te Arii hau mure ore e te pohe ore, e te itea ore ia hiˈo ra, ei te Atua paari aitâ ˈtu, ei ia ˈna te tura, e te hanahana, e a muri noa ˈtu. Amene.
18 Te tuu atu nei au i teie nei poroi ia oe, e tau tamaiti, e Timoteo, e mai tei te mau parau i faaite-atea-hia mai ia oe i mutaa ihora, ia aro oe i te tamaˈi maitai i taua parau ra; 19 i te tamau-maite-raa i te faaroo, e te aau maitai, i tei haapaehia e vetahi pae, e ua haaparari pahi noa hoi i te faaroo: 20 no ratou Humenaio ra raua o Alesanedero; o tei tuuhia ïa e au ia Satani, ia ite raua e, eiaha e faaino.